1. Ndi pinthu pipi pidalonga Yahova pyakuti pisacitika lero?

YAHOVA akhadalonga mwanyapantsi thangwi ya pinthu pinacitika lero kuti: ‘Amuna khumi a pilongero pya madzindza onsene anadzaphata mwakuwanga nguwo ya Muyuda mbampanga: Ife tisafunambo kuenda pabodzi na imwe, thangwi tabva kuti Mulungu ali na imwe.’ (Zak. 8:23) ‘Muyuda’ analongwa pa vesi ineyi asaimirira ale adadzodzwa na Mulungu mukuphatisira nzimu wace wakucena. Iwo asacemerwambo “Izraeli wa Mulungu.” (Agal. 6:16) ‘Amuna khumi’ asaimirira ale anafuna kukhala pa dziko yapantsi kwenda na kwenda. Iwo asadziwa kuti Yahova asankhula nsoka unoyu wa Akristu akudzodzwa, pontho asaona kuti ndi nkhombo kulambira Yahova pabodzi na iwo.

2. Kodi ‘amuna khumi’ asaenda tani pabodzi na Akristu akudzodzwa?

² Maseze ndi pyakunentsa kudziwa m’bodzi na m’bodzi wa Akristu akudzodzwa lero, * mbwenye ale anafuna kukhala pa dziko yapantsi anakwanisa ‘kuenda pabodzi’ na iwo. Munjira ipi? Bhibhlya isalonga kuti ‘amuna khumi’ mbadaphata ‘mwakuwanga nguwo ya Muyuda mbampanga: Ife tisafunambo kuenda pabodzi na imwe, thangwi tabva kuti Mulungu ali na imwe.’ Vesi ineyi isalonga Muyuda m’bodzi. Mbwenye mafala mawiri akuti ‘imwe’ asaimirira anthu azinji kupiringana m’bodzi. Pyenepi pisabveka kuti Muyuda nee ndi munthu m’bodzi basi, mbwenye asaimirira  nsoka onsene wa Akristu akudzodzwa. Ale akuti nee ndi akudzodzwa asatumikira Yahova pabodzi na Akristu akudzodzwa. Mbwenye, iwo nee asaona Akristu akudzodzwa ninga atsogoleri awo, thangwi asadziwa kuti Ntsogoleri ndi Yezu.—Mat. 23:10.

3. Ndi mibvundzo ipi inafuna kutawirwa mu nsolo uno?

³ Nakuti Akristu anango akudzodzwa aciri pabodzi na ife lero, panango anango a ife anabvundzika: (1) Akristu akudzodzwa asanyerezeranji thangwi ya iwo ene? (2) Kodi munthu anadya nkate na kumwa vinyu pa Cikumbuso asafunika kutsalakanwa tani? (3) Kodi tisafunika kudzudzumika na kuthimizirika kwa anthu anadya nkate na kumwa vinyu? Nsolo uno unatawira mibvundzo ineyi.

4. Ndi cenjezo ipi inagumanika pa 1 Akorinto 11:27-29 yakuti Akristu akudzodzwa asafunika kuinyerezera mwadidi, pontho thangwi yanji?

⁴ Akristu akudzodzwa asafunika kunyerezera mwadidi cenjezo inagumanika pa 1 Akorinto 11:27-29. (Lerini.) Ndi munjira ipi nyakudzodzwa anadya nkate na kumwa vinyu “mwakukhonda thema” pa Cikumbuso? Iye anakwanisa kucita pyenepi khala asadya nkate na kumwa vinyu, mu ndzidzi ubodzi ene mbakhala maso mwakukhonda bverana na midida ya Yahova.  (Aheb. 6:4-6; 10:26-29) Akristu akudzodzwa asadziwa kuti asafunika kukhala akukhulupirika toera kutambira ‘muoni wakucemerwa na Mulungu toera kuenda kudzulu kubulukira mwa Kristu Yezu.’—Afil. 3:13-16.

5. Akristu akudzodzwa asanyerezeranji thangwi ya iwo ene?

⁵ Nzimu wakucena wa Yahova usaphedza atumiki ace toera kukhala akucepeseka, tayu akudzikuza. (Aef. 4:1-3; Akol. 3:10, 12) Anyakudzodzwa nee asanyerezera kuti ndi akufunika kakamwe kupiringana anango. Iwo asadziwa kuti Yahova nee asaapasa kakamwe nzimu wakucena kupiringana atumiki ace anango. Iwo nee asanyerezera kuti asabvesesa kakamwe undimomwene wa Bhibhlya kupiringana anango. Pontho iwo nee asapanga munthu unango kuti iwe wadzodzwa, pontho usafunika kutoma kudya nkate na kumwa vinyu pa Cikumbuso. Mbwenye, mwakucepeseka iwo asadziwa kuti basi ene ndi Yahova asacemera anthu toera kuenda kudzulu.

6. Mwakubverana na 1 Akorinto 4:7, 8, Akristu akudzodzwa asafunika kukhala na maonero api?

⁶ Maseze anyakudzodzwa asadziwa kuti ndi mwai ukulu kucemerwa toera kuenda kudzulu, iwo nee asadikhira kutsalakanwa na anango mwakupambulika. (Afil. 2:2, 3) Iwo asadziwa kuti mu ndzidzi udadzodzwa iwo, Yahova nee apanga anango pyenepi. Natenepa, Akristu akudzodzwa nee asadzudzumika khala anango nee asakhulupira kuti iwo adzodzwa. Iwo asadziwa kuti Bhibhlya isalonga kuti nee tisafunika kukhulupira mwakucimbiza munthu analonga kuti apaswa basa yakupambulika na Mulungu. (Apok. 2:2) Toera kucalira kutsalakanwa mwakupambulika, Akristu akudzodzwa nee asapanga anango kuti iwo adzodzwa. Pontho iwo nee asadzikuza thangwi yakukhala Akristu akudzodzwa.—Lerini 1 Akorinto 4:7, 8.

7. Akristu akudzodzwa asacalira kucitanji, pontho thangwi yanji?

⁷ Akristu akudzodzwa nee asanyerezera kuti asafunika kucedza basi ene na anyakudzodzwa andzawo ninga nsoka wakupambulika. Iwo nee asasaka anyakudzodzwa andzawo toera kucedza thangwi ya kudzodzwa kwawo, peno kucita misoka yakupambulika toera kupfundza Bhibhlya. (Agal. 1:15-17) Mpingo nee mbudakhala wakuphatana khala anyakudzodzwa asacita pyenepi. Iwo mbadacita pinthu pyakukhonda bverana na nzimu wakucena, wakuti usaphedza atumiki a Mulungu toera kukhala antendere na akuphatana.—Aroma 16:17, 18.

8. Thangwi yanji tisafunika kucita mphole-mphole pakutsalakana ale anadya nkate na kumwa vinyu pa Cikumbuso? (Onani cidzindikiro capantsi.)

⁸ Kodi tisafunika kutsalakana tani abale na alongo akudzodzwa? Nee ndi pyakuthema kudzumatirwa kakamwe na munthu, maseze akhale wakudzodzwa wa Kristu. (Mat. 23:8-12) Bhibhlya ingalonga pya akulu a mpingo, isatikulumiza toera ‘kutowezera cikhulupiro cawo,’ mbwenye nee isalonga kuti tisafunika kuaona ninga atsogoleri athu. (Aheb. 13:7) Mwandimomwene Bhibhlya isalonga kuti anango “asafunika kulemedzwa kakamwe.” Pyenepi ndi pyakufunika thangwi iwo ‘asatsogolera munjira yadidi’ na ‘asaphata basa mwakuwanga pakulonga na pakupfundzisa,’ tayu thangwi iwo ndi akudzodzwa. (1 Tim. 5:17) Ife tingalemedza kakamwe anyakudzodzwa na kuatsalakana mwakupambulika, iwo nee anapibva mwadidi. * Kusiyapo pyenepi, ife tinaacitisa kukhala akudzikuza. (Aroma 12:3) Nee m’bodzi wa ife asafunika kucita pyenepi toera kugwegwedusa akudzodzwa a Kristu!—Luka 17:2.

9. Tinapangiza tani kuti tisalemedza Akristu akudzodzwa?

⁹ Tinapangiza tani kuti tisalemedza ale adadzodzwa na Yahova? Nee tisafunika kuabvundza kuti adzodzwa tani. Nkhani ineyi ndi ya munthu paekha, ife nee tisafunika kudzudzumika na pinthu pyakuti nee ndi pyathu. (1 Ates. 4:11; 2 Ates. 3:11) Pontho nee tisafunika kunyerezera kuti amuna awo peno akazawo, anyakubalawo, peno acibale awo kuti ndi akudzodzwambo. Munthu nee asadzodzwa thangwi acibale ace ndi akudzodzwa. Iye asadzodzwa basi ene angasankhulwa na Mulungu. (1 Ates. 2:12) Pontho tisafunika kucalira kucita mibvundzo yakuti inatsukwalisa anango. Mwacitsandzo, ife nee tisafunika kubvundza mulongo wakuti mamunace ndi wakudzodzwa kuti asapibva tani na cidikhiro cakukhala pa dziko yapantsi kwenda na kwenda, mamunace mbaenda kudzulu. Mwandimomwene, ife tiri na cinyindiro consene cakuti mu dziko ipswa, Yahova ‘anadzakwanirisa cifuno ca cinthu consene ca umaso.’—Masal. 145:16.

10. Kukhonda tsalakana mwakupambulika Akristu akudzodzwa kunatitsidzikiza tani?

¹⁰ Kukhonda tsalakana mwakupambulika kakamwe Akristu akudzodzwa kupiringana anango, kusatitsidzikiza. Munjira ipi? Bhibhlya isalonga kuti panango Akristu anango akudzodzwa nee anapitiriza kukhala akukhulupirika. (Mat. 25:10-12; 2 Ped. 2:20, 21) Ife tingacalira kutsalakana mwakupambulika anyakudzodzwa, nee tinatowezera anango, maseze akhale akudzodzwa peno ale anadziwika kuti asatumikira Yahova mu ndzidzi uzinji. (Yuda 16) Thangwi iwo angadzakhala akukhonda khulupirika peno kubuluswa mu mpingo, ife nee tinaluza cikhulupiro cathu kuna Yahova, peno kusiya kuntumikira.

11. Ninji pinacitika na numero ya ale anadya nkate na kumwa vinyu pa Cikumbuso?

¹¹ Mu pyaka pizinji nduli, numero ya anthu akhadya nkate na kumwa vinyu pa Cikumbuso ikhacepa. Mbwenye cincino, numero ineyi ikuthimizirika pyaka pyonsene. Kodi ife tisafunika kudzudzumika na pyenepi? Nkhabe. Tendeni tione kuti thangwi yanji nee tisafunika kudzudzumika.

12. Thangwi yanji nee tisafunika kudzudzumika na kuthimizirika kwa anthu anadya nkate na kumwa vinyu pa Cikumbuso?

¹² “Yahova asadziwa anthu ace.” (2 Tim. 2:19) Yahova asadziwa kuti mwandimomwene mbani adzodzwa. Mbwenye abale analengesa anthu anadya nkate na kumwa vinyu pa Cikumbuso, nee asadziwa. Natenepa, numero ineyi isaphataniza ale ananyerezera kuti ndi akudzodzwa, mbwenye iwo nee adzodzwa. Mwacitsandzo, anango akuti akhadya nkate na kumwa vinyu, mukupita kwa ndzidzi asiya. Anango, panango ali na utenda wa m’manyerezero unaacitisa kukhulupira kuti anaenda katonga na Kristu kudzulu. Ndi thangwi yace, ife nkhabe kudziwa  numero yandimomwene ya Akristu akudzodzwa adasala pa dziko yapantsi.

13. Kodi Bhibhlya isalonga kuti ndi anyakudzodzwa angasi anafuna kudzagumanika pa dziko yapantsi nyatwa ikulu ingatoma?

¹³ Anyakudzodzwa anadzakugumanika m’makhundu mazinji pa dziko yapantsi Yezu angabwera kudzaakwata toera kuenda nawo kudzulu. (Mat. 24:31) Bhibhlya isalonga kuti mu ntsiku zakumalisa panadzagumanika anyakudzodzwa akucepa pa dziko yapantsi. (Apok. 12:17) Mbwenye iyo nee isalonga kuti anadzagumanika angasi nyatwa ikulu ingatoma.

14. Mwakubverana na Aroma 9:11, 16, tisapfundzanji na njira inadzodzwa anthu?

¹⁴ Yahova ndiye asasankhula ndzidzi toera kudzodza munthu. (Aroma 8:28-30) Yahova atoma kudzodza anthu pidamala Yezu kulamuswa muli akufa. Pisaoneka kuti mu ndzidzi wa apostolo, Akristu onsene andimomwene akhali akudzodzwa. Mukupita kwa pyaka, azinji akhalonga kuti ndi Akristu, mwandimomwene iwo nee akhatowerera Kristu. Ngakhale tenepo, mu pyaka pyenepi, Yahova adzodza anthu akucepa akuti akhali Akristu andimomwene. Iwo akhali ninga tirigu idalonga Yezu kuti mbidakula pabodzi na nyakasongole. (Mat. 13:24-30) Mu ntsiku zakumalisa, Yahova asapitiriza kusankhula ale anafuna kudzacita khundu ya 144.000. * Natenepa Mulungu angasankhula anyakudzodzwa kumala mbakudzati fika, ife nee tisafunika kupenula ndzeru zace. (Lerini Aroma 9:11, 16.) * Ife tisafunika kucita mphole-mphole toera tikhonde kucita pinthu  ninga anyabasa adalonga Yezu mu nsangani wace. Iwo adungunya thangwi ya citsalakano cidapangiza mbuyawo kuna anyabasa adaphata basa pakumalisira.—Mat. 20:8-15.

15. Kodi anyakudzodzwa onsene asacita khundu ya “m’bandazi wakukhulupirika na wandzeru,” analongwa pa Mateu 24:45-47? Fokotozani.

¹⁵ Nee ndi onsene ali na cidikhiro cakuenda kudzulu akuti asacita khundu ya “m’bandazi wakukhulupirika na wandzeru.” (Lerini Mateu 24:45-47.) Ninga pikhacitika mu ndzidzi wa apostolo, Yahova na Yezu lero asaphatisira abale akucepa toera kudyesa peno kupfundzisa anthu azinji. Basi ene ndi Akristu akudzodzwa akucepa a mu ndzidzi wa apostolo adaphatisirwa toera kulemba Malemba Acigrego Acikristu. Lero, basi ene ndi Akristu akudzodzwa akucepa ali na basa ‘yakupereka cakudya pa ndzidzi wakuthema’ kuna atumiki a Mulungu.

16. Mwapfundzanji mu nsolo uno?

¹⁶ Tapfundzanji mu nsolo uno? Yahova atonga kupereka umaso wakukhonda mala pa dziko yapantsi kuna atumiki ace azinji, pontho atonga kupereka umaso wakuenda kudzulu kuna ale anafuna kudzatonga na Yezu. Yahova asapasa nkhombo atumiki ace onsene, “Muyuda,” kuphatanizambo “amuna khumi,” pontho iye asafuna kuti onsene abvere matongero ace mbapitiriza kukhala akukhulupirika. Onsene asafunika kukhala akucepeseka. Onsene asafunika kutumikira Yahova mwakuphatana. Pontho onsene asafunika kuwangisira toera kukhazikisa ntendere mu mpingo. Nakuti kumala kuli cifupi kakamwe, tendeni tonsene tipitirize kutumikira Yahova na kutowerera Kristu ninga “nkumbi ubodzi.”—Juw. 10:16.