MWATHIMBANA kale na nyatwa mbamunyerezera kuti nkhabepo munthu anafuna kukuphedzani? Ife tiri kukhala ‘m’midzidzi yakugopswa na yakunentsa kupirira.’ Pyenepi pinaticitisa kutsukwala na kupibva kuti tiri tekhene. (2 Tim. 3:1) Mbwenye nee tisafunika kuthimbana na nyatwa zathu tekhene. Bhibhlya isalonga kuti axamwali andimomwene anatiphedza kakamwe “mʼmidzidzi ya nyatwa.”—Mis. 17:17.

Mpostolo Paulu aphedzwa kakamwe na axamwali ace akhafamba na iye m’maulendo ace aumisionaryo. (Akol. 4:7-11) Pikhali Paulu nkaidi, axamwali ace amphedza kucita pinthu pyakuti nee mbadakwanisa kupicita ekhene. Mwacitsandzo, Epafrodhito, akwata pinthu pidatumiza abale a ku Filipi mbafikisa kuna Paulu mu ndzidzi ukhali iye nkaidi. (Afil. 4:18) Pontho Tikiko akwata matsamba adalemba Paulu mbaaendesa m’mipingo yakusiyana-siyana. (Akol. 4:7) Na ciphedzo ca axamwali ace, Paulu akwanisa kucita utumiki wace, ngakhale mu ndzidzi ukhakhonda iye kubuluka panyumba peno mu ndzidzi ukhali iye nkaidi. Mphapo imwe munakwanisambo tani kukhala xamwali wandimomwene?

Mu ntsiku zino, abale na alongo asapangiza pinthu pyakuti axamwali anakwanisa kupicita toera kuphedza anango. Onani citsandzo ca mulongo m’bodzi wakuti akhala xamwali wandimomwene kuna mpainiya wa ndzidzi onsene wa ku Espanya anacemerwa Elisabet. Pidadzindikirwa mai wace Elisabet kuti akhali na utenda wa kankro, mulongo unoyu atumizira Elisabet mphangwa zizinji zakuwangisa za m’Bhibhlya. Elisabet alonga: “Mu ndzidzi ukhaona ine mphangwa zenezi, ndikhatsandzaya kakamwe thangwi yakudziwa kuti pana munthu anandinyerezera, pontho pyenepi pikhandipasa mphambvu ntsiku zonsene.”—Mis. 18:24.

Tinakwanisa kuwangisa uxamwali wathu na abale na alongo tingaaphedza toera kugumanika pa misonkhano na m’basa yakumwaza mphangwa. Mwacitsandzo, kodi imwe munakwanisa kupasa bholeya m’bale peno mulongo wakukalamba? Unoyu unakwanisa kukhala mwai toera kuwangisana unango na ndzace. (Aroma 1:12) Mbwenye abale na alongo anango nee asakwanisa kubuluka panyumba. Mphapo tinaphedza tani abale na alongo anewa?

Abale na alongo anango nee asakwanisa kugumanika pa misonkhano n’Nyumba za Umambo thangwi ya utenda peno nyatwa zinango. Onani citsandzo ca David. Iye adzindikirwa kuti ali na utenda wa kankro, pontho akhafunika kukondzwa mu miyezi yakupiringana mitanthatu. M’midzidzi ineyi, iye na nkazace Lidia akhaona misonkhano mukuphatisira vidhyukonferensya.

 Iwo aphedzwa tani na abale na alongo mu mpingo? Pakumala kwa misonkhano, abale na alongo anango akuti akhali ku Nyumba ya Umambo akhalonga na David na Lidia mukuphatisira vidhyukonferensya. Kusiyapo pyenepi, David na Lidia angamala kutawira pa misonkhano, abale na alongo akhatumiza mphangwa toera kuawangisa misonkhano ingamala. Pyenepi pyaphedza tani David na Lidia? Iwo apibva kuti asafuniwa, pontho akhala na uxamwali wakuwanga na abale na alongo awo.

Musaona tani kucita masasanyiro toera kumwaza mphangwa pabodzi na m’bale peno mulongo wakuti nee asakwanisa kubuluka panyumba? Panango imwe munakwanisa kucinja ndandanda yanu toera kubuluka pabodzi na iwo m’basa ya m’munda. Natenepa, pyenepi pinaaphedza toera kuona kuti nee aduwalwa. (Mis. 3:27) Panango munakwanisa kulemba matsamba peno kumwaza mphangwa na telefoni pabodzi na iwo. Akulu a mpingo anakwanisa kucita masasanyiro toera abale akwanise kuona misonkhano ya basa ya m’munda mukuphatisira vidhyukonferensya. David na Lidia akomerwa kakamwe thangwi abale a mu mpingo wawo acita pyenepi. Davidi alonga: “Basi ene kugumanika pa nsonkhano wakumwaza mphangwa na kubvesera phembero pabodzi na nsoka wathu mukuphatisira vidhyukonferensya pikhatiwangisa kakamwe.” Kusiyapo pyenepi, pingakwanisika, midzidzi inango imwe munakwanisa kuenda na nyakupfundza wanu wa Bhibhlya kunyumba kwa mwazi mphangwa wakuti nee asakwanisa kubuluka panyumba toera kucita pfundziro kweneko.

Tingaphata basa pabodzi na abale na alongo anewa akuti nee asakwanisa kubuluka panyumba, tisakwanisa kuona makhaliro awo adidi, pontho tisawangisa uxamwali wathu na iwo. Imwe munaalemedza kakamwe thangwi yakuona maluso awo akuphatisira Bhibhlya toera kukhuya ntima wa munthu pakupfundzisa. Kusiyapo pyenepi, imwe mungaphedza anango toera kumwaza mphangwa na kugumanika pa misonkhano munakhala na axamwali apswa.—2 Akor. 6:13.

Pikhathimbana Paulu na nyatwa, Tito wakuti akhali xamwali wace aenda kuna iye toera kum’balangaza. (2 Akor. 7:5-7) Mphyadidi kakamwe kulonga mafala akubalangaza kuna abale na alongo athu. Citsandzo ca Tito cisapangiza kuti tinakwanisambo kubalangaza abale na alongo athu tingacedza nawo na kucita pinthu toera kuaphedza.—1 Juw. 3:18.

Abale na alongo ku Rusya asapangiza citsandzo cadidi cakuphedzana unango na ndzace. Onani pidacitikira m’bale Sergey na nkazace Tatyana. Pidamala kufufudzwa n’nyumba mwawo na apolixa, iwo akwatwa mbaenda kacitwa mibvundzo. Tatyana ndiye adatoma kusiyiwa mbabwerera kunyumba. Sergey alonga: “Pidafika Tatyana panyumba, mulongo m’bodzi wacipapo abwera panyumba pathu. Abale na alongo anango abwerambo toera kutiphedza kucenesa na kusasanyira pinthu n’nyumba mwathu.”

Sergey alonga: “Ndisakomerwa kakamwe na lemba ya Misangani 17:17 inalonga kuti: ‘Xamwali wandimomwene asakufuna ndzidzi onsene, pontho iye ndi m’bale m’midzidzi ya nyatwa.’ Ine ndakwanisa kuona undimomwene wa mafala anewa mu ndzidzi ukhatcingwa ife, thangwi ine nee ndikhakwanisa kuthimbana na pyenepi pyonsene ndekhene. Yahova andipasa axamwali akuti asandiphedza mwacipapo.” a

Mukupita kwa ndzidzi, ife tinathimbana na nyatwa zakunentsa kakamwe. Na thangwi ineyi, tinafuna axamwali akuti tisaanyindira. Mu ndzidzi wa nyatwa ikulu, tinadzafuna kakamwe axamwali anewa. Natenepa, uno ndi ndzidzi wakuwangisira toera kukhala xamwali wandimomwene!—1 Ped. 4:7, 8.