1-2. Ndi pinentso pipi pyakuti atumiki akukhulupirika a Yahova panango anathimbana napyo?

 TINGAGWERWA na cidengwa panango umaso wathu unacinja kakamwe mwakucimbiza. Mwacitsandzo, m’bale unango anacemerwa Luis a adzindikira kuti ali na utenda wakugopswa kakamwe wa kankro. Dotoro ampanga kuti iye mbadakhala m’maso miyezi yakucepa. Mulongo Monika na mamunace akhamala ndzidzi uzinji m’mabasa a Yahova. Ntsiku inango, Monika adzindikira kuti mamunace wakuti akhali nkulu wa mpingo akhacita madawo mwacibisobiso mu pyaka pizinji. Mulongo wakukhonda manga banja anacemerwa Olivia akhafunika kubuluka panyumba pace thangwi kukhafuna citika condzi cikulu. Pidabwerera iye panyumba pace, agumana kuti nyumba yace yamala kufudzwa na condzi. Mwakukhonda dikhira, umaso wa abale anewa wacinja kakamwe. Kodi imwe mwacitikirwambo na pinthu pyakuipa pyakuti pyacinja umaso wanu mwakucimbiza?

² Ngakhale kuti ndife atumiki akukhulupirika a Yahova, ife tisathimbana na nyatwa, pontho tisabva kupha ninga anthu anango onsene. Kusiyapo pyenepi, ife tisafunika kupirira kutcingwa na anthu akuti asaida atumiki a Yahova. Maseze Yahova nee anatitsidzikiza toera tikhonde kucitikirwa na pinthu pyenepi pyakuipa, iye asapikira kuti anatiphedza. (Iza. 41:10) Na ciphedzo cace, ife tinakwanisa kupitiriza kukhala akutsandzaya, kucita pisankhulo pyadidi na kupitiriza kukhala akukhulupirika kuna iye maseze titambe nyatwa zakunentsa kakamwe. Mu nsolo uno, tinaona njira zinai zinaphatisira Yahova toera kutiphedza tingacitikirwa na pinthu pyakuipa. Pontho tinaona pinafunika ife kucita toera tiphindule na ciphedzo cace.

 YAHOVA ANAKUTSIDZIKIZANI

3. Tingatamba nyatwa, ndi pinthu pipi pyakuti pinakhala pyakunentsa toera kupicita?

³ Khala tiri kutamba nyatwa, ndi pyakunentsa kunyerezera mwadidi na kucita pisankhulo pyadidi. Thangwi yanji? Thangwi pisapha muntima, tinakhala akutsukwala kakamwe na akudzudzumika. Ife tinakwanisa kukhala akudzudzumika mbatikhonda kudziwa pinafunika ife kucita. Onani kuti alongo awiri adalongwa mu ndima zakutoma akhali tani mu ndzidzi ukhatamba iwo nyatwa. Mulongo Olivia alonga: “Pidamala kufudzwa nyumba yanga na condzi, nee ndikhadziwa cakucita, pontho ndikhali wakudzudzumika kakamwe.” Thangwi ya madawo akhacita mamunace, mulongo Monika alonga: “Ndatsukwala kakamwe. Ndikhapibva ninga munthu andilasa na mpeni. Nee ndikhakwanisabve kucita mabasa akhacita ine ntsiku zonsene. Cipo ndanyerezera kale kuti pyenepi mbapidandicitikira.” Mphapo Yahova apikira kuti anatiphedza tani tingakhala akudzudzumika?

4. Mwakubverana na Afilipi 4:6, 7, Yahova apikiranji kuna ife?

⁴ Yahova asacitanji? Ninga pinalonga Bhibhlya, iye apikira kutipasa “ntendere wa Mulungu.” (Lerini Afilipi 4:6, 7.) Ntendere unoyu ndi kukhurudzika kunakhala na ife tingakhala na uxamwali wakuwanga na iye. Pontho ntendere unoyu, “usapiringana kubvesesa konsene”; pyenepi pisabveka kuti ntendere unoyu ndi wadidi kakamwe kupiringana pinanyerezera ife. Mwacitsandzo, kodi imwe mwatoma kale kucita phembero kuna Yahova, buluka penepo mbamukhala wakukhurudzika? Imwe mwakhala wakukhurudzika thangwi Yahova akupasani “ntendere wa Mulungu.”

5. Ntendere wa Mulungu usatsidzikiza tani manyerezero athu na mitima yathu?

⁵ Lemba ya Afilipi 4:7 isalongambo kuti ntendere wa Mulungu “unadzatsidzikiza mitima yanu na manyerezero anu.” Fala yakuti ‘kutsidzikiza’ ikhaphatisirwa toera kulonga pya anyankhondo akuti akhatsidzikiza nzinda toera ukhonde kufudzwa. Anthu akakhala mu nzinda unoyu akhapibva kuti akhali akutsidzikizika, thangwi akhadziwa kuti anyankhondo ali kuaonera. Munjira ibodzi ene, ntendere wa Mulungu ungatsidzikiza mitima yathu na manyerezero athu, tisakhala akukhurudzika thangwi tisadziwa kuti tiri akutsidzikizika. (Mas. 4:8) Ninga Yana, ngakhale kuti nyatwa zathu nee zinamala mwakucimbiza, ife tinakwanisa kupitiriza kukhala akukhurudzika. (1 Sam. 1:16-18) Pontho tingakhala akukhurudzika, kazinji kene pisakhala pyakukhonda nentsa kunyerezera mwadidi na kucita pisankhulo pyadidi.

6. Tisafunika kucitanji toera tikhale na ntendere wa Mulungu? (Onanimbo foto.)

⁶ Tisafunika kucitanji? Ninga anthu akakhala mu nzinda akuti akhakwanisa kucemera anyankhondo toera kuatsidzikiza,  ifembo tinakwanisa kuphemba Yahova toera atitsidzikize. Munjira ipi? Citani phembero mpaka mukhale na ntendere wa Mulungu. (Luka 11:9; 1 Ates. 5:17) M’bale Luis adalongwa mu ndima zakutoma, afokotoza kuti iye na nkazace Ana akwanisa tani kupirira pidapangwa iwo kuti iye anakhala m’maso miyezi yakucepa. Iye alonga: “Midzidzi ninga ineyi ndi pyakunentsa kakamwe kucita pisankhulo thangwi yakutsalakana ungumi na pinthu pinango. Mbwenye phembero ikhali yakufunika kakamwe toera tikhale na ntendere.” Luis na nkazace alonga kuti akhamala ndzidzi uzinji mbakacita phembero, pontho akhacita mwakukhonda phonya mbaphemba Yahova toera aapase ntendere wa m’manyerezero, akhale akukhurudzika na audziwisi toera kucita pisankhulo pyadidi. Natenepa Yahova aaphedza. Mungathimbana na nyatwa, pitirizani kucita phembero. Mungacita pyenepi, munakhala na ntendere wa Yahova wakuti unatsidzikiza ntima wanu na manyerezero anu.—Aroma 12:12.

YAHOVA ANAKUIKHANI PA MBUTO YAKUWANGA

7. Ndi mabvero api akuti panango tinakhala nawo tingathimbana na nyatwa?

⁷ Tingathimbana na nyatwa, panango nee tinakhala na mabvero mabodzi ene peno kunyerezera na kucita pinthu ninga mukhacitira ife kale. Ninga bote yakuti isakwatika na mabimbi, ifembo tinakwanisa kukhala akutsukwala tingathimbana na nyatwa. Mulongo Ana adalongwa pakutoma alonga kuti akhala na mabvero akusiyana-siyana pidafa mamunace Luis. Iye alonga: “Midzidzi inango ndikakhala wakutsukwala kakamwe, pontho ndikhabvereka ntsisi. Kusiyapo pyenepi, ndikhaipirwa thangwi ya kufa kwace.” Midzidzi inango, mulongo Ana akhapibva kuti ali ekhene, pontho akhaipirwa thangwi yakucita pisankhulo pyakuti mamunace mbadapicita mwadidi kakamwe. Midzidzi inangombo, akhapibva ninga ali m’bara yakuti muli kucitika mabimbi makulu thangwi ya condzi. Kodi Yahova asatiphedza tani tingakhala akutsukwala kakamwe thangwi ya mabvero athu?

8. Mwakubverana na Izaiya 33:6, ndi cinyindiro cipi cinatipasa Yahova?

⁸ Yahova asacitanji? Iye asatipasa cinyindiro cakuti anadzatiikha pa mbuto yakuwanga. (Lerini 1 Pedhru 5:10.) Bote ingafamba m’bara mu ndzidzi wa condzi panango inakwatika mbienda konsene kwene kunenda mabimbi. Toera pyenepi pikhonde kucitika, mabote anango asakhala na pinthu pantsi n’khundu-n’khundu toera akhale akutsidzikizika. Pinthu pyenepi pisaphedza toera bote ikhonde kukwatika kakamwe na mabimbi, pontho anthu ali m’bote anakhala akutsidzikizika, kusiyapo pyenepi bote inafamba mwadidi. Ngakhale tenepo, pinthu pyenepi pinatsidzikiza kazinji kene pisaphata basa mwadidi khala bote iri kufamba. Munjira ibodzi ene, Yahova anadzatiikha pa mbuto yakuwanga  tingapitiriza kuntumikira mwakukhulupirika m’midzidzi ya nyatwa.

9. Mabukhu na mavidhyu athu anatiphedza tani toera tipitirize kukhala na maonero akulinganira? (Onanimbo foto.)

⁹ Tisafunika kucitanji? Mungakhala wakutsukwala kakamwe citani pyonsene toera mupitirize kucita phembero, kugumanika pa misonkhano na kumwaza mphangwa. Ndimomwene kuti panango nee munakwanisa kucita pinthu ninga pikhacita imwe kalene, mbwenye kumbukani kuti Yahova nee asadikhira kuti ticite pinthu pyakuti nee tinakwanisa kupicita. (Luka 21:1-4) Kusiyapo pyenepi, khalani na ndzidzi wakucita pfundziro ya munthu paekha na kunyerezera mwadidi pinapfundza imwe. Thangwi yanji? Thangwi Yahova asaphatisira gulu yace toera kutipasa mabukhu na mavidhyu akuti anakwanisa kutiphedza kukhala na maonero akulinganira m’midzidzi ya nyatwa. Toera kugumana mphangwa zinafuna imwe, sakani mu aplikativo JW Library^®, Índice das Publicações da Torre de Vigia na Bukhu Inaphatisira Mboni za Yahova Pakufufudza. Mulongo Monika adalongwa pakutoma alonga kuti iye atoma kuphatisira pinthu pyenepi mu ndzidzi udatoma iye kukhala wakutsukwala kakamwe. Mwacitsandzo, iye asaka fala yakuti “kuipirwa.” Midzidzi inango, iye asaka mafala akuti “kusandukirana” na “kukhulupirika.” Buluka penepo iye akhaleri mpaka kupungula kutsukwala kwace. Iye alonga: “Pidatoma ine kusaka mafala anewa ndikhali wakudzudzumika kakamwe. Mbwenye pidapitiriza ine kuleri, pikhali ninga Yahova ali kundikhumbatira. Pikhaleri ine, ndadzindikira kuti Yahova akhabvesesa mabvero anga, pontho akhandiphedza.” Yahova anakuphedzanimbo toera mupungule kutsukwala kwanu mbamukhala wakukhurudzika.—Mas. 119:143, 144.

YAHOVA ANAKUPHEDZANI

10. Ndi mabvero api akuti panango tinakhala nawo tingagwerwa na nyatwa?

¹⁰ Tingacitikirwa na cinthu cakutsukwalisa kakamwe, panango tinasowa mphambvu, pontho manyerezero athu nee anakhala pa mbuto. Panango tinapibva ninga nyakucita mapika adaphekeka wakuti kale akhathamanga kakamwe mbwenye cincino asafamba mbakatcikhama. Panango pinakhala pyakunentsa kucita pinthu pyakuti kale tikhapicita mwakukhonda nentsa, peno nee tinakhala na cifuno cakucita pinthu pikhakomerwa na ife kupicita. Ninga Eliya, panango pinakhala pyakunentsa kakamwe kuna ife kulamuka, pontho basi ene tinafuna kugona. (1 Ama. 19:5-7) Yahova asapikira kucitanji tingasowa mphambvu?

11. Ndi njira ipi inango inaphatisira Yahova toera kutiphedza? (Masalmo 94:18)

 ¹¹ Yahova asacitanji? Iye apikira kuti anatiphedza. (Lerini Masalmo 94:18.) Ninga nyakucita mapika adaphekeka wakuti asafuna ciphedzo toera afambe, ife panango tinafunambo ciphedzo toera tipitirize kutumikira Yahova. M’midzidzi ineyi ya nyatwa, Yahova asatipasa cinyindiro cakuti: “Ine Yahova Mulungu wako, ndaphata djanja yako yamadyo, ndine anakupanga kuti: ‘Leka kugopa. Ine ndinadzakuphedza.’” (Iza. 41:13) Mambo Dhavidhi aona ciphedzo ceneci ca Yahova. Pikhathimbana iye na nyatwa, pontho pikhatcingwa iye na anyamalwa, apanga Yahova: “Djanja yanu yamadyo isandiphedza.” (Mas. 18:35) Mphapo Yahova asatiphedza tani?

12. Ndi anthu api akuti panango Yahova anaaphatisira toera kutiphedza tingasowa mphambvu?

¹² Kazinji kene Yahova asakulumiza anango toera kutiphedza. Mwacitsandzo, paulendo unango Dhavidhi pikhali iye wakusowa mphambvu, xamwali wace Yonatani aenda kuna iye toera kumpasa mphambvu na kum’balangaza. (1 Sam. 23:16, 17) Munjira ibodzi ene, Yahova asankhula Elizeu toera kuphedza Eliya. (1 Ama. 19:16, 21; 2 Ama. 2:2) Lero, Yahova panango anaphatisira acibale, axamwali, peno akulu a mpingo toera kutiphedza. Mbwenye tingakhala akutsukwala kakamwe, panango nee tinafuna kukhala pabodzi na anango. Basi ene tinafuna kukhala tekhene. Ndi pyenepi pinacitika kazinji kene. Mphapo tisafunika kucitanji toera tiphedzwe na Yahova?

13. Tisafunika kucitanji toera tiphindule na ciphedzo ca Yahova? (Onanimbo foto.)

¹³ Tisafunika kucitanji? Wangisirani toera mucalire kukhala mwekhene. Tingakhala tekhene, tinatoma kunyerezera basi ene umaso wathu na nyatwa zathu. Manyerezero anewa panango anaticitisa kukhonda kucita pisankhulo pyadidi. (Mis. 18:1) Ndimomwene kuti midzidzi inango tisafunika kukhala tekhene, makamaka tingacitikirwa na pinthu pyakuipa. Mbwenye tingakhala tekhene mu ndzidzi uzinji, panango tinaluza ciphedzo ca anthu anaphatisira Yahova toera kutiphedza. Natenepa maseze pikhale pyakunentsa, tawirani ciphedzo ca acibale anu, axamwali anu na akulu a mpingo mungathimbana na nyatwa. Aoneni ninga njira inaphatisira Yahova toera kukuphedzani.—Mis. 17:17; Iza. 32:1, 2.

YAHOVA ANAKUBALANGAZANI

14. Ndi pinthu pipi pyakuti panango pinaticitisa kugopa?

¹⁴ Midzidzi inango panango tinagopa kakamwe. Mu ndzidzi wakale, atumiki akukhulupirika a Mulungu alonga pya midzidzi ikhali iwo  akutsukwala na akugopa thangwi ya anyamalwa awo na pinthu pinango. (Mas. 18:4; 55:1, 5) Munjira ibodzi ene, panango tinatcingwa kuxikola, kubasa, na acibale athu peno na atongi. Panango tinagopa kufa thangwi ya utenda. Midzidzi ineyi panango tinapibva akusowa mphambvu ninga mwanang’ono. Mphapo Yahova asatiphedza tani m’midzidzi ninga ineyi?

15. Lemba ya Masalmo 94:19 isatipasa cinyindiro cipi?

¹⁵ Yahova asacitanji? Iye asatibalangaza na kutiphedza toera tikhale akukhurudzika. (Lerini Masalmo 94:19.) Lemba ineyi isaticitisa kunyerezera pya ntsikana wang’ono wakuti nee asakwanisa kugona thangwi yakugopa kulira kwa njazi. Ife tinakwanisa kunyerezera pai wace mbaenda kuna iye mbankwata mpaka kuphatwa na citulo. Maseze njazi iciri kulira, iye asapibva kuti ali wakutsidzikizika, pontho asabalangazika thangwi ya kukwatwa na pai wace. Munjira ibodzi ene, tingathimbana na nyatwa zakugopswa tisafuna ciphedzo ca Babathu wakudzulu toera atiphate m’manja mwace mwakuphipirisa mpaka kukhala akukhurudzika. Mphapo tinakwanisa tani kubalangazwa na Yahova?

16. Tisafunika kucitanji toera tibalangazwe na Yahova? (Onanimbo foto.)

¹⁶ Tisafunika kucitanji? Ndzidzi onsene citani phembero kuna Yahova, pontho lerini Mafalace. (Mas. 77:1, 12-14) Mungacita pyenepi, cinthu cakutoma cinafuna kucita imwe mungathimbana na nyatwa ndi kuphemba ciphedzo kuna Babanu wakudzulu. Pangani Yahova pinthu pinagopa imwe na pinthu pinakunentsani. Buluka penepo mbvesereni kubulukira m’Mafalace, pontho iye anakubalangazani. (Mas. 119:28) Panango munakwanisa kuleri makhundu anango a Bhibhlya akuti anakubalangazani mungagopa. Mwacitsandzo, panango munabalangazwa mungaleri bukhu ya Yobe, Masalmo, Misangani, kuphatanizambo mafala a Yezu anagumanika m’bukhu ya Mateu kapitulu 6. Mungacita phembero kuna Yahova na kuleri Mafalace, iye anakubalangazani.

17. Ndi cinyindiro cipi cakuti tinakwanisa kukhala naco?

¹⁷ Ife tinakwanisa kukhala na cinyindiro cakuti Yahova anatiphedza tingacitikirwa na pinthu pyakuipa mu umaso wathu. Iye nee anatisiya tekhene. (Mas. 23:4; 94:14) Yahova asapikira kuti anatitsidzikiza, anatiikha pa mbuto yakuwanga, anatiphedza na kutibalangaza. Lemba ya Izaiya 26:3 isalonga tenepa thangwi ya Yahova: “Imwe munadzatsidzikiza ale anakunyindirani na ntima onsene; munadzaapasa ntendere wakukhonda mala, thangwi iwo asakunyindirani.” Natenepa nyindirani Yahova, pontho citani pyonsene pinakwanisa imwe toera mutambire ciphedzo cace. Mungacita pyenepi, imwe munakhala na mphambvu ngakhale m’midzidzi ya nyatwa.