Bhibhlya isapangiza kuti Yahova asakwanisa kulonga mwanyapantsi pinthu pinafuna kucitika ntsogolo. (Iza. 45:21) Mbwenye iyo nee isafokotoza pyonsene thangwi ya njira inacita Yahova pyenepi, ndzidzi unacita iye pyenepi na pinthu pinasankhula iye kudziwa. Natenepa, nee ndi pyakukwanisika kudziwa pyonsene thangwi ya luso ya Yahova yakudziwa pya ntsogolo. Mbwenye thangwi ya pinthu pinango, ife tinakwanisa kukhala na cinyindiro.

Yahova anakwanisa kucita pyonsene pinafuna iye, mbwenye midzidzi inango asasankhula kukhonda kucita pinthu pinango. Thangwi yakukhala kwace waudziwisi kakamwe, Yahova anakwanisa kuona mwanyapantsi pinthu pyonsene pinafuna iye. (Aroma 11:33) Mbwenye Yahova anakwanisa kusankhula kukhonda kudziwa pinthu pinafuna kucitika, thangwi iye asakwanisa kudzitonga.—Iza. 42:14.

Yahova asatipasa cinyindiro cakuti pinthu pinafuna iye ndzidzi onsene pinacitika. Kodi pyenepi pisabverana tani na luso yace yakuona mwanyapantsi pinthu pinafuna kucitika ntsogolo? Lemba ya Izaiya 46:10 isafokotoza: “Pinthu mbapidzati kucitika, ine ndisalonga mwanyapantsi kuti pinacitika tani, pontho kutomera kale kakamwe, ndisalonga pinthu pyakuti pidzati kucitika. Ine ndisalonga: ‘Mwakukhonda penula, pinthu pidapikira ine pinadzacitika, pontho ndinadzacita pyonsene pinafuna ine.’

Thangwi ibodzi inapangiza kuti Yahova anakwanisa kulonga mwanyapantsi pinthu pya ntsogolo ndi yakuti iye ali na mphambvu yakucitisa kuti pinthu picitike. Iye nee asadzudzumika toera kuona pinthu pinafuna kucitika ntsogolo ninga kuti pinthu pyenepi pyamala kale kucitika, ninga tsamba yakumalisa ya bukhu yakuti munthu asaileri toera kudziwa kuti pinthu pyamala tani. Mbwenye Yahova anakwanisa kusankhula kuti cinthu cicitike pa ndzidzi unafuna iye. Pontho iye asacita pyonsene toera pinthu pinafuna iye picitike pa ndzidzi wakuthema.—Eks. 9:5, 6; Mat. 24:36; Mabasa 17:31.

Ndi thangwi yace Bhibhlya isaphatisira mafala akuti “ndakhunganya,” ‘ndapicita’ na “ndakhazikisa” toera kufokotoza pinthu pinafuna kucitika ntsogolo. (2 Ama. 19:25; Iza. 46:11) Mafala anewa athumburuzwa mu Cihebheri akuti asabverana na fala inango inabveka “nyakuumba.” (Yer. 18:4) Ninga nyakuumba wa luso anakwanisa kuphatisira dongo toera kucita combo cakubalika, Yahova anakwanisa kucinja pinthu toera pinafuna iye picitike.—Aef. 1:11.

Yahova apasa anthu onsene ufulu wakusankhula, pontho iye asalemedza pyenepi. Iye nee asatonga kuti pinthu pinacitika tani kuna m’bodzi na m’bodzi. Pontho nee asacitisa kuti anthu adidi acite pinthu pyakuti pinaabweresera nyatwa, mbapiacitisa kuti afudzwe. Iye asatawirisa kuti m’bodzi na m’bodzi asankhule pinafuna iye kucita mu umaso wace, pontho asaphedza anthu toera acite pinthu pyadidi.

Onani pidacitikira anthu a ku Ninive. Yahova alonga mwanyapantsi kuti nzinda unoyu mbudafudzwa thangwi ya uipi ukhacitika mwenemo. Mbwenye pidatcunyuka anthu a mu nzinda unoyu, Yahova “acinja manyerezero ace thangwi ya nyatwa ikhafuna iye kuabweresera, pontho iye nee aibweresa.” (Yona 3:1-10) Yahova acinja manyerezero ace, thangwi anthu a ku Ninive aphatisira mwadidi ufulu wawo wakusankhula, mbacita pinthu mwakubverana na mphangwa zikhamwaza Yona. Iwo atcunyuka, pontho nee afudzwa.

Citsandzo cinango ndi ca profesiya inalonga pya ntongi anacemerwa Siro, wakuti mbadaombola Ayuda ku ubitcu, pontho mbadakhazikisa ntemo toera templo ya Yahova imangwe. (Iza. 44:26–45:4) Mambo Siro wa ku Persya akwanirisa profesiya ineyi. (Esd. 1:1-4) Yahova aphatisira Siro toera kukwanirisa maprofesiya ace mwakukhonda kunkakamiza toera kumulambira. Siro akhali na ufulu wakusankhula munthu akhafuna iye kulambira.—Mis. 21:1.

Pyenepi basi ene ndi pingasi mwa pinthu pinalonga thangwi ya luso ya Yahova yakudziwa pya ntsogolo. Mwandimomwene, nkhabepo munthu anakwanisa kubvesesa mwadidi manyerezero a Yahova peno pinacita iye. (Iza. 55:8, 9) Pyonsene pidatipangiza Yahova pisawangisa cikhulupiro cathu cakuti ndzidzi onsene pinthu pinacita iye ndi pyadidi, kuphatanizambo pinthu pinalonga iye mwanyapantsi thangwi ya ntsogolo.