1-2. Ndi nyatwa zipi zinathimbana na atumiki azinji a Yahova, pontho iwo asakhala na mabvero api?

NYEREZERANI pitsandzo ipi pitatu: M’bale apangwa na dotoro kuti ali na utenda wakugopswa. M’bale unango wa pyaka pyakupiringana 50, wakuti asaphata basa mwaphinga aluza basa, pontho nee asakwanisa kugumana inango. Mulongo wakukhulupirika wakukalamba nee asakwanisabve kucita pizinji m’basa ya Yahova.

² Khala imwe musathimbana na ibodzi mwa nyatwa zenezi, panango munakhala na mabvero akuti nee ndimwe wakufunika. Nyatwa zenezi zinakwanisa kukutsukwalisani, kupibva ninga nee ndimwe wakufunika, pontho zinakwanisa kudzudzumisa uxamwali wanu na anthu anango.

3. Kodi Sathani na ale anantowezera asatsalakana tani anthu?

³ Dziko ino isapangiza maonero a Sathani thangwi ya umaso wa anthu. Ndzidzi onsene Sathani asatsalakana anthu ninga nee ndi akufunika kakamwe. Na cifuno cakuipa, iye apanga Eva kuti angakhonda kubvera Mulungu anakhala na ufulu, mu ndzidzi ubodzi ene mbadziwa kuti angacita pyenepi anafa. Ndzidzi onsene Sathani asatsogolera pinthu pyamalonda, pyandale na mauphemberi a dziko ino. Natenepa nee ndi pyakudzumatirisa kuona kuti anyamalonda azinji, anyandale na atsogoleri auphemberi asatsalakana anthu mwakusowa cilemedzo.

4. Tinapfundzanji mu nsolo uno?

⁴ Mbwenye mwakusiyana na Sathani, Yahova asafuna tidziwe kuti ndife  akufunika kakamwe, pontho asatiphedza tingathimbana na nyatwa zinaticitisa kupibva kuti nee ndife akufunika. (Masal. 136:23; Aroma 12:3) Nsolo uno unafokotoza kuti Yahova asatiphedza tani m’makhundu awa: (1) Tingathimbana na utenda, (2) tingathimbana na nyatwa yakusowa kobiri, pontho (3) tingakhala na mabvero akuti nee tikucita pizinji m’basa ya Yahova thangwi yakukalamba. Mbwenye, pakutoma tinapfundza kuti thangwi yanji tinakwanisa kukhala na cinyindiro cakuti ndife akufunika kakamwe kuna Yahova.

5. Ninji pinapangiza kuna imwe kuti anthu ndi akufunika kakamwe kuna Yahova?

⁵ Ngakhale tacitwa na pfumbi ya mataka, ife ndife akufunika kakamwe kuna Yahova kupiringana mataka. (Gen. 2:7) Onani mathangwi mangasi anaticitisa kudziwa kuti ndife akufunika kakamwe kuna Yahova. Iye acita anthu na maluso akutowezera makhaliro ace. (Gen. 1:27) Na thangwi ineyi, iye acita mwadidi kakamwe anthu kupiringana pinthu pyonsene pidacita iye pa dziko yapantsi.—Masal. 8:4-8.

6. Ndi thangwi ipi inango inaticitisa kudziwa kuti anthu akusowa ungwiro ndi akufunika kakamwe kuna Yahova?

⁶ Ngakhale pidadawa Adhamu, anthu apitiriza kukhala akufunika kuna Yahova. Iye apangiza pyenepi mukupereka Mwanace wakufunika, Yezu, ninga ciomboli thangwi ya madawo athu. (1 Juw. 4:9, 10) Mukuphatisira ciomboli ceneci, Yahova anadzalamusa muli akufa “anthu akulungama na akukhonda kulungama” adafa thangwi ya madawo a Adhamu. (Mabasa 24:15) Mafalace asapangiza kuti ndife akufunika kakamwe kuna iye, mwakukhonda tsalakana ungumi wathu, kusowa kobiri peno thunga.—Mabasa 10:34, 35.

7. Ndi mathangwi api anango anaticitisa kukhulupira kuti ndife akufunika kakamwe kuna Yahova?

⁷ Tiri na mathangwi anango anaticitisa kukhulupira kuti ndife akufunika kakamwe kuna Yahova. Iye aticemera, pontho aona kuti tatawira tani mphangwa zadidi. (Juw. 6:44) Tingafendedzera cifupi Yahova, iye anadzatifendedzerambo. (Tiya. 4:8) Yahova asaphatisira ndzidzi na mphambvu toera kutipfundzisa, mukutipangiza kuti ndife akufunika kakamwe kuna iye. Iye asadziwa makhaliro athu cincino, pontho asadziwa makhaliro anafuna kukhala na ife ntsogolo. Pontho iye asatisandika thangwi asatifuna. (Mis. 3:11, 12) Mwakukhonda penula, pyenepi pisapangiza kuti ndife akufunika kakamwe kuna Yahova!

8. Mafala anagumanika pa Masalmo 18:27-29, anatiphedza tani tingathimbana na nyatwa?

⁸ Maseze anthu anango akhapwaza Mambo Dhavidhi, iye akhadziwa kuti Yahova akhanfuna na akham’phedza. Pyenepi pyaphedza Dhavidhi toera kupirira nyatwa ikhathimbana na iye. (2 Sam. 16:5-7) Tingakhala na mabvero akuti nee ndife akufunika peno tingathimbana na nyatwa, Yahova anatiphedza toera kuona pinthu munjira yakusiyana, pontho anatiphedza toera kukunda nyatwa zonsene. (Lerini Masalmo 18:27-29.) Tingakhala na ciphedzo ca Yahova, nee cinthu cibodzi cinakwanisa kutipingiza kuntumikira mwakutsandzaya. (Aroma 8:31) Cincino, tendeni tione pinthu pitatu pinapangiza kuti Yahova asatifuna, pontho ndife akufunika kakamwe kuna iye.

9. Kodi utenda unakwanisa tani kukhuya manyerezero athu?

⁹ Utenda unakwanisa kukhuya manyerezero athu mbationa kuti nee ndife akufunika kuna anango. Panango tinakhala na manyadzo anthu angaona pinthu pinacimwana ife kucita, peno tingafuna kakamwe kuphedzwa na anango. Maseze anango akhonde kudziwa kuti tikuduwala, panango tinathimbana na mabvero akupasika manyadzo thangwi yakucimwana kucita pinthu pikhacita ife kale. Midzidzi ineyi yakunentsa, Yahova asatiphedza. Munjira ipi?

10. Mwakubverana na Misangani 12:25, ninji pinafuna kutiphedza tingaduwala?

¹⁰ Tingaduwala, ‘mafala adidi’ anakwanisa kutiphedza. (Lerini Misangani 12:25.) Kubulukira m’Bhibhlya, Yahova asatipanga pinthu pizinji  pyadidi pyakuti pisatikumbusa kuti ndife akufunika kakamwe kuna iye mwakukhonda tsalakana utenda wathu. (Masal. 31:19; 41:3) Tingaleri mwakubwereza-bwereza Bhibhlya, Yahova anatiphedza toera kuthimbana na mabvero akuipa akuti asabwera thangwi ya utenda wathu.

11. Kodi m’bale Jorge aona tani ciphedzo ca Yahova?

¹¹ Onani citsandzo ca Jorge. Pikhali iye m’phale, aphatwa na utenda wakuti wadzatekera mwakucimbiza, pontho wancitisa kukhala na mabvero akuti nee ndi wakufunika. Iye alonga: “Ine nee ndikhali wakukhunganyika toera kuthimbana na mabvero peno manyadzo thangwi ya utenda unoyu. Mu ndzidzi ukhatekera utenda wanga, ndikhanyerezera kuti umaso wanga mbudakhala tani. Ine ndatsukwala kakamwe, pontho ndaphemba ciphedzo ca Yahova kubulukira m’phembero.” Kodi Yahova am’phedza tani? Iye athimiza: “Nakuti manyerezero anga nee akhali pa mbuto, ine ndapangwa toera kuleri mavesi akucepa a bukhu ya Masalmo anapangiza kuti Yahova asatsalakana atumiki ace. Ndaleri kazinji kene mavesi anewa ntsiku zonsene, pontho iwo andibalangaza na kundiwangisa. Mukupita kwa ndzidzi, anthu anango atoma kuona kuti ndikhali wakutsandzaya. Iwo alonga kuti kutsandzaya kwanga kwaaphedza kakamwe. Ndadzindikira kuti Yahova atawira maphembero anga! Iye andiphedza toera kucinja mabvero akhali na ine. Ndatoma kunyerezera kakamwe pinalonga Mafala a Yahova thangwi ya njira inandiona iye mwakukhonda tsalakana utenda wanga.”

12. Mungathimbana na utenda, musafunika kucitanji toera kuphedzwa na Yahova?

¹² Khala musathimbana na utenda khalani na cinyindiro cakuti Yahova asadziwa nyatwa yanu. Phembani ciphedzo cace toera mukwanise kukhala na maonero akulinganira thangwi ya utenda wanu. Buluka penepo, lerini m’Bhibhlya mafala akubalangaza a Yahova. Ikhani manyerezero m’mavesi anapangiza kuti atumiki a Yahova  ndi akufunika kakamwe kuna iye. Mungacita pyenepi, munaona kuti Yahova ndi wadidi kuna onsene anantumikira mwakukhulupirika.—Masal. 84:11.

13. Ndi mabvero api asakhala na nsolo wa banja angaluza basa?

¹³ Misolo yonsene ya banja isafuna kutsalakana pyakufuna pya mabanja awo. Mbwenye nyerezerani kuti m’bale aluza basa maseze nee acita cinthu cakuipa. Iye asawangisira toera kusaka basa inango mbwenye nee asaigumana. Thangwi ya nyatwa ineyi, panango anakhala na mabvero akuti nee ndi wakufunika. Kodi kunyerezera mapikiro a Yahova kunam’phedza tani?

14. Thangwi yanji Yahova asakwanirisa mapikiro ace?

¹⁴ Ndzidzi onsene Yahova asakwanirisa mapikiro ace. (Yos. 21:45; 23:14) Iye asacita pyenepi na mathangwi mazinji. Thangwi yakutoma ndi yakuti pyenepi pinakhuya dzina yace na makhaliro ace. Yahova apikira kuti anatsalakana atumiki ace akukhulupirika, pontho iye asakulumizika toera kukwanirisa pikiro ineyi. (Masal. 31:1-3) Kusiyapo pyenepi, nakuti tisacita khundu ya banja yace, Yahova asadziwa kuti tinatsukwala angakhonda kutitsalakana. Iye apikira kuti anatipasa pinthu pinafuna ife toera kukhala maso mbatipitiriza kuntumikira mwakukhulupirika, pontho nee cinthu cibodzi cinafuna kumpingiza toera kukwanirisa pikiro ineyi!—Mat. 6:30-33; 24:45.

15. (a) Ndi nyatwa ipi idathimbana na Akristu a mu ndzidzi wa apostolo? (b) Ndi cinyindiro cipi cinagumanika pa Masalmo 37:18, 19?

¹⁵ Tingadziwa kuti thangwi yanji Yahova asakwanirisa mapikiro ace tinakwanisa kukhala na cinyindiro cakuti iye anatiphedza tingathimbana na nyatwa yakusowa kobiri. Nyerezerani citsandzo ca Akristu a mu ndzidzi wa apostolo. Pidatoma iwo kutcingwa mu Yerusalemu, “anyakupfundza onsene amala kubalalika, mbasala  apostolo basi.” (Mabasa 8:1) Pyenepi pyabweresa nyatwa ipi? Kusoweka kwa kobiri! Pisaoneka kuti Akristu aluza nyumba zawo na mabasa awo. Ngakhale tenepo, Yahova nee aasiya, pontho iwo nee akhali akutsukwala. (Mabasa 8:4; Aheb. 13:5, 6; Tiya. 1:2, 3) Yahova aphedza Akristu anewa akukhulupirika, pontho iye anatiphedzambo.—Lerini Masalmo 37:18, 19.

16. Ninji pinafuna kuticitisa kunyerezera kuti nee tikucita pizinji m’basa Yahova?

¹⁶ Tingakalamba, panango tisatoma kukhala na mabvero akuti nee tisacita pizinji m’basa ya Yahova. Pisaoneka kuti Mambo Dhavidhi akhalambo na mabvero mabodzi ene mu ndzidzi udakalamba iye. (Masal. 71:9) Kodi Yahova anatiphedza tani?

17. Tisapfundzanji na citsandzo ca mulongo anacemerwa Jheri?

¹⁷ Onani citsandzo ca mulongo anacemerwa Jheri. Iye akhadacemerwa Kunyumba ya Umambo toera kapfundza kusasanyira papswa nyumba zinaphatisirwa toera kacita basa ya Yahova. Iye alonga: “Ndakalamba, ndine nzice, pontho nee ndiri na maluso toera kuphatisirwa na Yahova. Nee ndine wakufunika.” Mbudzati kucitika nsonkhano unoyu, iye acita phembero kuna Yahova namasiku. Mangwana mwace, pidafika iye pa Nyumba ya Umambo, apitiriza kupenula khala akhali wakuthema kugumanika pa nsonkhano unoyu. Mu ndzidzi wa programu, m’bodzi wa anyakucita nkhani agomezera kuti maluso akufunika kakamwe kwa ife ndi kutawira na ntima onsene kupfundziswa na Yahova. Jheri asakumbuka: “Ine ndanyerezera, ‘ndiri nawo maluso anewa!’ Natenepa ndatoma kulira pidadzindikira ine kuti Yahova atawira phembero yanga. Iye andipasa cinyindiro cakuti ndine wakufunika, pontho akhali dzololo toera kundipfundzisa!” Thangwi yakukumbuka pyenepi, Jheri alonga:  “Ndafika pa nsonkhano unoyu mwakudzudzumika, pontho ndikhali na mabvero akuti nee ndine wakufunika. Mbwenye ndabuluka pa nsonkhano unoyu na cinyindiro consene cakuti ndine wakufunika!”

18. Bhibhlya isapangiza tani kuti Yahova asapitiriza kukomerwa na basa yathu maseze tikalambe?

¹⁸ Tingakalamba, tinakwanisa kukhala na cinyindiro consene cakuti Yahova anapitiriza kutiphatisira. (Masal. 92:12-15) Panango munanyerezera kuti nee musacita pizinji kuna Yahova. Mbwenye Yezu atipfundzisa kuti pyonsene pinacita ife kuna Yahova ndi pyakufunika. (Luka 21:2-4) Natenepa ikhani manyerezero anu ku pinthu pinakwanisa imwe kucita. Mwacitsandzo, imwe munakwanisa kupanga anango pya Yahova, kuphataniza anango m’maphembero anu na kuwangisa anango toera akhale akukhulupirika. Yahova asakuonani ninga nyabasa ndzace, tayu thangwi ya pinthu pinacita imwe, mbwenye thangwi ya kumbvera kwanu na ntima onsene.—1 Akor. 3:5-9.

19. Kodi lemba ya Aroma 8:38, 39 isatipasa cinyindiro cipi?

¹⁹ Ndi pyakutsandzayisa kakamwe kulambira Yahova, Mulungu wakuti asaona atumiki ace kukhala akufunika. Iye aticita toera ticite cifuniro cace, pontho ndi ulambiri wandimomwene unaticitisa kukhala na umaso wakutsandzayisa. (Apok. 4:11) Maseze dziko itione ninga anthu akukhonda funika, Yahova nee asationa munjira ineyi. (Aheb. 11:16, 38) Tingakhala akutsukwala thangwi ya utenda, kusowa kobiri peno kukalamba, tendeni tikumbuke kuti nee cinthu cibodzi cinafuna kuticimwanisa kufuniwa na Babathu wakudzulu.—Lerini Aroma 8:38, 39.