1-2. (a) Ndi mabvero api anakhala na ife tinganyerezera pya umaso wa Yezu na utumiki wace? (b) Tinapfundzanji mu nsolo uno?

 TINGAFERWA na nyakufunika wathu, ife tisantsuwa kakamwe. Panango pakutoma ife tinatsukwala kakamwe thangwi ya pinthu pidancitikira mbadzati kufa, makamaka khala iye athabuka kakamwe mbadzati kufa. Mbwenye mukupita kwa ndzidzi, ife tisatoma pontho kukhala akutsandzaya tinganyerezera pinthu pidatipfundzisa iye, pidacita iye peno pidalonga iye toera kutiwangisa na kutitsandzayisa.

² Munjira ibodzi ene, tingaleri thangwi ya kuthabuswa kwa Yezu na kufa kwace, tisatsukwalambo. Natenepa, mu ndzidzi wa Cikumbuso, ife tisanyerezera kufunika kwa ntsembe yaciomboli ya Yezu. (1 Akor. 11:24, 25) Ngakhale tenepo, tisatsandzaya kakamwe tinganyerezera pinthu pyonsene pidalonga Yezu na pidacita iye pikhali iye pa dziko yapantsi. Kusiyapo pyenepi, kunyerezera pinthu pinacita iye cincino na pinafuna kudzacita iye ntsogolo kusatiwangisa kakamwe. Natenepa, mu nsolo uno tinapfundza kuti kunyerezera pinthu pyenepi pyonsene na ufuni udapangiza Yezu kuna ife, kusatikulumiza toera kucita pinthu pinapangiza kupereka kwathu takhuta.

3. Ndi mathangwi api anaticitisa kupereka takhuta thangwi ya ciomboli?

³ Ife tisapereka takhuta kakamwe tinganyerezera umaso wa Yezu na kufa kwace. Mu utumiki wace pa dziko yapantsi, Yezu apfundzisa anthu thangwi ya nkhombo zinafuna kubweresa Umambo wa Mulungu. Ife tisakomerwa kakamwe na pinapfundzisa Bhibhlya thangwi ya ciomboli na pinthu pyadidi pinacitika thangwi ya ciomboli ceneci. Pontho ife tisapereka takhuta kakamwe thangwi ya ciomboli, thangwi ico cisacitisa kuti tikhale  na uxamwali wakuwanga na Yahova na Yezu. Ale anakhulupira Yezu, asakhalambo na cidikhiro ca kukhala m’maso kwenda na kwenda na kuonana pontho na anyakufunika awo adafa. (Juwau 5:28, 29; Aroma 6:23) Ife nee tathema kutambira nkhombo zenezi, pontho nee tinakwanisa kulipa Mulungu na Kristu thangwi ya pinthu pidaticitira iwo. (Aroma 5:8, 20, 21) Mbwenye tinakwanisa kupangiza kupereka kwathu takhuta kuna iwo. Tinacita tani pyenepi?

4. Mariya Madhalena apangiza tani kupereka takhuta kuna Yezu thangwi ya pinthu pidancitira iye? (Onani foto.)

⁴ Onani citsandzo ca nkazi Waciyuda akhacemerwa Mariya Madhalena. Iye akhathabuswa kakamwe na madimonyo manomwe. Panango iye akhanyerezera kuti nee mbadakwanisa kugumana ciphedzo. Natenepa iye apereka takhuta kakamwe mu ndzidzi udam’bulusa Yezu madimonyo anewa. Kupereka kwace takhuta kwankulumiza toera kukhala nyakupfundza wa Yezu, pontho toera aphatisire ndzidzi wace, mphambvu zace na pinthu pyace toera kuphedzera Yezu mu utumiki. (Luka 8:1-3) Maseze Mariya akhapereka takhuta thangwi ya pinthu pidancitira Yezu, iye panango nee akhadziwa kuti Yezu mbadancitira pinthu pinango pyadidi kakamwe ntsogolo. Iye mbadapereka umaso wace “toera munthu anan’khulupira” akhale na umaso wakukhonda mala. (Juwau 3:16) Ngakhale tenepo, Mariya apangiza kupereka takhuta mukukhala wakukhulupirika kuna Yezu. Mwacitsandzo, mu ndzidzi ukhathabuka Yezu, Mariya akhali dhuzi na iye toera kutsalakana Yezu na kubalangaza anthu anango akhali penepo. (Juwau 19:25) Pidafa Yezu, Mariya pabodzi na akazi anango awiri abweresa mafuta akununkhira toera kukhwaza manungo a Yezu. (Marko 16:1, 2) Mariya apaswa nkhombo zizinji thangwi ya kukhala wakukhulupirika kuna Yezu. Pidalamuswa Yezu muli akufa, iye aonana na Mariya, pontho acedza naye. Ndi anyakupfundza akucepa kakamwe adakhala na mwai unoyu.—Juwau 20:11-18.

5. Tinapangiza tani kuti tisapereka takhuta kuna Yahova na Yezu thangwi ya pinthu pyonsene pidaticitira iwo?

 ⁵ Ife tinapangizambo kupereka takhuta kuna Yahova na Yezu thangwi ya pyonsene pidaticitira iwo, mukuphatisira ndzidzi wathu, mphambvu zathu na pinthu piri na ife toera kutumikira Yahova. Mwacitsandzo, ife tinakwanisa kuperekeka toera kuphedzera basa yakumanga na kusasanyira nyumba zinaphatisira gulu ya Yahova.

6. Thangwi yanji tinakwanisa kulonga kuti ciomboli ndi muoni udapereka Yahova kuna m’bodzi na m’bodzi wa ife?

⁶ Tinganyerezera ufuni udapangiza Yahova na Yezu kuna ife pisatikulumiza toera kuafunambo. (1 Juwau 4:10, 19) Ife tisaafuna kakamwe tingadzindikira kuti Yezu afera m’bodzi na m’bodzi wa ife. Mpostolo Paulu adzindikira pyenepi mbapangiza kupereka kwace takhuta m’mafala adalembera iye Akristu a ku Galasya. Iye alonga: ‘Mwana wa Mulungu, andifuna mbaperekeka thangwi ya ine.’ (Agal. 2:20) Nakuti Yezu atifera, ife tinakwanisa kukhala axamwali a Yahova. (Juwau 6:44) Kodi nee pisakutsandzayisani kudziwa kuti Yahova asakomerwa na imwe, pontho alipa ntengo ukulu kakamwe toera mukhale xamwali wace? Pontho pyenepi nee pisakucitisani kufuna kakamwe Yahova na Yezu? Natenepa, m’bodzi na m’bodzi wa ife asafunika kubvundzika: ‘Kodi ufuni unoyu usandikulumiza toera kucitanji?’

7. Ninga pinapangizwa pa foto, tinapangiza tani ufuni wathu kuna Yahova na Yezu? (2 Akorinto 5:14, 15; 6:1, 2)

⁷ Ufuni wathu kuna Mulungu na Kristu usatikulumiza toera kufunambo anango. (Lerini 2 Akorinto 5:14, 15; 6:1, 2.) Njira ibodzi yakupangiza ufuni unoyu ndi kumwaza mphangwa mwaphinga. Ife tisamwazira mphangwa anthu onsene. Ife nee tisacalira kumwazira mphangwa anthu basi ene thangwi iwo ndi a dzindza yakusiyana na yathu. Kusiyapo pyenepi, ife tisamwazira mphangwa anthu akupfuma  peno akutcerenga, akupfundza kakamwe peno akuti nee apfundza kakamwe. Tingacita pyenepi, ife tisaphata basa mwakubverana na cifuniro ca Yahova, thangwi iye asafuna kuti “anthu a mitundu yonsene apulumuswe, pontho adziwe mwadidi undimomwene.”—1 Tim. 2:4.

8. Tinapangiza tani kuti tisafuna abale na alongo athu?

⁸ Ife tinapangizambo kuti tisafuna Mulungu na Kristu tingafuna abale na alongo athu. (1 Juwau 4:21) Ife tisafunika kupangiza citsalakano kuna abale na alongo athu m’midzidzi inathimbana iwo na nyatwa. Kusiyapo pyenepi, ife tisafunika kuabalangaza angaferwa na anyakufunika awo, kwenda kaaona angaduwala, pontho tisafunika kucita pyonsene pinakwanisa ife toera kuawangisa angatsukwala. (2 Akor. 1:3-7; 1 Ates. 5:11, 14) Ife tisafunikambo kucita phembero thangwi ya iwo, thangwi tisadziwa kuti “phembero yakudembetera inacitwa na munthu wakulungama isaphedza kakamwe.”—Tiya. 5:16.

9. Ndi njira ipi inango yakuti tinakwanisa kupangiza ufuni kuna abale na alongo athu?

⁹ Ife tinapangizambo ufuni kuna abale na alongo athu tingacita pyonsene pinakwanisa ife toera kukhala mu ntendere na iwo. Ife tisawangisira toera kulekerera anango ninga pinacita Yahova. Nakuti Yahova apereka Mwanace toera afe thangwi ya madawo athu, ife tisafunikambo kulekerera abale na alongo athu angatidawira. Ife nee tisafunika kukhala ninga nyabasa wakuipa adalonga Yezu mu nsangani wace. Maseze mbuyace amulekerera mangawa mazinji kakamwe, nyabasa unoyu nee alekererambo nyabasa ndzace wakuti akhadanfiyari kobiri yakucepa. (Mat. 18:23-35) Khala imwe mwatsukwalisana na m’bale peno mulongo mu mpingo, munakwanisa kukhazikisa ntendere mbidzati kufika ntsiku ya Cikumbuso? (Mat. 5:23, 24) Mungacita pyenepi munapangiza kuti musafuna kakamwe Yahova na Yezu.

10-11. Akulu a mpingo anapangiza tani kuti asafuna Yahova na Yezu? (1 Pedhru 5:1, 2)

¹⁰ Akulu a mpingo anapangiza tani kuti asafuna Yahova na Yezu? Njira ibodzi yakucita pyenepi ndi kutsalakana mabira a Yezu. (Lerini 1 Pedhru 5:1, 2.) Yezu apangiza kufunika kwa kucita pyenepi kuna mpostolo Pedhru. Pidamala iye kukhonda Yezu katatu, mpostolo Pedhru akhafuna kakamwe kupangiza kuti asafuna Yezu. Pidalamuswa Yezu muli akufa, iye abvundza Pedhru: “Simau mwana wa Juwau, kodi iwe usandifuna?” Ife tinakwanisa kukhala na cinyindiro cakuti mpostolo Pedhru mbadacita pinthu pyonsene toera kupangiza kuti asafuna Mbuyace. Buluka penepo, Yezu apanga Pedhru: ‘Kumbiza mabira anga.’ (Juwau 21:15-17) Natenepa mu umaso wace onsene, Pedhru atsalakana mwaufuni mabira a Mbuya, mbapangiza kuti iye akhafuna Yezu.

¹¹ Akulu a mpingo, munapangiza tani mu ndzidzi wa Cikumbuso kuti mafala adalonga Yezu kuna mpostolo Pedhru ndi akufunika kakamwe? Imwe munakwanisa kupangiza kuti musafuna kakamwe Yahova na Yezu mukucedzera abale na alongo na kuphedza ale adasiya kutumikira Yahova toera atome pontho kucita pyenepi. (Ezek. 34:11, 12) Imwe munakwanisambo kupangiza citsalakano kuna anyakupfundza a Bhibhlya na anthu anatoma kwene kugumanika pa Cikumbuso. Ife tisafuna kuatambira mwadidi, thangwi tisadikhira kuti iwo anakhalambo anyakupfundza a Yezu.

12. Thangwi yanji kunyerezera mafala adalonga Yezu namasiku mbadzati kufa kusatipasa cipapo? (Juwau 16:32, 33)

¹² Namasiku mbadzati kufa, Yezu apanga anyakupfundzace: “Mu dziko imwe munadzaona nyatwa, mbwenye khalani na cipapo! Ine ndakunda dziko.” (Lerini Juwau 16:32, 33.)  Ninji pidaphedza Yezu toera akhale wacipapo mu ndzidzi ukhatsalakanwa iye mwakuipa na anyamalwa ace mbapitiriza kukhala wakukhulupirika mpaka kufa kwace? Iye akhanyindira Yahova. Pontho nakuti iye akhadziwa kuti atowereri ace mbadathimbanambo na mayesero mabodzi ene, iye aphemba Yahova toera aaonere. (Juwau 17:11) Thangwi yanji pyenepi pisatipasa cipapo? Thangwi Yahova ndi wamphambvu kakamwe kupiringana anyamalwa athu. (1 Juwau 4:4) Yahova asaona pinthu pyonsene. Natenepa, tiri na cinyindiro cakuti tinganyindira Yahova, ife tinakwanisa kukunda kugopa mbatikhala acipapo.

13. Kodi Zuze wa ku Arimateya apangiza tani cipapo?

¹³ Onani citsandzo ca Zuze wa ku Arimateya. Iye akhalemedzwa kakamwe na Ayuda. Pontho iye akhacita khundu ya thando ikulu yakutongera miseru Yaciyuda. Mbwenye mu ndzidzi ukhamwaza Yezu mphangwa pa dziko yapantsi, Zuze nee akhali wacipapo. Juwau alonga kuti iye akhali “nyakupfundza wa Yezu, mbwenye nee akhalonga pakweca kuti ndi nyakupfundza wa Yezu thangwi akhagopa Ayuda.” (Juwau 19:38) Ngakhale kuti iye akhakomerwa na mphangwa za Umambo, iye nee akhapangiza kuna anango kuti akhakhulupira Yezu. Panango iye akhagopa kuti anthu nee mbadamulemedza angadziwa kuti iye ndi nyakupfundza wa Yezu. Mbwenye Bhibhlya isalonga kuti pidafa Yezu, Zuze “akhala na cipapo, aenda kuna Pilato mbaphemba manungo a Yezu.” (Marko 15:42, 43) Pa ndzidzi unoyu, Zuze nee abisabve kuti akhali nyakupfundza wa Yezu.

14. Musafunika kucitanji mungaona kuti musagopa anthu?

¹⁴ Kodi midzidzi inango imwe musagopambo anthu ninga pidacita Zuze? Midzidzi inango musakhala na manyadzo kuxikola peno kubasa toera kupangiza kuti ndimwe m’bodzi wa Mboni za Yahova? Kodi imwe musanyinyirika toera kukhala m’mwazi mphangwa peno kubatizwa thangwi yakugopa kuti anthu anakuonani tani? Lekani tawirisa kuti mabvero anewa akucitiseni kusiya kucita pinthu pinadziwa imwe kuti ndi pyadidi. Phembani Yahova toera akupaseni cipapo kuti mucite cifuno cace. Mungaona kuti Yahova ali kutawira maphembero anu, imwe munakhala wamphambvu na wacipapo kakamwe.—Iza. 41:10, 13.

15. Pidaonekera Yezu kuna anyakupfundzace, kutsandzaya kwawo kwaakulumiza toera kucitanji? (Luka 24:52, 53)

¹⁵ Anyakupfundza a Yezu atsukwala kakamwe pidafa iye. Nyerezerani mabvero akhafuna kukhala na imwe mbamudakhala penepo.  Iwo nee akhatsukwala basi ene thangwi akhadaferwa na xamwali wawo, mbwenye thangwi akhadaluzambo cidikhiro cawo. (Luka 24:17-21) Ngakhale tenepo, pidaonekera Yezu kuna iwo, iye akhala na ndzidzi toera kuaphedza kubvesesa kuti pyenepi pikhafunika kucitika toera kukwanirisa profesiya ya Bhibhlya. Iye aapasambo basa yakufunika kakamwe toera kucita. (Luka 24:26, 27, 45-48) Pidapita ntsiku 40 Yezu aenda kudzulu, pontho anyakupfundzace atoma pontho kukhala akutsandzaya kakamwe. Thangwi iwo akhadziwa kuti Yezu ali m’maso, pontho mbadaaphedza toera kukwanirisa basa idapaswa iwo. Kutsandzaya kwawo kwaakulumiza toera kusimba Yahova mwaphinga.—Lerini Luka 24:52, 53; Mabasa 5:42.

16. Tinatowezera tani anyakupfundza a Yezu?

¹⁶ Tinatowezera tani anyakupfundza a Yezu? Ife tinakwanisa kukhala akutsandzaya pakulambira Yahova, tayu basi ene mu ndzidzi wa Cikumbuso, mbwenye caka consene. Toera pyenepi pikwanisike, tisafunika kuikha pa mbuto yakutoma Umambo wa Mulungu. Mwacitsandzo, azinji asacita masasanyiro toera akwanise kumwaza mphangwa, agumanike pa misonkhano na kucita kulambira kwa banja mwakukhonda phonya. Anango asankhula kukhonda khala na pinthu pizinji pyakumanungo toera akwanise kucita pizinji mu mpingo, peno toera akwanise kutumikira kumbuto yakuti iri na amwazi mphangwa akucepa. Maseze tisafunika kupirira toera kupitiriza kutumikira Yahova, iye apikira kutipasa nkhombo zizinji tingaikha pa mbuto yakutoma Umambo wace.—Mis. 10:22; Mat. 6:32, 33.

17. Muli wakutonga toera kucitanji mu ndzidzi wa Cikumbuso? (Onani foto.)

¹⁷ Ife tisadikhira mwakutsandzaya kugumanika pa Cikumbuso, Ncipiri, ntsiku 4 ya Abril. Ngakhale tenepo, lekani kudikhira ntsiku ineyi toera kunyerezera pya umaso na kufa kwa Yezu na ufuni udapangiza iye na Yahova kuna ife. Nyerezerani pinthu pyenepi Cikumbuso mbacidzati kucitika na pakumala kwa Cikumbuso. Mwacitsandzo, imwe munakwanisa kuleri thangwi ya Cikumbuso na kunyerezera mwadidi pinthu pidacitika pinapangizwa m’bokosi ya nsolo wakuti “Sumana Yakumalisa ya Umaso wa Yezu pa Dziko Yapantsi,” inagumanika mu Umaso Wathu Wacikristu na Utumiki wa Abril 2019. Mu ndzidzi unacita imwe pyenepi, sakani kuona mavesi a m’Bhibhlya anathimizira kupereka kwanu takhuta, ufuni, cipapo na kutsandzaya. Buluka penepo, yeserani kuona pinthu pyakuti munakwanisa kupicita toera kupangiza kuti musapereka takhuta kakamwe. Imwe munakwanisa kukhala na cinyindiro cakuti Yezu anakomerwa na pinthu pyonsene pinacita imwe toera kukumbuka kufa kwace mu ndzidzi wa Cikumbuso.—Apok. 2:19.