NCITATU namacibese, ntsiku 24 ya Janeiro ya 2018, ku Bheteli ya Kanadha na ya ku Estados Unidos kwacitwa cidziwiso cakupambulika: M’bale Kenneth Cook Jr. akhazikiswa ninga m’bodzi wa Mathubo Akutonga a Mboni za Yahova.

M’bale Kenneth abalwa, pontho akulira mu nzinda wa Pensilvânia, EUA. Mu ndzidzi udapfundziswa iye undimomwene na ndzace wakuxikola, iye akhadasala pang’ono toera kumalisa xikola. M’bale Kenneth abatizwa ntsiku 7 ya Junho ya 1980, pontho atoma kutumikira ninga mpainiya wa ndzidzi onsene pa ntsiku 1 ya Setembro ya 1982. Pakupita pyaka piwiri mbakatumikira ninga mpainiya, iye aphembwa toera aende katumikira ku Bheteli ya ku Wallkill, Nova York. Iye afika kweneku pa ntsiku 12 ya Outubro ya 1984.

Mu pyaka 25, m’bale Kenneth akhali na mwai wakuphedzera basa Yakudhinda mabukhu na Ofesi inatsalakana Bheteli. Iye amanga banja na mulongo Jamie mu caka 1996, pontho iye atomambo kuphata basa ku Bheteli ya Wallkill. Mwezi wa Dezembro wa 2009, m’bale Kenneth na mulongo Jamie acinjwa mbaendeswa ku Centro Educacional da Torre de Vigia ku Patterson, Nova York. Kweneku, m’bale Kenneth asankhulwa toera aphate basa mu Dhepartamentu Inatambira na Kutawira Matsamba. Buluka penepo, mu ndzidzi ungasi, banja ineyi yabwerera pontho ku Wallkill. Mbwenye mwezi wa Abril wa 2016, iwo acinjwa mbaendeswa ku Brooklyn, Nova York. Pakupita miyezi mixanu, m’bale Kenneth na nkazace Jamie afulukambo pabodzi na banja ya Bheteli mbaenda ku ofesi inaonera basa inacitwa pa dziko yonsene yapantsi ku Warwick, Nova York. Mwezi wa Janeiro wa 2017, m’bale Kenneth akhazikiswa ninga m’bodzi wa anyakuphedza a Komiti ya Mathubo Inayang’anira Basa Yakulemba Mabukhu.