1. Thangwi yani tisafuna Yahova ninga ntsogoleri wathu? Perekani citsandzo.

 NYEREZERANI kuti mwatayika mu nsitu. Nsitu unoyu ndi wakugopswa kakamwe thangwi muli na pinyama pyakugopswa, pinyama ping’ono pyakuti pisathapulisa anthu utenda, miti ya venenu, madjendje na miyala. Imwe munakhala wakukhurudzika mungakhala na ntsogoleri wakuti asadziwa mbuto zakugopswa mu nsitu unoyu, pontho asadziwa kuti anakutsidzikizani tani. Dziko lero yakhala ninga mbuto ineyi. Iyo yadzala na pinthu pyakugopswa pyakuti pisaikha pa ngozwi uxamwali wathu na Yahova. Mbwenye ife tiri na ntsogoleri waungwiro, Yahova. Iye asaticitisa kukhala wakutsidzikizika na kutiphedza mpaka kutambira umaso wakukhonda mala mu dziko ipswa.

2. Yahova asatitsogolera tani?

² Yahova asatitsogolera tani? Iye asaphatisira makamaka Mafalace, Bhibhlya. Mbwenye iye asaphatisirambo anthu toera kutitsogolera. Mwacitsandzo, iye asaphatisira “m’bandazi wakukhulupirika na wandzeru” toera kutipasa cakudya cauzimu na kutiphedza kucita pisankhulo pyadidi. (Mat. 24:45) Yahova asaphatisirambo amuna anango ninga ayang’aniri a cisa na akulu a mpingo. Iwo asatiwangisa na kutipasa pitsogolero toera tikwanise kupirira nyatwa. Tisapereka takhuta kakamwe kuna Yahova thangwi yakutitsogolera mwadidi m’midzidzi yakunentsa inakhala ife kumala mbakudzati kufika. Pitsogolero pyenepi pisatiphedza toera tipitirize kukhala axamwali a Yahova na kufamba munjira ya umaso wakukhonda kumala.

3. Tinapfundzanji mu nsolo uno?

³ Maseze tisadziwa pyenepi, midzidzi inango pisakhala pyakunentsa kubvera pitsogolero pya Yahova, makamaka khala pitsogolero pyenepi pyaperekwa na anthu akusowa ungwiro. Thangwi yanji? Panango thangwi ndi uphungu wakuti nee takomerwa nawo. Peno panango tinanyerezera kuti pitsogolero pyenepi nee pisabveka mwadidi, pontho nee pyabuluka kuna Yahova. Midzidzi  ineyi tisafunika kunyindira kuti Yahova ndiye anatsogolera atumiki ace, pontho kubvera pitsogolero pyace ndzidzi onsene kusatiphedza. Toera kutiphedza kunyindira kakamwe pitsogolero pya Yahova, mu nsolo uno tinapfundza kuti: (1) Yahova atsogolera tani atumiki ace nduli, (2) asatsogolera tani atumiki ace lero, pontho (3) thangwi yanji ndi pyakufunika kunyindira pitsogolero pya Yahova?

YAHOVA ATSOGOLERA TANI AIZRAELI?

4-5. Yahova apangiza tani kuti akhaphatisira Mose toera kutsogolera Aizraeli? (Onani foto iri pa tsamba yakutoma.)

⁴ Yahova asankhula Mose toera atsogolere Aizraeli kuti abuluke mu Ejitu. Yahova apangiza Aizraeli kuti iye akhaphatisira Mose toera kuatsogolera. Mwacitsandzo, Yahova aphatisira khole na masikati na khole ya moto namasiku. (Eks. 13:21) Mose akhatowera khole ineyi mbatsogolera Aizraeli mpaka ku bara yakufira. Aizraeli agopa pidaona iwo kuti kutsogolo kwawo kukhali na bara, pontho nduli mwawo mukhali na anyankhondo Aejitu. Iwo atoma kunyerezera kuti Mose nee akhafunika kuatsogolera mpaka ku Bara Yakufira. Mbwenye nee ndi Mose adaatsogolera mpaka kufika ku Bara Yakufira, ndi Yahova adaphatisira Mose toera kucita pyenepi. (Eks. 14:2) Pontho pyenepi pyapasa mwai Yahova toera kupangiza mphambvu zace munjira yakudzumatirisa.—Eks. 14:26-28.

⁵ Mu pyaka 40, Mose anyindira pitsogolero pya Yahova toera kutsogolera Aizraeli n’thando. a Mu ndzidzi ungasi, Yahova acitisa kuti khole ilimire padzulu pa nsasa wa Mose toera Aizraeli onsene aione. (Eks. 33:7, 9, 10) Yahova akhalonga na Mose kubulukira mu khole ineyi, pontho Mose akhapereka pitsogolero kuna Aizraeli. (Mas. 99:7) Natenepa Aizraeli mbadakwanisa kuona kuti Mose akhaphatisirwa na Yahova toera kuatsogolera.

6. Aizraeli akhaona tani pitsogolero pikhapaswa iwo na Yahova? (Numero 14:2, 10, 11)

⁶ Mwakutsukwalisa, Aizraeli azinji akhapwaza pinthu pikhapangiza kuti Yahova akhalonga na iwo mukuphatisira Mose. (Lerini Numero 14:2, 10, 11.) Mwakubwereza-bwereza, iwo nee akhatawira kuti Yahova akhaphatisira Mose. Na thangwi ineyi, Yahova nee atawirisa kuti Aizraeli anango apite mu Dziko Yakupikirwa.—Num. 14:30.

7. Aizraeli anango apangiza tani kuti akhanyindira njira ikhatsogolera Yahova? (Numero 14:24) (Onanimbo foto.)

⁷ Mbwenye Aizraeli anango abvera pitsogolero pya Yahova. Mwacitsandzo, Yahova alonga: ‘Kalebe apitiriza kundibvera na ntima onsene.’ (Lerini Numero 14:24.) Yahova apasa nkhombo Kalebe, pontho ampasa mbuto idasankhula iye mu dziko yakupikirwa. (Yos. 14:12-14) Aizraeli adabalwa mukupita kwa ndzidzi apitirizambo kubvera pitsogolero pya Yahova. Pidafa Mose, Yoswa mbakhala ntsogoleri wa Izraeli, iwo “akhamulemedza kakamwe mu umaso wace onsene.” (Yos. 4:14) Na thangwi ineyi, Yahova apasa nkhombo Aizraeli mbaatsogolera mpaka mu dziko idapikira iye.—Yos. 21:43, 44.

8. Yahova atsogolera tani atumiki ace mu ndzidzi wa amambo? (Onanimbo foto.)

⁸ Pakupita pyaka pingasi, Yahova asankhula atongi toera kutsogolera atumiki ace. Buluka penepo, mu ndzidzi wa amambo Yahova asankhula aprofeta toera kutsogolera atumiki ace. Amambo akukhulupirika kuna Yahova mbadakwanisa kuphemba uphungu kuna aprofeta anewa. Mwacitsandzo, Mambo Dhavidhi atawira mwakucepeseka kusandikwa na mprofeta Natani. (2 Sam. 12:7, 13; 1 Kro. 17:3, 4) Mambo Yosafati abvera mprofeta Yazieli toera kudziwa pikhafuna iye kucita na atumiki a Mulungu, pontho toera kuaphedza kuti ‘akhulupire  aprofeta a Mulungu.’ (2 Kro. 20:14, 15, 20) Mambo Ezekiya asaka ciphedzo ca mprofeta Izaiya mu ndzidzi ukhali iye n’nyatwa. (Iza. 37:1-6) Ndzidzi onsene ukhabvera amambo pitsogolero pya Yahova, iwo akhapaswa nkhombo, pontho mbumba ikhali yakutsidzikizika. (2 Kro. 20:29, 30; 32:22) Pikhaoneka pakweca kuti Yahova akhaphatisira aprofeta toera kutsogolera atumiki ace. Ngakhale tenepo, amambo azinji kuphatanizambo mbumba akhonda kubvera aprofeta a Yahova.—Yer. 35:12-15.

YAHOVA ATSOGOLERA TANI AKRISTU A MU NDZIDZI WA APOSTOLO?

9. Yahova aphatisira ani toera kutsogolera Akristu a mu ndzidzi wa apostolo? (Onanimbo foto.)

⁹ Yahova akhazikisa mpingo Wacikristu mu Pentekoste 33. Mphapo iye atsogolera tani Akristu a mu ndzidzi unoyu? Yahova akhazikisa Yezu ninga nsolo wa mpingo. (Aef. 5:23) Mbwenye Yezu nee akhapanga ekhene m’bodzi na m’bodzi wa anthu anewa pikhafunika iwo kucita. Iye aphatisira apostolo na akulu a mpingo mu Yerusalemu toera kutsogolera Akristu a mu ndzidzi unoyu. (Mabasa 15:1, 2) Kusiyapo pyenepi, Akulu a mpingo akhazikiswambo toera kutsogolera mipingo.—1 Ates. 5:12; Tito 1:5.

10. (a) Akristu a mu ndzidzi wa apostolo akhaona tani pitsogolero pikhatambira iwo? (Mabasa 15:30, 31) (b) Thangwi yanji mukupita kwa ndzidzi anango asiya kunyindira anthu akhaphatisira Yahova toera kuatsogolera? (Onani bokosi ya nsolo wakuti  “Thangwi Yanji Anango Nee Asatawira Kuti Yahova Asaphatisira Anthu Toera Kutsogolera Atumiki Ace?”)

¹⁰ Kodi Akristu a mu ndzidzi wa apostolo akhanyindira njira ikhaatsogolera Yahova? Inde. Azinji a iwo akhabvera mwakutsandzaya pitsogolero pikhatambira iwo. Pontho akhatsandzaya na ‘mafala akuwangisa’ akhatambira iwo. (Lerini Mabasa 15:30, 31.) Mphapo lero, Yahova asatsogolera tani atumiki ace?

YAHOVA ASATITSOGOLERA TANI LERO?

11. Perekani citsandzo cinapangiza kuti Yahova ali kutsogolera tani atumiki ace lero.

¹¹ Yahova asapitiriza kutsogolera atumiki ace lero. Iye asacita pyenepi mukuphatisira Mafalace, Bhibhlya na Mwanace Yezu Kristu wakuti ndi nsolo wa mpingo. Pali na pinthu pinapangiza kuti Yahova asapitiriza kuphatisira anthu toera kutsogolera atumiki ace? Inde. Onani pidacitika kutomera mu caka 1870. Charles Taze Russell na axamwali ace akuti akhapfundzambo Bhibhlya, atoma kubvesesa kuti caka ca 1914 mbacidakhala cakufunika kakamwe thangwi  yakukhazikiswa kwa Umambo wa Mulungu. (Dhan. 4:25, 26) Toera kudziwa pyenepi, iwo apfundza kakamwe maprofesiya a Bhibhlya. Kodi Yahova akhaatsogolera mu ndzidzi ukhafufudza iwo? Inde. Pinthu pidacitika pa dziko yonsene mu caka ca 1914 pyapangiza kuti mwandimomwene Umambo wa Mulungu ukhadakhazikiswa. Thangwi mu caka ceneci, Nkhondo Yakutoma ya Dziko Yonsene yatoma, pontho kubulukira mu caka ceneci, mautenda, piteketeke na njala pyathimizirika kakamwe. (Luka 21:10, 11) Mwandimomwene, Yahova aphatisira amuna anewa akukhulupirika toera kuphedza atumiki ace.

12-13. Ninji pidacitwa mu ndzidzi wa Nkhondo Yaciwiri ya Dziko Yonsene Yapantsi toera kuthimizira basa yakumwaza mphangwa?

¹² Nyerezeranimbo pinthu pidacitika mu ndzidzi wa Nkhondo Yaciwiri ya Dziko Yonsene Yapantsi. Pakumala kupfundza lemba ya Apokalipse 17:8, abale ku Ofesi ikulu ya Mboni za Yahova abvesesa kuti nkhondo ineyi nee mbidatsogolera mpaka pa nkhondo ya Armajedhoni, mbwenye mbapadaoneka ndzidzi wa ntendere pang’ono wakuti mbudapasa mwai toera basa yakumwaza mphangwa ithimizirike. Natenepa iwo acita cisankhulo cikhaoneka ninga nee mbicidaphedza. Iwo akhazikisa Xikola ya Jiliyadhi ya Torre de Vigia toera kupfundzisa amisionaryo kuti amwaze mphangwa na kupfundzisa m’mbuto zizinji pa dziko yonsene yapantsi. Amisionaryo azinji atumizwa ngakhale mu ndzidzi unoyu wa nkhondo. Kusiyapo pyenepi, m’bandazi wakukhulupirika akhazikisambo Kursu ya Utumiki wa Mulungu b toera kupfundzisa onsene m’mipingo kuti akhale amwazi mphangwa na apfundzisi adidi. Munjira ineyi, atumiki a Mulungu akhakhunganywa toera kucita basa ikulu kakamwe.

¹³ Tinganyerezera pidacitika nduli tisakwanisa kuona kuti Yahova akhatsogolera atumiki ace mu ndzidzi unoyu wakunentsa. Pontho kutomera mu ndzidzi wa Nkhondo Yaciwiri ya Dziko Yonsene Yapantsi, atumiki a Yahova a m’madziko mazinji asakwanisa kumwaza mphangwa mwaufulu. Mwandimomwene, basa yakumwaza mphangwa pa dziko yonsene ikuthimizirika.

14. Thangwi yanji tinakwanisa kunyindira pitsogolero pinapereka gulu ya Yahova? (Apokalipse 2:1) (Onanimbo foto.)

 ¹⁴ Lero, Mathubo Akutonga asapitiriza kutowezera pitsogolero pya Yezu. Iwo asacita pyenepi mukukhala na cinyindiro cakuti pisankhulo pyonsene pinacita iwo pisabverana na pinafuna Yezu. Kusiyapo pyenepi, ayang’aniri a cisa na akulu a mpingo asaphatisirwa toera kupereka pitsogolero m’mipingo. c Akulu a mpingo akudzodzwa ali ‘n’djanja yamadyo’ ya Yezu. (Lerini Apokalipse 2:1.) Ndimomwene kuti akulu a mpingo ndi akusowa ungwiro, pontho asacita madodo. Mose, Yoswa na apostolo akhacitambo madodo midzidzi inango. (Num. 20:12; Yos. 9:14, 15; Aroma 3:23) Ngakhale tenepo, ife tisakwanisa kuona kuti Yezu akupitiriza kutsogolera m’bandazi wakukhulupirika na akulu a mpingo. Iye anapitiriza kuphatisira amuna anewa “ntsiku zonsene mpaka kumala kwa makhaliro a dziko.” (Mat. 28:20) Natenepa tonsene tiri na mathangwi toera kunyindira pitsogolero pinapereka Yezu mukuphatisira amuna anewa akukhulupirika.

THANGWI YANJI NDI PYAKUFUNIKA KUNYINDIRA ALE ANAPHATISIRA YAHOVA TOERA KUTSOGOLERA ATUMIKI ACE?

15-16. Mwapfundzanji na pitsandzo pya anthu adabvera uphungu wa Yahova?

¹⁵ Tingabvera pitsogolero pya Yahova tisakwanisa kuona kuti mwandimomwene pisatiphedza. Mwacitsandzo, Andy na nkazace Robyn abvera uphungu wa m’bandazi wakukhulupirika na wandzeru thangwi yakukhonda kukhala na umaso wakufuna pizinji. (Onani nota de estudo pa Mateu 6:22.) Thangwi yakucita pyenepi, iwo akhala na mwai wakuphedzera mabasa akumanga mu gulu ya Yahova. Robyn alonga: “Midzidzi inango tikhakhala m’mbuto zakucepa kakamwe, pontho nee tikhali na kuzinya. Kusiyapo pyenepi, ndikhafunikambo gulisa pinthu pizinji pikhaphatisira ine toera kubulusa mafoto. Ine ndalira pidagulisa ine makamera anga. Mbwenye ninga Sara, ndikhali dzololo toera ndikhonde kunyerezera pinthu pidasiya ife.” (Aheb. 11:15) Mphapo Andy na nkazace asaona tani pinthu pidacita iwo? Robyn alonga: “Ife tiri akutsandzaya kakamwe thangwi tisadziwa kuti tiri kupasa Yahova pyonsene piri na ife. Tingaphata basa toera kuphedzera gulu ya Yahova, ife tisakwanisa kuona kuti umaso unadzakhala tani mu dziko ipswa.” Andy alongambo: “Ife tiri akutsandzaya thangwi tiri kuphatisira ndzidzi wathu onsene na mphambvu zathu m’basa ya Yahova.”

¹⁶ Onani citsandzo cinango cinapangiza kufunika kwa kubvera pitsogolero pya Yahova. Marcia pidamalisa iye kupfundza, akhafuna kubvera uphungu udatambira iye toera kutumikira ninga mpainiya. (Mat. 6:33; Aroma 12:11) Iye  alonga: “Ine ndapaswa mwai wakupfundza pyaka pinai ku universidhadhe mwakukhonda lipa. Mbwenye ine ndikhafuna kucita pizinji m’basa ya Yahova, natenepa ndasankhula kucita kursu ya ndzidzi wakucepa mbandipfundza basa yakuti mbidandiphedza ndingatumikira ninga mpainiya. Ceneci cikhali cisankhulo cadidi kakamwe cidacita ine mu umaso wanga. Cincino ndine mpainiya, pontho ndzidzi unaphata ine basa usandiphedza toera ndiphedzere pa Bheteli na kucita pinthu pinango pyakufunika kakamwe m’basa ya Yahova.”

17. Ndi pinthu pipi pinango pyadidi pinafuna kucitika tingabvera uphungu wa Yahova? (Izaiya 48:17, 18)

¹⁷ Midzidzi inango tisatambira uphungu mu gulu ya Yahova wakuti usatitsidzikiza. Mwacitsandzo, ife tisakumbuswa thangwi ya ngozwi yakufuna kukhala na pinthu pizinji na kucita pinthu pyakuti pinaticitisa kukhonda kubvera mitemo ya Mulungu. Tingabvera uphungu unoyu, tisakwanisa kuona kuti ndi pyadidi kubvera pitsogolero pya Yahova. Ife tisakhala na cikumbuntima cakucena mbaticalira nyatwa zizinji. (1 Tim. 6:9, 10) Tingacita pyenepi, tinakwanisa kutumikira Yahova na ntimathu onsene. Nkhabe cinthu cinango mu dziko cakuti cinaticitisa kukhala akutsandzaya na akukhurudzika kusiyapo kutumikira Yahova.—Lerini Izaiya 48:17, 18.

18. Thangwi yanji muli dzololo toera kupitiriza kubvera pitsogolero pya Yahova?

¹⁸ Mwakukhonda penula, Yahova anapitiriza kuphatisira anthu toera kutipasa pitsogolero mu ndzidzi wa nyatwa ikulu na mu ndzidzi wa Utongi wa Pyaka Cikwi. (Mas. 45:16) Kodi ife tinabvera pitsogolero pyenepi maseze tisafuna kucita pinthu pinango? Pinakhala pyakukhonda nentsa kubvera pitsogolero pya Yahova khala cincino tisabvera pitsogolero pyace. Natenepa ndzidzi onsene tisafunika kubvera pitsogolero pya Yahova. Pyenepi pisaphataniza uphungu unatipasa iye mukuphatisira anthu adasankhula iye toera kutitsogolera. (Iza. 32:1, 2; Aheb. 13:17) Tingabvera Ntsogoleri wathu waungwiro, Yahova, tinakwanisa kukhala na cinyindiro cakuti iye anatitsidzikiza ku ngozwi, pontho tinapitiriza kukhala axamwali ace mu umaso wathu onsene mu dziko ipswa.