1, 2. M’bale unango adzindikiranji thangwi ya iye, pontho acitanji?

ROBERT abatizwa pikhali iye m’phale, mbwenye undimomwene nee ukhali wakufunika kakamwe mu umaso wace. Iye alonga: “Ine cipo ndacita cinthu cakuipa, mbwenye nee ndikhacita pinthu mwaphinga. Ine ndikhaona kuti ndiri wakuwanga mwauzimu, ndikhagumanika pa misonkhano yonsene na kutumikira ninga mpainiya wakuphedza miyezi mingasi pacaka. Mbwenye ciripo cikhasoweka mu umaso wanga.”

² Robert nee adzindikira cikhasoweka mu umaso wace mpaka kumanga banja. Mwakusendzeka, iye na nkazace midzidzi inango akhacitana mibvundzo ya Bhibhlya. Nkazace akhadziwa mwadidi Bhibhlya na akhatawira mibvundzo mwakukhonda nentsa. Mbwenye kazinji kene Robert nee akhadziwa matawiro, pontho pyenepi pikhampasa manyadzo. Iye alonga: “Ndikhapibva ninga nee ndikhadziwa cinthu. Ndanyerezera kuti ‘Khala ndisafuna kukhala na maluso ninga a nkazanga, ndisafunika kucita cinthu.’” Natenepa iye acita. Iye alonga: “Ndatoma kupfundza Bhibhlya kazinji kene, natenepa ndakwanisa kuidziwa mwadidi.  Ndatoma kudziwa pinthu pizinji pinalonga Bhibhlya, cakufunika kakamwe, ndakulisa uxamwali wanga na Yahova.”

3. (a) Tisapfundzanji thangwi ya pidacitikira Robert? (b) Ndi mibvundzo ipi inafuna ife kudinga?

³ Tinakwanisa kupfundza pinthu pyakufunika kakamwe thangwi ya pidacitikira Robert. Panango ife tiri na cidziwiso cibodzi cene ca Bhibhlya, tisagumanika pa misonkhano na kuenda mu utumiki mwakukhonda phonya, mbwenye nee tiri na manyerezero auzimu. Panango tawangisira toera kukhala na manyerezero auzimu, mbwenye tingadingika, tinaona makhundu anango anafunika ife kusasanyira. (Afilipi 3:16) Mu nsolo uno, tinatawira mibvundzo mitatu yakufunika kakamwe: (1) Ninji cinafuna kutiphedza toera kudziwa khala tiri na manyerezero auzimu? (2) Tinakhala tani akuwanga mwauzimu? (3) Kukhala akuwanga mwauzimu kunatiphedza tani mu umaso wathu?

4. Uphungu unagumanika pa Aefesi 4:23, 24 usaphatisirwa kuna ani?

⁴ Mu ndzidzi udatoma ife kutumikira Mulungu, tikhacita macinjo mu umaso wathu. Macinjo anewa nee amala pidabatizwa ife. Bhibhlya isalonga: ‘Pitirizani kucinjwa mu mphambvu za manyerezero anu.’ (Aefesi 4:23, 24) Nakuti ndife akusowa ungwiro, tisafunika kupitiriza kucita macinjo. Ngakhale tisatumikira Yahova mu pyaka pizinji, tisafunika kupitiriza kuwangisa uxamwali wathu na iye.—Afilipi 3:12, 13.

5. Ndi mibvundzo ipi inafuna kutiphedza kudziwa khala tiri na manyerezero auzimu?

⁵ Khala ndife aphale peno akulu, tisafunika kudingika mwadidi. Tinakwanisa kubvundzika: ‘Pana cidzindikiro cinapangiza kuti manyerezero anga auzimu akuthimizirika? Ndikukhala ninga Kristu? Kodi makhaliro na macitiro anga asapangizanji pa misonkhano? Makani anacedza ine asapangiza kuti ndisafunanji makamaka mu umaso wanga? Ndandanda yanga ya pfundziro, mabvaliro na makhunganyikiro anga, pontho na njira inatambira ine uphungu isapangizanji thangwi ya ine? Kodi ndisacitanji ndingayeserwa toera kucita cinthu cakuipa? Kodi ndikukhala Nkristu wakukola?’ (Aefesi 4:13) Mibvundzo ineyi inatiphedza toera kudzindikira khala tikuthambaruka mwauzimu.

6. Ninji pontho cinafuna kutiphedza toera kudziwa khala tiri na manyerezero auzimu?

⁶ Midzidzi inango tisafunika kuphedzwa na anango toera kudzindikira khala tiri na manyerezero auzimu. Mpostolo Paulu afokotoza kuti munthu wakufuna pinthu pya dziko, nee asabvesesa kuti pinacita iye nee pisakomeresa Mulungu. Mbwenye munthu wa manyerezero auzimu asabvesesa pinthu pinafuna Mulungu. Iye asadziwa kuti Yahova nee asakomerwa na umaso wakufuna pinthu pya dziko. (1 Akorinto 2:14-16; 3:1-3) Nakuti akulu a mpingo ali na manyerezero a Kristu, kazinji kene asakhala akutoma kuona  pidzindikiro pya manyerezero akufuna pinthu pya dziko. Angatipasa uphungu, kodi tisautawira na kuuphatisira? Tingacita pyenepi, tinapangiza pakweca kuti tisafuna kuthambaruka mwauzimu.—Koelete 7:5, 9.

7. Tisadziwa tani kuti munthu wa manyerezero auzimu nee ndi ule basi ene ali na cidziwiso ca Bhibhlya?

⁷ Kukhala na cidziwiso ca Bhibhlya nee pyakwana toera tikhale na manyerezero auzimu. Mambo Salomoni akhadziwa kakamwe pya Yahova, pontho mafala anango audziwisi wa Salomoni alembwa m’Bhibhlya. Mbwenye mukupita kwa ndzidzi uxamwali wace na Yahova wafewa, pontho iye nee adzakhala wakukhulupirika. (1 Amambo 4:29, 30; 11:4-6) Mphapo, tisafunika kucitanji toera kuthimizira cidziwiso ca Bhibhlya? Tisafunika kupitiriza kuwangisa cikhulupiro cathu. (Akolose 2:6, 7) Tinacita tani pyenepi?

8, 9. (a) Ninji cinafuna kutiphedza toera kuwangisa cikhulupiro cathu? (b) Thangwi yanji tisafunika kupfundza na kunyerezera mwacidikhodikho? (Onani cithundzithundzi cakutoma.)

⁸ Mu ndzidzi wa apostolo, Paulu akulumiza Akristu toera akhale ‘akukola mwauzimu.’ (Ahebere 6:1) Tinaphatisira tani uphungu unoyu lero? Njira ibodzi toera kucita pyenepi ndi kupfundza bukhu ya Pitirizani Kufuna Mulungu. Pyenepi pinakuphedzani toera kubvesesa kuti munaphatisira tani midida ya Bhibhlya mu umaso wanu. Khala mwamala kupfundza bukhu ineyi, pana mabukhu anango akuti munakwanisa kuapfundza toera kukuphedzani kuwangisa cikhulupiro canu. (Akolose 1:23) Tisafunikambo kunyerezera mwacidikhodikho pinapfundza ife na kuphemba Yahova toera atiphedze kuona kuti tinapiphatisira tani.

⁹ Mu ndzidzi unapfundza ife na kunyerezera mwacidikhodikho, tisafunika kukulisa cifuno ca kubvera na kukomeresa Yahova. (Masalmo 40:8; 119:97) Tisafunikambo kucalira cinthu consene cinafuna kutipingiza kuthambaruka mwauzimu.—Tito 2:11, 12.

10. Aphale na atsikana asafunika kucitanji toera kukhala akuwanga mwauzimu?

¹⁰ Khala ndimwe m’phale peno ntsikana, muli na pifuno pyauzimu? M’bale m’bodzi anatumikira ku Bheteli kazinji kene asacedza na aphale na atsikana akubatizwa pa misonkhano  ya cisa mbaacita mibvundzo thangwi ya pifuno pyawo pyauzimu. Iye asakwanisa kuona azinji ananyerezera mwacidikhodikho kuti anatumikira tani Yahova. Anango asanyerezera kutumikira Yahova m’basa ya ndzidzi onsene peno kufuluka kuenda m’mbuto zinafunika amwazi mphangwa azinji. Mbwenye aphale na atsikana anango nee asadziwa kuti anatawira tani mbvundzo wa m’bale unoyu. Pyenepi pisabveka kuti iwo nee asafuna kukhala na pifuno pyauzimu? Khala ndimwe m’phale peno ntsikana, bvundzikani: ‘Ndisaenda kumisonkhano na kumwaza mphangwa basi ene thangwi yakukulumizwa na anyakubalanga? Peno ndi thangwi ya uxamwali wanga na Mulungu?’ Mwandimomwene, tonsene tisafunika kukhala na pifuno pyauzimu, mwakukhonda tsalakana khala ndife aphale na atsikana peno akulu. Pifuno pyenepi pinatiphedza toera kukhala akuwanga mwauzimu.—Koelete 12:1, 13.

11. (a) Tisafunika kucitanji toera kukhala na manyerezero auzimu? (b) Ndi citsandzo cipi ca m’Bhibhlya cakuti tinakwanisa kucitowezera?

¹¹ Tingaona makhundu anafunika ife kusasanyira, tisafunika kucita macinjo. Pyenepi ndi pyakufunika kakamwe thangwi pisaimirira umaso peno kufa. (Aroma 8:6-8) Yahova nee asadikhira kuti tikhale aungwiro, pontho asatipasa nzimu wace wakucena toera kutiphedza. Mbwenye tisafunika kuwangisira kucita khundu yathu. M’bale John Barr, akhatumikira ninga m’bodzi wa Mathubo Akutonga, afokotoza mafala anagumanika pa Luka 13:24 mbalonga: “Azinji asadodoma thangwi nee asawangisira toera  kuthambaruka mwauzimu.” Ife tisafunika kukhala ninga Yakobe, adathimbana na anju mpaka kupaswa nkhombo. (Genesi 32:26-28) Maseze pfundziro ya Bhibhlya inakwanisa kukhala yakutsandzayisa, nee tisafunika kuona Bhibhlya ninga cinthu cakusendzeka naco. Tisafunika kuwangisira toera kugumana undimomwene wakufunika wakuti unatiphedza.

12, 13. (a) Ninji cinafuna kutiphedza toera kuphatisira Aroma 15:5? (b) Citsandzo na uphungu wa Pedhru pisatiphedza tani? (c) Musafunika kucitanji toera kuthambaruka mwauzimu? (Onani bokosi “ Musafunika Kucitanji Toera Kuthambaruka Mwauzimu.”)

¹² Tingawangisira toera kuthambaruka mwauzimu, nzimu wakucena unatiphedza toera kucinja njira inanyerezera ife. Mwapang’ono-pang’ono tinapfundza kunyerezera ninga pikhacita Kristu. (Aroma 15:5) Nzimu wakucena unakwanisa kutiphedza toera kukunda pifuno pyakuipa na kukulisa makhaliro anakomeresa Mulungu. (Agalata 5:16, 22, 23) Tingadzindikira kuti tisanyerezera kakamwe pinthu pyakumanungo peno ubalangazi, nee tisafunika kubwerera nduli. Tisafunika kupitiriza kuphemba nzimu wakucena wa Yahova toera kutiphedza kunyerezera pinthu pyakulungama. (Luka 11:13) Kumbukani mpostolo Pedhru. Midzidzi inango iye nee akhanyerezera ninga Kristu. (Mateo 16:22, 23; Luka 22:34, 54-62; Agalata 2:11-14) Mbwenye iye nee abwerera nduli, pontho Yahova amphedza. Mwapang’ono-pang’ono, Pedhru apfundza kunyerezera ninga Kristu. Ife tinakwanisambo kucita pibodzi pyene.

¹³ Mukupita kwa ndzidzi Pedhru alonga makhaliro anafuna kutiphedza. (Lerini 2 Pedro 1:5-8.) Tisafunika kuwangisira toera kukulisa n’khaliro wakudzitonga, kupirira, kufuna abale athu na makhaliro anango adidi. Ntsiku zonsene tisafunika kubvundzika: ‘Ndi n’khaliro upi unafunika ine kukulisa lero wakuti unandiphedza toera kukhala wakuwanga mwauzimu?’

14. Kukhala na manyerezero auzimu kunatiphedza tani?

¹⁴ Tinganyerezera ninga Kristu, pinatiphedza kupangiza makhaliro adidi kubasa peno kuxikola, kunatiphedzambo kuphatisira mafala adidi na kucita pisankhulo pyandzeru ntsiku zonsene. Pisankhulo pyathu pinapangiza kuti ife tisayesera kutowezera Kristu. Nakuti tiri na manyerezero auzimu, nee tisafunika kutawirisa cinthu consene kuphekesa uxamwali wathu na Yahova. Tingayeserwa kucita cinthu cakuipa, makhaliro athu auzimu anatiphedza toera kukhonda mayesero. Mbatidzati kucita cisankhulo, tinatoma kubvundzika: ‘Ndi midida ipi ya Bhibhlya inafuna kundiphedza? Kodi Kristu mbadacitanji m’makhaliro ninga anewa? Ninji pinafuna kukomeresa Yahova?’ Tisafunika kunyerezera mibvundzo ineyi ndzidzi onsene. Natenepa, tendeni tidinge makhaliro mangasi na kuona kuti midida ya Bhibhlya inatiphedza tani toera kucita pisankhulo pyandzeru.

15, 16. Kunyerezera ninga Kristu kunatiphedza tani (a) pakusankhula munthu wakumanga naye banja? (b) pakusankhula axamwali?

¹⁵ Kusankhula munthu wakumanga naye banja. N’dida wa m’Bhibhlya usagumanika pa 2 Akorinto 6:14, 15, Tradução do Novo Mundo. (Lerini.) Paulu apangiza pakweca kuti anthu a manyerezero auzimu nee asaona pinthu peno kucita ninga anthu a manyerezero aunyama. N’dida unoyu unakuphedzani tani toera kusankhula munthu wakumanga naye banja?

 ¹⁶ Kusankhula axamwali. N’dida wa m’Bhibhlya usagumanika pa 1 Akorinto 15:33, NM. (Lerini.) Munthu wa manyerezero auzimu nkhabe kucita uxamwali na anthu akuti anafewesa cikhulupiro cace. Nyerezerani kuti munaphatisira tani n’dida unoyu m’makhaliro akusiyana-siyana. Mwacitsandzo, n’dida unoyu unakuphedzani tani toera kucita pisankhulo pakuphatisira interneti?

17-19. Kukhala munthu wa manyerezero auzimu kunakuphedzani tani (a) toera kucalira mabasa akuphekesa mwauzimu? (b) toera kukhala na pifuno pyadidi? (c) toera kukhazikisa ntendere?

¹⁷ Mabasa akuti anafewesa makhaliro athu auzimu. Tisagumana cenjezo yakufunika kakamwe pa Ahebere 6:1. (Lerini.) Ndi api ‘mabasa akufa’ akuti tisafunika kuacalira? Ndi mabasa akuti nee anatiphedza toera kukhala akuwanga mwauzimu. Cenjezo ineyi inatiphedza toera kutawira mibvundzo ninga iyi: ‘Kodi basa ineyi ndi yakuphindulisa peno ndi yakuphekesa? Ndisafunika kucita khundu m’mabasa anewa? Thangwi yanji nee ndisafunika kucita khundu ya nsoka unayesera kucinja makhaliro a dziko?’

¹⁸ Pifuno pyauzimu. Mu Nkhani ya Paphiri, Yezu apereka uphungu wakufunika kakamwe kwa ife thangwi ya pifuno. (Mateo 6:33) Munthu wa manyerezero auzimu asaikha Umambo pa mbuto yakutoma mu umaso wace. N’dida unoyu unatiphedza toera kutawira mibvundzo ninga iyi: ‘Kodi ndisafunika kuenda ku universidade ndingamalisa kupfundza? Kodi ndisafunika kutawira basa yonsene?’

¹⁹ Kukhonda bverana. Uphungu wa Paulu kwa Akristu a ku Roma unakwanisa kutiphedza tingakhonda bverana na andzathu. (Aroma 12:18) Ife tisatowezera Kristu, natenepa tisayesera kukhala ‘mwantendere na anthu onsene.’ Tisafunika kucitanji tingakhonda kubverana na andzathu? Pisanentsa kwa ife kutawira maonero a anango? Peno tisadziwika ninga munthu anakhazikisa ntendere?—Tyago 3:18.

20. Thangwi yanji imwe musafuna kuthambaruka mwauzimu?

²⁰ Pitsandzo pyenepi pisapangiza kuti midida ya Bhibhlya inatiphedza tani toera kucita pisankhulo pinapangiza kuti tisatsogolerwa na nzimu wa Mulungu. Tingakhala na manyerezero auzimu, tinakhala na umaso wakutsandzayisa na wakuphindulisa. Robert adalongwa pa ndima yakutoma alonga: “Pidamala ine kukulisa uxamwali wanga na Yahova, ine ndikhali mamuna wadidi na baba wadidi. Ine ndikhali wakutsandzaya kakamwe.” Tingacita pyonsene pinakwanisa ife toera kuthambaruka mwauzimu, tinatsandzaya na nkhombo zizinji. Tinakhala na umaso wakutsandzaya cincino na ‘umaso wandimomwene’ ntsogolo.—1 Timoti 6:19.