MU NDZIDZI wakale kobiri yakusemba nayo ikhaperekwa kuna anyakubala a nkazi mu ndzidzi wa masasanyiro akumanga banja. Kobiri ineyi toera kusemba nayo ikhaphataniza pinthu pya ntengo ukulu, pinyama peno kobiri ene. Midzidzi inango mamuna akhaphatira basa anyakubala a nkazi, m’mbuto mwakupereka kobiri, ninga pidacita Yakobe wakuti aphatira basa pai wace Rakeli mu pyaka pinomwe toera kusemba mwanace. (Gen. 29:17, 18, 20) Thangwi yanji iwo akhapereka kobiri ineyi yakusemba nayo?

Nyakupfundza pya Bhibhlya anacemerwa Carol Meyers alonga: “Kupereka kobiri yakusemba nayo kukhali kupereka takhuta kuna anyakubala a nkazi thangwi yakuluza mwanawo wakuti akhaaphedza kakamwe m’basa yakulima.” Pontho kupereka kobiri ineyi kukhaphedza toera anyakubala a mamuna na anyakubala a nkazi akhale akuphatana. Mabanja anewa mbadakwanisa kuphedzana m’midzidzi yakunentsa. Kusiyapo pyenepi, kupereka kobiri yakusemba nayo kukhapangiza kuti nkazi ali kukhunganyika toera kumanga banja, pontho mbadasiya kutsalakanwa na kutsidzikizwa na pai wace mbatoma kutsalakanwa na mamunace.

Kupereka kobiri yakusemba nayo nee kukhabveka kuti nkazi akhali ninga cinthu cakuti mbicidaguliswa peno kugulwa. Bukhu inango inalonga pya umaso wa Aizraeli mu ndzidzi wakale (Ancient Israel—Its Life and Institutions) yalonga: “Masasanyiro anewa akupereka kobiri yakusemba nayo peno kupereka cinthu cinango kuna anyakubala a nkazi kukhacitisa kumanga banja kwa Aizraeli kuoneke ninga kukhali kugula. Mbwenye kupereka kobiri yakusemba nayo kukhali kupereka takhuta kuna anyakubala a nkazi, tayu kun’gula.”

M’madziko anango, anthu asapitiriza kupereka kobiri yakusemba nayo. Anyakubala Acikristu angaphemba kobiri yakusemba nayo asafunika kupangiza kuna anthu ‘onsene kuti iwo ali na maonero adidi’ mbakhonda kuphemba pizinji. (Afil. 4:5; 1 Akor. 10:32, 33) Munjira ineyi, iwo asapangiza kuti nee ‘asafuna kakamwe kobiri’ peno pinthu pizinji. (2 Tim. 3:2) Kusiyapo pyenepi, anyakubala angakhonda kuphemba kobiri izinji yakusemba nayo, mamuna anafuna kumanga banja na mwanawo nee anakakamizika toera kucinja ntsiku yakumanga banja mpaka kukhala na kobiri toera kusemba. Peno nee anafunika kusiya kutumikira ninga mpainiya toera aphate basa ndzidzi onsene kuti akwanise kobiri toera kusemba nayo.

M’madziko anango, mautongi asakhazikisa ntengo wa kobiri yakusemba nayo. M’madziko anewa, anyakubala Acikristu asafunika kubvera pyenepi. Thangwi yanji? Thangwi Bhibhlya isalonga kuti Akristu asafunika “kubvera mautongi” na kubvera mitemo yakuti nee isaphonyana na mitemo ya Mulungu.—Aroma 13:1; Mabasa 5:29.