1. Anthu azinji lero asanyerezeranji?

 PANANGO imwe mwadzindikira kuti anthu azinji lero asadzudzumika kakamwe na pinafuna iwo m’mbuto mwa pinafuna anango. Mwacitsandzo, anthu anango asaphatisira redes sociais toera kupasika mbiri na kugaya thangwi ya pinthu pinacita iwo. Mbwenye pali na anthu akucepa akuti asapasa mbiri Yahova Mulungu. Mu nsolo uno, tinapfundza kuti pisabvekanji kupasa mbiri Yahova, pontho thangwi yanji tisafunika kucita pyenepi. Kusiyapo pyenepi, tinapfundzambo kuti tinapasa tani Mulungu mbiri yakuthema, pontho iye anadzapasa tani mbiri dzina yace ntsogolo.

PISABVEKANJI KUPASA MBIRI YAHOVA?

2. Yahova apangiza tani mbiri yace pa Phiri ya Sinai? (Onanimbo iri pa tsamba yakutoma.)

² Bhibhlya isapangiza kuti Yahova ndi Mulungu wakudzumatirisa. Pakupita ntsiku zakucepa pidamala Yahova kusudzula dzindza ya Izraeli ku Ejitu, iye aapangiza mbiri yace. Nyerezerani basi: Aizraeli azinji kakamwe agumanyikana dhuzi na Phiri ya Sinai toera kubva pikhafuna kuapanga Mulungu. Phiri yaphimbirwa na khole ikulu. Mwakukhonda dembuka utci wadzala pa phiri yonsene, kwaoneka citeketeke cikulu, kwabveka njazi, kucetuma na kulira kwamphambvu kakamwe kwa nyanga. (Eks. 19:16-18; 24:17; Mas. 68:8) Pidacita Yahova pyenepi, Aizraeli adzumatirwa kakamwe na mphambvu zace.

3. Pisabvekanji kupasa mbiri Yahova?

³ Anthu anakwanisambo kupasa mbiri  Yahova. Njira ibodzi yakupasa mbiri Yahova ndi kupanga anango thangwi ya mphambvu zace zakudzumisa na makhaliro ace akudzumatirisa. Tisapasambo mbiri Mulungu tingamulemedza thangwi yakutiphedza mu pinthu pinakwanisa ife kucita. (Iza. 26:12) Mambo Dhavidhi apangiza citsandzo cadidi cakupasa mbiri Yahova. Mu phembero idacita iye pamaso pa mbumba yonsene ya Izraeli, Dhavidhi alonga mafala awa kuna Mulungu: “Imwe Yahova, ukulu, mphambvu, mbiri, kubalika na cilemedzo ndi pyanu; thangwi pinthu pyonsene piri kudzulu na pa dziko yapantsi ndi pyanu.” Pidamala Dhavidhi kucita phembero ineyi, “mbumba yonsene yasimba Yahova.”—1 Kro. 29:11, 20.

4. Yezu apasa tani mbiri Yahova?

⁴ Pikhali Yezu pa dziko yapantsi, iye apasa mbiri Babace pidapanga iye anthu kuti ndi Yahova adampasa mphambvu toera kucita pirengo. (Marko 5:18-20) Yezu aphedzambo anango toera aone kuti Yahova ndi wakudzumatirisa kubulukira mu pinthu pikhalonga iye thangwi ya Babace na njira ikhatsalakana iye anango. Ntsiku inango, Yezu akhapfundzisa mu sinagoga. Mwa anthu akhambvesera, pakhali na nkazi m’bodzi wakuti akhathabuswa na dimonyo mu pyaka 18. Dimonyo acitisa kuti nsana wa nkazi unoyu ufunyike mbacimwana kuufuthula. Yezu adzindikira kuti nkazi unoyu akhathabuka kakamwe, natenepa aona kuti ndi pyadidi kumphedza. Yezu afendedzera nkazi unoyu mbampanga mwaufuni: “Nkaziwe, utenda wako wawangiswa.” Yezu aphata nkazi unoyu, pontho mwakukhonda dembuka nsana wace wadzongoka, mbatoma “kusimba Mulungu.” Iye apereka takhuta kakamwe thangwi Yahova akhadam’phedza toera akhale pontho mwadidi! (Luka 13:10-13) Nkazi unoyu akhali na mathangwi adidi kakamwe toera kupereka takhuta kuna Yahova; ife tisafunikambo kucita pyenepi.

NINJI PINATIKULUMIZA TOERA KUPASA MBIRI YAHOVA?

5. Ndi mathangwi api ali na ife toera kulemedza Yahova?

⁵ Ife tisapasa mbiri Yahova thangwi tisamulemedza kakamwe. Ife tiri na mathangwi mazinji toera kumulemedza. Yahova ali na mphambvu toera kucita pyonsene pinafuna iye, pontho iye nkhabe kuneta. (Mas. 96:4-7) Udziwisi wace ukulu usaoneka mu pinthu pidacita iye. Iye atipasa umaso na pinthu pyonsene pinafuna ife toera tipitirize na umaso. (Apok. 4:11) Iye ndi wakukhulupirika. (Apok. 15:4) Pinthu pyonsene pinacita iye pisafamba mwadidi, pontho iye asakwanirisa mapikiro ace. (Yos. 23:14) Ndi thangwi yace mprofeta Yeremiya alonga mafala awa thangwi ya Yahova: “Pakati pa anthu onsene audziwisi, pontho pakati pa maumambo a madzindza awo onsene, nkhabepo munthu adalandana na imwe”! (Yer. 10:6, 7) Pana mathangwi mazinji anapangiza kuti thangwi yanji tisafunika kulemedza Babathu. Ife nee tisalemedza basi Yahova, mbwenye tisanfunambo.

6. Thangwi yanji tisafuna Yahova?

⁶ Ife tisapasa mbiri Yahova thangwi tisanfuna kakamwe. Dingani makhaliro mangasi a Yahova anaticitisa kunfuna. Iye ndi wantsisi. (Mas. 103:13; Iza. 49:15) Tingathabuka, iye asatsukwala. (Zak. 2:8) Iye asatiphedza toera tindziwe mwadidi mbatikhala axamwali ace. (Mas. 25:14; Mabasa 17:27) Pontho iye ndi wakucepeseka; “iye asakotama toera kuona kudzulu na dziko yapantsi, asabulusa pa pfumbi munthu wakusowa ciphedzo.” (Mas. 113:6, 7) Na mathangwi anewa onsene, ife tisakulumizika toera kupasa mbiri Mulungu wathu wankulu.—Mas. 86:12.

7. Ndi mwai upi wakupambulika uli na ife?

⁷ Ife tisapasa mbiri Yahova thangwi tisafuna kuti anango andziwe. Anthu azinji nkhabe dziwa undimomwene thangwi ya Yahova. Thangwi yanji? Thangwi Sathani alonga uthambi  thangwi ya Yahova, pontho anthu asakhulupira uthambi unoyu. (2 Akor. 4:4) Sathani asacitisa anthu kunyerezera kuti Yahova ndi Mulungu wakuipa ntima, wakuti nkhabe kutitsalakana, pontho wakuti asacitisa nyatwa zonsene pa dziko yapantsi. Mbwenye ife tisadziwa undimomwene thangwi ya Mulungu wathu! Ife tiri na mwai wakuphedza anthu anango kubvesesa makhaliro akudzumisa a Mulungu wathu. (Iza. 43:10) Bukhu ya Masalmo kapitulu 96 isalonga pya kupasa mbiri Yahova. M’bukhu ineyi tinaona kuti tinapasa tani mbiri Yahova munjira yakuthema.

TINAPASA TANI MBIRI YAHOVA MUNJIRA YAKUTHEMA?

8. Ndi njira ipi ibodzi yakuti tinakwanisa kupasa mbiri Yahova? (Masalmo 96:1-3)

⁸ Lerini Masalmo 96:1-3. Tinakwanisa kupasa mbiri Yahova kubulukira mu pinthu pinalonga ife thangwi ya iye. Mavesi anewa asatipanga toera ‘tiimbire Yahova’ nyimbo, ‘tisimbe dzina yace,’ ‘tidziwise mphangwa zadidi za cipulumuso cace,’ na ‘kudziwisa mbiri yace pakati pa anthu a madzindza anango.’ Zenezi ndi njira zakusiyana-siyana toera kupasa mbiri Babathu wakudzulu. Atumiki a Yahova mu ndzidzi wakale akhafuna kakamwe kulonga na anango thangwi ya makhaliro akudzumisa a Yahova, pontho akhafunambo kulonga pinthu pyonsene pyadidi pidaacitira Yahova. (Dha. 3:16-18; Mabasa 4:29) Tinatowezera tani citsandzo cawo?

9-10. Mwapfundzanji na citsandzo ca Angelina? (Onanimbo foto.)

⁹ Onani citsandzo ca Angelina, a mulongo wakuti asakhala ku Estados Unidos. Iye apangiza cipapo mbalonga thangwi ya Yahova kubasa kwace. Nakuti Angelina akhali nyabasa mupswa, iye aphembwa toera agumanike pa nsonkhano pabodzi na anyabasa anango apswa. Pa nsonkhano unoyu, onsene akhala na mwai wakucedza na anango thangwi ya umaso wawo. Angelina agumanya mafoto toera kupangiza kutsandzaya kuli na iye thangwi yakukhala Mboni wa Yahova. Mbwenye mbadzati kutoma kulonga, ndzace wa pabasa alonga kuti akuzwa ninga Mboni wa Yahova. Iye atoma kulonga pinthu pyakuipa thangwi ya Mboni za Yahova na pinthu pinakhulupira iwo. Angelina alonga: “Ine ndadzudzumika kakamwe. Mbwenye ine ndikhadziwa kuti pikhalonga iye thangwi ya Yahova pikhali pyauthambi. Ine ndanyerezera: ‘Ndisafunika kulonga. Ndisafunika kuapanga undimomwene thangwi ya Yahova.’”

 ¹⁰ Nyabasa ndzace pidamala iye kulonga, Angelina acita phembero muntima mwakucimbiza. Buluka penepo, iye apanga nyabasa ndzace unoyu mwakukoma ntima: “Ine ndakuzwambo ninga Mboni wa Yahova, pontho ndisapitiriza mpaka lero.” Maseze Angelina akhali m’makhaliro akunentsa, iye apitiriza kukhala wakukhurudzika. Iye apangiza andzace akubasa mafoto adabulusa iye mwakutsandzaya na axamwali ace mu ndzidzi unatumikira iye Yahova; pontho afokotoza mwacilemedzo pinakhulupira iye. (1 Ped. 3:15) Ndi nkhombo zipi zidakhala na iye? Pidamala Angelina kulonga, nyabasa ndzace akhurudzika. Nyabasa ndzace unoyu akumbuka pinthu pyadidi pidacitika pikhali iye mwana mu ndzidzi ukhasonkhana iye na Mboni za Yahova. Angelina alonga: “Ndi mwai ukulu kakamwe kutsidzikiza dzina ya Yahova. Thangwi iye athema kucitirwa pyenepi.” Ife tinakwanisambo kupasa mbiri Yahova maseze anango akhonde kumulemedza. Unoyu ndi mwai ukulu kakamwe kuna ife.

11. Alambiri andimomwene asatowezera tani mafala anagumanika pa Masalmo 96:8?

¹¹ Lerini Masalmo 96:8. Ife tinakwanisa kuphatisira pinthu pyathu toera kupasa mbiri Yahova. Alambiri andimomwene ndzidzi onsene asapasa mbiri Yahova munjira ineyi. (Mis. 3:9) Mwacitsandzo, Aizraeli akhapereka kobiri na pinthu pinango pyakufunika toera kuphedzera kumangwa kwa templo na kuitsalakana. (2 Ama. 12:4, 5; 1 Kro. 29:3-9) Anyakupfundza anango a Yezu, apereka “pinthu pyawo” toera Yezu na apostolo akwanise kukhala na pinthu pikhafuna iwo. (Luka 8:1-3) Bhibhlya isalongambo kuti mu ndzidzi ukhanentseka Akristu anango thangwi ya njala, abale na alongo awo akuti akakhala mbuto zinango akhatumiza kobiri toera kuaphedza. (Mabasa 11:27-29) Lero tinakwanisambo kupasa mbiri Yahova kubulukira mu pyakupereka pinacita ife.

12. Pyakupereka pyathu pisapasa tani mbiri Yahova? (Onanimbo foto.)

¹² Onani citsandzo cibodzi cinapangiza kuti tisapasa tani mbiri Yahova na pyakupereka pyathu. Mu caka ca 2020, ku Zimbabwe madzi nee akhabvumba mwakukwana. Anthu azinji akhali pangozwi yakufa thangwi yakusoweka kwa cakudya, kuphatanizambo mulongo Prisca. Maseze makhaliro akhali akunentsa kakamwe, Prisca akhapitiriza kumwaza mphangwa masumana onsene Ncitatu na Ncixanu, ngakhale m’midzidzi yakulima. Mavizinyu ace akhansingirira thangwi yakumwaza mphangwa m’mbuto mwa kuenda kalima.  Iwo akhalonga: “Iwe unafa na njala.” Prisca akhanyindira kuti Yahova anantsalakana. Na thangwi ineyi, ndzidzi onsene iye akhatawira: “Yahova cipo asaduwala atumiki ace.” Mwakukhonda dembuka, iye atambira ciphedzo cinaperekwa na gulu yathu. Ciphedzo ceneci cisakwanisika thangwi ya pyakupereka pinacita ife. Mavizinyu a Prisca adzumatirwa kakamwe, mbampanga: “Ndzidzi onsene Mulungu asakuphedza, natenepa ife tisafuna kupfundza thangwi ya iye.” Mavizinyu ace anomwe atoma kugumanika pa misonkhano yathu.

13. Makhaliro athu anapasa tani mbiri Yahova? (Masalmo 96:9)

¹³ Lerini Masalmo 96:9. Tinakwanisa kupasa mbiri Yahova kubulukira m’makhaliro athu. Anyantsembe akhafunika kusamba, mbakhala akucena toera akwanise kutumikira mu templo ya Yahova. (Eks. 40:30-32) Ife tisafunikambo kukhala akucena, tayu basi ene kukhala na manungo akucena, mbwenye tisafunikambo kucalira pinthu pyonsene pinaida Yahova. (Mas. 24:3, 4; 1 Ped. 1:15, 16) Bhibhlya isalonga kuti tisafunika kudula “uunthu wakale” mbatibvala “uunthu upswa.” Pyenepi pisabveka kuti tisafunika kucita pyonsene pinakwanisa ife toera kucalira manyerezero na macitiro akuti nkhabe kukomeresa Yahova, mbatipfundza kunyerezera na kucita pinthu pinapangiza kuti tisatowezera Yahova na makhaliro ace adidi. (Akol. 3:9, 10) Na ciphedzo ca Yahova, ngakhale ale akuti acita pinthu pyakuipa kakamwe anakwanisa kucinja mbabvala uunthu upswa.

14. Musapfundzanji na citsandzo ca Jack? (Onanimbo foto.)

¹⁴ Onani citsandzo ca Jack wakuti akhali phanga wakugopswa kakamwe, pontho anthu akhancemera Dimonyo. Thangwi ya uphanga ukhacita iye, Jack atongwa kuphiwa. Pikhadikhira iye ntsiku yakuphiwa kwace, m’bale m’bodzi aenda nkaidi yace mbamphemba toera apfundze Bhibhlya. Jack atawira mbatoma kupfundza Bhibhlya. Maseze akhadacita pinthu pizinji pyakuipa kakamwe, iye acinja, pontho mukupita kwa ndzidzi abatizwa ninga Mboni wa Yahova. Jack akhadacinja kakamwe makhaliro ace, thangwi pa ntsiku ikhafuna iye kuphiwa, anyakuonera anango a kaidi akhagwisa misozi mu ndzidzi ukhaapangana Jack. Ntsogoleri wa anyakuonera kaidi ineyi, alonga: “Jack akhali nyakaidi wakugopswa kakamwe wa mbuto ino, mbwenye iye adzakhala nyakaidi wadidi kakamwe.” Pakupita sumana ibodzi pidamala Jack kuphiwa, abale adaenda kacitisa misonkhano nkaidi agumana nyakaidi m’bodzi wakuti ukhali ulendo wace wakutoma kugumanika pa misonkhano. Ninji pidancitisa toera kugumanika pa misonkhano?  Iye adzumatirwa thangwi ya macinjo makulu adacita Jack, pontho akhafuna kudziwa kuti asafunika kucitanji toera alambire Yahova. Pyenepi pisapangiza pakweca kuti makhaliro athu anakwanisa kupasa mbiri Babathu wakudzulu!—1 Ped. 2:12.

YAHOVA ANAPASA TANI MBIRI DZINACE NTSOGOLO?

15. Yahova anadzapasa tani mbiri dzina yace ntsogolo? (Masalmo 96:10-13)

¹⁵ Lerini Masalmo 96:10-13. Mavesi anewa akumalisa a Masalmo 96 asapangiza Yahova ninga Nyakutonga Miseru na Mambo wakulungama. Yahova anapasa tani mbiri dzinace ntsogolo? Iye anacita pyenepi angabweresa ulungami. Mwakukhonda dembuka, iye anafudza Bhabhilonya Wankulu, thangwi asacita pinthu pizinji pyakuipa, pontho asapfundzisa uthambi thangwi ya iye. (Apok. 17:5, 16; 19:1, 2) Bhabhilonya Wankulu angafudzwa, panango anthu anango anasankhula kutoma kulambira Yahova pabodzi na ife. Pakumalisa, pa nkhondo ya Armajedhoni, Yahova anadzafudza dziko yonsene ya Sathani, kuphatanizambo onsene anamuida na ale analonga uthambi thangwi ya iye. Mbwenye iye anapulumusa anthu onsene ananfuna, anambvera na anampasa mbiri. (Marko 8:38; 2 Ates. 1:6-10) Pakumala mayesero akumalisa akuti anacitika kunkhomo kwa Utongi wa Pyaka Cikwi wa Kristu, Yahova anadzacenesa dzina yace kwenda na kwenda. (Apok. 20:7-10) Pa ndzidzi unoyu, ‘dziko yapantsi inadzadzala na cidziwiso ca mbiri ya Yahova ninga kudzala kwa madzi m’bara.’—Abha. 2:14.

16. Muli wakutonga toera kucitanji? (Onanimbo foto.)

¹⁶ Pinadzakhala pyakutsandzayisa kakamwe anthu onsene angadzasimba Yahova mwakubverana na pinafuna iye! Mbwenye ndzidzi unoyu mbudzati kufika, ife tinakwanisa kucita pyonsene pinakwanisa ife toera kusimba Mulungu wathu. Toera kutiphedza kubvesesa basa iri na ife, Mathubo Akutonga asankhula Masalmo 96:8 toera ikhale lemba yathu ya caka ca 2025. Iyo isalonga: “Pasani mbiri dzina yakuthema ya Yahova.”