NSOLO WA PFUNDZIRO 3
NYIMBO 35 “Sakani Pinthu Pyakufunika Kakamwe”
Citani Pisankhulo Pinatsandzayisa Yahova
“Kugopa Yahova ndi kutoma kwa udziwisi, pontho kudziwa Wakucena Kakamwe ndi kubvesesa pinthu.”—MIS. 9:10.
PINAFUNA IFE KUPFUNDZA
Tinaphatisira tani udziwisi, kubvesesa na luso yakunyerezera toera kucita pisankhulo pyadidi?
1. Ndi pinentso pipi pinathimbana na ife tonsene?
NTSIKU zonsene ife tisafunika kucita pisankhulo; pinango ndi pyakukhonda nentsa, ninga kusankhula pyakudya peno ndzidzi wakugona. Mbwenye pisanentsa kucita pisankhulo thangwi ya pinthu pinango. Pisankhulo pinacita ife pinakwanisa kukhuya ungumi wathu, kutsandzaya kwathu, banja yathu peno ulambiri wathu kuna Yahova. Ife tisafunika kucita pisankhulo pyakuti pinatiphedza, pontho pinaphedzambo banja yathu. Kupiringana pyonsene, ife tisafuna kuti pisankhulo pyathu pitsandzayise Yahova.—Aroma 12:1, 2.
2. Ninji pinafuna kukuphedzani toera kucita pisankhulo pyadidi?
2 Imwe munacita pisankhulo pyadidi (1) mungadziwa undimomwene thangwi ya pinthu, (2) mungakumbuka maonero a Yahova thangwi ya pinthu pyenepi, na (3) kudinga maonero adidi a anango. Mu nsolo uno, ife tinadinga pinthu pyenepi pitatu, pontho pyenepi pinatiphedza toera kuona kuti tinakulisa tani luso yathu yakudzindikira.—Mis. 2:11.
DZIWANI UNDIMOMWENE THANGWI YA PINTHU
3. Thangwi yanji musafunika kudziwa pyonsene mbamudzati kucita pisankhulo? Fokotozani.
3 Cinthu cinafuna kutiphedza toera kucita pisankhulo pyadidi ndi kudziwa undimomwene thangwi ya pinthu. Thangwi yanji pyenepi ndi pyakufunika? Nyerezerani kuti ntenda aenda kuna dotoro thangwi ya kubva kupha. Kodi dotoro anampasa mitombwe mbadzati kudziwa kuti ali kubvanji peno kuncita mibvundzo? Mwandimomwene nkhabe. Imwe munacitambo pisankhulo pyadidi mungatoma kudziwa undimomwene wa pinthu pyonsene. Munacita tani pyenepi?
4. Mwakubverana na Misangani 18:13, thangwi yanji musafunika kukhala na cinyindiro cakuti musadziwa pyonsene? (Onanimbo foto.)
4 Imwe munadziwa undimomwene mungacita mibvundzo. Mwacitsandzo, nyerezerani kuti imwe mwacemerwa toera kuenda ku phwando. Kodi mbamudaendako? Khala imwe nee musadziwana na munthu adakucemerani peno khala nee musadziwa pinthu pinafuna kucitika kweneko, panango munancita mibvundzo iyi: “Tinagumanikana kupi, pontho lini? Ndi anthu angasi anafuna kugumanika kweneko? Mbani anafuna kutsogolera pyenepi? Mbani anafuna kugumanika kweneko? Ndi masendzekero api anafuna kucitwa kweneko? Kodi kunagumanika pyakumwa pyakuledzeresa?” Mitawiro ya mibvundzo ineyi inakuphedzani toera kucita cisankhulo cadidi.—Lerini Misangani 18:13.
Citikani mibvundzo toera mudziwe pyonsene (Onani ndima 4) a
5. Pakumala kudziwa pinthu pyonsene, ninji pinafunika imwe kucita?
5 Mungamala kudziwa undimomwene wa pinthu, nyerezerani pinafuna kucitika kweneko. Nyerezerani kuti anthu akuti nee asatumikira Yahova acemerwambo toera agumanike kweneko, pontho kuti kunagumanika pyakumwa pyakuledzeresa, mbwenye nee panagumanika munthu toera kutsogolera kuti pinthu pifambe mwadidi. Kodi musaona kuti masendzekero anewa anafamba mwadidi? (1 Ped. 4:3) Mphapo ndiye tani khala ndzidzi unoyu udabverana imwe toera kucita masendzekero ndi ndzidzi unoyu unaenda imwe ku misonkhano peno ndzidzi unaenda imwe kamwaza mphangwa? Imwe mungadziwa undimomwene wa pinthu pyonsene, pinakhala pyakukhonda nentsa toera kucita pisankhulo pyadidi. Mbwenye pali na cinthu cinango cinafunika imwe kucita. Imwe musadziwa maonero anu thangwi ya pinthu pyenepi; natenepa bvundzikani: Ndi api maonero a Yahova thangwi ya pyenepi?’—Mis. 2:6.
ONANI PINANYEREZERA YAHOVA
6. Mwakubverana na Tiyago 1:5, thangwi yanji tisafunika kucita phembero toera kuphemba ciphedzo ca Yahova?
6 Phembani Yahova toera akuphedzeni kubvesesa pinanyerezera iye. Yahova apikira kutipasa udziwisi toera ticite pisankhulo pyakuti pisankomeresa. Iye asatipasa udziwisi unoyu “mwakudzala manja” mbakhonda kudungunya.—Lerini Tiyago 1:5.
7. Munakwanisa tani kudziwa manyerezero a Yahova? Perekani citsandzo.
7 Mungamala kuphemba citsogolero ca Yahova, onesesani mwadidi njira inatawira iye phembero yanu. Mwacitsandzo, nyerezerani kuti imwe mwatayika. Mwakukhonda penula, imwe munabvundzisa munthu anakhala pacisa ceneci. Kodi imwe munapitiriza na ulendo wanu munthu mbadzati kukupangizani njira? Nkhabe. Imwe munadikhira munthu unoyu toera akupangizeni njira. Munjira ibodzi ene, mungamala kuphemba Yahova toera akupaseni udziwisi, yeserani kuona ntawiro wace kubulukira m’malemba na m’midida ya Bhibhlya yakuti isabverana na pinthu pinafuna imwe kucita. Mwacitsandzo, khala munasankhula kwenda ku masendzekero adalonga ife pakutoma, musafunika kukumbuka pinalonga Bhibhlya thangwi ya maphwando akuipa, axamwali akuipa na kufunika kwa kuikha Umambo wa Mulungu pa mbuto yakutoma kupiringana pifuno pyanu.—Mat. 6:33; Aroma 13:13; 1 Akor. 15:33.
8. Munacitanji mungafuna ciphedzo toera kugumana mphangwa zinasaka imwe? (Onanimbo foto.)
8 Midzidzi inango, panango imwe munafuna ciphedzo toera kugumana mphangwa zinasaka imwe. Panango munapaswa maonero na m’bale peno mulongo wa maluso. Mbwenye imwe munaphedzekambo mungafufudza mwekha. M’mabukhu athu muli na mphangwa zizinji. Mabukhu anewa asaphataniza Bukhu Inaphatisira Mboni za Yahova Pakufufudza na Malemba Toera Kuaphatisira mu Umaso Wathu Wacikristu. Kumbukani kuti cifuno canu ndi kucita pisankhulo pyakuti pinatsandzayisa Yahova.
Onani pinanyerezera Yahova (Onani ndima 8) b
9. Munakhala tani na cinyindiro cakuti cisankhulo canu cisatsandzayisa Yahova? (Aefesi 5:17)
9 Tinakhala tani na cinyindiro cakuti cisankhulo cathu cinakomeresa Yahova? Pakutoma, ife tisafunika kudziwa mwadidi Yahova. Thangwi Bhibhlya isalonga: “Kudziwa Wakucena Kakamwe ndi kubvesesa pinthu.” (Mis. 9:10) Ife tinabvesesa mwadidi tingadziwa makhaliro a Yahova, tingadziwa cifuno cace, kudziwa pinafuna iye na pinaida iye. Bvundzikani: ‘Nakuti ndisadziwa Yahova, ndinacita tani cisankhulo cakuti cinantsandzayisa?’—Lerini Aefesi 5:17.
10. Thangwi yanji midida ya Bhibhlya ndi yakufunika kakamwe kupiringana misambo ya pabanja peno makhaliro apacisa?
10 Toera kutsandzayisa Yahova, midzidzi inango tisafunika kusiya kucita pinafuna ale ali dhuzi na ife. Mwacitsandzo, panango anyakubala anakakamiza mwanawo wankazi toera asembwe na mamuna wakuti nee ali na uxamwali wakuwanga na Yahova basi ene thangwi ali na kobiri izinji. Ndimomwene kuti anyakubala asafuna kuti mwanawo akhale na munthu wakuti anakwanisa kum’pasa kobiri na pinthu pinango pinafuna iye. Mphapo, mbani anafuna kum’phedza toera athambaruke mwauzimu? Yahova asaona tani pinthu pyenepi? Ntawiro tinaugumana pa Mateu 6:33. Pa lemba ineyi, Akristu asakulumizwa toera “kuikha pa mbuto yakutoma Umambo wa Mulungu.” Maseze ife tisalemedza anyakubalathu na anthu a pacisa, cifuno cathu cikulu ndi kutsandzayisa Yahova.
DINGANI MWADIDI MAONERO A ANTHU ANANGO
11. Ndi pinthu pipi pinalongwa pa Afilipi 1:9, 10 pyakuti pinakuphedzani toera kukhala na maonero adidi?
11 Mungamala kuona midida ya m’Bhibhlya yakuti isabverana na cisankhulo canu, imwe musafunika kunyerezera mwadidi maonero anu. (Lerini Afilipi 1:9, 10; onani nota de estudo yakuti “pleno discernimento”) Luso yakudzindikira inakuphedzani toera kubvesesa pinthu pinafuna kucitika thangwi ya cisankhulo canu. Midzidzi inango pisankhulo pinango pinakhala pyakukhonda nentsa toera kupicita. Mbwenye pisankhulo pinango ndi pyakunentsa. Luso yakudzindikira inakuphedzani toera kucita pisankhulo pyadidi ngakhale m’midzidzi yakunentsa.
12-13. Luso yakudzindikira inakuphedzani tani toera kucita cisankhulo cadidi thangwi ya basa?
12 Nyerezerani kuti muli kusaka basa toera kutsalakana banja yanu. Mbwenye mwagumana mabasa mawiri. Imwe musasaka kudziwa pyonsene: Ntundu wa basa, ndzidzi wakutoma na wa kukotoka. Buluka penepo musaona kuti munamala ndzidzi ungasi toera kufika kubasa. Mabasa mawiri ene ndi akutawirika kuna Akristu. Panango imwe musasankhula ntundu ubodzi wa basa thangwi musakomerwa nayo peno thangwi kobiri inafuna kutambirwa kweneko ndi izinji. Mbwenye pali na pinthu pinango pyakuti musafunika kupinyerezera mbamudzati kucita cisankhulo.
13 Mwacitsandzo, kodi ibodzi mwa mabasa anewa inakupingizani toera kugumanika pa misonkhano ya mpingo? Inakupasani ndzidzi toera kuphedza banja yanu kuti ikhale yakutsidzikizika, yakutsandzaya, pontho na uxamwali wakuwanga na Yahova? Kucitika mibvundzo ineyi kunakuphedzani toera “kuikha pinthu pyakufunika pa mbuto yakutoma” pyakuti ndi ulambiri wanu na kutsalakana banja yanu, tayu pinthu pyakumanungo. Buluka penepo, imwe munacita cisankhulo cadidi, pontho Yahova anakupasani nkhombo.
14. Kuphatisira luso yakudzindikira na kupangiza ufuni, kunatiphedza tani toera kucalira kugwegwedusa anango?
14 Luso yakudzindikira inatiphedzambo toera kuona kuti pisankhulo pyathu pisakhuya tani anango mbaticalira ‘kuagwegwedusa.’ (Afil. 1:10) Pyenepi ndi pyakufunika kakamwe pakucita pisankhulo thangwi ya mabvaliro na njira ya kukhunganyika. Mwacitsandzo, panango imwe munakomerwa na njira yanu ene yakubvala peno maonekero anu. Mphapo ndiye tani khala anthu anango kunja peno mu mpingo asadzudzumika na pyenepi? Luso yakunyerezera inatiphedza toera kulemedza maonero a anango. Ufuni unatikulumiza toera kucita ‘pinakomerwa na anango’ mbatikhala akucepeseka. (1 Akor. 10:23, 24, 32; 1 Tim. 2:9, 10) Buluka penepo tinacita cisankhulo cakuti cinapangiza kuti tisafuna, pontho tisalemedza anango.
15. Musafunika kucitanji mbamudzati kucita cisankhulo cakufunika?
15 Khala imwe musafuna kucita cisankhulo cakufunika, nyerezerani pinafunika imwe kucita toera pinthu pikufambireni mwadidi. Yezu atipfundzisa kuti tisafunika ‘kukhala pantsi toera kuona.’ (Luka 14:28) Natenepa nyerezerani ndzidzi, pinthu pinafuna imwe kuphatisira na kuwangisira kunafunika imwe kucita toera pinthu pifambe mwadidi. Midzidzi inango musafunika kucedza na banja yanu toera kuona kuti m’bodzi na m’bodzi pa banja asafunika kucitanji toera kuphedzera cisankhulo canu. Thangwi yanji kucita pyenepi ndi kwakufunika? Thangwi pyenepi pinakuphedzani toera kudzindikira makhundu anafunika imwe kusasanyira peno kukhala na maonero anango akuti asaphedza kakamwe. Mu ndzidzi unacedza imwe na banja yanu mbamubvesera maonero awo, iwo anakuphedzani toera cisankhulo canu cifambe mwadidi.—Mis. 15:22.
CITANI CISANKHULO CADIDI
16. Ndi pinthu pipi pinafuna kukuphedzani toera kucita cisankhulo cadidi? (Onanimbo bokosi yakuti “Tinacita Tani Pisankhulo Pyadidi?”)
16 Khala imwe musatowezera pinthu pidamala ife kulonga, pisaoneka kuti muli dzololo toera kucita cisankhulo cadidi. Imwe mwaona pinthu pinacitika, pontho mwaona midida ya m’Bhibhlya yakuti inakuphedzani toera kucita cisankhulo cinatsandzayisa Yahova. Cincino imwe munakwanisa kuphemba Yahova toera akuphedzeni kucita cisankhulo cadidi.
17. Ninji pinafuna kutiphedza toera kucita pisankhulo pyadidi?
17 Maseze nduli mwacita pisankhulo pizinji pyakuti pyafamba mwadidi, kumbukani kuti cinthu cinafuna kukuphedzani toera kucita pisankhulo pyadidi ndi kunyindira udziwisi wa Yahova, tayu kunyindira maluso anu peno udziwisi wanu. Basi ene ndi Yahova anakwanisa kukupasa cidziwiso, kubvesesa na luso yakudzindikira pinthu pyadidi na pyakuipa. (Mis. 2:1-5) Yahova anakuphedzani toera kucita pisankhulo pyadidi pyakuti pinantsandzayisa.—Mas. 23:2, 3.
NYIMBO 28 Mbani Anakhala Xamwali wa Yahova?
