‘Iye Asapasa Mphambvu Anthu Akuneta’
Lemba Yathu ya Caka ca 2018: ‘Ale anadikhira Yahova anadzakhala pontho na mphambvu.’—IZAIYA 40:31.
1. Ndi nyatwa zipi zinango zinafunika ife kupirira, pontho thangwi yanji Yahova asakomerwa na atumiki ace angakhala akukhulupirika? (Onani cithundzithundzi cakutoma)
UMASO n’dziko ino ndi wakunentsa kakamwe. Mwacitsandzo, abale na alongo athu azinji asathimbana na utenda. Anango akuti ndi akugwesera asafunika kutsalakana acibale awo akukalamba. Anango asawangisira toera kutsalakana mabanja awo. Ife tisadziwa kuti azinji a imwe asathimbanambo na nyatwa zinango zizinji kupiringana zenezi ndzidzi onsene! Pyenepi pisaphemba ndzidzi uzinji, mphambvu na kobiri. Mbwenye mwandimomwene musanyindira kuti Yahova anadzakuphedzani. Imwe musadziwa kuti pinthu pyonsene pyakuipa pinadzamala thangwi iye apikira pyenepi. Tingakhulupira pyenepi Yahova anatsandzaya kakamwe!
2. Lemba ya Izaiya 40:29 isatiwangisa tani, pontho ndi manyerezero api akuphonyeka asakhala na anango?
2 Kodi midzidzi inango musapibva kuti nyatwa zinathimbana na imwe ndi zakunentsa kupirira? Khala musapibva tenepo dziwani kuti azinji asapibvambo munjira ibodzi ene. Atumiki akukhulupirika a Mulungu anango a mu ndzidzi wakale akhapibvambo 1 Amambo 19:4; Yobe 7:7) Ninji cidaaphedza toera kupitiriza kupirira? Iwo akhanyindira mphambvu za Yahova. Bhibhlya isalonga kuti Mulungu ‘asapasa mphambvu anthu akuneta.’ (Izaiya 40:29) Mwakutsukwalisa, lero atumiki anango a Mulungu asaona kuti njira yadidi toera kupirira nyatwa zinathimbana na iwo ndi kusiya kutumikira Yahova. Iwo asapibva kuti kutumikira Yahova ndi ntolo m’mbuto mwakuona ninga mwai. Natenepa iwo asasiya kuleri Bhibhlya, kugumanika pa misonkhano na kumwaza mphangwa. Pyenepi ndi pinafuna Sathani kwa iwo.
munjira ibodzi ene. (3. (a) Tisafunika kucitanji toera Sathani akhonde kutifewesa? (b) Tinadzadinganji mu nsolo uno?
3 Dyabo nee asafuna kuti ife tikhale akuwanga mwauzimu. Iye asadziwa kuti ife tisakhala akuwanga tingakhala akuphatika m’basa ya Yahova. Natenepa mungabva kuti mwaneta m’manungo na m’manyerezero, nee musafunika kusiya Yahova. Khalani cifupi na iye. Bhibhlya isalonga: ‘Iye anadzakuwangisani, anadzakupasani mphambvu.’ (1 Pedro 5:10; Tyago 4:8) Mu nsolo uno, tinapfundza luso ya Yahova toera kutiwangisa kubulukira pa lemba ya Izaiya 40:26-31. Buluka penepo tinadzadinga makhaliro mawiri akuti anakwanisa kupungula phinga yathu m’basa ya Yahova, pontho tinadzapfundzambo kuti kuphatisira midida ya Bhibhlya kunatiphedza tani toera kupirira nyatwa.
ALE ANADIKHIRA YAHOVA ANADZAKHALA PONTHO NA MPHAMBVU
4. Tisapfundzanji pa lemba ya Izaiya 40:26?
4 Lerini Izaiya 40:26. Nee munthu m’bodzi ali na luso yakulengesa nyenyezi zonsene ziri kudzulu. Asiyentista asakhulupira kuti panango ziripo nyenyezi zakupiringana mamiliyau 400 mu galaxia yathu. Mbwenye Yahova asapasa dzina nyenyezi ibodzi na ibodzi. Pyenepi pisatipfundzisanji thangwi ya Yahova? Khala iye asatsalakana nyenyezi zakuti nkhabe umaso, nyerezerani kuti iye asapibva tani thangwi ya imwe! Imwe musantumikira, tayu mwakukakamizika, mbwenye thangwi musanfuna na ntima onsene. (Masalmo 19:1, 3, 14) Baba wathu wakufunika asadziwa pinthu pyonsene thangwi ya imwe. Bhibhlya isalonga kuti ‘ngakhale tsisi yonsene ya mu nsolo mwanu yalengeswa’ na iye. (Mateo 10:30) Yahova asafuna tidziwe kuti iye ‘asadziwa nyatwa zonsene zinathimbana na munthu wakulungama.’ (Masalmo 37:18) Mwandimomwene, Yahova asaona nyatwa zonsene zinathimbana na imwe, pontho iye anakwanisa kukupasani mphambvu toera kupirira nyatwa zenezi.
5. Tisadziwa tani kuti Yahova anakwanisa kutipasa mphambvu?
5 Lerini Izaiya 40:28. Yahova ndi Phata ya mphambvu zonsene. Mwacitsandzo, onani mphambvu inapasa iye dzuwa. Nyakulemba pya siyensiya anacemerwa David Bodanis alonga kuti mu segundu ibodzi dzuwa isabulusa moto wamphambvu ninga wa mabhiliyau a mabhomba makulu. Nyakufufudza unango alonga kuti moto unabulusa dzuwa mu segundu ibodzi unakwana kwa anthu onsene pa dziko yapantsi mbusala unango toera kuphatisirwa mu pyaka 200.000! Mwandimomwene, Yahova wakuti asapasa mphambvu dzuwa, anakwanisambo kutipasa mphambvu toera kupirira nyatwa zathu.
6. Ndi munjira ipi goli ya Yezu ndi yakukhonda nentsa, pontho pyenepi pisatikhuya tani?
6 Lerini Izaiya 40:29, Tradução do Novo Mundo. Kutumikira Yahova kusatitsandzayisa kakamwe. Yezu apanga anyakupfundzace: ‘Kwatani goli yanga.’ Iye athimiza: ‘Munadzagumana ciwangiso. Goli yanga ndi yakukhonda nentsa, pontho pinakuphembani ine toera kukwata ndi pyakululupa.’ (Mateo 11:28-30) Pyenepi ndimomwenedi! Thangwi yakuneta, midzidzi inango pinakhala pyakunentsa kuenda ku misonkhano peno kamwaza mphangwa. Mbwenye tisabva tani tingabwerera kunyumba? Tisakhala na mphambvu, pontho tisakhala akukhunganyika mwadidi toera kuthimbana na nyatwa zathu. Mwandimomwene, goli ya Yezu ndi yakukhonda nentsa.
7. Perekani citsandzo cinapangiza undimomwene wa mafala anagumanika pa lemba ya Mateo 11:28-30.
7 Onani citsandzo ca mulongo m’bodzi. Iye asanentseka na utenda wakukhonda kuwanga unacitisa manungo kukhala akuneta kakamwe. Natenepa midzidzi inango pyenepi ndi pyakunentsa kwa iye toera kugumanika pa misonkhano. Mbwenye, ntsiku inango pidawangisira iye toera kugumanika pa misonkhano, alemba: “Nkhani ikhalonga pya kufewa manungo. Nkhani ineyi yacitwa mwadidi kakamwe, pontho yandicitisa kubulusa misozi. Pyenepi pyandipfundzisa kufunika kwakukhonda kudjomba misonkhano.” Mulongo unoyu atsandzaya kakamwe thangwi yakuwangisira kugumanika pa misonkhano!
8, 9. Kodi mpostolo Paulu akhafuna kubvekesanji mudalonga iye kuti: ‘Ndingafewa, penepo ndine wamphambvu’?
8 Lerini Izaiya 40:30. Panango tiri na maluso mazinji, mbwenye pinakhala pyakunentsa kucita pinango tekha. Ineyi ndi ntsonga yakufunika kakamwe kwa ife tonsene. Mpostolo Paulu akhakwanisa kucita pinthu pizinji, mbwenye nee akhakwanisa kucita pyonsene pikhafuna iye. Pidacita iye phembero kuna Yahova mbalonga mabvero ace, Yahova ampanga: ‘Mphambvu zanga zisapangizika pakufewa kwako.’ Paulu abvesesa pidampanga Yahova. Na thangwi yace iye alonga: ‘Ndingafewa, penepo ndine wamphambvu.’ (2 Akorinto 12:7-10) Kodi iye akhafuna kubvekesanji?
9 Paulu adzindikira kuti nee mbadakwanisa kucita pinthu pyonsene, iye akhafunambo ciphedzo. Natenepa nzimu wakucena ukhampasa mphambvu mu ndzidzi ukhafewa iye. Mbwenye nzimu wakucena ukhampasambo mphambvu toera kucita pinthu pizinji. Nzimu wa Mulungu ukhapasa mphambvu Paulu toera kucita pinthu pyakuti nee mbadakwanisa kupicita na mphambvu zace. Pyenepi pinacitikambo kuna ife lero. Yahova angatipasa nzimu wace wakucena, tinakhala na mphambvu kakamwe!
10. Kodi Yahova aphedza tani Dhavidhi toera kupirira nyatwa zace?
10 Nyamasalmo Dhavidhi aona nzimu wakucena wa Mulungu mbukampasa mphambvu kazinji kene. Iye aimba: ‘Na ciphedzo canu ndinakwanisa kuthamangisa anyamalwanga; na mphambvu za Mulungu ndinakwanisa kunumpha mpanda.’ (Masalmo 18:29) Ninga mpanda wakulapha wakuti nkhabe kwanisika kuunumpha, midzidzi inango nyatwa zathu ndi zikulu kakamwe zakuti nee tinakwanisa kuzimalisa tekha. Natenepa tisafunika ciphedzo ca Yahova.
11. Nzimu wakucena usatiphedza tani toera kupirira nyatwa zathu?
11 Lerini Izaiya 40:31. Nkhwazi nee zisaphatisira basi ene mphambvu zawo mu ndzidzi unakhala izo kudzulu. Mphepo isaphedza nkhwazi toera kumburuka kudzulu kakamwe. Pyenepi pisacitisa nkhwazi kumala ndzidzi uzinji mbikamburuka mwakukhonda phatisira mphambvu zizinji. Natenepa mu ndzidzi unathimbana imwe na nyatwa, nyerezerani pya nkhwazi. Phembani Yahova toera akupaseni ‘mphedzi, nzimu wakucena.’ (Jwau 14:26) Ife tinakwanisa kuphemba Yahova toera atipase nzimu wace ndzidzi onsene. Tisafunika kuphemba ciphedzo ca Yahova makamaka tingakhonda kubverana na abale peno alongo athu mu mpingo. Thangwi yanji midzidzi inango pyenepi pisacitika?
12, 13. (a) Thangwi yanji midzidzi inango pasaoneka kukhonda kubverana kwa Akristu? (b) Umaso wa Zuze usatipfundzisanji thangwi ya Yahova?
12 Kukhonda kubverana kusacitika thangwi tonsene ndife akusowa ungwiro. Midzidzi inango, panango tinaipirwa na pinthu pinalonga anango peno pinacita iwo, peno anango anaipirwambo na ife. Pyenepi pinakwanisa kukhala ciyeso kwa ife. Mbwenye pisatipasa mwai toera kukhala akukhulupirika kwa Yahova. Munjira ipi? Mukupfundza kuphata basa pabodzi na abale na alongo athu mwakubverana. Yahova asaafuna maseze ndi akusowa ungwiro, natenepa tisafunikambo kuafuna.
Yahova nee asiya Zuze, natenepa iye nee anakusiyanimbo (Onani ndima 13)
13 Yahova asatawirisa kuti atumiki ace athimbane na mayesero. Tisadziwa pyenepi kubulukira mu umaso wa Zuze. Pikhali Zuze m’phale, abale ace ancitira bibvu. Iwo an’gulisa ninga bitcu, mbaendeswa ku Ejitu. (Genesi 37:28) Yahova akhaona pyonsene pikhacitika pontho akhabva kupha muntima mwace pikhaona iye xamwali wace wakukhulupirika Zuze, mbakatsalakanwa mwakuipa. Ngakhale tenepo, Yahova nee apingiza toera pyenepi pikhonde kucitika. Mukupita kwa ndzidzi, pidapambizirwa Zuze kuti akhafuna kupita m’mabonde na nkazi wa Putifare mbaikhwa n’kaidi, Yahova nee apingiza toera pyenepi pikhonde kucitika. Kodi Mulungu akhadasiya Zuze? Nkhabe. Bhibhlya isalonga kuti ‘Yahova akhali na Zuze mbapasa nkhombo pyonsene pikhacita iye.’—Genesi 39:21-23.
14. Tisaphindula tani tingacalira kuipirwa na kukoya pinthu muntima?
14 Citsandzo cinango ndi ca Dhavidhi. Nee ndi azinji adatsalakanwa mwakuipa kakamwe ninga Dhavidhi. Ngakhale tenepa, ninga xamwali wa Mulungu nee atawirisa Masalmo 37:8) Thangwi ikulu inaticitisa ‘kukhonda kuipirwa’ ndi yakuti tisafuna kutowezera Yahova. Iye ‘nee asatitsalakana mwakubverana na madawo athu,’ mbwenye asatilekerera. (Masalmo 103:10) Kucalira kuipirwa na kukoya pinthu muntima kunatiphedza toera kukhala na ungumi wadidi. Mwacitsandzo, kuipirwa kusacitisa kuti ciropa cikhonde kufamba mwadidi na kukhonda puma mwadidi. Kuipirwa kunacitisambo munthu kukhala na utenda wa pâncreas na wa fafa. Tingaipirwa pinakhala pyakukhonda nentsa kucita cisankhulo cakuipa. Pontho, tingakhala akuipirwa ndzidzi uzinji tinalonga peno kucita pinthu pyakuti pinadzidzida andzathu. M’mbuto mwakukhala akuipirwa kakamwe mphyadidi kukhala akukhurudzika. Bhibhlya isalonga: ‘Ntima wakupfulika ndi umaso wa munthu.’ (Misangani 14:30) Mphapo tinacitanji khala anango atidzidzida, pontho tinakhazikisa tani ntendere na iwo? Tinakwanisa kuphatisira uphungu wa Bhibhlya.
kutsogolerwa na kuipirwa kwace. Iye alemba: ‘Leka kuipirwa, calira ukali; pontho leka kucita pinthu pyakuipa.’ (TINGATSUKWALISWA NA ABALE ATHU
15, 16. Tisafunika kucitanji khala m’bale peno mulongo atitsukwalisa?
15 Lerini Aefesi 4:26, NM. Ife nee tisadzumatirwa tingatsalakanwa mwakuipa na anthu akuti nee asatumikira Yahova. Mbwenye panango tisatsukwala khala m’bale peno mulongo, peno wacibale wathu alonga peno aticitira pinthu pyakuipa. Munacitanji mungatsalakanwa munjira ineyi? Munamulekerera mbamuduwala pidacitika peno munapitiriza kukoya pinthu muntima? Khala nee musakwanisa kuduwala pidacitika, musafunika kutowezera midida ya Bhibhlya na kukhazikisa ntendere mwakucimbiza. Tingakhala ndzidzi uzinji mbitikhonda kucedza mwakucimbiza na munthu adaipirwa na ife pinadzakhala pyakunentsa kakamwe kukhazikisa ntendere.
16 Nyerezerani kuti mwatsukwaliswa na m’bale pontho nee musakwanisa kumulekerera. Munacitanji toera kukhazikisa ntendere? Cakutoma, citani phembero kuna Yahova. Dembeterani kuna iye toera akuphedzeni kucedza mwadidi na m’bale wanu. Kumbukani kuti m’bale wanu ndi xamwalimbo wa Yahova. (Masalmo 25:14) Mulungu asafuna axamwali ace na asaatsalakana mwakukoma ntima, pontho asadikhira kuti ticitembo pibodzi pyene. (Misangani 15:23; Mateo 7:12; Akolose 4:6) Caciwiri, nyerezerani mwadidi pinafuna imwe kalonga kuna m’bale wanu. Lekani kunyerezera kuti iye akutsukwalisani mwakufuna. Panango akhadadodomeka peno imwe mwabva mwakuphonyeka. Tawirani kuti imwe mwadawambo. Panango munatomesa makani mukulonga tenepa: “Panango ine ndaipirwa mwakucimbiza kakamwe, mbwenye pidalonga imwe dzulo, ine ndapibva . . . ” Khala pidacedza imwe nee pyaphedza toera kukhazikisa ntendere na m’bale wanu, yeserani ulendo unango. Citani phembero thangwi ya iye. Phembani Yahova toera ampase nkhombo, pontho akuphedzeni toera kuona makhaliro ace adidi. Munakwanisa kukhala na cinyindiro cakuti Yahova anadzakomerwa na kuwangisira kwanu toera kukhazikisa ntendere na m’bale wanu, wakuti ndi m’bodzi mwa axamwali ace.
TINGAPASIKA MULANDO THANGWI YA PINTHU PIDACITA IFE NDULI
17. Yahova asaphedza tani munthu adacita madawo makulu? (b) Thangwi yanji tisafunika kutawira ciphedzo ca Yahova mwakucimbiza?
17 Anango adacita madawo makulu asapibva kuti nee athema kutumikira Yahova. Masalmo 32:3-5) Khala mwacita madawo makulu, Yahova ali dzololo toera kukulekererani. Iye asafuna kukuphedzani kusasanyira pontho uxamwali wanu na iye. Mbwenye musafunika kutawira ciphedzo cinapereka iye kubulukira kwa akulu a mpingo. (Misangani 24:16; Tyago 5:13-15) Natenepa tawirani ciphedzo ceneci mwakucimbiza. Umaso wanu wakukhonda mala usanyindira pyenepi. Mphapo ndiye tani khala mwalekererwa madawo anu, mbwenye musapitiriza na mabvero akupasika mulando? Munacitanji?
Mabvero anewa anaticitisa kuluza ntendere, kutsandzaya na mphambvu zathu. Mambo Dhavidhi akhathimbana na mabvero akupasika mulando mbalonga: ‘Pikhakhonda ine kubweka madawo anga, magogodo anga akhadamala mphambvu thangwi yakulira ntsiku zonsene. Djanja yanu ikhandilemera masiku na masikati.’ Mbwenye Dhavidhi akwanisa kuthimbana na nyatwa ineyi thangwi akhali wakukola mwauzimu. Iye alemba: ‘Pakumalisa ndabweka madawo anga, pontho mwandilekerera madodo na madawo anga.’ (18. Citsandzo ca Paulu cinaphedza tani anthu ali na mabvero akupasika mulando?
18 Midzidzi inango mpostolo Paulu akhadafewa manungo thangwi akhadzudzumika na madawo adacita iye kale. Iye alonga: ‘Ine ndine wang’ono mwa apostolo, pontho nee ndathema kuthulwa mpostolo, thangwi ndikhatcinga mpingo wa Mulungu.’ Ndi thangwi yace iye alemba: ‘Mbwenye thangwi yakukoma ntima kwa Mulungu ndiri ninga munandionera imwe.’ (1 Akorinto 15:9, 10) Yahova akhadziwa kuti Paulu akhali wakusowa ungwiro. Mbwenye iye akhanfuna, pontho akhafuna kuti Paulu adziwe pyenepi. Kodi mwatcunyukadi madawo anu? Mwaabweka kuna Yahova na kuna akulu a mpingo? Mungacita pyenepi, Yahova anakulekererani. Khulupirani kuti iye anakulekererani, pontho tawirani kulekererwa na iye!—Izaiya 55:6, 7.
19. Ndi ipi lemba ya caka 2018, pontho thangwi yanji ndi yakufunika?
19 Nakuti tikukhala mu ntsiku zakumalisa, tisadikhira kuthimbana na nyatwa zizinji. Mbwenye tisafunika kukumbuka kuti Yahova, ‘asapasa mphambvu anthu akuneta pontho asapasa mphambvu ale adazisowa,’ munakwanisa kupereka pyonsene toera kupitiriza kuntumikira mwakukhulupirika. (Izaiya 40:29; Masalmo 55:22; 68:19) Ndzidzi onsene tingapita mu Nyumba ya Umambo mu caka 2018, tinadzakumbuka cinthu cakufunika kakamwe: ‘Ale anadikhira Yahova anadzakhala pontho na mphambvu.’—Izaiya 40:31.
Yahova anakwanisa kukupasani mphambvu toera kupirira nyatwa zanu