NSOLO WA PFUNDZIRO 7
NYIMBO 15 Simbani Mwana Wakutoma wa Yahova!
Kulekerera Kwa Yahova Kusakuphedzani Tani?
“Kulekerera kwandimomwene kuli na imwe.”—MAS. 130:4.
PINAFUNA IFE KUPFUNDZA
Tinaona pitsandzo pingasi pya m’Bhibhlya pinapangiza njira zinatilekerera Yahova. Pontho nsolo uno unatiphedza toera kuthimizira kupereka kwathu takhuta thangwi ya kulekerera kwace.
1. Thangwi yanji ndi pyakunentsa kudziwa pinafuna kulonga munthu angatipanga kuti ndakulekerera?
“INE NDAKULEKERERA.” Ndi pyakutsandzayisa kakamwe kubva mafala anewa, makamaka khala mwacita pinthu peno mwalonga pinthu pyakuti pyatsukwalisa munthu unango. Kodi mwandimomwene mafala anewa asabvekanji? Munthu angalonga kuti ndakulekerera, asafuna kulonga kuti uxamwali wanu unapitiriza ninga mukhali iwo kale? Peno munthu unoyu asafuna kulonga kuti nee musafunikabve kucedza thangwi ya pinthu pidacitika, mbwenye uxamwali wanu nee unapitirizabve ninga mukhali iwo kale? Mwandimomwene fala yakuti “ndakulekerera” iri na mabvekero akusiyana-siyana thangwi isanyindira munthu adailonga.
2. Bhibhlya isalonganji thangwi ya kulekerera kwa Yahova? (Onanimbo cidzindikiro capantsi.)
2 Njira inatilekerera Yahova ndi yakusiyana kakamwe na njira inalekerera ife andzathu. Nkhabepo anakwanisa kulekerera munthu ninga munalekerera Yahova. Nyamasalmo alonga tenepa thangwi ya Yahova: “Kulekerera kwandimomwene kuli na imwe, toera anthu akulemedzeni.” a (Mas. 130:4) Undimomwene ndi wakuti kulekerera kwa Yahova ndi “kulekerera kwandimomwene.” Thangwi ndiye basi anadziwa mabvekero akulekerera. M’mavesi anango a Malemba Acihebheri, anyakulemba Bhibhlya alonga njira inalekerera Yahova mukuphatisira fala yakuti nee mbadaiphatisira angalonga njira inalekerera anthu.
3. Thangwi yanji kulekerera kwa Yahova ndi kwakusiyana na kulekererana kunacita ife? (Izaiya 55:6, 7)
3 Yahova angalekerera munthu, asafudziratu madawo a munthu unoyu. Natenepa munthu unoyu anakwanisa kukhala pontho na uxamwali wakuwanga na iye. Ife tisapereka takhuta kakamwe kuna Yahova thangwi iye asatilekerera munjira ineyi.—Lerini Izaiya 55:6, 7.
4. Yahova asatiphedza tani toera kubvesesa mabvekero akulekerera kwandimomwene?
4 Khala kulekerera kwa Yahova ndi kwakusiyana na kwathu, ninga anthu akusowa ungwiro, tinakwanisa tani kubvesesa mabvekero a kulekerera kwandimomwene? Yahova asaphatisira pitsandzo toera kutiphedza kubvesesa kuti iye asatilekerera tani. Mu nsolo uno, tinaona pingasi mwa pitsandzo pyenepi. Pitsandzo pyenepi pisapangiza kuti Yahova asafudza tani madawo athu mbatikhala pontho na uxamwali na iye. Kudinga pitsandzo pyenepi kunathimizira ufuni wathu na kupereka kwathu takhuta thangwi ya ntsisi na kukoma ntima kwa Pai wathu, Yahova.
YAHOVA ASALEKERERA MADAWO
5. Ninji pinacitika Yahova angatilekerera madawo athu?
5 M’Bhibhlya, madawo kazinji kene asalandaniswa na ntolo wakulemera. Mambo Dhavidhi alonga thangwi ya madawo ace kuti: “Madodo anga anjipa mpaka padzulu pa nsolo wanga; ninga ntolo wakulemera, ine ndisacimwana kuathukula thangwi ndi mazinji kakamwe.” (Mas. 38:4) Mbwenye Yahova asalekerera madawo a munthu anatcunyuka. (Mas. 25:18; 32:5) Fala Yacihebheri idathumburuzwa “kulekerera” isabveka “kulamuka” peno “kuthukula.” Natenepa Yahova angatilekerera madawo athu, pisakhala ninga abulusa m’mapewa mwathu ntolo wakulemera kakamwe wa madawo mbaenda nawo kutali kakamwe.
‘Mwalekerera’ (Mas. 32:5)
6. Yahova asakwata madawo athu mbaenda nawo kupi?
6 Bhibhlya isaphatisira citsandzo cinango toera kupangiza kuti Yahova asakwata madawo athu mbaenda nawo kutali kakamwe. Bukhu ya Masalmo 103:12 isalonga: “Ninga kumabulukiro a dzuwa ndi kutali kakamwe na kumadokero a dzuwa, munjira ibodzi ene, iye asaikha madawo athu kutali kakamwe na ife.” Kunabuluka dzuwa na kunadoka dzuwa ndi mbuto ziwiri zakusiyana, pontho pyenepi pisacitika m’midzidzi yakusiyana. M’mafala anango, Yahova asakwata madawo athu mbaenda nawo kutali kakamwe kwakuti ife cipo tinaaona pontho. Pyenepi pisapangiza kuti Yahova asatilekerera na ntima onsene, pontho pisatiphedza toera kukhala akukhurudzika!
“Ninga kumabulukiro a dzuwa ndi kutali kakamwe na kumadokero a dzuwa” (Mas. 103:12)
7. Bhibhlya isalonga kuti Yahova asacitanji na madawo athu? (Mikeya 7:18, 19)
7 Ngakhale kuti Yahova asakwata madawo athu mbaenda nawo kutali kakamwe, pisabveka kuti iye asakoya madawo anewa? Nkhabe. Mambo Ezekiya alonga: ‘Imwe mwaponya nduli mwanu madawo anga onsene.’ Peno ninga pinalonga cidzindikiro capantsi kuti: “Mwabulusa madawo anga onsene pamaso panu.” (Iza. 38:9, 17; cidzindikiro capantsi) Pyenepi pisapangiza kuti Yahova asakwata madawo a anthu akutcunyuka mbaasiya kutali kakamwe, pontho iye nee asaakumbukabve. Mafala adalonga Ezekiya anakwanisa kuthumburuzwa tenepa: “Imwe mwacitisa kuti pikhale ninga nee ndikhadacita madawo.” Bhibhlya isagomezera pontho ntsonga ineyi m’mafala anagumanika pa Mikeya 7:18, 19. (Lerini.) Mavesi anewa asalonga kuti Yahova asaponya madawo athu m’bara yakuzika kakamwe. Mu ndzidzi wakale, cinthu cingagwa m’bara yakuzika kakamwe, pikhali pyakunentsa toera kucigumana.
“Imwe mwaponya kunduli kwanu madawo anga onsene” (Iza. 38:17)
“Madawo awo onsene imwe munadzaaponya pa mbuto yakuzika kakamwe ya bara” (Mik. 7:19)
8. Tapfundzanji mpaka pano?
8 Pitsandzo pyenepi pisatipfundzisa kuti Yahova angatilekerera, iye asabulusa ntolo wakulemera wa madawo pa nsolo pathu. Pisakhala ninga pidalonga Dhavidhi kuti: “Anyakutsandzaya ndi ale adalekererwa macitiro awo akuipa, na ale akuti madawo awo afudzwa; anyakutsandzaya ndi ale akuti Yahova cipo anadzakumbuka pontho madawo awo.” (Aroma 4:7, 8) Kweneku ndi kulekerera kwandimomwene!
YAHOVA ASAFUDZA MADAWO ATHU
9. Bhibhlya isaphatisira citsandzo cipi toera kutiphedza kubvesesa kuti Yahova asatilekerera na ntima onsene?
9 Yahova aphatisira citsandzo cinango toera kutiphedza kuona kufunika kwa ntsembe ya ciomboli. Iye asatsuka na kufudza madawo a munthu wakutcunyuka. Bhibhlya isalonga kuti pisakhala ninga Yahova asafula mbatsuka madawo. Pyenepi pisacitisa kuti nyakudawa akhale pontho wakucena. (Mas. 51:7; Iza. 4:4; Yer. 33:8) Pontho Yahova afokotoza kuti asacita tani pyenepi pa Izaiya 1:18: ‘Maseze madawo anu akhale akufira, iwo anadzacena kakamwe ninga neve; maseze akhale akufira kakamwe, iwo anadzacena kakamwe ninga thonje.’ Ndi pyakunentsa kakamwe toera kumalisa midonthi yakufira ingagwa pa nguwo. Ndi thangwi yace Yahova aphatisira citsandzo ceneci toera kupangiza kuti madawo athu anakwanisa kukhala akucena kakamwe ninga kuti nee akhalipo.
‘Maseze madawo anu akhale akufira, iwo anadzacena kakamwe ninga neve’ (Iza. 1:18)
10. Ndi citsandzo cipi cinango cinaphatisira Yahova toera kupangiza kulekerera kwace?
10 Ninga pidapfundza ife mu nsolo udamala, madawo athu asalandaniswa na “mangawa.” (Mat. 6:12; Luka 11:4) Natenepa, ndzidzi onsene unadawira ife Yahova pisakhala ninga tiri kuthimizira mangawa athu. Mangawa ali na ife ndi mazinji kakamwe! Mbwenye Yahova angatilekerera madawo athu, pisakhala ninga atilekerera mangawa anewa. Iye nee asaphemba kulipwa thangwi ya madawo adamala iye kutilekerera. Ninga munthu wakuti asakhala wakutsandzaya kakamwe angalekererwa mangawa ace, ife tisakhalambo akutsandzaya kakamwe Yahova angatilekerera!
“Tilekerereni mangawa athu” (Mat. 6:12)
11. Pisabvekanji Bhibhlya ingalonga kuti ‘talekererwa’ madawo athu? (Mabasa 3:19)
11 Yahova asacita pizinji kupiringana kutilekerera mangawa peno madawo athu. Iye asaafudza kwenda na kwenda. (Lerini Mabasa 3:19.) Mangawa angalekererwa, ife tinakwanisa kunyerezera X wankulu kakamwe adalembwa padzulu pa tsamba idalembwa mangawa anewa. Mbwenye numero ya ntengo wa mangawa isapitiriza kuoneka. Natenepa kufudza cinthu ndi pyakusiyana kakamwe na kulemba X. Toera kubvesesa pyenepi, ife tisafunika kukumbuka kuti mu ndzidzi wakale tinta ikhaphatisirwa ikhali yakukhonda nentsa kufudzika. Munthu mbadakwanisa kukwata esponja yakutota mbafudza pinthu pidalembwa na tinta ineyi. Munjira ibodzi ene, mangawa angafudzwa iwo nee asaonekabve. Pisakhala ninga pa tsamba ineyi nee pakhadalembwa pinthu. Kudziwa kuti Yahova nee asalekerera basi ene madawo athu, mbwenye iye asaafudza mbakhonda kuonekabve, pyenepi pisakhuya kakamwe ntima wathu!—Mas. 51:9.
“Toera mulekererwe madawo anu” (Mabasa 3:19)
12. Citsandzo ca khole ikulu cisabvekanji kuna ife?
12 Pa Izaiya 44:22, Yahova aphatisira citsandzo cinango toera kubvekesa kuti asafudza tani madawo athu. Lemba ineyi isalonga: “Ine ndinadzafudza madawo ako mbakhala ninga aphimbirwa na khole, pontho madawo ako anadzakhala ninga aphimbirwa na khole yakupswipa kakamwe.” Yahova angatilekerera, pisakhala ninga aphatisira khole ikulu kakamwe mbaphimbira madawo athu toera ife na anthu anango ticimwane kuaona.
“Ine ndinadzafudza madawo ako mbakhala ninga aphimbirwa na khole” (Iza. 44:22)
13. Tisapibva tani Yahova angatilekerera madawo athu?
13 Citsandzo ceneci cisatipfundzisanji? Yahova angatilekerera, ife nee tisafunikabve kupitiriza kupasika mulando thangwi ya madawo adacita ife. Kubulukira mu ntsembe ya Yezu Kristu, ife talekererwa mangawa athu. Yahova angatilekerera madawo athu pisakhala ninga cipo tacita madawo. Tingatcunyuka madawo athu na ntima onsene, Yahova asatilekerera.
YAHOVA ASATITAWIRISA KUKHALA PONTHO AXAMWALI ACE
Kulekerera kwa Babathu wakudzulu kusatiphedza toera kukhala na uxamwali wakuwanga na iye (Onani ndima 14)
14. Thangwi yanji tisafunika kunyindira kulekerera kwa Yahova? (Onanimbo mafoto.)
14 Yahova angatilekerera, tinakwanisa kukhala na cinyindiro cakuti tinakhala pontho na uxamwali na iye. Pyenepi pisatiphedza toera tikhonde kupasika mulando. Pontho nee tisafunika kugopa kuti Yahova anakoya pinthu pyakuipa pidacita ife mbadikhira ndzidzi unango toera kutitcunyusa thangwi ya pinthu pyenepi. Pyenepi nkhabe citika. Mphapo thangwi yanji tisafunika kunyindira Yahova angalonga kuti atilekerera? Yahova apanga mprofeta Yeremiya tenepa: “Thangwi ine ndinadzalekerera madodo awo, pontho nee ndinadzakumbukabve madawo awo.” (Yer. 31:34) Mpostolo Paulu aphatisira mafala akulandana na anewa mu ndzidzi udalonga iye kuti: “Nee ndinadzakumbukabve madawo awo.” (Aheb. 8:12) Kodi mafala anewa asabvekanji?
“Nee ndinadzakumbukabve madawo awo” (Yer. 31:34)
15. Ndi munjira ipi Yahova nee asakumbukabve madawo athu?
15 M’Bhibhlya, fala yakuti “kukumbuka” nee isabveka basi ene kukumbuka pinthu pidacitika nduli. Mbwenye isabvekambo kupanga munthu toera acite pinthu. Phanga adakhomerwa pamuti dhuzi na Yezu aphemba: “Yezu, ndikumbukireni mungapita mu Umambo wanu.” (Luka 23:42, 43) Mamuna unoyu nee akhaphemba basi ene toera Yezu ankumbuke. Pontho ntawiro wa Yezu usapangiza kuti mamuna unoyu akhafuna kuti Yezu acite pinthu toera kumphedza. Natenepa, Yahova angalonga kuti nee anakumbukabve madawo athu, pyenepi pisabveka kuti iye atilekerera madawo athu, pontho nee anatitcunyusabve ntsogolo thangwi ya madawo anewa.
16. Bhibhlya isatilandanisa nanji?
16 Yahova angatilekerera, tisapibva kuti tasudzulwa. Bhibhlya isaphatisira citsandzo cinango toera kutiphedza kubvesesa pyenepi. Ife takhala ninga “mabitcu a madawo,” mbwenye thangwi yakulekererwa na Yahova, takhala ninga ‘mabitcu adasudzulwa m’madawo.’ (Aroma 6:17, 18; Apok. 1:5) Kulekerera kwa Yahova kusatisudzula m’madawo, pontho pyenepi pisatitsandzayisa kakamwe!
“Mwasudzulwa m’madawo” (Aroma 6:18)
17. Kulekererwa kwalandana tani na kuwangiswa utenda? (Izaiya 53:5)
17 Lerini Izaiya 53:5. Bhibhlya isalonga kuti thangwi ya madawo athu, ife takhala ninga anthu akuti ali na utenda wakukhonda wanga. Thangwi ya ntsembe yaciomboli idatipasa Yahova kubulukira mwa Mwanace, ife takhala ninga tawangiswa. (1 Ped. 2:24) Munjira ibodzi ene, munthu ali na utenda wakukhonda wanga asatsandzaya kakamwe angawangiswa utenda wace. Ifembo tisatsandzaya kakamwe thangwi yakulekererwa madawo athu mbatikwanisa kukhala pontho na uxamwali wakuwanga na Yahova. Pyenepi pisakwanisika basi ene thangwi ya ntsembe ya ciomboli. Ndi thangwi yace Yahova asatilekerera, pontho tisakwanisa kukhala na uxamwali wakuwanga na iye.
“Thangwi ya pironda pyace, ife tawangiswa” (Iza. 53:5)
KULEKERERA KWA YAHOVA KUSABVEKANJI KUNA IFE?
18. Tapfundzanji na pitsandzo pinagumanika m’Bhibhlya thangwi ya kulekerera kwa Yahova? (Onanimbo bokosi yakuti “Yahova Asatilekerera Tani?”)
18 Tapfundzanji na pitsandzo pidaphatisira Bhibhlya thangwi yakulekerera kwa Yahova? Tapfundza kuti Yahova angatilekerera pisakhala ninga nee tacita madawo. Yahova cipo anatitcunyusa pontho thangwi ya pidacita ife. Na thangwi ineyi, tinakwanisa kukhala na uxamwali wakuwanga na Babathu wakudzulu. Natenepa, kulekerera kwandimomwene ndi muoni unatipasa Yahova. Pyenepi pisapangiza ufuni na kukoma ntima kwace kukulu kunapangiza iye kuna ife, thangwi tisadziwa kuti nee tathema kulekererwa.—Aroma 3:24.
19. (a) Thangwi yanji tisafunika kupereka takhuta? (Aroma 4:8) (b) Tinapfundzanji mu nsolo unatowera?
19 Lerini Aroma 4:8. Ife tisapereka takhuta kakamwe thangwi Yahova asatilekerera! (Mas. 130:4) Mbwenye khala tisafuna kuti Yahova atilekerere, tisafunika kucita cinthu cakufunika kakamwe cidalonga Yezu. Iye alonga: “Mungakhonda kulekerera ale anakudawirani, Babanu wakudzulu nee anakulekereranimbo madawo anu.” (Mat. 6:14, 15) Pyenepi pisapangiza kuti tisafunika kulekerera anango ninga pinacita Yahova. Mphapo tinacita tani pyenepi? Mu nsolo unatowera, tinapfundza pyenepi.
NYIMBO 46 Tikupereka Takhuta Yahova
a Malemba Acihebheri aphatisira fala yakuti “kulekerera” inapangiza kuti ndi kulekerera kwandimomwene, maseze pali na njira zinango zakulekerera. Athumburuzi azinji a Bhibhlya nee aphatisira mafala anewa akufunika kakamwe, mbwenye athumburuzi a Bhibhlya ya Dziko Ipswa aphatisira mafala anewa pakuthumburuza Masalmo 130:4.
