Anango akuzwa m’mbuto zakuti amuna azinji asaona akazi ninga nee ndi akufunika. Mwacitsandzo, m’bale Hans, wakuti ndi muyang’aniri wa cisa ku Bholiviya, alonga: “Amuna anango akuzwa m’makhaliro akhaacitisa kunyerezera kuti amuna ndi akufunika kakamwe kupiringana akazi. Thangwi yakunyerezera kuti ndi akufunika kakamwe kupiringana akazi, kazinji kene asatsalakana akazi mwakusowa cilemedzo.” Nkulu wa mpingo unango anacemerwa Shengxian wa ku Taiwani, alonga: “Kunakhala ine, amuna azinji asaona kuti akazi nee asafunika kulonga maonero awo kuna amuna. Mamuna angalonga maonero adapereka akazi, amuna anango panango nee anamulemedza.” Amuna anango asapangiza kuti nee asalemedza akazi munjira yakubisika kakamwe. Mwacitsandzo, panango iwo analonga pinthu pyakusekesa pyakuti pinatsukwalisa akazi.

Pyakutsandzayisa ndi pyakuti mwakukhonda tsalakana njira idakuzwa munthu, iye anakwanisa kucinja. Iye anakwanisa kusiya kunyerezera kuti mamuna ndi wakufunika kakamwe kupiringana nkazi. (Aef. 4:22-24) Toera akwanise kucita pyenepi asafunika kutowezera citsandzo ca Yahova. Mu nsolo uno, tinaona kuti Yahova asatsalakana tani akazi, abale anatsalakana tani alongo ninga munaatsalakanira Yahova, kusiyapo pyenepi tinaonambo kuti akulu a mpingo anapangiza tani cilemedzo kuna alongo mu mpingo.

YAHOVA ASATSALAKANA TANI AKAZI?

Yahova akhazikisa citsandzo cadidi cakuti amuna anatsalakana tani akazi. Nakuti iye ndi Baba wacitsalakano, asafuna anthu onsene. (Juw. 3:16) Alongo akukhulupirika ndi ninga anace akufunika kakamwe kuna iye. Onani njira zingasi zinapangiza kuti kuna Yahova akazi ndi akufunika kakamwe.

Iye asaatsalakana mwakusowa tsankhulo. Yahova acita amuna na akazi mwakulandana na Iye.  (Gen. 1:27) Iye nee acita amuna kuti akhale na maluso kakamwe peno ndzeru kupiringana akazi, pontho nee asafuna kakamwe amuna kupiringana akazi. (2 Kro. 19:7) Iye acita amuna na akazi na luso ibodzi ene yakubvesesa undimomwene wa m’Bhibhlya na kupangiza makhaliro ace adidi. Yahova asakomerwa na amuna na akazi anankhulupira, mwakukhonda tsalakana khala cidikhiro cawo ndi cakukhala kwenda na kwenda m’paraizu pa dziko yapantsi peno kutumikira ninga amambo na anyantsembe kudzulu. (2 Ped. 1:1) Mwakukhonda penula, Yahova asakomerwa na onsene, amuna na akazi ene.

Iye asaabvesera. Yahova asatsalakana mabvero a akazi na pinthu pinaadzudzumisa. Mwacitsandzo, iye abvesera mbatawira maphembero a Rakeli na Yana. (Gen. 30:22; 1 Sam. 1:10, 11, 19, 20) Yahova atsogolera anyakulemba Bhibhlya toera alembembo mphangwa zinapangiza amuna adabvera maonero a akazi. Mwacitsandzo, Abhrahamu acita pidapangwa iye na Yahova toera abvere pidalonga nkazace, Sara. (Gen. 21:12-14) Mambo Dhavidhi abvesera pidalonga Abhigaili. Mwandimomwene, Dhavidhi aona kuti Abhigaili atumwa na Yahova toera kudzalonga na iye. (1 Sam. 25:32-35) Yezu wakuti akhapangiza mwadidi makhaliro a Babace, abvera mai wace, Mariya. (Juw. 2:3-10) Pitsandzo pyenepi pisapangiza kuti njira ibodzi inapangiza Yahova cilemedzo kuna akazi ndi kuabvesera.

Iye asaanyindira. Mwacitsandzo, Yahova apasa Eva basa yakuphedzera kutsalakana dziko yonsene yapantsi. (Gen. 1:28) Kucita kwace pyenepi kusapangiza kuti Yahova nee akhamuona ninga munthu wakupwazika kuna mamunace Adhamu, mbwenye akhamuona ninga nyakuphedza wakufunika. Yahova aphatisirambo mprofeta wankazi Dhebhora na Uldha toera kucenjeza mbumba yace, kuphatanizambo mambo na nyakutonga miseru. (Aton. 4:4-9; 2 Ama. 22:14-20) Lero, Yahova asanyindira alongo toera kuphata mabasa ace. Alongo anewa akukhulupirika asatumikira ninga amwazi mphangwa, apainiya na amisionaryo. Iwo asaphedzera basa yakumanga, asatsalakana Nyumba za Umambo na nyumba zinango zinaphatisirwa na gulu ya Yahova. Anango asatumikira pa Bheteli, mbwenye anango asatumikira m’maofesi anathumburuzirwa mabukhu. Alongo anewa ndi ninga nsoka ukulu wa anyankhondo wakuti Yahova asauphatisira toera kukwanirisa cifuniro cace. (Mas. 68:11) Mwandimomwene, Yahova nee asaona kuti akazi ndi akupolola peno akusowa maluso.

ABALE ANATOWEZERA TANI YAHOVA PAKUTSALAKANA AKAZI?

Toera kudziwa khala tisatsalakana alongo ninga munafunira Yahova peno nkhabe, tisafunika kuonesesa mwadidi njira inanyerezera ife na inacita ife pinthu. Toera ticite pyenepi tisafuna ciphedzo. Ninga dotoro asakwanisa kuphatisira ntcini wakucita raio X toera kuona khala ntima wa munthu uli mwadidi peno nkhabe, munjira ibodzi ene xamwali wadidi na Mafala a Mulungu anakwanisa kutiphedza toera kudzindikira khala njira inaona ife akazi isakomeresa Mulungu peno nkhabe. Tinacitanji toera titambire ciphedzo ceneci?

Bvundzani xamwali wanu. (Mis. 18:17) Mphyadidi kucita mibvundzo iyi kuna xamwali wakuti asadziwika ninga munthu wadidi na wakulinganira: “Usaona kuti ndisatsalakana tani alongo? Kodi asaona kuti ndisaalemedza? Pana cinthu cinafunika ine kucita toera ndiatsalakane mwadidi?” Xamwali wanu angakupangani pinthu pyakuti musafunika kupisasanyira, lekani kumpokanya, mbwenye khalani dzololo toera kucita pidakupangani iye.

Pfundzani Mafala a Mulungu. Njira yadidi toera kudziwa khala tisatsalakana mwadidi alongo peno nkhabe ndi kuphatisira Mafala a Mulungu toera kudzindikira manyerezero athu na macitiro athu. (Aheb. 4:12) Mu ndzidzi unapfundza ife Bhibhlya, tinadzindikira amuna adatsalakana mwadidi akazi na anango adakhonda kutsalakana mwadidi akazi. Ife tinakwanisa kulandanisa pitsandzo pyenepi na njira inatsalakana ife akazi. Kusiyapo pyenepi, kulandanisa mavesi anango a m’Bhibhlya kunatiphedza kucalira kuphatisira mwakuipa Bhibhlya toera kuphedzera maonero akuipa thangwi ya akazi. Mwacitsandzo, mwakubverana na 1 Pedhru 3:7, mamuna asafunika kulemedza nkazi ninga “combo cakuti nkhabe nentsa kusweka.” a Kodi pyenepi pisabveka kuti nkazi ndi wakupwazika, wakusowa maluso peno wakusowa  basa angalandaniswa na mamuna? Nkhabe! Tingalandanisa mafala a Pedhru na mafala anagumanika pa Agalata 3:26-29 tisaona kuti Yahova asankhula akazi na amuna ene toera atonge pabodzi na Yezu kudzulu ninga amambo. Tingapfundza Mafala a Mulungu, mbatiphemba axamwali athu adidi toera atipange kuti asaona tani njira inatsalakana ife akazi, tinakwanisa kupangiza cilemedzo cakuthema kuna alongo athu.

AKULU A MPINGO ANAPANGIZA TANI CILEMEDZO KUNA ALONGO?

Abale mu mpingo anakwanisambo kutsalakana alongo mwacilemedzo angatowezera citsandzo ca akulu a mpingo aufuni. Akulu a mpingo anapangiza tani cilemedzo kuna alongo toera akhale citsandzo cadidi kuna anango? Tendeni tione njira zingasi.

Iwo asasimba alongo. Mpostolo Paulu apangiza citsandzo cadidi kuna akulu a mpingo cakuti anakwanisa kucitowezera. Iye asimba alongo azinji mu tsamba idalembera iye mpingo wa ku Roma. (Aroma 16:12) Musakwanisa kunyerezera kutsandzaya kudakhala na alongo anewa mu ndzidzi ukhalerwi tsamba ya Paulu mu mpingo? Munjira ibodzi ene, akulu a mpingo asasimba alongo thangwi ya makhaliro awo adidi na mabasa anaphatira iwo Yahova. Pyenepi pisaphedza alongo toera kudziwa kuti asalemedzwa na kutsalakanwa. Mafala a ciwangiso a akulu a mpingo anakwanisa kuphedza alongo anewa toera kupitiriza kutumikira Yahova mwakukhulupirika.—Mis. 15:23.

Pakusimba alongo, akulu a mpingo asafunika kucita pyenepi na ntima onsene na kuapanga kuti thangwi yanji ali kuasimba. Thangwi yanji? Mulongo unango anacemerwa Jessica alonga: “Pisakhala pyadidi kakamwe abale angapanga mulongo kuti ‘mwacita mwadidi kakamwe.’ Mbwenye tisatsandzaya abale angatipanga cinthu cidacita ife, ninga kupfundzisa anathu toera apfulike pa misonkhano peno kukwata anyakupfundzathu a Bhibhlya mbatienda nawo ku misonkhano.” Akulu a mpingo angasimba alongo thangwi ya pinthu pidacita iwo, pyenepi  pisaaphedza kuona kuti ndi akufunika, pontho asalemedzwa mu mpingo.

Iwo asabvesera alongo. Akulu a mpingo akucepeseka asadziwa kuti siwo basi tayu anadziwa njira zadidi zakucita pinthu. Akulu a mpingo anewa asaphemba alongo toera alonge maonero awo, pontho mu ndzidzi unalonga iwo maonero awo iwo asaabvesera mwadidi. Angacita pyenepi, akulu a mpingo asawangisa alongo, pontho iwo asaphedzekambo. Munjira ipi? Nkulu wa mpingo unango anacemerwa Gerardo, wakuti asatumikira ku Bheteli alonga: “Ine ndisabvundzisa alongo toera ndidziwe maonero awo, thangwi maonero awo asandiphedza toera ndicite mwadidi basa yanga. Kazinji kene iwo asaphata mwadidi kakamwe mabasa awo kupiringana abale azinji.” Mu mpingo, alongo azinji asatumikira ninga apainiya, natenepa iwo asadziwa mwadidi makhaliro a anthu. Nkulu wa mpingo anacemerwa Bryan alonga: “Alongo athu ali na maluso mazinji akuti anakwanisa kuaphatisira mu gulu. Natenepa phedzekani na maluso awo!”

Akulu a mpingo audziwisi nee asapwaza mwakucimbiza maonero a alongo. Thangwi yanji? Nkulu wa mpingo unango anacemerwa Edward alonga: “Maonero a alongo na pidatamba iwo mu umaso, pinakwanisa kuphedza m’bale toera akwanise kubvesesa mwadidi pinthu, pyenepi pinamphedza toera kubvera ntsisi anango.” (Mis. 1:5) Maseze nkulu wa mpingo akhonde kuphatisira maonero a alongo, iye asafunika kupereka takhuta kuna iwo thangwi yakupereka maonero awo mbalonga pidabvesesa iwo.

Iwo asapfundzisa alongo. Akulu a mpingo akuti ali na luso yakubvesesa pinthu asasaka miyai toera kupfundzisa alongo. Mwacitsandzo, iwo anakwanisa kupfundzisa mulongo kuti anatsogolera tani misonkhano ya basa yakumwaza mphangwa pangasoweka m’bale wakubatizwa. Iwo anakwanisa kuapfundzisa toera aphatisire maferamentu peno mitcini inango toera aphedzere basa yakumanga peno kusasanyira nyumba zinaphatisirwa na gulu ya Yahova. Pa Bheteli, ayang’aniri asapfundzisa alongo toera aphate mabasa akusiyana-siyana, ninga basa yakusasanyira nyumba, yakugula pinthu, yakutsalakana kobiri, yakutsalakana maprogramu a mitcini yandzeru na mabasa anango. Akulu a mpingo angapfundzisa alongo, iwo asapangiza kuti ndi akuthema na akunyindirika.

Alongo azinji asaphatisira pidapfundziswa iwo na akulu a mpingo toera kuphedza anango. Mwacitsandzo, alongo anango asaphatisira maluso awo akumanga toera kuphedza anango amange nyumba zawo cidengwa cingamala kucitika. Alongo anango asaphatisira maluso adapfundziswa iwo m’basa yakupereka umboni wapakweca toera kupfundzisambo anango kuti akwanisembo kucita pyenepi. Alongo asaona tani akulu a mpingo anaapfundzisa? Mulongo unango anacemerwa Jennifer alonga: “Pidatoma ine basa yakumanga Nyumba ya Umambo, muyang’aniri aphatisira ndzidzi wace toera kundipfundzisa. Iye akhaona basa ikhaphata ine, pontho akhandisimba. Ndikhakomerwa kakamwe kuphata basa na iye thangwi ndikhaona kuti ndine wakufunika na wakunyindirika.”

NKHOMBO ZAKUTSALAKANA ALONGO ATHU NINGA ANTHU A PABANJA PATHU

Ife tisafuna alongo athu akukhulupirika ninga munaafunira Yahova! Na thangwi ineyi tisaatsalakana ninga anthu a pabanja pathu. (1 Tim. 5:1, 2) Ife tisakomerwa kakamwe kuphata basa pabodzi na iwo. Ife tisatsandzaya kakamwe iwo angadziwa kuti ife tisaafuna, pontho tisaaphedza. Mulongo unango anacemerwa Vanessa alonga: “Ine ndisapereka takhuta kakamwe kuna Yahova thangwi ndiri mu gulu yace, yakuti iri na abale na alongo akuti asandibalangaza.” Mulongo unango wa ku Taiwan alonga: “Ine ndisapereka takhuta kakamwe thangwi Yahova na gulu yace asatsalakana akazi, pontho asalemedza pinanyerezera iwo. Pyenepi pisawangisa cikhulupiro canga, pontho pisandicitisa kuona kuti ndi mwai ukulu kakamwe kukhala mu gulu ya Yahova.”

Yahova anatsandzaya kakamwe angaona abale akukhulupirika akutsalakana akazi na kuaona munjira inaaonera iye! (Mis. 27:11) Nkulu wa mpingo unango anakhala ku Escócia anacemerwa Benjamin alonga: “Anthu azinji lero nee asalemedza akazi, natenepa akazi angapita n’Nyumba ya Umambo ife tisafuna kuti iwo apibve kuti asafuniwa, pontho asalemedzwa.” Tendeni ticite pyonsene pinakwanisa ife toera titowezere Yahova mbatitsalakana alongo athu mwaufuni na mwacilemedzo.—Aroma 12:10.