KODI imwe mwaona kale kuti anthu azinji lero asanyerezera kuti asafunika kutsalakanwa mwakupambulika peno kuti asafunika kukhala na miyai yakuti anango nee ali nayo? Maseze atsalakanwe mwakupambulika, iwo asanyerezera kuti pyenepi nee pyakwana. Anthu anacita pyenepi asanyerezera basi ene pinafuna iwo, pontho nee asapereka takhuta thangwi ya pinthu piri na iwo. Bhibhlya ikhadalonga kale kuti mu ntsiku zakumalisa anthu azinji mbadacita pyenepi.—2 Tim. 3:2.

Anthu ananyerezera basi ene pinafuna iwo atoma kale kakamwe. Mwacitsandzo, Adhamu na Eva akhafuna kusankhula okhene pinthu pyadidi na pyakuipa, na thangwi ineyi, tonsene lero tisathabuka. Mukupita kwa ndzidzi, mambo Uziya wa ku Yuda, anyerezera kuti athema kupisa insenso, mbwenye manyerezero anewa akhali akuphonyeka. (2 Kro. 26:18, 19) Afarisi na Asadhuki akhanyerezera kuti ndi akufunika kakamwe kuna Mulungu, basi ene thangwi akhali a dzindza ya Abhrahamu.—Mat. 3:9.

Ife tazungulirwa na anthu akudzikuza na ananyerezera basi ene pinafuna iwo, pontho nkhaliro unoyu unakwanisa kutikhuya. (Agal. 5:26) Panango tinatoma kunyerezera kuti tathema kutambira miyai inango yakutumikira peno kuti tathema kutsalakanwa mwakupambulika kakamwe. Mphapo tisafunika kucitanji toera tikhonde kukhuyiwa na manyerezero anewa? Pakutoma, tisafunika kudziwa maonero a Yahova thangwi ya pinthu pyenepi. Onani pinthu piwiri pyakuti pinakwanisa kutiphedza.

 Yahova ndiye anadziwa pinthu pyakuti tathema kupitambira. Onani pitsandzo pingasi.

• Yahova asafuna kuti pabanja mamuna afune nkazace, pontho nkazi alemedze mamunace. (Aef. 5:33) Munthu wakumanga banja ali na ufulu wakudikhira kuti nkazace peno mamunace apangize ufuni basi ene kuna iye. (1 Akor. 7:3) Kusiyapo pyenepi, anyakubala asadikhira kuti anawo aalemedze, pontho ana asafunika kufuniwa na kutsalakanwa na anyakubalawo.—2 Akor. 12:14; 1 Akor. 6:2.

• Yahova alonga kuti akulu a mpingo asafunika kulemedzwa thangwi ya basa yakuwanga inacita iwo. (1 Ates. 5:12) Mbwenye iwo nee asafunika kukhala ninga atongi kuna abale na alongo awo.—1 Ped. 5:2, 3.

• Yahova apasa mautongi ufulu wakulipisa misonkho na kulemedzwa na anthu anatonga iwo.—Aroma 13:1, 6, 7.

Thangwi ya ufuni, Yahova asatipasa pizinji kupiringana pidathema ife kutambira. Nakuti ndife anyakudawa, ife basi ene tathema kufa. (Aroma 6:23) Ngakhale tenepo, Yahova asatipasa nkhombo zizinji thangwi ya ufuni wace ukulu kuna ife. (Mas. 103:10, 11) Nkhombo zonsene na miyai inatipasa iye, basi ene pisakwanisika thangwi yakukoma ntima kukulu kwa Yahova.—Aroma 12:6-8; Aef. 2:8.

Citani mphole-mphole toera mukhonde kunyerezera ninga anthu a dziko ino ya Sathani. Mwakukhonda dzindikira, panango tinatoma kunyerezera kuti tathema kutambira pinthu pizinji piringana anango. Ntsiku inango, Yezu alonga nsangani unapangiza kuti ndi pyakukhonda nentsa kunyerezera munjira ineyi. Iye alonga pya anyabasa angasi akuti akhadatawira kuphata basa m’munda toera kutambira dhenaryo ibodzi. Buluka penepo, mwanaciro munda acemera anyabasa anango. Pakumalisa, mu ndzidzi ukhadoka dzuwa anyabasa onsene atambira kobiri ibodzi ene, ngakhale ale akuti basi ene aphata basa ora ibodzi. Mbwenye ale adatoma kuphata basa namacibese anyerezera kuti akhafunika kutambira kobiri izinji kupiringana anango, thangwi aphata basa ntsiku yamumphu pa dzuwa. (Mat. 20:1-16) Yezu aphatisira nsangani unoyu toera kupangiza atowereri ace kuti asafunika komerwa na pinthu pinaapasa Mulungu mwakukoma ntima.

Khalani wakupereka takhuta, pontho lekani kukakamiza anango toera akucitireni pinthu. (1 Ates. 5:18) Towezerani citsandzo ca mpostolo Paulu; iye nee aphemba kobiri kuna abale na alongo  ace ku Korinto, maseze iye akhali na ufulu wakuphemba ciphedzo ceneci. (1 Akor. 9:11-14) Ife tisafunika kupereka takhuta na pinthu pyonsene pyadidi pinatambira ife, m’mbuto mwakudikhira kuti anango aticitire pinthu.

Khalani wakucepeseka. Munthu anganyerezera kuti ndi wakufunika kakamwe kupiringana anango, kazinji kene asatoma kunyerezera kuti athema kukhala na pinthu pizinji kupiringana piri na iye. Kucepeseka kunatiphedza toera tikhonde kukhala na manyerezero anewa.

Mprofeta Dhanyeli akhali wakucepeseka, pontho ndi citsandzo cadidi kuna ife. Banjace ikhali yakudziwika kakamwe, iye akhali wakubalika, wandzeru kakamwe, pontho akhali na maluso mazinji. Na thangwi ineyi, panango iye mbadanyerezera kuti akhafunika kutsalakanwa mwakupambulika thangwi ya miyai idatambira iye. (Dhan. 1:3, 4, 19, 20) Mbwenye Dhanyeli apitiriza kucepeseka, pontho nkhaliro unoyu wancitisa kukhala wakufunika kakamwe kuna Yahova.—Dhan. 2:30; 10:11, 12.

Ife tisafunika kucalira kunyerezera basi ene pinafuna ife na kudzikuza ninga anthu azinji lero. M’mbuto mwace, tisafunika kutsandzaya na nkhombo zonsene zinatipasa Yahova thangwi ya kukoma ntima kwace kukulu.