1-2. Thangwi yanji tisagumanika pa Cikumbuso pyaka pyonsene?

 MU PYAKA pyakupiringana 2.000 nduli, Yezu atifera, mbatipasa mwai toera kugumana umaso wakukhonda mala. Namasiku mbadzati kufa, Yezu apanga atowerere ace toera akumbukire kufa kwace mukuphatisira nkate na vinyu.—1 Akor. 11:23-26.

² Ife tisabvera ntemo wa Yezu thangwi tisanfuna kakamwe. (Juwau 14:15) Pyaka pyonsene, Cikumbuso mbacidzati kucitika na pakumala kwa Cikumbuso, ife tisapangiza kuti tisapereka takhuta thangwi ya pinthu pidacita Yezu kuna ife mukunyerezera na kucita phembero thangwi yakufunika kwa kufa kwace. Ife tisamwazambo mphangwa mwaphinga toera kucemera anthu azinji kakamwe kuti agumanike pa Cikumbuso. Pontho nee tisatawirisa kuti pinthu pinango pitipingize toera kugumanika pa Cikumbuso ceneci.

3. Tinapfundzanji mu nsolo uno?

³ Mu nsolo uno, ife tinapfundza pinthu pitatu pyakuti atumiki a Yahova asawangisira kupicita toera kukumbuka kufa kwa Yezu: (1) kucita Cikumbuso munjira idatipfundzisa Yezu, (2) kucemera anango toera agumanikembo pa Cikumbuso na (3) kugumanika pa Cikumbuso mwakukhonda tsalakana pinentso.

4. Ndi undimomwene upi unalongwa pyaka pyonsene pa Cikumbuso, pontho thangwi yanji nee tisafunika kuupwaza? (Luka 22:19, 20)

⁴ Pyaka pyonsene, ife tisabvesera nkhani pa Cikumbuso yakuti isatawira mwadidi kakamwe mibvundzo mizinji. Ife tisapfundza kuti thangwi yanji anthu akhafunika kuombolwa, pontho kufa kwa Yezu kunakwanisa tani kulekerera madawo a anthu azinji. Ife tisakumbuswa kuti nkate na vinyu pisaimiriranji,  pontho mbani asafunika kudya nkate na kumwa vinyu. (Lerini Luka 22:19, 20.) Kusiyapo pyenepi, ife tisakumbuswa nkhombo zinafuna kutambira ale anafuna kukhala pa dziko yapantsi kwenda na kwenda. (Iza. 35:5, 6; 65:17, 21-23) Ife nee tisafunika kupwaza undimomwene unoyu. Anthu azinji nee asabvesesa undimomwene unoyu, pontho iwo nee asapereka takhuta thangwi ya ntsembe ya ciomboli. Kusiyapo pyenepi, iwo nee asacita Cikumbuso ca kufa kwa Yezu mwakubverana na pidapfundzisa iye. Thangwi yanji?

5. Pidamala kufa apostolo, anthu atoma tani kukumbuka kufa kwa Yezu?

⁵ Pidamala kufa apostolo a Yezu, Akristu authambi atoma kuoneka mu mpingo. (Mat. 13:24-27, 37-39) Iwo akhalonga “pinthu pyakuphonyeka toera kupeusa anyakupfundza kuti atowerere iwo.” (Mabasa 20:29, 30) Cibodzi mwa “pinthu pyakuphonyeka” pidatoma kupfundzisa Akristu anewa authambi ndi cakuti Yezu nee apereka manungo ace “kabodzi basi toera abuluse madawo a anthu azinji,” ninga pinalonga Bhibhlya, mbwenye ntsembe yace ikhafunika kuperekwa mwakubwereza-bwereza. (Aheb. 9:27, 28) Lero anthu azinji asakhulupira uthambi unoyu. Iwo asaenda ku gereja masumana onsene, m’midzidzi inango ntsiku zonsene toera kukumbuka ntsembe ya Yezu inacemerwa “Ntsembe ya Misa.” b Mauphemberi anango asakumbuka kufa kwa Yezu, mbwenye anthu a mauphemberi anewa nee asabvesesa kufunika kwa ntsembe ya ciomboli. Anthu anango panango anabvundzika: ‘Kodi kufa kwa Yezu kusacitisadi kuti madawo anga alekererwe?’ Thangwi yanji iwo asacita mbvundzo unoyu? Ndi thangwi yakuti iwo apangwa pyenepi na anthu analonga kuti ntsembe ya Yezu nee inakwanisa kulekerera madawo athu. Mphapo atowereri andimomwene a Yezu asaphedza tani anthu toera kubvesesa pyenepi?

6. Ndi undimomwene upi udabvesesa nsoka wa anyakupfundza Bhibhlya mu caka ca 1872?

⁶ Mu caka ca 1870, nsoka wa anyakupfundza Bhibhlya ukhatsogolerwa na Charles Taze Russell watoma kupfundza Malemba mwacidikhodikho. Iwo akhafuna kudziwa undimomwene thangwi yakufunika kwa ntsembe ya Yezu, pontho akhafuna kudziwa kuti Cikumbuso ca kufa kwace cisafunika kucitwa tani. Mu caka ca 1872, iwo abvesesa kuti mwandimomwene Yezu apereka umaso wace toera kuombola anthu azinji. Iwo nee abisa undimomwene unoyu, mbwenye adziwisambo anango mukuphatisira mabukhu, majornali na marevista. Buluka penepo, ninga pikhacita Akristu a mu ndzidzi wa apostolo, iwo atoma kugumanyikana pa Cikumbuso kabodzi pa caka.

7. Tisaphedzeka tani na undimomwene udagumana anyakupfundza Bhibhlya?

⁷ Lero ife tisaphedzeka kakamwe na undimomwene udagumana abale anewa adapfundza Malemba mwacidikhodikho. Munjira ipi? Yahova asatiphedza toera kubvesesa kuti ntsembe ya Yezu isabvekanji, pontho inacitanji kuna anthu onsene. (1 Juwau 2:1, 2) Ife tapfundzambo pinafokotoza Bhibhlya thangwi ya cidikhiro ca anthu anakomeresa Mulungu cakuti anthu anango anatambira umaso wakukhonda mala kudzulu, pontho azinji kakamwe anatambira umaso wakukhonda mala pa dziko yapantsi. Ife tisakhala na uxamwali wakuwanga kakamwe na Yahova tinganyerezera ufuni unapangiza iye kuna ife, pontho na njira inaphedzeka ife na ntsembe ya ciomboli ya Yezu. (1 Ped. 3:18; 1 Juwau 4:9) Natenepa, ninga pidacita abale athu akukhulupirika a mu ndzidzi  wakale, ife tisacemerambo anango toera agumanike pabodzi na ife pa Cikumbuso ca kufa kwa Yezu, cakuti cisacitwa mwakubverana na pidapfundzisa iye.

8. Ndi pinthu pipi pinacita Mboni za Yahova toera kucemera anthu azinji kakamwe kuti agumanikembo pa Cikumbuso? (Onani foto.)

⁸ Kutomera kale kakamwe, atumiki a Yahova asacemera anthu toera agumanikembo pa Cikumbuso. Mu caka ca 1881, abale na alongo ku Estados Unidos acemerwa toera agumanyikane pa Cikumbuso n’nyumba ya m’bale unango ku Allegheny, Pensylvaniya. Mukupita kwa ndzidzi, mpingo ubodzi na ubodzi ukhacita okha Cikumbuso. Mwezi wa Março wa caka 1940, amwazi a mphangwa apangwa toera acemere anthu a mucisa cawo kuti agumanikembo pa Cikumbuso. Mu caka ca 1960, Bheteli yatoma kutumiza micemerero ya Cikumbuso kuna mipingo. Kutomera mu caka ceneci, micemerero mizinji kakamwe ya Cikumbuso isagawirwa. Thangwi yanji tisawangisira kakamwe kucemera anthu anango toera agumanikembo pa Cikumbuso?

9-10. Ndi anthu api anango anaphedzeka tingawangisira kucemera anango kuti agumanikembo pa Cikumbuso? (Juwau 3:16)

⁹ Thangwi ibodzi inaticitisa kucemera anango toera agumanikembo pa Cikumbuso, ndi yakuti ife tisafuna kuti ale anagumanika pa Cikumbuso paulendo wakutoma apfundze undimomwene thangwi ya pinthu pidacita Yahova na Yezu kuna ife. (Lerini Juwau 3:16.) Ife tisadikhira kuti pinthu pinaona iwo na pinabva iwo pa Cikumbuso pinaaphedza toera kufuna kupfundza pizinji mbakhala atumiki a Yahova. Mbwenye pana anthu anango asaphedzekambo.

 ¹⁰ Ife tisacemerambo anthu adasiya kutumikira Yahova toera agumanikembo pa Cikumbuso. Ife tisacita pyenepi toera kuakumbusa kuti Mulungu asapitiriza kuafuna. Azinji asatawira kugumanika pa Cikumbuso, pontho ife tisatsandzaya kakamwe tingaaona. Kugumanika pa Cikumbuso kusaakumbusa kutsandzaya kukhali na iwo mu ndzidzi ukhatumikira iwo Yahova. Onani citsandzo ca Monica. c Iye aphedzwa toera akhale pontho m’mwazi mphangwa mu ndzidzi wa utenda wa COVID-19. Pidamala iye kugumanika pa Cikumbuso ca 2021, iye alonga: “Cikumbuso ca caka cino cakhala cakupambulika kakamwe kuna ine. Unoyu ukhali ulendo wanga wakutoma kumwazira mphangwa anthu na kuacemera toera agumanike pa Cikumbuso, thangwi pakhadapita pyaka 20 nee kucita basa ineyi. Nakuti ndisapereka takhuta kakamwe thangwi ya pidacita Yahova na Yezu kuna ine, ndacita pyonsene pidakwanisa ine toera kucemera anango kuti agumanikembo pa Cikumbuso.” (Mas. 103:1-4) Mwakukhonda tsalakana khala anthu asatawira micemerero yathu peno nkhabe, ife tisawangisira kuacemera toera agumanikembo pa Cikumbuso, thangwi tisadziwa kuti Yahova asakomerwa na kuwangisira kwathu.

11. Yahova asapasa tani nkhombo kuwangisira kwathu kucemera anthu kuti agumanike pa Cikumbuso? (Ageu 2:7)

¹¹ Yahova asapasa nkhombo kuwangisira kunacita ife toera kucemera anthu kuti agumanike pa Cikumbuso. Mwacitsandzo, mu caka ca 2021, mwakukhonda tsalakana utenda wa COVID-19, anthu akukwana 21.367.603 agumanika pa Cikumbuso. Numero ineyi yapiringana numero ya Mboni za Yahova pa dziko yonsene yapantsi. Mwandimomwene, Yahova nee asadzudzumika basi ene na numero ya anthu anagumanika pa Cikumbuso, mbwenye iye asadzudzumika na m’bodzi na m’bodzi anagumanika pa Cikumbuso. (Luka 15:7; 1 Tim. 2:3, 4) Ife tiri na cinyindiro cakuti Yahova asaphatisira basa yathu yakucemera anthu toera kutiphedza kugumana anthu a mitima yadidi.—Lerini Ageu 2:7.

12. Ndi pinentso pipi pyakuti panango pinaticitisa kukhala pyakunentsa toera kugumanika pa Cikumbuso? (Onani foto.)

¹² Yezu alonga kuti mu ntsiku zakumalisa, ife mbatidathimbana na nyatwa zakusiyana-siyana ninga kutcingwa na acibale athu, mautongi, nkhondo, mautenda na pinthu pinango. (Mat. 10:36; Marko 13:9; Luka 21:10, 11) Midzidzi inango, nyatwa zenezi zisaticitisa kukhala pyakunentsa toera kugumanika pa Cikumbuso ca kufa kwa Yezu. Mphapo abale na alongo athu asacitanji toera kukunda pinentso pyenepi, pontho Yahova asaaphedza tani?

13. Yahova apasa tani nkhombo cipapo na kuwangisira kwa m’bale Artem toera kucita Cikumbuso nkaidi?

¹³ Kuikhwa nkaidi. Abale na alongo athu anaikhwa nkaidi thangwi ya cikhulupiro cawo asacita pyonsene pinakwanisa iwo toera kukumbuka kufa kwa Yezu. Onani citsandzo ca Artem. Mu ndzidzi wa Cikumbuso ca caka ca 2020, iye akhadafungirwa nkaidi ing’ono kakamwe ya 17 metros quadrados, pontho nkaidi ineyi mukhali na anthu axanu. Mwakukhonda tsalakana kufungirwa nkaidi, iye akwanisa kugumana nkate na vinyu toera kupiphatisira pa Cikumbuso, pontho acita masasanyiro toera acite nkhani ya Cikumbuso ekhene. Mbwenye amuna anango akhali mu kaidi ineyi akhafumali, pontho akhalonga mwakutikana. Mphapo mbale Artem acitanji? Iye aaphemba toera akhonde kulonga mafala akutikana, pontho akhonde kufumali mu ndzidzi ubodzi. Mwakudzumatirisa,  amuna anewa atawira kusiya kufumali na kulonga mafala akutikana mu ndzidzi wa Cikumbuso. Artem alonga: “Ine ndikhafuna kuapanga thangwi a Cikumbuso.” Maseze iwo nee akhafuna kubva mphangwa zenezi, pidamala iwo kuona na kubvesera m’bale Artem pa Cikumbuso, iwo ancita mibvundzo thangwi ya Cikumbuso ceneci.

14. Atumiki a Yahova acitanji toera akwanise kucita Cikumbuso mu ndzidzi wa utenda wa COVID-19?

¹⁴ Utenda wa COVID-19. Pidatoma utenda wa COVID-19, atumiki a Yahova nee mbadakwanisa kugumanyikana pabodzi mu Nyumba ya Umambo peno mbuto zinango toera kucita Cikumbuso. Mbwenye pyenepi nee pyaapingiza toera kucita Cikumbuso. d Mipingo ikhali m’mbuto zakuti ziri na interneti yadidi, yacita Cikumbuso mukuphatisira vidhyukonferensya. Mphapo ninji pidacitika kuna abale na alongo azinji ali m’mbuto zakuti nee ziri na interneti yadidi? M’madziko anango, acitwa masasanyiro toera nkhani ya Cikumbuso ioniwe mu televizau na kubveserwa m’maradhyo. Kusiyapo pyenepi, abale a m’mabheteli agravari nkhani ya Cikumbuso mu pilongero pyakupiringana  500 toera abale na alongo azinji anakhala m’mbuto zakutali akwanisembo kucita Cikumbuso. Pontho abale acita masasanyiro toera mavidhyu na maaudhyu a nkhani ineyi aperekwe kuna abale anewa anakhala m’mbuto zakutali.

15. Mwapfundzanji na citsandzo ca nyakupfundza Bhibhlya anacemerwa Sue?

¹⁵ Kutcingwa na acibale. Kuna anango pisakhala pyakunentsa kakamwe toera kugumanika pa Cikumbuso thangwi ya kutcingwa na acibale. Onani citsandzo ca nyakupfundza Bhibhlya anacemerwa Sue. Mu caka ca 2021, mbidzati kufika ntsiku ya Cikumbuso, Sue apanga mulongo anampfundzisa Bhibhlya kuti iye nee mbadakwanisa kugumanika pa Cikumbuso thangwi yakutcingwa na acibale ace. Mulongo unoyu aleri lemba ya Luka 22:44. Buluka penepo, iye afokotoza kuti tingathimbana na nyatwa, tisafunika kutowezera citsandzo ca Yezu mukulonga pinthu pinatidzudzumisa kuna Yahova na kun’nyindira. Mangwana mwace, iye acita masasanyiro toera akhale na nkate na vinyu, pontho aona programu ya Kulambira Kwa Macibese kwakupambulika mu jw.org. Ntsiku ineyi namasiku, pikhali iye nkwartu mwace ekhene abvesera nkhani ya Cikumbuso mukuphatisira telefoni. Buluka penepo, Sue alembera mphangwa mulongo anampfundzisa Bhibhlya kuti: “Imwe mwandiwangisa kakamwe dzulo. Ine ndacita pyonsene pinakwanisa ine toera kugumanika pa Cikumbuso, pontho Yahova andiphedza. Ine nee ndisakwanisa kulonga kutsandzaya kuli na ine, pontho ndisapereka takhuta kakamwe.” Kodi imwe musaona kuti Yahova anakwanisa kukuphedzani mungathimbana na cinentso ninga ceneci?

16. Thangwi yanji tiri na cinyindiro cakuti Yahova anatipasa nkhombo tingawangisira toera kugumanika pa Cikumbuso? (Aroma 8:31, 32)

¹⁶ Yahova asakomerwa kakamwe na kuwangisira kwathu toera kukumbuka kufa kwa Yezu. Ife tiri na cinyindiro cakuti iye anatipasa nkhombo tingapitiriza kupereka takhuta thangwi ya pinthu pidacita iye kuna ife. (Lerini Aroma 8:31, 32.) Natenepa, tendeni tikhale dzololo toera kugumanika pa Cikumbuso caka cino mbatiwangisira toera kumwaza mphangwa mwaphinga mu ndzidzi wa Cikumbuso.