Pai na mai akhali akatolika. Mbwenye pidapfundza iwo m’Bhibhlya kuti dzina ya Mulungu ndi Yahova, uwiri wawo adzakhala Mboni za Yahova zaphinga. Pai adzasiya kusema madzimunthu akhaoneka ninga Yezu. Mbwenye aphatisira maluso akhali na iye akusema toera kusasanyira nyumba yathu yapantsi mbikhala Nyumba ya Umambo yakutoma ku Filipina.

Pidabalwa ine mu caka ca 1952, anyakubalanga atoma kundipfundzisa Bhibhlya ninga pikhacita iwo na abale anga anai amuna na atatu akazi. Ndzidzi ukhakula ine, pai wanga andiwangisa toera ndileri kapitulu ibodzi ya Bhibhlya ntsiku zonsene, pontho iye akhandipfundzisa mabukhu akusiyana-siyana. M’midzidzi inango anyakubala athu akhaphemba ayang’aniri a cisa na abale akhatumwa na Bheteli toera kufikira panyumba pathu. Ninga banja, ife tatsandzaya kakamwe thangwi iwo akhatifokotozera pinthu pikhadziwa iwo, akhatiwangisa, pontho takwanisa kuona kuti ndi pyakufunika kakamwe kutumikira Yahova mu umaso wathu.

Ine ndapfundza kakamwe na anyakubalanga, akuti akhali akukhulupirika kuna Yahova. Pidafa mai wanga, ine na pai wanga tatoma kutumikira ninga apainiya pabodzi mu caka ca 1971. Mbwenye pai wanga alowa mu caka ca 1973 pikhali ine na pyaka 20 pyakubalwa. Kuferwa na anyakubala kwandicitisa kupibva kuti ndiri ndekhene. Mbwenye cidikhiro “cakunyindirika na cakuwanga” cinagumanika m’Bhibhlya candiphedza kakamwe toera kukhala na maonero adidi mbandikhala na uxamwali wakuwanga na Yahova. (Aheb. 6:19) Pakupita ndzidzi ungasi pakumala kufa kwa pai wanga, ine ndakhazikiswa ninga mpainiya wakupambulika toera kutumikira ku Coron provinsya ya Palawan.

Pikhali ine na pyaka 21 pyakubalwa, ndaenda kakhala ku ntsuwa ya Coron. Ine ndadzumatirwa kakamwe pidaona ine kuti kweneko nee ndi anthu onsene akhali na maluju, madzi adidi, makaru peno miyota toera kufamba napyo. Maseze kukhali na abale angasi, nee m’bodzi wa iwo akhatumikira ninga mpainiya, pontho kazinji kene ndikhaenda kamwaza  mphangwa ndekhene. Mwezi wakutoma, ine ndatsuwa kakamwe acibale anga na axamwali anga. Namasiku ndikhayang’ana nyenyezi uku mbandikalira. Ine ndikhanyerezera pya kusiya basa yanga toera kubwerera pyanga kunyumba.

Midzidzi ineyi yakunentsa, ine ndapanga Yahova pyonsene pikhali muntima mwanga. Ine ndagumana mphangwa zakuwangisa mu ndzidzi ukhaleri ine Bhibhlya na mabukhu athu. Buluka penepo, ndzidzi onsene ndikhanyerezera mafala anagumanika pa Masalmo 19:14. Ine ndadzindikira kuti Yahova mbadakhala “Mwala wanga na Mpulumusi wanga” kubulukira mukunyerezera pinthu pinantsandzayisa ninga mabasa ace na makhaliro ace. Ine ndaphedzeka kakamwe na nsolo ukhagumanika mu revista ya Ncenjezi wakuti “Nunca está sozinho.” a Ine ndikhauleri mwakubwereza-bwereza. Mu ndzidzi unoyu wakuti ndikhali ndekhene, ndikhapibva kuti ndikhali na Yahova. Natenepa ndikhabandza mwai unoyu toera kucita phembero, kupfundza na kunyerezera mwadidi pikhapfundza ine.

Pidafika ine ku Coron, ndakhala ntsiku zingasi, buluka penepo ndakhazikiswa ninga nkulu wa mpingo. Nakuti ndikhali ndekhene ninga nkulu wa mpingo, ine ndikhatsogolera Xikola ya Utumiki wa Mulungu, Nsonkhano wa Basa, Pfundziro ya Bukhu ya Mpingo na Pfundziro ya Ncenjezi masumana onsene. Kusiyapo pyenepi, ndine basi akhacita nkhani zapakweca masumana onsene. Nakuti ndikhali na pinthu pizinji toera kucita, nee ndikhapibvabve kuti ndiri ndekhene.

Ine ndikhakomerwa kakamwe na basa yanga ku Coron, thangwi anyakupfundza anga azinji a Bhibhlya athambaruka mbabatizwa. Mbwenye pakhalimbo na pinentso. Midzidzi inango, ndikhafunika kufamba ndzidzi uzinji toera kufika kucisa cikhaenda ine kamwaza mphangwa, pontho mbandikhonda dziwa kuti ndingafika ndinagona papi. Kusiyapo pyenepi, cisa ca mpingo cikhali na ntsuwa zing’ono-zing’ono. Natenepa, toera kufika mbuto zenezi ndikhaphatisira bote, m’bara yakuti ikhali na mabimbi mazinji maseze nee ndikhadziwa sambirira. Mbwenye Yahova anditsalakana, pontho anditsidzikiza mu pinentso pyenepi pyonsene. Mukupita kwa ndzidzi, ndadzindikira kuti Yahova akhandikhunganya toera kuthimbana na pinentso m’basa yanga ntsogolo.

Mu caka ca 1978, ine ndapangwa toera kuenda katumikira ku Papua Nova Guiné, ku Australia. Papua Nova Guiné ndi dziko yakuti iri na mapiri mazinji, pontho kukula kwayo ndi ninga dziko ya Espanya. Ine ndadzumatirwa na kuona kuti anthu cifupi na mamiliyau matatu anakhala kweneko asalonga pilongero pyakupiringana 800. Mbwenye pyakutsandzayisa ndi pyakuti anthu azinji akhalonga cilongero ca pidgin--melanésio cakuti cikhacemerwambo Tok Pisin.

Ine ndapangwa toera kutumikira mu mpingo wa cingerezi ndzidzi ungasi ku nzinda ukulu wa Porto Moresby. Buluka penepo ndacinja mpingo ukhali ine mbandienda mpingo wa cilongero ca Tok Pisin, pontho ndatoma kupfundza cilongero ceneci. Ine ndikhaphatisira pinthu pikhapfundza ine m’basa yakumwaza mphangwa. Pyenepi pyandiphedza toera kupfundza cilongero ceneci mwakucimbiza kakamwe. Mwakukhonda dembuka ndikhakwanisa kucita nkhani n’cilongero ca Tok Pisin. Ndadzumatirwa kakamwe, thangwi mbandidzati kucita caka cibodzi ku Papua Nova Guiné, ine ndakhazikiswa ninga muyang’aniri wa cisa m’mipingo ya cilongero ca Tok Pisin m’maprovinsya mazinji.

Nakuti mipingo ikhali kutali na kutali, ine ndikhafunika kucita masasanyiro a misonkhano ya cisa  mizinji, pontho ndikhafunika kucita maulendo mazinji. Pakutoma, ndikhapibva kuti ndikhali ndekhene thangwi anthu azinji akhalonga cilongero cakusiyana na canga, pontho misambo yawo ikhali yakusiyana na yanga. Ine nee ndikhakwanisa kuenda kacedzera mipingo mukuphatisira makaru peno miyota thangwi miseu yace nee ikhali mwadidi, pontho dziko yace ndi ya mapiri mazinji. Natenepa, ndikhafunika kucita ulendo na ndeka masumana onsene. Midzidzi inango, ndine basi ene akhacita ulendo na ndeka ing’ono yakuti nee ikhali mwadidi. Ine ndikhadzudzumika kakamwe na maulendo anewa ninga pikhadzudzumika ine mu ndzidzi ukhacita ine ulendo na bote.

Nakuti anthu azinji nee akhali na matelefoni, toera kulonga na abale m’mipingo ndikhaphatisira matsamba. Kazinji kene, ndikhafika tsamba idatumiza ine mbidzati kufika. Ine ndikhafunika kubvundzisa anthu kuti ndinagumana kupi Mboni za Yahova. Ngakhale tenepo, ndzidzi onsene ukhagumanikana ine na abale, iwo akhali akupereka takhuta na aufuni, pontho pyenepi pikhandiphedza toera ndipitirize kuwangisira. Ine ndaona ciphedzo ca Yahova munjira zizinji. Pontho uxamwali wanga na iye wakhala wakuwanga.

Pa ntsiku yakutoma idagumanika ine pa misonkhano ku ntsuwa ya Bougainville, banja ibodzi yandimwetulira mbibvundza: “Musatikumbuka?” Ndakumbuka kuti ndamwazira mphangwa banja ineyi pa ulendo wakutoma udafika ine ku Porto Moresby. Ine ndikhadatoma kuapfundzisa Bhibhlya, buluka penepo ndaphemba m’bale m’bodzi wa cisa ceneci toera apitirize kuapfundzisa. Mu ndzidzi unoyu, uwiri wawo akhadamala kubatizwa. Zenezi ndi nkhombo zinango mwa zizinji zidakhala na ine mu pyaka pitatu pidatumikira ine ku Papua Nova Guiné.

Mbandidzati kubuluka ku Coron mu caka ca 1978, ine ndadziwana na Adel wakuti akhali mulongo waphinga na wakubalika. Iye akhali mpainiya wa ndzidzi onsene, pontho akhakuza ana awiri akuti ndi Samuel na Shirley. Mu ndzidzi ubodzi ene, iye akhatsalakana mai wace wakukalamba. Mwezi wa Maio wa caka ca 1981, ine ndabwerera ku Filipina toera kumanga banja na Adel. Pidamala ife kumanga banja, tatumikira ninga apainiya a ndzidzi onsene, pontho tatsalakana banja yathu.

Maseze ndikhali na banja, mu caka ca 1983 ndakhazikiswa pontho ninga mpainiya wakupambulika mbandienda katumikira ku ntsuwa ya Linapacan, provinsya ya Palawan. Banja yathu yafuluka mbienda kakhala ku ntsuwa ineyi yakuti ikhali kutali na nzinda, pontho kwakuti nee kukhali na Mboni za Yahova. Pidapita caka cibodzi, mai wace Adel alowa. Ngakhale tenepo, ife tapitiriza kukhala aphinga mu utumiki, pontho pyenepi pyatiphedza toera kupirira nyatwa ineyi. Ife tacitisa mapfundziro mazinji a Bhibhlya ku Linapacan, pontho mwakukhonda dembuka iwo akhafuna kugumanika pa misonkhano, natenepa tikhafunika kukhala na Nyumba ya Umambo ing’ono. Ife tamanga Nyumba ineyi ya Umambo tekhene. Pidapita pyaka pitatu, tatsandzaya kuona anthu akukwana 110 mbagumanika pa Cikumbuso; azinji a iwo athambaruka mbabatizwa.

Mu caka ca 1986, ine ndapangwa toera kuenda katumikira ku ntsuwa ya Culion, kwakuti anthu azinji akhathabuka na utenda wa matanya. Buluka penepo, Adel akhazikiswambo ninga mpainiya wakupambulika. Pakutoma, ife tikhagopa kumwazira mphangwa anthu akhali na matanya. Mbwenye amwazi mphangwa  a mucisa ceneci atipanga kuti anthu anewa akondzwa, natenepa nee mbadatithapulisa utenda unoyu. Anango mwa atenda anewa, akhagumanikambo pa misonkhano panyumba ya mulongo m’bodzi. Mwakukhonda dembuka, ife tadzolowera, pontho pyakhala pyakutsandzayisa kumwaza mphangwa kuna anthu anewa akhapibva kuti nee akhafuniwa na Mulungu, pontho na anthu anango. Ndi pyakutsandzayisa kuona anthu akhali na utenda unoyu mbatsandzaya thangwi yakudziwa kuti ntsogolo anakhala na ungumi wadidi.—Luka 5:12, 13.

Anathu adzolowera tani kukhala ku ntsuwa ya Culion? Ine na Adel, tacemera alongo awiri atsikana a ku Coron, toera anathu acite uxamwali na anthu anewa a makhaliro adidi. Samuel, Shirley na atsikana anewa awiri atsandzaya kakamwe m’basa yawo yakumwaza mphangwa na kupfundzisa Bhibhlya anapiana azinji mu ndzidzi wakuti ine na Adel tikhapfundzisa anyakubala a anapiana anewa. Mwakukhonda dembuka, tikhacitisa mapfundziro a Bhibhlya mabanja akukwana 11. Ife tikhapfundzisa Bhibhlya anthu azinji akuti akhathambaruka, pontho takwanisa kukhazikisa mpingo upswa.

Pakutoma, ndine basi akhali nkulu wa mpingo mucisa ceneci. Natenepa, ofesi ya filiali yandiphemba toera kutsogolera misonkhano mu mpingo wa amwazi mphangwa asere ku Culion na mu mpingo wa amwazi mphangwa apfemba ku Marily, kwakuti ndikhafunika kufamba maora matatu na bote toera kufika. Ninga banja, tingakotoka misonkhano tikhapita na mbuto za mapiri toera kucitisa mapfundziro a Bhibhlya mucisa ca Halsey.

Mukupita kwa ndzidzi, anthu azinji apfundza undimomwene ku Marily na Halsey, pontho tikhafunika kumanga Nyumba za Umambo m’mbuto zenezi ziwiri. Ku Linapacan, abale na anyakupfundza Bhibhlya apereka pinthu pizinji toera kumanga napyo, pontho acita basa yakumanga. Nyumba ya Umambo ya ku Marily ikhali ikulu yakuti anthu 200 mbadakwana, pontho mwakukhonda nentsa mbatidakwanisa kuithimizira, mbaticitira misonkhano ya cisa mwenemo.

Pidakula anathu mu caka ca 1993, ine ndatoma kutumikira ninga muyang’aniri wa cisa na nkazanga ku Filipina. Buluka penepo, mu caka ca 2000, ine ndacemerwa toera ndiende ku Escola de Treinamento Ministerial toera ndipfundziswe, buluka penepo ndikhale mpfundzisi wa xikola ineyi. Ine ndaona kuti nee ndikhali wakuthema kucita basa ineyi, mbwenye  Adel andiwangisa. Iye andikumbusa kuti Yahova anandipasa mphambvu toera kucita basa ineyi ipswa. (Afil. 4:13) Adel alonga njira ikhakwanisa iye kucita basa yace mu ndzidzi ukhathimbana iye na utenda.

Mu caka ca 2006, mu ndzidzi ukhapfundzisa ine, nkazanga adzindikirwa kuti akhali na utenda wa Parkinson. Ife tadzudzumika kakamwe! Mbwenye mu ndzidzi udalonga ine kuti ndikhafunika kusiya basa ikhacita ine toera kuntsalakana, iye alonga: “Sakani dotoro wakuti anakondza utenda wanga. Ndisapidziwa kuti Yahova anatiphedza toera kupitiriza kucita basa yace.” Mu pyaka pitanthatu pidatowera, Adel apitiriza kutumikira Yahova mwakukhonda kudungunya. Mu ndzidzi ukhacimwana iye kufamba, akhaphatisira njinga ya anyakulamala toera kuenda kamwaza mphangwa. Ngakhale mu ndzidzi ukhacimwana iye kulonga mwadidi, akhapereka ntawiro wa fala ibodzi peno wa mafala mawiri pa misonkhano. Ndzidzi onsene Adel akhatambira mphangwa zakusimba thangwi yakukhulupirika kwace kuna Yahova, mpaka kufa kwace mu caka ca 2013. Ine ndamala pyaka 30 na Adel, wakuti akhali wakukhulupirika na waufuni. Mbwenye pidalowa iye, ndatoma pontho kutsukwala kakamwe na kupibva kuti ndiri ndekhene.

Adel akhafuna kuti ndipitirize kucita basa ikhacita ine, natenepa ndapitiriza. Ine ndikhacita basa yanga ndzidzi onsene. Pyenepi pyandiphedza toera ndikhonde kutsukwala kakamwe. Kutomera mu caka ca 2014 mpaka 2017, ine ndikhacedzera mipingo ya cilongero ca Tagalo mu dziko yakuti basa yathu isakhondeswa. Buluka penepo, ndacedzera mipingo ya Citagalo ku Taiwan, Estados Unidos na Kanadha. Mu caka ca 2019, ine ndakhala mpfundzisi wa Xikola ya Amwazi Mphangwa a Umambo n’Cingerezi ku Indiya na ku Tailândia. Ine ndatsandzaya kakamwe na mabasa anewa onsene. Ndisatsandzaya kakamwe ndingakhala na pizinji pyakucita m’basa ya Yahova.

M’mabasa onsene mapswa akhatambira ine, ndikhapfundza kufuna abale na alongo akhagumana ine m’mbuto zenezi, natenepa pikhali pyakunentsa kakamwe kusiyana nawo. M’midzidzi ineyi, ine ndapfundza kunyindira Yahova na ntima onsene. Nakuti Yahova akhandiphedza ndzidzi onsene, pyenepi pikhandiphedza toera kutawira macinjo onsene akhatambira ine. Lero, ndiri kutumikira mu mpingo upswa ku Filipina, mwakuti abale na alongo ndi ninga acibale anga acitsalakano. Pontho ndiri wakutsandzaya kuona Samuel na Shirley mbakatowezera cikhulupiro ca mai wawo.—3 Juw. 4.

Ine ndathimbana na mayesero mazinji mu umaso wanga, kuphatanizambo kuona nkazanga wakufunika mbathabuka na utenda wakugopswa mpaka kufa. Ine ndikhafunika kudzolowera macinjo mazinji mu umaso wanga. Mwandimomwene, ine ndakwanisa kuona kuti Yahova “nee ali kutali na m’bodzi na m’bodzi wa ife.” (Mabasa 17:27) Natenepa, djanja ya Yahova “nee ndi yakubvira kakamwe” toera akhonde kutsalakana atumiki ace, maseze akhale kutali na acibale. (Iza. 59:1) Yahova wakuti ndi Mwala wanga, andiphedza kakamwe mu umaso wanga onsene, natenepa ndisapereka takhuta kuna iye. Ine cipo ndikhali ndekhene.