NSOLO WA PFUNDZIRO 5
NYIMBO 108 Ufuni Wandimomwene wa Mulungu
Nkhombo Zinakhala na Ife Thangwi ya Ufuni wa Yahova
“Kristu Yezu abwera pa dziko yapantsi toera kupulumusa anyakudawa.”—1 TIM. 1:15.
PINAFUNA IFE KUPFUNDZA
Tinapfundza kuti tisaphedzeka tani na ciomboli, pontho tinapangiza tani kuti tisapereka takhuta kuna Yahova.
1. Tisafunika kucitanji toera titsandzayise Yahova?
NYEREZERANI kuti mwapasa muoni wakubalika na wakufunika kakamwe munthu anafuna imwe. Munatsukwala kakamwe munthu unoyu angakoya muoni unoyu mbauduwala. Mbwenye imwe mbamudatsandzaya kakamwe munthu unoyu angaphatisira muoni udampasa imwe mbapereka takhuta. Citsandzo ceneci cisabverana tani na muoni wa ntsembe ya ciomboli udatipasa Yahova? Yahova apereka Mwanace toera atifere. Natenepa Yahova asatsandzaya kakamwe tingapereka takhuta thangwi ya muoni unoyu wakufunika, pontho thangwi ya ufuni wace wakuti wancitisa kupereka Mwanace ninga ciomboli!—Juw. 3:16; Aroma 5:7, 8.
2. Tinapfundzanji mu nsolo uno?
2 Tingatoma kuona ciomboli ninga nee ndi muoni wakufunika, pinakhala ninga takoya muoni unoyu pa mbuto yakuti nee tisauona mbatiuduwala. Toera pyenepi pikhonde kucitika, ntsiku zonsene tisafunika kunyerezera pinthu pidaticitira Mulungu na Kristu. Nsolo uno unatiphedza toera kucita pyenepi. Tendeni tione kuti ntsembe yaciomboli inatiphedza tani cincino na ntsogolo. Tinaonambo kuti tisafunika kucitanji toera tipangize kuti tisapereka takhuta thangwi ya ufuni wa Yahova makamaka masumana mangasi Cikumbuso mbacidzati kufika na masumana mangasi Cikumbuso cingamala.
TINAPHEDZEKA TANI CINCINO?
3. Ciomboli cisatiphedza tani lero?
3 Ife tiri kuphedzeka na ntsembe yaciomboli ya Kristu. Mwacitsandzo, thangwi ya ciomboli Yahova asatilekerera madawo athu. Iye nee asakakamizwa toera kutilekerera. Mbwenye iye asacita pyenepi na kufuna kwace. Nyamasalmo apangiza kupereka kwace takhuta thangwi yakulekererwa na Yahova. Iye alonga: “Thangwi imwe Yahova ndimwe wadidi, pontho muli dzololo toera kulekerera.”—Mas. 86:5; 103:3, 10-13.
4. Yahova apereka kuna ani ntsembe ya Ciomboli? (Luka 5:32; 1 Timoti 1:15)
4 Anango a ife panango ananyerezera kuti nee athema kulekererwa na Yahova. Mwandimomwene nee m’bodzi wa ife athema kulekererwa na Yahova. Mpostolo Paulu alonga: “Nee ndathema kucemerwa mpostolo.” Buluka penepo iye athimiza: “Mbwenye thangwi ya kukoma ntima kukulu kwa Mulungu, ine ndine mpostolo.” (1 Akor. 15:9, 10) Tingatcunyuka Yahova asatilekerera. Thangwi yanji? Iye nee asacita pyenepi thangwi tathema, mbwenye thangwi asatifuna. Khala imwe muli wakutsukwala thangwi musanyerezera kuti nee mwathema kulekererwa na Yahova, kumbukani kuti Yahova nee apereka ntsembe yaciomboli kuna anthu aungwiro, mbwenye aipereka kuna anthu akudawa.—Lerini Luka 5:32; 1 Timoti 1:15.
5. Kodi ife tiri na ufulu wa kulekererwa na Yahova? Fokotozani.
5 Nee m’bodzi wa ife asafunika kunyerezera kuti ali na ufulu wa kulekererwa na Yahova basi ene thangwi asantumikira mu pyaka pizinji. Ndimomwene kuti Yahova asakumbuka pyonsene pinacita ife kuna iye. (Aheb. 6:10) Yahova apereka Mwanace ninga muoni, tayu toera kutilipa thangwi yakuntumikira. Natenepa, tingalonga kuti tathema kulekererwa peno kuti tiri na ufulu wa kulekererwa na Yahova thangwi tacita pizinji m’basa yace, pinakhala ninga tiri kulonga kuti Kristu nee akhafunika kutifera.—Onani Agalata 2:21.
6. Thangwi yanji Paulu atumikira Yahova mwaphinga?
6 Paulu akhadziwa kuti mwakukhonda kutsalakana basa ikhacita iye kuna Yahova, iye nee athema kulekererwa. Mphapo thangwi yanji iye akhatumikira Yahova mwaphinga? Iye acita pyenepi tayu toera kupangiza kuti iye akhathema kulekererwa na Mulungu, mbwenye toera kupangiza kupereka kwace takhuta thangwi yakukoma ntima kukulu kwa Yahova. (Aef. 3:7) Ninga Paulu, ife tisapitiriza kutumikira Yahova mwaphinga, tayu toera Yahova atibvere ntsisi, mbwenye toera kupereka takhuta kuna iye.
7. Ndi njira ipi inango yakuti ciomboli cinakwanisa kutiphedza lero? (Aroma 5:1; Tiyago 2:23)
7 Nkhombo inango iri na ife cincino thangwi ya ciomboli ndi yakuti tisakwanisa kukhala na uxamwali wakuwanga na Yahova. a Ninga pidaona ife mu nsolo udamala, pidabalwa ife nee tikhali na uxamwali na Mulungu. Mbwenye thangwi ya ciomboli, ife tisakwanisa kukhala “muntendere na Mulungu,” mbatikhala axamwaliace.—Lerini Aroma 5:1; Tiyago 2:23.
8. Thangwi yanji tisafunika kupereka takhuta kuna Yahova thangwi ya mwai wakucita phembero?
8 Thangwi yakukhala na uxamwali wakuwanga na Yahova ife tiri na mwai wakucita phembero. Yahova nee asabva basi ene maphembero anacita ife pa misonkhano ya mpingo, mbwenye asabvambo maphembero anacita m’bodzi na m’bodzi wa ife angakhala ekhene. Tingacita phembero tisakhala akukhurudzika, pontho tisakhala na ntendere wa m’manyerezero. Phembero nee isatiphedza mu njira zenezi basi, mbwenye isatiphedzambo kuwangisa uxamwali wathu na Yahova. (Mas. 65:2; Tiya. 4:8; 1 Juw. 5:14) Pikhali Yezu pa dziko yapantsi, iye akhacita phembero kazinji kene thangwi akhadziwa kuti Yahova akhambvesera, pontho phembero mbidamphedza toera apitirize kukhala na uxamwali wakuwanga na Babace. (Luka 5:16) Tisapereka takhuta kakamwe, thangwi kubulukira mu ntsembe ya ciomboli ya Yezu, ife tinakwanisa kukhala axamwali a Yahova ngakhale kulonga na iye mu phembero.
CIOMBOLI CINATIPHEDZA TANI NTSOGOLO?
9. Alambiri akukhulupirika a Yahova anaphedzeka tani na ciomboli ntsogolo?
9 Alambiri akukhulupirika a Yahova anaphedzeka tani na ciomboli ntsogolo? Iwo anadzatambira umaso wakukhonda mala. Anthu azinji asanyerezera kuti pyenepi nkhabe kwanisika thangwi ndzidzi onsene anthu ali kufa. Mbwenye cifuniro ca Yahova cikhali cakuti anthu akhale m’maso kwenda na kwenda. Mbidakhala Adhamu nee adawa, tonsene mbatidakhala m’maso kwenda na kwenda. Natenepa, maseze ndi pyakunentsa kunyerezera kukhala na umaso wakwenda na kwenda cincino, tinakwanisa kukhala na cinyindiro cakuti pyenepi pinacitikadi. Thangwi tisadziwa kuti toera pyenepi pikwanisike, Yahova alipa ntengo ukulu kakamwe, wakuti ndi umaso wa Mwanace.—Aroma 8:32.
10. Anyakudzodzwa na mabira anango asadikhiranji?
10 Ngakhale kuti umaso wakukhonda mala ndi nkhombo ya ntsogolo, Yahova asafuna kuti tinyerezere thangwi ya pyenepi cincino. Anyakudzodzwa asadikhira umaso wakukhonda mala kudzulu mbatonga pabodzi na Kristu. (Apok. 20:6) Mabira anango asadikhira kukhala mparaizu pa dziko yapantsi mwakuti nkhabe kudzaonekabve kubva kupha, nyatwa na kutsukwala. (Apok. 21:3, 4) Kodi imwe ndimwe m’bodzi wa ale ali na cidikhiro cakukhala na umaso wakwenda na kwenda pa dziko yapantsi? Ale anafuna kukhala pa dziko yapantsi nee anatambira nkhombo zakucepa tingalandanisa na ale anafuna kukhala kudzulu. Yahova acita anthu toera akhale pa dziko yapantsi. Natenepa kukhala na umaso wakwenda na kwenda pa dziko yapantsi kunaticitisa kukhala akutsandzaya.
11-12. Ndi nkhombo zipi zinango zinadikhira ife m’Paraizu? (Onanimbo mafoto.)
11 Nyerezerani kuti umaso unadzakhala tani m’Paraizu pa dziko yapantsi. Imwe nee munadzudzumikabve na utenda peno kufa. (Iza. 25:8; 33:24) Yahova anadzakupasani pinthu pyonsene pyadidi pinafuna imwe. Kodi imwe musafuna kudziwa pizinji thangwi ya pinyama peno mbalame? Musafuna kudziwa kuphatisira cakuimba naco? Peno kudhezenyari? Mwakukhonda penula, m’Paraizu tinadzafuna anthu anadziwa kudhezenyari na kumanga nyumba. Kusiyapo pyenepi, panadzafunika anthu toera kucita mabasa ninga kulima, kusasanya pyakulima napyo na kutsalakana mbuto ineyi yakubalika. (Iza. 35:1; 65:21) Mungadzakhala na umaso wakukhonda mala, imwe munakhala na ndzidzi wakucita pinthu pyenepi pyonsene na pinthu pinango pizinji.
12 Pinadzakhala pyakutsandzayisa kakamwe kutambira ale anafuna kudzalamuswa muli akufa. (Mabasa 24:15) Nyerezeranimbo kutsandzaya kunafuna kukhala na imwe mungapfundza pizinji thangwi ya Yahova na pinthu pizinji pidacita iye. (Mas. 104:24; Iza. 11:9) Kusiyapo pyenepi pyonsene, imwe cipo munadzadawa; natenepa munadzatumikira Yahova, pontho cipo munadzafunika kuphemba kulekererwa. Kodi imwe munatawira kuluza nkhombo zenezi zonsene basi ene thangwi ya “kutsandzaya na pinthu pya madawo, pyakuti ndi pya ndzidzi wakucepa”? (Aheb. 11:25) Mwandimomwene nkhabe! Nkhombo zinafuna khala na ife ntsogolo ndi zadidi kakamwe kupiringana pinthu pyonsene piri na ife lero. Kumbukani kuti Paraizu pa dziko yapantsi nee inakhala cidikhiro kwenda na kwenda. Pyenepi pyonsene pinakwanisika, thangwi Yahova atifuna kakamwe mbapereka Mwanace ninga ciomboli.
Ndi nkhombo zipi zinadikhira imwe kakamwe m’Paraizu? (Onani ndima 11-12)
PANGIZANI KUTI MUSAPEREKA TAKHUTA THANGWI YA UFUNI WA YAHOVA
13. Tinapangiza tani kuti tisapereka takhuta thangwi ya ufuni wa Yahova? (2 Akorinto 6:1)
13 Tinapangiza tani kuti tisapereka takhuta kuna Yahova thangwi ya ciomboli? Tingaikha Umambo wace pa mbuto yakutoma mu umaso wathu. (Mat. 6:33) Thangwi Yezu afa “toera anthu akuti ali m’maso akhonde kukhala m’maso toera kucita pinafuna iwo basi, mbwenye acite pinafuna ule adaafera mbalamuswa muli akufa.” (2 Akor. 5:15) Yahova ndi wakukoma ntima kakamwe, pontho atilekerera. Tingacita pyonsene pinakwanisa ife toera kuntumikira, tinapangiza kuti tisapereka takhuta thangwi ya pyonsene pinaticitira iye.—Lerini 2 Akorinto 6:1.
14. Tinanyindira tani pitsogolero pya Yahova?
14 Tinakwanisambo kupereka takhuta thangwi ya ufuni wa Yahova tingan’nyindira na kubvera pitsogolero pyace. Munjira ipi? Tingafuna kucita pisankhulo ninga kupfundza ku universidhadhe peno ntundu wa basa unafuna ife kutawira, tisafunika kunyerezera kuti Yahova asafuna kuti ticitenji. (1 Akor. 10:31; 2 Akor. 5:7) Tingacita pisankhulo mukutsogolerwa na cikhulupiro cathu kuna Yahova, cikhulupiro ceneci na uxamwali wathu na iye pisakhala pyakuwanga kakamwe. Pontho cidikhiro cathu cakukhala m’maso kwenda na kwenda cisakhala candimomwene.—Aroma 5:3-5; Tiya. 2:21, 22.
15. Tinapangiza tani kupereka kwathu takhuta mu ndzidzi wa Cikumbuso?
15 Njira inango yakupangiza kupereka kwathu takhuta thangwi ya ufuni wa Yahova ndi kucita pyonsene pinakwanisa ife ndzidzi uno wa Cikumbuso. Kusiyapo kucita masasanyiro toera kugumanika pa Cikumbuso, ife tinakwanisa kucemerambo anango toera agumanike pa Cikumbuso. (1 Tim. 2:4) Fokotozerani ale adacemera imwe pinthu pinafuna citika pa Cikumbuso. Pingakwanisika, apangizeni mavidhyu a nsolo wakuti Thangwi Yanji Yezu Afa? na Kumbukani Kufa Kwa Yezu anagumanika mu jw.org. Akulu a mpingo asafunika kucemera ale adasiya kusonkhana na kumwaza mphangwa. Nyerezerani kutsandzaya kunafuna kudzaoneka kudzulu na pa dziko yapantsi mabira anango akutayika angaphedzwa toera kubwerera pa nkumbi wawo. (Luka 15:4-7) Pa Cikumbuso, tisafunika kumwanyika tayu basi ale anadziwa ife, mbwenye tisafunikambo kumwanyika makamaka anthu apswa na ale adasiya kale kakamwe kusonkhana na kumwaza mphangwa. Tisafuna kuti iwo apibve kuti atambirwa mwadidi.—Aroma 12:13.
16. Tinacita tani pizinji mu utumiki mu ndzidzi wa Cikumbuso?
16 Kodi imwe munakwanisa kucita pizinji m’basa ya Yahova mu ndzidzi wa Cikumbuso? Ineyi ndi njira yadidi yakupangiza kuti musapereka takhuta thangwi ya pyonsene pidacita Yahova na Yezu kuna imwe. Mu ndzidzi unacita ife pizinji m’basa ya Yahova, ife tinaona ciphedzo cace, pontho cinyindiro cathu kuna iye cinadzakhala cakuwanga kakamwe. (1 Akor. 3:9) Kusiyapo pyenepi, lerini mavesi a m’Bhibhlya adaikhwa m’bukhu yakuti Kudinga Malemba Ntsiku na Ntsiku peno mu programu ya misonkhano ya pakati pa sumana. Imwe munakwanisambo kuphatisira mavesi anewa toera kucita pfundziro ya munthu paekha peno kulambira kwa banja.
17. Ninji pinatsandzayisa Yahova? (Onanimbo bokosi ya nsolo wakuti “ Tinapereka Tani Takhuta Kuna Yahova?”)
17 Ndimomwene kuti anango panango nee anakwanisa kucita pyonsene pidapfundza ife mu nsolo uno. Mbwenye kumbukani kuti Yahova nee asalandanisa pinthu pinacita imwe na pinacita anango. Iye asaona ufuni uli na imwe kuna iye. Iye asatsandzaya angaona kuti imwe muli kupereka takhuta thangwi ya muoni wakufunika kakamwe, ciomboli.—1 Sam. 16:7; Marko 12:41-44.
18. Thangwi yanji tisafunika kupereka takhuta kuna Yahova na kuna Yezu Kristu?
18 Thangwi ya ciomboli tisakwanisa kulekererwa madawo athu, kukhala axamwali a Yahova na kukhala na cidikhiro cakukhala na umaso wakukhonda mala. Tendeni tipitirize kupereka takhuta thangwi ya ufuni wa Yahova udancitisa kutipasa nkhombo zenezi. (1 Juw. 4:19) Tendeni tipitirize kuperekambo takhuta kuna Yezu, thangwi ya kutifuna kakamwe mbapereka umaso wace toera kutipulumusa!—Juw. 15:13.
NYIMBO 154 Ufuni Wakukhonda Mala
a Yahova alekerera atumiki ace akale, Yezu mbadzati kupereka umaso wace ninga ciomboli. Yahova akhadziwa kuti Mwanace mbadakhala wakukhulupirika mpaka kufa kwace. Kuna iye pikhali ninga Yezu akhadamala kupereka kale umaso wace ninga ciomboli.—Aroma 3:25.
