NSOLO WA PFUNDZIRO 4
NYIMBO 18 Tisapereka Takhuta Thangwi ya Ciomboli
Ciomboli Cisatipfundzisanji?
“Mulungu apangiza ufuni wace kuna ife.”—1 JUW. 4:9.
PINAFUNA IFE KUPFUNDZA
Tinaona kuti ciomboli cisapangiza tani makhaliro adidi kakamwe a Yahova Mulungu na a Yezu Kristu.
1. Ndi maphindu api anafuna kukhala na ife tingagumanika pa Cikumbuso ca kufa kwa Kristu?
YAHOVA atipasa muoni wakupambulika kakamwe pidatuma iye Mwanace toera kutifera! (2 Akor. 9:15) Nakuti Yezu atifera, ife tisakwanisa kukhala axamwali a Yahova Mulungu. Pontho tisakwanisa kukhala na cidikhiro cakukhala na umaso wakwenda na kwenda. Tiri na mathangwi mazinji kakamwe toera kupereka takhuta kuna Yahova. Iye acita masasanyiro a ciomboli thangwi asatifuna kakamwe! (Aroma 5:8) Toera kutiphedza kuti tipitirize kupereka takhuta thangwi ya pinthu pidacita Yahova na Yezu kuna ife, Yezu asatiphemba kuti tigumanike pa Cikumbuso cakufa kwace cinacitwa kabodzi pa caka.—Luka 22:19, 20.
2. Tinapfundzanji mu nsolo uno?
2 Caka cino, Cikumbuso ca kufa kwa Yezu cinacitwa Nsabudu, ntsiku 12 ya Abril ya 2025. Ife tonsene tikucita masasanyiro toera tidzagumanike. Masumana mangasi Cikumbuso mbacidzati na pakumala kwa Cikumbuso, pinakhala mwadidi kakamwe kukhala na ndzidzi toera kunyerezera mwadidi pidaticitira Yahova na Mwanace. Mu nsolo uno, ife tinaona kuti ciomboli cisatipfundzisanji thangwi ya Yahova na Mwanace. Mu nsolo unatowera tinaona kuti tinaphedzeka tani na ciomboli, pontho tinapangiza tani kupereka takhuta thangwi ya ciomboli.
CIOMBOLI CISATIPFUNDZISANJI THANGWI YA YAHOVA?
3. Kufa kwa munthu m’bodzi kunakwanisa tani kuombola anthu azinji kakamwe? (Onanimbo foto.)
3 Ciomboli cisatipfundzisa kuti Yahova ndi Mulungu wakuti asafuna ulungami. (Dheu. 32:4) Onani basi: Pidakhonda Adhamu kubvera Mulungu, iye adawa mbafa. (Aroma 5:12) Nakuti ndife anace, ndifembo anyakudawa, pontho tisafa. Toera kutiombola m’madawo na kufa, Yahova atuma Mwanace Yezu kuti atifere. Mphapo kufa kwa munthu m’bodzi basi waungwiro kunakwanisa tani kusudzula anthu azinji kakamwe m’madawo na kufa? Mpostolo Paulu afokotoza: ‘Thangwi yakukhonda bvera kwa munthu m’bodzi basi [Adhamu] anthu azinji adzakhala anyakudawa, tenepambo thangwi yakubvera kwa munthu m’bodzi basi [Yezu], anthu azinji anadzakhala akulungama.’ (Aroma 5:19; 1 Tim. 2:6) Paulu akhafuna kulonga kuti anthu onsene ndi anyakudawa, pontho akhafunika kufa thangwi yakukhonda bvera kwa Adhamu. Natenepa pakhafunika munthu waungwiro na wakubvera toera kutiombola.
Thangwi ya munthu m’bodzi basi Adhamu, ife tonsene tisadawa mbatifa. Thangwi ya munthu m’bodzi basi Yezu, ife tinakwanisa kusudzulwa m’madawo na kufa (Onani ndima 3)
4. Thangwi yanji Yahova nee atawirisa kuti ana akubvera a Adhamu akhale na umaso wakwenda na kwenda?
4 Kodi Yezu akhafunikadi kufa toera kutipulumusa? Thangwi yanji Yahova nee atawirisa kuti ana akubvera a Adhamu akhale m’maso kwenda na kwenda? Kuna anthu akusowa ungwiro, kucita pyenepi mbapidakhala pya ufuni na pyakukhonda nentsa. Mbwenye kuna Yahova pyenepi nee mbapidakhala pinthu pyakuthema toera kucita, thangwi mbapidakhala ninga kuti Adhamu nee akhadacita madawo makulu kakamwe, pontho kuti anace nee mbadakhala akusowa ungwiro. Mbwenye unoyu nee ndi undimomwene.
5. Thangwi yanji tiri na cinyindiro cakuti ndzidzi onsene Yahova asacita pinthu mwaulungami?
5 Ninji pikhafuna kucitika khala Yahova nee apereka ciomboli, mbakhonda kucita pinthu mwakubverana na ulungami wace mukutawirisa ana akusowa ungwiro a Adhamu toera kukhala na umaso kwenda na kwenda? Mulungu mbadacita pyenepi, anthu panango mbadatoma kupenula ulungami wace. Mwacitsandzo, anthu mbadapenula khala Mulungu anakwanirisa mapikiro ace. Mbwenye ife tisadziwa kuti pyenepi nee pinacitika. Thangwi yanji? Nakuti Yahova acita pinthu mwaulungami, pontho apereka Mwanace Yezu ninga ntsembe, tinakwanisa kukhala na cinyindiro cakuti ndzidzi onsene, iye asacita pinthu mwaulungami.
6. Ndi nkhaliro upi udakulumiza Yahova toera kutuma Mwanace toera kudzatifera? (1 Juwau 4:9, 10)
6 Maseze ciomboli cisatiphedza kubvesesa kuti Yahova ndi waulungami, ico cisatiphedzambo kubvesesa ufuni ukulu uli na iye. (Juw. 3:16; lerini 1 Juwau 4:9, 10.) Yahova atuma Mwanace toera kutifera thangwi iye asafuna kuti tikhale na umaso wakwenda na kwenda, pontho toera ticite khundu ya atumiki ace. Pidadawa Adhamu, iye asiya kucita khundu ya alambiri a Yahova. Na thangwi ineyi, mu ndzidzi unabalwa ife, nee tisacitabve khundu ya atumiki ace. Mbwenye nakuti ciomboli calipwa kale, anthu onsene anapangiza cikhulupiro mbabvera Mulungu, anakwanisa kucita khundu ya alambiri a Mulungu. Ngakhale lero, Yahova anakwanisa kutilekerera madawo athu mbatikhala na uxamwali wa ponda ndipondembo na iye, pabodzi na abale na alongo athu. Mwandimomwene, Yahova asatifuna kakamwe!—Aroma 5:10, 11.
7. Kuthabuka kwa Yezu kusatiphedza tani kubvesesa kuti Yahova asatifuna?
7 Tinganyerezera mwadidi ciomboli cidapereka Yahova, tinakwanisa kubvesesa kuti iye asatifuna kakamwe. Sathani alonga kuti nkhabepo munthu anapitiriza kukhala wakukhulupirika kuna Yahova angathimbana na nyatwa. Toera kupangiza kuti pidalonga Sathani ndi pyauthambi, Yahova atawirisa kuti Yezu athabuke kakamwe mbadzati kufa. (Yobe 2:1-5; 1 Ped. 2:21) Yahova aona pyonsene pikhacitikira Yezu, kusingirirwa kwace, kumenywa kwace na anyankhondo, ngakhale mu ndzidzi ukhakhomerwa iye pamuti. Kusiyapo pyenepi, Yahova aona Mwanace wakufunika kakamwe mbafa munjira yakutsukwalisa. (Mat. 27:28-31, 39) Yahova mbadakwanisa kupingiza toera pyenepi pikhonde kucitika. Mwacitsandzo, mu ndzidzi udalonga anthu kuti: “Mulungu mbampulumuse cincino khala asakomerwa naye,” Yahova mbadacita pyenepi. (Mat. 27:42, 43) Mbidakhala Mulungu acita pyenepi, Yezu nee mbadakwanisa kupereka umaso wace ninga ciomboli, pontho ife nee mbatidakhala na cidikhiro. Natenepa Yahova atawirisa Mwanace kutamba nyatwa mpaka kufa.
8. Kodi Yahova atsukwala pikhaona iye Mwanace mbakathabuka? Fokotozani. (Onanimbo foto.)
8 Nee tisafunika kunyerezera kuti nakuti Mulungu ndi wamphambvu zonsene, iye nee ali na mabvero! Iye acita anthu na luso yakupangiza mabvero. Nakuti Bhibhlya isalonga kuti tacitwa mwakulandana na Mulungu, natenepa iye ali na mabvero. Bhibhlya isalonga kuti Mulungu ‘asatsukwala.’ (Mas. 78:40, 41) Nyerezerani citsandzo ca Abhrahamu na Izaki. Yahova apanga Abhrahamu toera apereke mwanace m’bodzi basi ninga ntsembe. (Gen. 22:9-12; Aheb. 11:17-19) Nyerezerani mabvero akusiyana-siyana adakhala na Abhrahamu pikhacita iye masasanyiro toera kupha mwanace. Nyerezerani kutsukwala kakamwe kudakhala na Yahova, pidaona iye anthu mbakathabusa kakamwe Mwanace mpaka kumupha!—Onani mu jw.org vidhyu ya nsolo wakuti Towezerani Cikhulupiro Cawo—Abhrahamu, Khundu 2.
Yahova abva kupha kakamwe pidaona iye Mwanace mbathabuka (Onani ndima 8)
9. Lemba ya Aroma 8:32, 38, 39 isatipfundzisanji thangwi ya ufuni wa Yahova?
9 Ciomboli cisatipfundzisa kuti nkhabepo munthu anatifuna kakamwe ninga Yahova, ngakhale acibale athu peno axamwali ale akuti asatifuna kakamwe, ufuni wawo nkhabe kupiringana wa Yahova. (Lerini Aroma 8:32, 38, 39.) Mwakukhonda penula, Yahova asatifuna kakamwe kupiringana ife ene. Musafuna kukhala na umaso wakwenda na kwenda? Yahova asafuna kakamwe pyenepi. Imwe musafuna kulekererwa madawo anu? Yahova asafuna kakamwe kukulekererani. Pinthu pinafunika ife kucita ndi kutawira ntsembe ya ciomboli, kukhala akukhulupirika na akubvera. Ciomboli ndi cipangizo cikulu kakamwe ca ufuni wa Mulungu. Mu dziko ipswa tinapfundza pontho pinthu pizinji kakamwe thangwi ya ufuni wa Yahova.—Ekle. 3:11.
CIOMBOLI CISATIPFUNDZISANJI THANGWI YA YEZU?
10. (a) Thangwi yanji Yezu adzudzumika thangwi yakufa kwace? (b) Yezu apangiza tani kuti Sathani ndi nyauthambi? (Onanimbo bokosi ya nsolo wakuti “ Kukhulupirika Kwa Yezu Kwapangiza Kuti Sathani Ndi Nyauthambi.”)
10 Yezu asadzudzumika kakamwe na pinthu pinalonga anthu thangwi ya Babace. (Juw. 14:31) Mbadzati kufa, Yezu apambizirwa kuti atikana Mulungu, pontho iye adzudzumika kakamwe na kupambizirwa kweneku. Natenepa iye aphembera: “Baba, pingakwanisika, bulusani ndiko iyi pana ine.” (Mat. 26:39) Nakuti Yezu apitiriza kukhala wakukhulupirika mpaka kufa kwace, iye apangiza kuti Sathani ndi nyauthambi.
11. Yezu apangiza tani kuti akhafuna kakamwe anthu? (Juwau 13:1)
11 Ciomboli cisatipfundzisambo kuti Yezu asadzudzumikambo kakamwe na anthu, makamaka na anyakupfundzace. (Mis. 8:31; lerini Juwau 13:1.) Mwacitsandzo, pinthu pinango pikhafunika iye kucita pa dziko yapantsi pikhali pyakunentsa, makamaka njira yakutsukwalisa idafa iye. Ngakhale tenepo, Yezu acita pinthu pyenepi pyonsene pyakunentsa, tayu basi thangwi apangwa na Yahova, mbwenye apicita thangwi akhafuna kakamwe anthu. Yezu aikha manyerezero ace onsene m’basa yakumwaza mphangwa, kupfundzisa na kuphedza anango. Ngakhale pa ntsiku ikhafuna iye kuphiwa, Yezu akhala na ndzidzi wakutsuka miyendo ya apostolo ace, aapfundzisa, aabalangaza na kuapasa mphambvu. (Juw. 13:12-15) Mu ndzidzi udakhomerwa iye pamuti, Yezu apasa cidikhiro phanga akhali dhuzi na iye, pontho aphemba mpostolo Juwau toera atsalakane mai wace. (Luka 23:42, 43; Juw. 19:26, 27) Natenepa Yezu nee apangiza basi ene ufuni ukulu pidafa iye, mbwenye apangizambo ufuni unoyu ndzidzi onsene ukhali iye pa dziko yapantsi.
12. Ndi munjira ipi Yezu asapitiriza kupereka ntsembe thangwi ya ife?
12 Maseze Kristu “afa kabodzi basi,” iye asapitiriza kupereka ntsembe thangwi ya ife. (Aroma 6:10) Ninji pinaticitira iye lero? Iye ali kupitiriza kuphata basa toera kutipasa pinthu pyadidi kubulukira ku ciomboli. Nyerezerani pinthu pinacita iye cincino. Iye asatumikira ninga Mambo wathu, Nyantsembe wathu Wankulu na nsolo wa mpingo. (1 Akor. 15:25; Aef. 5:23; Aheb. 2:17) Iye apaswa basa toera kugumanya Akristu akudzodzwa na mwinji ukulu. Basa ineyi inamaliswa nyatwa ikulu mbidzati kumala. a (Mat. 25:32; Marko 13:27) Iye asaphedzambo atumiki ace akukhulupirika toera akhale na cakudya cauzimu cakukwana mu ntsiku zino zakumalisa. (Mat. 24:45) Pontho mu ndzidzi unafuna Yezu kutonga mu Pyaka Cikwi, iye anapitiriza kucita pinthu toera kutiphedza. Mwandimomwene, Yahova apereka Mwanace toera kutiphedza!
PITIRIZANI KUPFUNDZA PINTHU PIPSWA
13. Kunyerezera mwadidi ufuni udapangiza Mulungu na Kristu kuna ife kunatiphedza tani?
13 Munakwanisa kupitiriza kupfundza thangwi ya ufuni udapangiza Yahova Mulungu na Yezu Kristu kuna ife mungapitiriza kunyerezera thangwi ya ufuni unoyu. Masumana mangasi Cikumbuso mbacidzati kufika na pakumala kwa Cikumbuso, munakwanisa kuleri mwadidi mphangwa zizinji zinagumanika m’mabukhu a Mateu, Marko, Luka na Juwau. Lekani kuleri makapitulu mazinji mu ndzidzi ubodzi ene. Mbwenye lerini mwakukhurudzika, pontho sakani mphangwa zakuthimizirika zinapangiza kuti thangwi yanji tisafunika kufuna Yahova na Yezu. Kusiyapo pyenepi, pangani anango pinthu pinapfundza imwe.
14. Mwakubverana na Masalmo 119:97 na cidzindikiro capantsi, kufufudza kunatiphedza tani toera kupitiriza kupfundza thangwi ya ciomboli na pinthu pinango? (Onanimbo foto.)
14 Khala musatumikira Yahova mu pyaka pizinji, panango munabvundzika khala pinakwanisika kugumana mphangwa zipswa zinalonga pya ulungami wa Mulungu, ufuni wace na ciomboli. Undimomwene ndi wakuti nkhabe madire toera kupitiriza kupfundza thangwi ya pinthu pyenepi na pinango. Mphapo munacitanji? Lerini mabukhu athu toera kugumana mphangwa zinango zakuthimizirika. Mungaleri Bhibhlya mbamukhonda kubvesesa pinaleri imwe, fufudzani. Pa ntsiku ineyi, nyerezerani pidapfundza imwe thangwi ya Yahova na Mwanace, pontho nyerezerani ufuni udapangiza iwo kuna imwe.—Lerini Masalmo 119:97 na cidzindikiro capantsi.
Ngakhale tisatumikira Yahova mu pyaka pizinji, tinakwanisa kuthimizira kupereka kwathu takhuta thangwi ya ciomboli (Onani ndima 14)
15. Thangwi yanji tisafunika kupitiriza kusaka pinthu pipswa mu ndzidzi unaleri ife Bhibhlya?
15 Lekani kutsukwala mungakhonda kugumana mphangwa zipswa mu ndzidzi unaleri imwe Bhibhlya peno mu ndzidzi unafufudza imwe. Imwe mwalandana na munthu anasaka ouro. Kazinji kene munthu anasaka ouro, asakumba mu ndzidzi uzinji na ntsiku zizinji toera kuigumana. Maseze agumane mapindi mang’ono kakamwe a ouro, iye nee asabwerera nduli, thangwi kuna iye mapindi anewa ndi akufunika. Mbwenye pinthu pyakufunika kakamwe kupiringana ouro ndi pinthu pinapfundza ife m’Bhibhlya! (Mas. 119:127; Mis. 8:10) Natenepa pitirizani kuleri Bhibhlya, pontho sakani pinthu pipswa mbamupfundza pinthu pyenepi.—Mas. 1:2.
16. Tinatowezera tani Yahova na Yezu?
16 Mu ndzidzi unapfundza imwe, onani kuti munapiphatisira tani. Mwacitsandzo, towezerani ulungami wa Yahova mukutsalakana anango mwakusowa tsankhulo. Munakwanisambo kutowezera ufuni unapangiza Yezu kuna Babace na kuna anango mukukhala dzololo toera kucita pinthu pinafuna Yahova na kuphedza anango, maseze kucita pyenepi midzidzi inango pisakhala pyakunentsa. Pontho towezerani Yezu mukumwaza mphangwa kuna anango toera akhale na mwai wakudziwa Yahova mbakhulupira ciomboli.
17. Tinapfundzanji mu nsolo unatowera?
17 Tingabvesesa mwadidi masasanyiro a ciomboli, ife tinafuna kakamwe Yahova na Mwanace. Tingacita pyenepi, iwo anatifunambo kakamwe. (Juw. 14:21; Tiya. 4:8) Natenepa, tendeni tiphatisire pinthu pinatipasa Yahova toera tipitirize kupfundza thangwi ya ciomboli. Mu nsolo unatowera, tinapfundza thangwi ya nkhombo ziri na ife thangwi ya kufa kwa Yezu, pontho tinaona kuti tinapereka tani takhuta thangwi ya ufuni wa Yahova.
NYIMBO 107 Mulungu Atipasa Citsandzo Toera Kupangiza Ufuni
a Kugumanya “pinthu pyakudzulu” pidalonga Paulu pa Aefesi 1:10, ndi kwakusiyana na kugumanywa kwa “adasankhulwa” kudalonga Yezu pa Mateu 24:31 na Marko 13:27. Paulu akhalonga pya ndzidzi wakuti Yahova anadzasankhula anace auzimu mu kuadzodza na nzimu wakucena. Yezu akhalonga pya ndzidzi ukhafuna kugumanywa anyakudzodzwa adasala pa dziko yapantsi mu ndzidzi wa nyatwa ikulu.
