1. Munganyerezera thangwi ya Yahova, ninji pinabwera m’manyerezero mwanu?

 KODI imwe mwanyerezera kale kuti Yahova akhala tani? Ninji pinanyerezera imwe mungacita phembero kuna iye? Maseze ife nkhabe kwanisa kuona Yahova, mbwenye Bhibhlya isalonga makhaliro ace akusiyana-siyana. Yahova asalandaniswa na “dzuwa, xango” na “malirimi a moto.” (Mas. 84:11; Aheb. 12:29) M’masomphenya, Ezekiyeli alonga kuti Yahova ndi ninga mwala wa safira, utale wakuyetimira na ceza ca utawaleza. (Ezek. 1:26-28) Anango mwa makhaliro anewa a Yahova anakwanisa kutidzumatirisa peno kutigopesa.

2. Thangwi yanji midzidzi inango pisakhala pyakunentsa kukhulupira kuti Yahova asatifuna?

² Nakuti ife nkhabe kwanisa kuona Yahova, panango pinakhala pyakunentsa kukhulupira kuti iye asatifuna. Anango asanyerezera kuti Yahova cipo asatifuna thangwi ya pinthu pidaacitikira mu umaso wawo. Panango iwo akuzwa na anyakubala akuti nee akhaafuna. Yahova asabvesesa, pontho asadziwa kuti mabvero anewa asatikhuya tani. Toera kutiphedza, iye asalonga makhaliro ace adidi kubulukira m’Bhibhlya.

3. Thangwi yanji tisafunika kupfundza pya ufuni wa Yahova?

³ Fala ibodzi inafokotoza mwadidi Yahova ndi ufuni. Bhibhlya isalonga kuti “Mulungu ndi ufuni.” (1 Juw. 4:8) Pyonsene pinacita iye ndi thangwi ya ufuni. Ufuni wa Yahova ndi ukulu kakamwe, pontho iye asaupangiza kuna anthu onsene, ale anantumikira na anakhonda kuntumikira. (Mat. 5:44, 45) Mu nsolo uno tinapfundza thangwi ya Yahova na ufuni wace. Tingapfundza pizinji thangwi ya Mulungu wathu, ufuni wathu kuna iye unathimizirikambo.

YAHOVA ASATIFUNA KAKAMWE

4. Musapibva tani thangwi ya ufuni unapangiza Yahova kuna imwe? (Onanimbo foto.)

⁴ “Yahova ndi wakukoma ntima kakamwe.” (Tiya. 5:11) M’Bhibhlya, Yahova asalandanisika ninga mama waufuni. (Iza. 66: 12, 13) Nyerezerani citsalakano cinapangiza mama waufuni kuna mwanace wang’ono. Iye asankwata mbalonga naye mwaufuni na mwakukhurudzika. Mwana angalira peno angabva kupha, mai wace asawangisira toera kumpasa pinafuna iye. Ife tingatamba nyatwa tinakwanisa kukhala na cinyindiro cakuti Yahova anatiphedza. Nyamasalmo alonga: “Pidakundwa ine na kupswipa ntima, imwe mwandibalangaza mbandikhala wakukhurudzika.”—Mas. 94:19.

5. Kodi ufuni wakukhonda mala wa Yahova usabvekanji kuna imwe?

⁵ Yahova ndi wakukhulupirika. (Mas. 103:8) Iye nkhabe siya kutifuna tingacita pinthu pyakuipa. Aizraeli atsukwalisa Yahova kazinji kene; mbwenye mu ndzidzi udatcunyuka iwo mbasiya kucita pinthu pyakuipa, iye apangiza ufuni wace wakukhonda mala kuna iwo. Mwacitsandzo, iye aapanga: ‘Imwe mwadzakhala akufunika kakamwe kuna ine, ine ndakulemedzani, pontho ndisakufunani.’ (Iza. 43:4, 5) Ndi ufuni unoyu unapangiza Yahova kuna ife. Ndzidzi onsene ife tinakwanisa kun’nyindira. Maseze ticite madawo makulu, Yahova nkhabe kutisiya. Tingatcunyuka mbatibwerera kuna Yahova, iye anapitiriza kutifuna. Iye asapikira kuti ‘anatilekerera na ntima onsene.’ (Iza. 55:7) Bhibhlya isalonga kuti kulekerera kweneko kusabweresa “midzidzi yacibalangazo buluka kuna Yahova.”—Mabasa 3:19.

6. Lemba ya Zakariya 2:8 isatipfundzisanji thangwi ya Yahova?

⁶ Lerini Zakariya 2:8. Nakuti Yahova asatifuna, iye asabvesesa mwakucimbiza mabvero athu, pontho ali dzololo toera kutitsidzikiza. Tingathabuka iye asatsukwala kakamwe. Natenepa, tinakwanisa kukhala na cinyindiro cakuti iye anatitawira tingamphemba: “Nditsidzikizeni ninga munatsidzikizira imwe diso yanu.” (Mas. 17:8) Diso ndi yakufunika kakamwe, pontho ndi ibodzi mwa makhundu a manungo akuti asafunika kutsidzikizwa mwadidi kakamwe. Natenepa, Yahova angatiladanisa na diso pisakhala ninga iye akulonga: ‘Ule anathabusa mbumba yanga, ali kudzokonya khundu yakufunika kakamwe ya manungo anga.’

7. Thangwi yanji tisafunika kukhala na cinyindiro cakuti Yahova asatifuna?

⁷ Yahova asafuna kuti imwe mukhale na cinyindiro cakuti iye asakufunani kakamwe. Mbwenye iye asadziwa kuti thangwi ya makhaliro athu akale, panango tinapenula khala iye asatifunadi. Peno tinathimbana na nyatwa zakuti zinaticitisa kupenula ufuni wa Yahova kuna ife. Mphapo tinacitanji toera tikhale na cinyindiro  cakuti iye asatifuna? Njira ibodzi yakucita pyenepi ndi kupfundza thangwi ufuni unapangiza Yahova kuna Yezu, Akristu akudzodzwa na kuna ife tonsene.

YAHOVA ASAPANGIZA TANI UFUNI WACE?

8. Thangwi yanji Yezu akhali na cinyindiro cakuti Babace akhanfuna?

⁸ Yahova na Mwanace akhala pabodzi mu pyaka pizinji kakamwe, pontho pyenepi pyaacitisa kukhala na uxamwali wa ponda ndipondembo. Nkhabe munthu akhali na uxamwali ninga unoyu. Pa Mateu 17:5, Yahova mbadakwanisa basi ene kulonga: ‘Uyu ndi ule anakomerwa na ine.’ Mbwenye nakuti iye akhafuna kuti ife tidziwe kuti iye akhafuna kakamwe Yezu, iye alonga: “Uyu ndi Mwananga wakufunika.” Yahova akhakomerwa na pikhacita Yezu na pire pikhafuna iye kudzacita. (Aef. 1:7) Pontho Yezu nee akhapenula khala Babace akhanfuna peno nkhabe. Iye akhali na cinyindiro consene cakuti Babace akhanfuna. Kazinji kene iye alonga na cinyindiro kuti Baba asandifuna.—Juw. 3:35; 10:17; 17:24.

9. Ndi mafala api anapangiza kuti Yahova asafuna Akristu akudzodzwa? Fokotozani. (Aroma 5:5)

⁹ Yahova asapangizambo kuti asafuna Akristu akudzodzwa. (Lerini Aroma 5:5.) Onani mafala akuti “ufuni wa Mulungu wadzadzwa.” Bukhu inango yalonga kuti “ufuni wa Mulungu usabwera kuna ife ninga madzi a mu nkulo.” Citsandzo ceneci cisapangiza kuti Yahova asafuna kakamwe Akristu akudzodzwa, pontho iwo asadziwa kuti “asafuniwa na Mulungu.” (Yuda 1) Mpostolo Juwau alemba tenepa toera kupangiza mabvero awo: “Onani ufuni ukulu udapangiza Baba kuna ife, mpaka ife kucemerwa ana a Mulungu!” (1 Juw. 3:1) Kodi Yahova asafuna basi ene Akristu akudzodzwa? Nkhabe. Iye asapangiza kuti asafuna ife tonsene.

10. Ndi cinthu cipi cakufunika kakamwe cinapangiza kuti Yahova asatifuna?

¹⁰ Ndi cinthu cipi cakufunika kakamwe cinapangiza kuti Yahova asatifuna? Ciomboli. Nkhabepo munthu unango adapangiza ufuni ukulu kakamwe kupiringana udapangiza Yahova! (Juw. 3:16; Aroma 5:8) Yahova atawirisa Mwanace wakufunika kakamwe kubwera kudzatifera toera kulekerera madawo athu, mbatikhala axamwali Ace. (1 Juw. 4:10) Tinganyerezera mwadidi pidacita Yahova na Yezu toera kutipulumusa ku madawo na kufa, tinadzindikira kuti iwo asafuna m’bodzi na m’bodzi wa ife. (Agal. 2:20) Yahova nee akakamizwa toera kupereka ntsembe ineyi, mbwenye aipereka thangwi ya kutifuna. Yahova apangiza kuti asatifuna pidapereka iye Mwanace wakufunika kakamwe ninga ntsembe, mbantawirisa kuti athabuke na kuphiwa thangwi ya ife.

11. Tisapfundzanji na lemba ya Yeremiya 31:3?

¹¹ Mwakubverana na pidapfundza ife, Yahova asatipanga kuti iye asatifuna, pontho pyonsene pinacita iye pisapangiza pyenepi. (Lerini Yeremiya 31:3.) Yahova aticitisa kuti tindziwe thangwi iye asatifuna. (Dheu. 7:7, 8) Nkhabepo cinthu peno munthu anakwanisa kuticitisa kuti tikhonde kufuniwa na Mulungu. (Aroma 8:38, 39) Kodi imwe musapibva tani thangwi yakudziwa pyenepi? Lerini Masalmo 23 toera kuona kuti Dhavidhi apibva tani thangwi ya ufuni na citsalakano cidapangiza Yahova kuna iye, pontho onani kuti ifembo tisapibva tani thangwi ya ufuni unoyu.

MUSAPIBVA TANI MUNGANYEREZERA UFUNI UNAPANGIZA YAHOVA?

12. Munafokotoza tani mwacigwagwa Masalmo 23?

¹² Lerini Masalmo 23:1-6. Masalmo 23 ndi nyimbo inapangiza kuti Yahova asatifuna, pontho asatitsalakana. Dhavidhi, ule adalemba bukhu ya Masalmo, apangiza uxamwali wakuwanga ukhali pakati pa iye na Nkumbizi wace, Yahova. Dhavidhi akhali wakutsidzikizika pikhatsogolerwa iye na Yahova, pontho iye akhanyindira kakamwe citsogolero cace. Dhavidhi akhadziwa kuti Yahova mbadanfuna mu umaso wace onsene. Ninji cikhampasa cinyindiro ceneci?

13. Thangwi yanji Dhavidhi akhali na cinyindiro cakuti Yahova akhantsalakana?

 ¹³ “Nee ndinasowa cinthu.” Dhavidhi akhadziwa kuti Yahova akhantsalakana, thangwi ndzidzi onsene akhampasa pikhafuna iye. Dhavidhi akhadziwambo kuti Yahova akhali xamwali wace, pontho akhali wakutawirika kuna iye. Ndi thangwi yace, iye akhali na cinyindiro cakuti mwakukhonda tsalakana pikhafuna kuncitikira ntsogolo, Yahova mbadapitiriza kumpasa pyonsene pikhafuna iye. Nakuti Dhavidhi akhadziwa kuti Yahova akhantsalakana, pontho akhanfuna, pyenepi pyamphedza toera akhonde kukhala wakudzudzumika kakamwe, pontho pyamphedza toera akhale wakutsandzaya.—Mas. 16:11.

14. Ninji pinapangiza kuti Yahova asatitsalakana?

¹⁴ Mwaufuni, Yahova asatitsalakana, makamaka m’midzidzi inatamba ife nyatwa. Clara, a adatumikira ku Bheteli mu pyaka pyakupiringana 20, nee akhadziwa kuti anaphedza tani acibale ace akuti akhatamba nyatwa zizinji. Mwakukhonda dikhira, pai wace aphatwa na utenda wa trombozi, m’bale wace wankazi abuluswa mu mpingo, pontho banja yawo yaluza nyumba yawo na malonda awo. Kodi Yahova apangiza tani citsalakano kuna iwo? Clara alonga: “Yahova atsalakana acibale anga toera akwanise kukhala na pinthu pikhafuna iwo ntsiku na ntsiku. Kazinji kene Yahova akhatipasa pinthu pizinji kupiringana pikhadikhira ife! Ine ndisanyerezera kazinji kene citsalakano cidapangiza Yahova, pontho ndisapereka takhuta thangwi ya pyenepi. Kunyerezera pyenepi kwandiphedza toera ndikwanise kupirira nyatwa zinango.”

15. Yahova acitanji toera kubalangaza Dhavidhi? (Onanimbo foto.)

¹⁵ “Iye asandibalangaza.” M’midzidzi inango, Dhavidhi akhali wakutsukwala kakamwe thangwi ya nyatwa zikhatamba iye. (Mas. 18:4-6) Ngakhale tenepo, Yahova am’balangaza na  citsalakano cace caufuni. Yahova atsogolera xamwali wace wakuti akhadaneta mbamuendesa “ku mbuto yakuti iri na thongwe yadidi.” Kusiyapo pyenepi, iye antsogolera toera “kuenda kapuma ku mbuto yakuti iri na madzi.” Pyenepi pyaphedza Dhavidhi toera akhale pontho na mphambvu mbapitiriza kutumikira Yahova mwakutsandzaya.—Mas. 18:28-32..

16. Ufuni wa Yahova usakubalangazani tani?

¹⁶ Munjira ibodzi ene lero, “thangwi ya ufuni ukulu wa Yahova, ife nee tafudzwa” mu ndzidzi ukhatamba ife mayesero peno nyatwa. (Cil. 3:22; Akol. 1:11) Onani citsandzo ca Rachel. Iye anentseka kakamwe thangwi mamunace ansiya, pontho asiya kutumikira Yahova mu ndzidzi wa utenda wa COVID-19. Kodi Yahova amphedza tani? Rachel alonga: “Yahova andiphedza toera ndidziwe kuti ndisafuniwa. Iye acitisa kuti axamwali anga akhale dhuzi na ine, andibweresere cakudya, anditumizire mphangwa na malemba akundibalangaza, aseke na ine, pontho andikumbuse kuti Yahova asandifuna. Ndzidzi onsene ndisapereka takhuta kuna Yahova thangwi ya kundipasa abale na alongo aufuni.”

17. Thangwi yanji Dhavidhi ‘nee akhagopa cinthu’?

¹⁷ “Nee ndinagopa cinthu, thangwi imwe muli na ine.” Kazinji kene umaso wa Dhavidhi ukhali pangozwi, pontho anyamalwa ace akhali amphambvu kakamwe. Mbwenye ufuni wa Yahova ukham’phedza toera akhale wakutsidzikizika. Dhavidhi akhapibva kuti ndzidzi onsene Yahova akhali na iye, pontho pyenepi pikham’balangaza. Na thangwi ineyi, iye alonga: “[Yahova] andipulumusa ku pinthu pyonsene pikhagopa ine.” (Mas. 34:4) Maseze midzidzi inango Dhavidhi akhagopa kakamwe, iye akwanisa kukhala wacipapo thangwi akhadziwa kuti Yahova akhanfuna.

18. Kudziwa kuti Yahova asatifuna, kunatiphedza tani m’midzidzi ya nyatwa?

¹⁸ Kudziwa kuti Yahova asatifuna kusatiphedza tani mu ndzidzi wa nyatwa? Mpainiya unango anacemerwa Susi alonga mabvero akhali na iye na mamunace mu ndzidzi udapheka mwanawo wamamuna. Iye alonga: “Ungagwerwa na nyatwa mwakukhonda dikhira, usabalalika ndzeru mbusowa cakucita. Mbwenye kudziwa kuti Yahova asatifuna, kwatiphedza toera tikhale akutsidzikizika.” Rachel, adalongwa mu ndima za nduli alonga: “Ntsiku inango namasiku, ntima wanga watoma kundipha kakamwe. Ine ndikhadzudzumika, pontho ndikhagopa. Buluka penepo ndacita phembero kuna Yahova uku mbandikalira. Mu ndzidzi unoyu, iye andiphedza toera ndikhale wakukhurudzika, pontho andibalangaza ninga pinacita mama kuna mwanace, buluka penepo ndaphatwa na citulo mbandigona. Ine  cipo ndinaduwala pidacitika ntsiku ineyi.” Nkulu wa mpingo unango anacemerwa Tasos akhala nkaidi mu pyaka pinai thangwi yakukhonda kuenda kunkhondo. Kodi Yahova acitanji toera kupangiza kuti asanfuna, pontho asantsalakana? Iye alonga: “Yahova andipasa pizinji kupiringana pire pikhafuna ine. Pyenepi pyandiphedza toera ndikwanise kun’nyindira na ntima onsene. Pontho Yahova aphatisira nzimu wace toera andiphedze kuti ndikhale wakutsandzaya, maseze ndikhali nkaidi. Pyenepi pyandiphedza toera kuona kuti ndinganyindira kakamwe Yahova, ndinapibva kuti iye asandifuna kakamwe. Natenepa ine ndatoma kutumikira ninga mpainiya wa ndzidzi onsene pikhali ine nkaidi.”

WANGISANI UXAMWALI WANU NA MULUNGU WAUFUNI

19. (a) Kudziwa kuti Yahova asatifuna, kunatiphedza tani mu ndzidzi unacita ife phembero? (b) Ndi mafala api analonga pya ufuni wa Yahova akuti musakomerwa nawo kakamwe? (Onani bokosi yakuti “ Mafala Anatiphedza Kudziwa Kuti Yahova Asatifuna Kakamwe.”)

¹⁹ Pitsandzo pyonsene pidapfundza ife mu nsolo uno pisapangiza kuti Yahova, “Mulungu waufuni,” ali na ife! (2 Akor. 13:11) Iye asatsalakana m’bodzi na m’bodzi wa ife. Ife tiri na cinyindiro cakuti iye asatitsidzikiza “na ufuni Wace wakukhonda mala.” (Mas. 32:10) Tinganyerezera kakamwe ufuni unapangiza iye kuna ife, iye anakhala wandimomwene kuna ife, pontho uxamwali wathu na iye unakhala wakuwanga. Ife tinakwanisa kucita phembero kuna iye mwakusudzuka, mbatimpanga kuti tisafuna kakamwe ufuni wace. Tinakwanisa kumpanga nyatwa zathu zonsene na cinyindiro cakuti iye anatibvesera, pontho anacita pinthu toera kutiphedza.—Mas. 145:18, 19.

20. Kodi ufuni wa Yahova usatiphedza tani toera kukhala dhuzi na iye?

²⁰ Kutonthola kusaticitisa kufuna kukhala dhuzi na moto, munjira ibodzi ene, ufuni wa Yahova usaticitisa kufuna kukhala dhuzi na iye. Maseze ufuni wa Yahova ndi ukulu kakamwe, iye asaupangiza mwakukoma ntima. Natenepa, khalani wakutsandzaya thangwi Yahova asakufunani. Pontho pangizanimbo kuti musafuna Yahova mbamulonga mwakutsandzaya kuti: “Ine ndisafuna Yahova”!—Mas. 116:1.