NSOLO WA PFUNDZIRO 1
‘Leka Kudzudzumika, Thangwi Ine Ndine Mulungu Wako’
‘Leka gopa pinthu tayu, ine ndinakhala na iwe! Leka kudzudzumika, thangwi ine ndine Mulungu wako! Ndinakuwangisa mbandikuphedza.’—IZA. 41:10.
NYIMBO 7 Yahova Ndi Mphambvu Yathu
PINAFUNA IFE KUPFUNDZA *
1-2. (a) Kodi mafala anagumanika pa lemba ya Izaiya 41:10 aphedza tani mulongo Yoshiko? (b) Yahova acitisa kuti mafala anewa alembwe toera kuphedza ani?
MULONGO wakukhulupirika akhacemerwa Yoshiko atambira mphangwa zakutsukwalisa. Dotoro wace ampanga kuti iye asala na miyezi yakucepa toera afe. Kodi iye acitanji? Mulongo Yoshiko akumbuka vesi yace ya pantima ya Izaiya 41:10. (Lerini.) Buluka penepo iye apanga dotoro wace mwakukhurudzika kuti nee akhagopa thangwi akhanyindira ciphedzo ca Yahova. * Mafala acibalangazo adagumana iye pa lemba ineyi am’phedza toera kunyindira Yahova na ntima wace onsene. Lemba ineyi inatiphedzambo toera kukhala akukhurudzika tingathimbana na nyatwa. Toera kubvesesa kuti vesi ineyi inatiphedza tani, pakutoma tendeni tione kuti thangwi yanji Mulungu alonga mafala anewa kuna Izaiya.
2 Pakutoma, Yahova apanga Izaiya kuti alembe mafala anewa toera kubalangaza Ayuda akhafuna kuendeswa ku ubitcu ku Bhabhilonya. Yahova acitisa kuti mafala anewa alembwe, tayu basi ene toera kuphedza Ayuda akhafuna kuendeswa ku ubitcu, mbwenye toera kuphedzambo atumiki ace onsene. (Iza. 40:8; Aroma 15:4) Nakuti lero tikukhala ‘m’midzidzi yakugopswa na yakunentsa kupirira,’ ndi thangwi yace tisafuna kakamwe cibalangazo cinagumanika m’bukhu ya Izaiya.—2 Tim. 3:1.
3. (a) Mwakubverana na lemba ya caka 2019, ndi api mapikiro anagumanika pa Izaiya 41:10? (b) Thangwi yanji mapikiro anewa ndi akufunika kakamwe kwa ife?
3 Mu nsolo uno tinapfundza mapikiro matatu akutsandzayisa adacita Yahova anagumanika pa lemba ya Izaiya 41:10: (1) Yahova anakhala na ife, (2) iye ndi Mulungu wathu na (3) iye anatiphedza. Mapikiro * anewa ndi akufunika kakamwe kwa ife thangwi ninga mulongo Yoshiko, ife tisathimbanambo na nyatwa zizinji mu umaso. Mbwenye tisafunika kupirira nyatwa zenezi. Anango a ife asapirira angatcingwa na mautongi. Natenepa tendeni tipfundze ibodzi na ibodzi mwa mapikiro anewa matatu.
“INE NDINAKHALA NA IWE”
4. (a) Ndi pikiro ipi yakutoma inafuna ife kupfundza? (Onanimbo cidzindikiro capantsi.) (b) Kodi Yahova asapangiza tani kuti asatifuna? (c) Mafala adalonga Mulungu asakukhuyani tani?
4 Pakutoma Yahova asatibalangaza na mafala awa: “Leka gopa pinthu tayu, ine ndinakhala na iwe!” * Yahova asapangiza kuti ali na ife thangwi iye asatitsalakana. Onani kuti iye asapangiza tani ufuni na citsalakano cace kuna ife. Yahova alonga: ‘Ndiwe wakufunika pamaso panga. Ndinakufuna mbandikulemedza.’ (Iza. 43:4) Nkhabepo cinthu kudzulu peno pa dziko yapantsi cinafuna kucitisa Yahova kusiya atumiki ace; thangwi ndzidzi onsene iye ndi wakukhulupirika kwa ife. (Iza. 54:10) Ufuni na uxamwali unapangiza iye kuna ife usaticitisa kukhala acipapo. Lero iye asatitsidzikiza ninga mudacitira iye xamwali wace Abhramu (Abhrahamu). Yahova ampanga: ‘Leka gopa, Abhramu. Ine ndine mbvunuliri wako.’—Gen. 15:1.
Na ciphedzo ca Yahova ife tinakwanisa kukunda nyatwa zakulandana na mikulo ya madzi akuzika na moto (Onani ndima 5-6) *
5-6. (a) Tisadziwa tani kuti Yahova anatiphedza tingathimbana na nyatwa? (b) Tisapfundzanji na citsandzo ca mulongo Yoshiko?
5 Ife tisadziwa kuti Yahova anatiphedza tingathimbana na nyatwa thangwi iye apikira kuna m’bodzi na m’bodzi wa atumiki ace kuti: ‘Ungawambuka mikulo ya madzi akuzika, ine ndinakhala na iwe, nee unainjipirwa na pyakugopswa. Ungapita pamoto, nee unapya, nyatwa zikulu zinafuna kudza, zinakupisa tayu.’ (Iza. 43:2) Mafala anewa asabvekanji?
6 Yahova nee apikira kumalisa nyatwa zinathimbana na ife cincino mwacirengo, mbwenye apikira kutitsidzikiza toera tikhonde kuririma ‘m’mikulo’ ya nyatwa peno tikhonde kupiswa na “moto” wa mayesero. Iye asapikira kuti anakhala na ife, mbatiphedza toera ‘kukunda’ mayesero anewa. Mphapo Yahova anacita tani pyenepi? Iye anatiphedza toera tipitirize kukhala akukhulupirika, maseze tithimbane na nyatwa mpaka kufa. (Iza. 41:13) Mulongo Yoshiko, adalongwa pakutoma adzindikira undimomwene unoyu. Mwanace wankazi alonga: “Ife tadzumatirwa kakamwe na kukhurudzika kwa Mama. Ife tadzindikira kuti ndi Yahova akham’phedza toera akhale wakukhurudzika. Ngakhale ntsiku idafa Mama, iye alonga thangwi ya mapikiro a Yahova kuna akonzi na atenda anango.” Tisapfundzanji na citsandzo ca mulongo Yoshiko? Tinganyindira pikiro ya Mulungu yakuti “ine ndinakhala na iwe,” tinakhalambo amphambvu na acipapo tingathimbana na nyatwa.
‘INE NDINE MULUNGU WAKO’
7-8. (a) Ndi pikiro ipi yaciwiri inafuna ife kupfundza, pontho pikiro ineyi isabvekanji? (b) Thangwi yanji Yahova apanga Ayuda akhali ku ubitcu kuti: ‘Lekani kudzudzumika’? (c) Kodi mafala anagumanika pa Izaiya 46:3, 4 aphedza tani atumiki a Mulungu akhali ku ubitcu toera akhale akukhurudzika?
7 Onani pikiro yaciwiri idalemba Izaiya: ‘Leka kudzudzumika, thangwi ine ndine Mulungu wako.’ Kodi fala yakuti kudzudzumika isabvekanji? Fala idathumburuzwa ‘kudzudzumika’ pa vesi ineyi mu cilongero cakutoma inakwanisa kubveka “kusuzumira na paphewa cinthu cakuipa cinafuna kucitika” peno “kuyang’ana pinacitika n’khundu mwanu ninga pinacita munthu angakhala pa mbuto yakugopswa.”
8 Thangwi yanji Yahova apanga Ayuda akhafuna kuendeswa ku ubitcu ku Bhabhilonya toera akhonde ‘kudzudzumika’? Thangwi iye akhadziwa kuti anthu akhafuna kukhala n’dziko ineyi mbadagopa. Ninji cikhafuna kuacitisa kugopa? Kunkhomo kwa pyaka 70 pya ubitcu ku Bhabhilonya, Yahova mbadaphatisira anyankhondo amphambvu a ku Medhya na Persya toera kukunda Bhabhilonya na kubulusa Ayuda mu ubitcu. (Iza. 41:2-4) Mu ndzidzi ukhafika anyamalwa, Abhabhilonya na anthu a madzindza anango akhafunika kubalangazana unango na ndzace mukulonga: ‘Khala wacipapo.’ Pontho iwo acita madzimunthu a alungu mbanyerezera kuti alungu anewa mbadaatsidzikiza. (Iza. 41:5-7, Tradução do Novo Mundo da Bíblia Sagrada) Mu ndzidzi unoyu, Yahova acitisa kuti mitima ya Ayuda akhali ku ubitcu ikhale yakukhurudzika. Iye alonga: ‘Iwe, Izraeli [mwakusiyana na madzindza anango] ndiwe ntumiki wanga, leka kudzudzumika, thangwi ine ndine Mulungu wako.’ (Iza. 41:8-10) Onani pidalonga Yahova: ‘Ine ndine Mulungu wako.’ Na mafala anewa, Yahova apasa cinyindiro alambiri ace akukhulupirika kuti iwo nee aaduwala—iye akhapitiriza kukhala Mulungu wawo, pontho iwo akhali mbumba yace. Natenepa iye aapanga: ‘Ine ndinakuphedzani mbandikupulumusani.’ Mwakukhonda penula, mafala anewa awangisa kakamwe Ayuda akhali ku ubitcu.—Lerini Izaiya 46:3, 4.
9-10. Thangwi yanji ife nee tisafunika kugopa? Perekani citsandzo.
9 Mwakusiyana na kale, lero anthu asadzudzumika kakamwe thangwi yakuthimizirika kwa makhaliro akuipa pa dziko. Ndimomwene kuti ife tisakhuyiwambo na nyatwa zenezi. Mbwenye nee tisafunika kugopa. Yahova asatipanga: ‘Ine ndine Mulungu wanu.’ Kodi mafala anewa asatiphedza tani toera kukhala akukhurudzika?
10 Toera kubvesesa mwadidi nyerezerani kuti Djimu na Bheni akucita ulendo na ndeka, mbwenye ndeka ineyi ikukwatika na mphepo. Mu ndzidzi unakwatika iyo, nyakutekenya ndeka akhuwa mbalonga: “Lekani kudula masintu acitsidzikizo. Ife tinanentseka na mphepo mu mphindi zingasi.” Djimu akugopa kakamwe. Buluka penepo nyakutekenya ndeka athimiza: “Lekani kudzudzumika, analonga ndine anatekenya.” Mu ndzidzi unoyu Djimu asukusa nsolo wace mbalonga: “Ndi ntundu wanji wacibalangazo unoyu?” Mbwenye iye aona kuti Bheni nee akudzudzumika. Natenepa iye ambvundza: “Thangwi yanji nee ukudzudzumika?” Bheni amwetulira mbalonga: “Thangwi ndisandziwa mwadidi nyakutekenya ndeka unoyu. Iye ndi babanga!” Buluka penepo Bheni alonga: “Dikhira ndikupange pya babanga. Ungadziwa maluso ace na pinacita iye, iwe nee unagopabve.”
11. Tisapfundzanji na citsandzo ca anyakucita ulendo awiri?
11 Tisapfundzanji na citsandzo ceneci? Ninga Bheni, ife nee tisafunika kudzudzumika thangwi tisadziwa mwadidi Babathu wakudzulu, Yahova. Ife tisadziwambo kuti maseze nyatwa zathu zinjipe, iye anatiphedza toera tikwanise kupirira mu ntsiku zino zakumalisa za makhaliro ano a dziko. (Iza. 35:4) Tinganyindira Yahova, tinakwanisa kukhala akukhurudzika mu ndzidzi wakuti n’dziko anthu akugopa kakamwe. (Iza. 30:15) Pontho tisafunika kutowezera Bheni mukupanga anango pinaticitisa kunyindira Mulungu. Pyenepi pinaaphedzambo toera kunyindira Yahova mu ndzidzi unathimbana iwo na nyatwa.
“NDINAKUWANGISA MBANDIKUPHEDZA”
12. (a) Ndi pikiro ipi yacitatu inafuna ife kupfundza? (b) Mafala anewa asatikumbusanji thangwi ya Yahova?
12 Onani pikiro yacitatu idalemba Izaiya: “Ndinakuwangisa mbandikuphedza.” Izaiya akhadalonga kale kuti Yahova asawangisa tani, pontho asaphedza tani atumiki ace, mbalonga: ‘Yahova akubwera toera kudzatonga na mphambvu zace.’ (Iza. 40:10) Mafala anewa asatikumbusa kuti Yahova ndi Ntongi wamphambvu. Mu ndzidzi wakale, iye aphatisira mphambvu zace zonsene toera kutsidzikiza atumiki ace, pontho lero asaziphatisirambo toera kutsidzikiza ale anan’nyindira.—Deut. 1:30, 31; Iza. 43:10.
Na ciphedzo ca Yahova, pida pyonsene pinacimwana kutilasa (Onani ndima 12-16) *
13. (a) Ndi ndzidzi upi unakwanirisa Yahova pikiro yace toera kutiwangisa? (b) Ndi pikiro ipi yakuti isatipasa mphambvu na cinyindiro?
13 Yahova asakwanirisa pikiro yace yakuti ‘anatiwangisa’ makamaka m’midzidzi inatcingwa ife. Makhundu anango a dziko lero, anyamalwa athu asayesera kupingiza basa yathu yakumwaza mphangwa peno kufudza gulu yathu. Ngakhale tenepo, ife nkhabe dzudzumika kakamwe na pyenepi. Yahova asatipasa cinyindiro cakuti anatipasa mphambvu. Iye alonga: ‘Pida pyonsene pinacimwana kukulasani.’ (Iza. 54:17) Mafala anewa asatikumbusa ntsonga zitatu zakufunika.
14. Thangwi yanji nee tisadzudzumika anyamalwa a Mulungu angatitcinga?
14 Ntsonga yakutoma, ninga atowereri a Kristu ife tisadikhira kutcingwa. (Mat. 10:22) Yezu alongeratu kuti anyakupfundzace mbadatcingwa kakamwe mu ntsiku zakumalisa. (Mat. 24:9; Juw. 15:20) Ntsonga yaciwiri, profesiya ya Izaiya isaticenjeza kuti anyamalwa athu anacita pizinji kupiringana kutiida, pontho iwo anaphatisira pida pyakusiyana-siyana toera kutikunda. Pida pyenepi pisaphataniza mayesero akukhonda kuoneka mwadidi, kupambizirwa, ngakhale kutcingwa. (Mat. 5:11) Yahova nee anakhondesa anyamalwa anewa toera akhonde kuphatisira pida pyenepi. (Aef. 6:12; Apok. 12:17) Mbwenye nee tisafunika kugopa. Thangwi yanji?
15-16. (a) Ndi ntsonga ipi yacitatu inafunika ife kukumbuka, pontho lemba ya Izaiya 25:4, 5 isaphedzera tani maonero anewa? (b) Lemba ya Izaiya 41:11, 12 isalonganji thangwi ya pinafuna kucitikira ale anatitcinga?
15 Onani ntsonga yacitatu inafunika ife kukumbuka. Yahova alonga kuti “pida pyonsene” pinaphatisirwa toera kutikunda ‘pinacimwana kutilasa.’ Ninga mpanda usatitsidzikiza ku condzi cikulu, Yahova asatitsidzikizambo ‘ku ukali wa anthu akuipa.’ (Lerini Izaiya 25:4, 5.) Cipo anyamalwa athu anawina thangwi Yahova ndzidzi onsene ali na ife.—Iza. 65:17.
16 Toera tipitirize kunyindira Yahova, iye asatipanga pinafuna kucitikira ‘onsene ale anatitcinga.’ (Lerini Izaiya 41:11, 12.) Anyamalwa anacita pyonsene pinakwanisa iwo toera kutitcinga, mbwenye mamalisiro ace ndi mabodzi ene: Anyamalwa onsene a Mulungu ‘anadzafa.’
TINATHIMIZIRA TANI KUNYINDIRA KWATHU YAHOVA
Ife tinakwanisa kuthimizira kunyindira kwathu Yahova tingaleri Bhibhlya ntsiku zonsene (Onani ndima 17-18) *
17-18. (a) Thangwi yanji kuleri Bhibhlya kusatiphedza toera kunyindira kakamwe Mulungu? Perekani citsandzo. (b) Thangwi yanji kunyerezera mwacidikhodikho lemba ya caka 2019 kunatiphedza?
17 Khala tisafuna kunyindira Yahova na ntimathu onsene, tisafunika kundziwa mwadidi. Njira yadidi kakamwe toera kudziwa Mulungu ndi kuleri Bhibhlya na kunyerezera mwacidikhodikho pinaleri ife. Bhibhlya iri na pitsandzo pizinji pinapangiza kuti Yahova atsidzikiza tani atumiki ace a ndzidzi wakale. Kuleri pitsandzo pyenepi kunatipasa cinyindiro cakuti iye anatitsalakanambo ntsiku zino.
18 Onani citsandzo cadidi cidaphatisira mprofeta Izaiya toera kulonga njira inatitsidzikizira Yahova. Iye alonga kuti Yahova ndi ninga nkumbizi, atumiki ace ninga mabira. Izaiya alonga thangwi ya Yahova: ‘Iye anagumanya mabira pabodzi pene, mbaatsogolera.’ (Iza. 40:11) Tingatsogolerwa na Yahova nee tinadzudzumika thangwi tisakhala akutsidzikizika. Toera kutiphedza kupitiriza kukhala akukhurudzika tingathimbana na nyatwa, m’bandazi wakukhulupirika na wandzeru asankhula lemba ya Izaiya 41:10 toera ikhale lemba ya caka 2019, ‘Leka kudzudzumika, thangwi ine ndine Mulungu wako.’ Nyerezerani mwacidikhodikho pikiro ineyi thangwi iyo inakuphedzani toera mukwanise kupirira nyatwa za ntsogolo.
NYIMBO 38 Mulungu Anadzakupasani Mphambvu
^ ndima 5 Lemba ya caka 2019 isatipasa mathangwi matatu toera tikhale akukhurudzika pinthu pyakuipa pingacitika n’dziko peno pingaticitikira. Kudziwa mathangwi anewa kunatiphedza toera tinyindire Yahova mbitikhonda kudzudzumika kakamwe. Nyerezerani mwacidikhodikho lemba ya caka. Mungakwanisa ikoyeni mu nsolo, thangwi inakuphedzani mungathimbana na nyatwa ntsogolo.
^ ndima 1 Onani Ncenjezi wa Maluwa wa 2016, tsa. 18.
^ ndima 3 MABVEKERO A MAFALA ANANGO: Pikiro ndi dumbiro inacita munthu toera kupangiza kuti pinalonga iye pinacitikadi. Mapikiro adacita Yahova asatiphedza toera tikhonde kudzudzumika kakamwe na nyatwa zakuti panango zinatigwera.
^ ndima 4 CIDZINDIKIRO CAPANTSI: Mafala akuti “Leka gopa” asagumanika m’maulendo matatu pa Izaiya 41:10, 13 na 14. Pontho mavesi anewa kazinji kene asalonga fala yakuti “ine” (toera kulonga Yahova). Thangwi yanji Yahova acitisa Izaiya kulemba fala yakuti “ine” kazinji kene? Toera kugomezera ntsonga yakufunika—ife nee tinadzudzumika kakamwe tinganyindira Yahova.
^ ndima 52 PITHUNDZITHUNDZI: Anthu a banja ibodzi ene akuthimbana na nyatwa kubasa, nyatwa za ungumi, pakumwaza mphangwa na kuxikola.
^ ndima 54 PITHUNDZITHUNDZI: Apolixa adzudzumisa nsonkhano wa Mboni za Yahova ukhacitwa pa nyumba ya m’bale, mbwenye abale na alongo apitiriza kukhala akukhurudzika.
^ ndima 56 PITHUNDZITHUNDZI: Kucita Kulambira Kwa Banja masumana onsene kusatipasa mphambvu toera kupirira.
