1, 2. Ninji cinafuna kudzagumanya anthu mwakudzumatirisa mu caka 2018, pontho thangwi yanji? (Onani cithundzithundzi cakutoma.)

NTSIKU 31 ya mwezi wa Março, caka 2018, pikwi na pikwi pya anthu pa dziko yonsene yapantsi anadzacita Cikumbuso cakuti cisacitwa kabodzi pacaka. Pakumala kubira kwa dzuwa, Mboni za Yahova na anthu anango anadzagumanyikana toera kukumbukira ntsembe idapereka Yezu kwa ife. Pyaka pyonsene, Cikumbuso ca kufa kwa Kristu cisagumanya anthu mwakudzumatirisa kakamwe kupiringana misonkhano inango yonsene inacitwa pa dziko.

² Yahova na Yezu asakomerwa kakamwe angaona pikwi na pikwi pya anthu pa dziko yonsene mbakacita Cikumbuso m’midzidzi yakusiyana-siyana. Bhibhlya isalonga ‘mwinji ukulu wa mitundu yonsene, wa madzindza onsene, wa mbumba zonsene, wa pilongero pyonsene,’ usakhuwa: ‘Cipulumuso cikhale kuli Mulungu wathu wakukhala pa mpando na kuli Mwanabira.’ (Apokalipse 7:​9, 10) Ndi pyakutsandzayisa kakamwe kudziwa kuti pyaka  pyonsene pa Cikumbuso, anthu azinji asapasa mbiri Yahova na Yezu thangwi ya pinthu pidacita iwo!

3. Ndi mibvundzo ipi inafuna kutawirwa mu nsolo uno?

³ Mu nsolo uno, imwe munadzagumana matawiro a mibvundzo minai: (1) Ndinakhunganyika tani toera kuphindula pa Cikumbuso? (2) Kodi Cikumbuso cisaphedza tani atumiki a Mulungu toera kukhala akuphatana? (3) Ndisafunika kucitanji toera kuphedzera kuphatana kwa atumiki a Mulungu? (4) Unadzafika ndzidzi wakucita Cikumbuso cakumalisa? Khala ndi tenepo, lini?

4. Thangwi yanji ndi pyakufunika kugumanika pa Cikumbuso?

⁴ Thangwi yanji ndi pyakufunika kwa ife kugumanika pa Cikumbuso? Thangwi ibodzi ndi yakuti kugumanika pa misonkhano ndi njira inalambira ife Yahova. Tiri na cinyindiro cakuti Yahova na Yezu asaona munthu onsene anawangisira toera kugumanika pa nsonkhano unoyu wakufunika kakamwe unacitwa kabodzi pacaka. Ife tisafuna Yahova na Yezu aone kuti tinadzagumanika pa Cikumbuso mwakukhonda tsalakana pinthu pyonsene pinafuna kutipingiza. Macitiro athu angapangiza kuti misonkhano ndi yakufunika kakamwe kwa ife, tisapasa mathangwi adidi Yahova toera apitirize kukoya madzina athu ‘m’bukhu yace ya cikumbuso.’ Bukhu ineyi isacemerwambo ‘bukhu ya umaso.’ Iri na madzina onsene a ale anafuna kupaswa umaso wakukhonda mala na Yahova.​—Malakiya 3:16; Apokalipse 20:15.

5. Masumana mangasi mbidzati fika ntsiku ya Cikumbuso, ‘munapitiriza tani kubvundzika khala muciri akuwanga mu cikhulupiro’?

⁵ Masumana mangasi mbidzati fika ntsiku ya Cikumbuso, ife tinakwanisa kusaka ndzidzi toera kuphembera na kunyerezera mwacidikhodikho khala uxamwali wathu na Yahova uciri wakuwanga. (Lerini 2 Akorinto 13:⁠5.) Mpostolo Paulu apanga Akristu: ‘Pitirizani kubvundzika khala muciri akuwanga mu cikhulupiro.’ Tinacita tani pyenepi? Tinakwanisa kubvundzika: ‘Kodi ndisakhulupiradi kuti iyi ndi gulu ibodzi basi idasankhula Yahova toera kucita cifuno cace? Ndisacita pyonsene pinakwanisa ine toera kumwaza mphangwa zadidi na kupfundzisa anango? Macitiro anga asapangiza kuti ndisakhulupira kuti tikukhala mu ntsiku zakumalisa, pontho utongi wa Sathani uli cifupi na kumala? Kodi ndisapitiriza kunyindira Yahova na Yezu ninga mu ndzidzi udatoma ine kutumikira Yahova?’ (Mateo 24:14; 2 Timoti 3:1; Ahebere 3:14) Kunyerezera matawiro a mibvundzo ineyi kunatiphedza toera ‘kupitiriza kudingika’ tekha.

6. (a) Ndi njira ipi ibodzi basi kwa ife toera kuwina umaso wakukhonda mala? (b) Nkulu wa mpingo unango akhakhunganyika tani Cikumbuso pyaka pyonsene na munatowezerambo tani citsandzo cace?

⁶ Njira ibodzi toera kukhunganyika Cikumbuso ndi kuleri na kunyerezera misolo inafokotoza kuti thangwi yanji Cikumbuso ndi cakufunika kakamwe. (Lerini Jwau 3:16; 17:3.) Njira ibodzi basi toera kuwina umaso  wakukhonda mala ndi kudziwa Yahova na kukhulupira Mwanace, Yezu. Toera kukhunganyika Cikumbuso, tinakwanisa kusankhula kupfundza mphangwa zakuti zinatiphedza kukhala cifupi na Yahova pabodzi na Yezu. Pyenepi ndi pidacita m’bale m’bodzi wakuti akhatumikira mu ndzidzi uzinji ninga nkulu wa mpingo. Mu pyaka pizinji, iye akhakoya misolo ya Ncenjezi inalonga pya Cikumbuso na ufuni unapangiza Yahova na Yezu kwa ife. Masumana mangasi mbidzati fika ntsiku ya Cikumbuso, iye akhaleri pontho misolo ineyi na kunyerezera mwadidi kufunika kwa Cikumbuso. Midzidzi inango iye akhathimizira nsolo ubodzi peno miwiri pa misolo inakoya iye. Iye asalerimbo na kunyerezera mwadidi malemba a Bhibhlya analonga pya Cikumbuso. Nkulu wa mpingo unoyu alonga kuti thangwi ya kucita pyenepi, akhapfundza pinthu pipswa pyaka pyonsene. Iye asapibvambo kuti pyenepi pisawangisa ufuni wace kwa Yahova na Yezu. Mungapfundza munjira ineyi, munadzafunambo kakamwe Yahova na Yezu. Munadzaperekambo takhuta kakamwe thangwi ya pidacita iwo na kuphindula kakamwe na Cikumbuso.

7. (a) Masiku adatomesa Yezu Cakudya Cancidodo ca Mbuya, alonganji m’phembero yace? (b) Ninji pinapangiza kuti Yahova atawira phembero ya Yezu?

⁷ Masiku adatomesa Yezu Cakudya Cancidodo ca Mbuya acita phembero yakupambulika. Iye aphembera pya mwai uli na iye wakukhala wakuphatana na Babace. Yezu aphemberambo kuti anyakupfundzace onsene asafunika kukhala akuphatana. (Lerini Jwau 17:20, 21.) Mwakukhonda penula, Yahova atawira phembero ineyi ya Mwanace wakufunika. Kupiringana misonkhano yonsene, Cikumbuso cisapangiza pakweca kuti Mboni za Yahova ndi zakuphatana. Pa ntsiku ineyi, pikwi na pikwi pya anthu a m’madziko na mitundu yakusiyana pa dziko yonsene anadzagumanyikana pabodzi toera kupangiza kuti asakhulupira kuti Yahova atuma Mwanace. M’mbuto zinango, anthu asapibva kuti nee ndi pyakuthema kwa anthu a mitundu yakusiyana kukhala a uphemberi ubodzi ene mbagumanyikana pabodzi. Mbwenye Yahova na Yezu nee asapibva tenepo. Kwa iwo, kugumanyikana kwathu pa Cikumbuso ndi kwakufunika kakamwe.

8. Ndi mphangwa zipi zidalonga Yahova kuna Ezekyeli?

⁸ Ninga atumiki a Yahova, nee tisadzumatirwa thangwi yakuphatana munjira ineyi. Yahova akhadalonga mwanyapantsi kuphatana kweneku kuna Ezekyeli. Iye apanga Ezekyeli toera akwate pimiti piwiri, cimuti cibodzi ca ‘Yuda’ na cinango ca ‘Zuze,’ pontho apigumanya toera pikhale cimuti cibodzi. (Lerini Ezekyele 37:15-17.) “Mibvundzo Inacitwa na Anyakuleri” inagumanika mu Ncenjezi wa Maluwa wa 2016 wafokotoza: “Kubulukira kwa mprofeta Ezekyeli, Yahova apikira kuti mbumba yace mbidabwerera ku Dziko Yakupikirwa, iyo mbidadzakhala pontho dzindza ibodzi basi. Profesiya ineyi yalongambo kuti ale analambira Mulungu mu ntsiku zakumalisa mbadadzakhalambo akuphatana ninga nsoka ubodzi.”

9. Kukwanirisika kwa profesiya ya Ezekyeli kusaoneka tani pakweca pyaka pyonsene?

⁹ Kutomera mu caka 1919, Yahova atoma kusasanyira paswa na kugumanya mwapang’ono-pang’ono Akristu akudzodzwa. Iwo akhali ninga cimuti ca “Yuda.” Buluka penepo, ale akhadikhira kukhala kwenda na kwenda pa dziko yapantsi atoma kuphatana na anyakudzodzwa. Anthu ali na cidikhiro cakukhala pa  dziko yapantsi ali ninga cimuti ca “Zuze.” Yahova apikira kugumanya pimiti pyenepi piwiri toera kukhala ‘cimuti cibodzi basi’ m’manja mwace. (Ezekyele 37:​19) Iye agumanya Akristu akudzodzwa na “mabira anango” mbakhala “nkumbi ubodzi.” (Jwau 10:​16; Zakariya 8:​23) Lero, misoka ineyi ndi yakuphatana na isatumikira Yahova pabodzi. Pontho iyo iri na Mambo m’bodzi, Yezu Kristu, ule akhacemera Mulungu mu profesiya ya Ezekyeli kuti ‘ntumiki wanga Dhavidhi.’ (Ezekyele 37:​24, 25) Pyaka pyonsene tingagumanyikana pa Cikumbuso toera kukumbukira kufa kwa Yezu, tisaona kuphatana kwa misoka ineyi miwiri ninga pikhadalonga Yahova kuna Ezekyeli. Mphapo tisafunika kucitanji toera kuphedzera kuphatana kwa atumiki a Mulungu?

10. Tinaphedzera tani kuphatana kwa atumiki a Mulungu?

¹⁰ Ndi njira ipi yakutoma yakuti tinakwanisa kuphedzera kuphatana kwa atumiki a Mulungu? Ndi kuwangisira kakamwe toera kukhala akucepeseka. Pikhali Yezu pa dziko yapantsi, apanga anyakupfundzace kuti asafunika kukhala akucepeseka. (Mateo 23:​12) Anthu azinji lero, kazinji kene asaona kuti ndi akufunika kakamwe kupiringana anango. Mbwenye tingakhala akucepeseka, tinalemedza abale anatsogolera mu gulu ya Yahova na kubvera pitsogolero pyawo. Natenepa mpingo unakwanisa kukhala wakuphatana. Kusiyapo pyonsene, tingakhala akucepeseka, tinakomeresa  Mulungu, thangwi iye ‘asaida anthu akudzikuza, mbwenye asapangiza kukoma ntima kuna akucepeseka.’​—1 Pedro 5:5.

11. Kunyerezera pinaimirira nkate na vinyu pinaphatisirwa pa Cikumbuso kunatiphedza tani toera kukhala akuphatana?

¹¹ Ndi njira ipi yaciwiri yakuti tinakwanisa kuphedzera kuphatana kwathu? Ndi kunyerezera mwacidikhodikho kuti nkate na vinyu pisaimiriranji. Tisafunika kucita pyenepi mbidzati fika ntsiku ya Cikumbuso, pontho makamaka ntsiku ya Cikumbuso. (1 Akorinto 11:23-25) Nkate wakusowa cakutupisa usaimirira manungo aungwiro adapereka Yezu ninga ntsembe. Vinyu yakufira isaimirira ciropa cace. Mbwenye tisafunika kucita pizinji kupiringana kudziwa basi ene mabvekero a pinthu pyenepi. Tisafunika kukumbuka kuti ntsembe ya ciomboli ya Yezu isaphataniza macitiro mawiri makulu a ufuni. Yahova apereka Mwanace kwa ife, pontho Yezu atawira kupereka umaso wace kwa ife. Tinganyerezera pya ufuni wawo, pinatikulumiza toera kuafunambo. Pontho ufuni wathu kwa Yahova unadzatimangirira pabodzi mbitikhala akuphatana mwakuwanga.

12. Mu nsangani unalonga pya mambo na anyabasace, Yezu abvekesa tani kuti Yahova asafuna tilekerere anango?

¹² Ndi njira ipi yacitatu yakuti tinakwanisa kuphedzera kuphatana kwathu? Ndi kulekerera anango na ntima onsene. Tingacita pyenepi, tinapangiza kuti tisapereka takhuta kakamwe na njira inatilekerera Yahova madawo athu thangwi ya ntsembe ya Yezu. Toera kupangiza thangwi yanji ndi pyakufunika kulekerera, Yezu alonga nsangani wa mambo na anyabasace. Lerini Mateo 18:​23-34, mbamubvundzika: ‘Ndiri dzololo toera kucita pidapfundzisa Yezu? Ndisatsalakana mwadidi abale na alongo, pontho ndisayesera kubvesesa mabvero awo? Ndiri dzololo toera kulekerera ale anandidawira?’ Ndimomwene kuti madawo anango ndi makulu kakamwe kupiringana anango. Ninga anthu akusowa ungwiro, pinakhala pyakunentsa kakamwe kwa ife toera kualekerera. Mbwenye nsangani wa Yezu usatipfundzisa kuti Yahova asafuna ticitenji. (Lerini Mateo 18:35.) Yezu abvekesa pyenepi kuti Yahova nee anadzatilekerera tingakhonda kulekerera abale athu khala atcunyuka na ntima onsene. Ceneci ndi cinthu cakufunika kakamwe toera kucinyerezera mwacidikhodikho. Toera kutsidzikiza kuphatana kwathu, tisafunika kulekerera anango ninga pidalonga Yezu.

13. Ninji cinafuna kutiphedza toera kulekerera anango?

¹³ Cinthu cibodzi cinafuna kutiphedza kulekerera anango ndi kukhala dzololo toera kukhazikisa ntendere. Mpostolo Paulu alonga kuti tisafunika kuwangisira kakamwe toera kukhala akuphatana na antendere. (Aefesi 4:3) Natenepa, ndzidzi wa Cikumbuso, nyerezerani mwadidi njira inatsalakana imwe anango. Bvundzikani: ‘Anthu onsene asadzindikira kuti nee ndiri wakuipirwa na anthu adandidawira? Iwo asakwanisa kuona kuti ndisawangisira kakamwe toera kukhazikisa ntendere na kuphedzera kuphatana kwathu?’ Ineyi ndi mibvundzo yakufunika kakamwe toera kuinyerezera.

14. Tinapangiza tani kuti ‘tisapirirana unango na ndzace mwaufuni’?

¹⁴ Ndi njira ipi yacinai yakuti tinakwanisa kuphedzera kuphatana kwathu? Ndi kutowezera Yahova mukupangiza ufuni. (1 Jwau 4:8) Ife nee tisafunika kulonga: “Ndisafunika kufuna abale anga, mbwenye nee ndisakomerwa nawo.” Mpostolo Paulu alemba pa Aefesi 4:2 kuti tisafunika ‘kupirirana unango na ndzace mwaufuni.’  Onani kuti Paulu nee alonga basi ene kuti tisafunika ‘kupirirana unango na ndzace’ mbwenye tisafunika kucita pyenepi ‘mwaufuni.’ Pyenepi ndi pinthu piwiri pyakusiyana. Mu mpingo, tisagumana anthu a mitundu yakusiyana-siyana. Yahova akwewa anthu anewa onsene mu gulu yace. (Jwau 6:44) Natenepa, iye ali na mathangwi adidi kakamwe toera kuafuna. Khala abale na alongo athu athema kufuniwa na Mulungu, ndife ani toera kulonga kuti iwo nee athema kufuniwa na ife? Tisafunika kubvera ntemo wa Yahova wakufuna abale athu.​—1 Jwau 4:20, 21.

15. Kodi Cikumbuso cakumalisa cinadzacitwa lini na tisadziwa tani pyenepi?

¹⁵ Ntsiku inango tinadzacita Cikumbuso cakumalisa. Tisadziwa tani pyenepi? Paulu apanga Akristu akudzodzwa kuti ndzidzi unakumbukira iwo kufa kwa Yezu pyaka pyonsene, ‘asadziwisa anango kufa kwa Mbuya, mpaka kubwera kwace.’ (1 Akorinto 11:26) Mu profesiya yace inalonga pya ndzidzi wakumalisa, Yezu alongambo pya ‘kubwera’ kwace. Mu profesiya yace inalonga pya nyatwa ikulu, Yezu alonga: ‘Penepo cinadzaoneka kudzulu cidzindikiro ca Mwana wa munthu. Anthu a madzindza onsene anadzadhima pacifuwa thangwi ya kutsukwala, iwo anadzaona Mwana wa munthu mbabwera m’makole na mphambvu na mbiri ikulu. Pontho iye anadzatuma aanju ace na matuluka akulira mwamphambvu. Iwo anadzagumanya anthu adasankhuliwa na iye kubulukira nkhomo zinai za mphepo na kunkhomo ibodzi ya thambo mpaka inango.’ (Mateo 24:29-31) Yezu ‘anadzagumanya anthu adasankhula iye’ mu ndzidzi unafuna kudzakwata iye Akristu onsene akudzodzwa aciri pa dziko yapantsi mbaenda nawo kudzulu. Pyenepi pinadzacitika nyatwa ikulu ingatoma, mbwenye mbidzati kutoma nkhondo ya Armajedhoni. Pa nkhondo ineyi, Yezu pabodzi na onsene akukwana 144.000, anadzamenyana na amambo a dziko yapantsi mbaakunda. (Apokalipse 17:12-14) Cikumbuso cinafuna kucitwa Yezu mbadzati ‘kubwera’ kudzagumanya anyakudzodzwa, cinadzakhala Cikumbuso cakumalisa.

16. Thangwi yanji muli wakutonga kugumanika pa Cikumbuso caka cino?

¹⁶ Khalani akutonga toera kudzagumanika pa Cikumbuso cinafuna kudzacitwa ntsiku 31 ya mwezi wa Março wa caka 2018. Pontho phembani ciphedzo ca Yahova toera mupitirize kuphedzera kuphatana kwa atumiki ace. (Lerini Masalmo 133:1.) Ntsiku inango, tinadzaenda ku Cikumbuso cakumalisa. Mbidzati fika ntsiku ineyi, tendeni tipangize kuti kugumanyikana kwathu pyaka pyonsene pa Cikumbuso ndi kwakufunika kakamwe kwa ife.