1, 2. Thangwi yanji ndzidzi onsene n’dziko musaoneka anthu akutcerenga?

LERO, mpfuma ndi zakunentsa kakamwe pa dziko yonsene. Mwacitsandzo, ndi pyakunentsa kuna aphale na atsikana azinji kugumana basa. Anango asaikha umaso wawo pangozwi mbaenda m’madziko akupfuma. Mbwenye m’madziko anewa, muli na anthu akutcerenga azinji kakamwe. Pa dziko yonsene yapantsi, anthu akupfuma akupitiriza kupfuma, akutcerenga akupitiriza kutcerenga. Kufufudza kudacitwa cincino kusapangiza kuti purusentu ibodzi ya anthu akupfuma kakamwe lero anadzakhala na kobiri izinji kakamwe kupiringana mapurusento 99 a anthu pa dziko yonsene. Mwandimomwene, mu ndzidzi wakuti anango ali na kobiri izinji kakamwe toera kuiphatisira mu ndzidzi uzinji, mabiliyau a anthu anango ndi akutcerenga kakamwe. Yezu adzindikira pyenepi pidalonga iye kuti: ‘Anthu akutcerenga muli nawo ntsiku zonsene.’ (Marko 14:7) Thangwi yanji kusowa ulungami kweneku kusaoneka lero?

² Yezu akhadziwa kuti basi ene ndi Umambo wa Mulungu unakwanisa kucinja mpfuma za dziko. Bhibhlya isapangiza kuti “anyabasa,” peno mpfuma za dziko, kuphatanizambo anthu andale na auphemberi asacita khundu ya dziko ya Sathani. (Apokalipse 18:3) Atumiki a Mulungu asafunika kukhala akusiyana na  anthu anewa m’makhundu onsene. Mbwenye, atumiki azinji a Mulungu asaphatisirambo mpfuma za dziko ya Sathani.

3. Ndi mibvundzo ipi inafuna kudinga ife?

³ Ninga Akristu, tisafunika kudinga makhaliro athu thangwi ya mpfuma za dziko. Toera kucita pyenepi, tisafunika kubvundzika: ‘Ndinaphatisira tani pinthu pyakumanungo toera kupangiza kuti ndine wakukhulupirika kwa Mulungu? Ndinaphatisira tani mwakucepa kakamwe mpfuma za dziko? Ninji pinapangiza kuti atumiki a Mulungu lero asanyindira kakamwe Yahova?’

4, 5. (a) Ninji pidacitikira nyabasa mwakubverana na mafala adalonga Yezu? (b) Kodi Yezu apanga atowereri ace toera kucitanji?

⁴ Lerini Luka 16:1-9. Mafala a Yezu analonga pya nyabasa wakukhonda kulungama asafunika kuticitisa kunyerezera mwadidi. Nyabasa akhapumphwa kuti akhabvunga mpfuma, patrau wace mbanyerezera kum’bulusa basa. * (Onani cidzindikiro capantsi.) Mbwenye nyabasa unoyu acita pinthu ‘mwandzeru.’ Mbadzati kusiya basace, iye acita uxamwali na anthu akuti mbadamphedza mukupita kwa ndzidzi. Yezu nee alonga mafala anewa toera anyakupfundzace acite pinthu mwakusowa ulungami toera akwanise kuphedzeka. Anthu a dziko asacita pinthu mwakusowa ulungami. M’mbuto mwace, Yezu alonga mafala anewa toera kutipfundzisa ntsonga yakufunika kakamwe.

⁵ Yezu akhadziwa kuti ninga nyabasa wakuti akhali m’makhaliro akunentsa, mbidakhala pyakunentsa kwa atowereri ace azinji kukhala n’dziko ino yakusowa ulungami. Natenepa iye aapanga: ‘Citani uxamwali kubulukira mu mpfuma zakukhonda kulungama.’ Thangwi yanji? Thangwi mpfuma zenezi zingamala, Yahova na Yezu, akuti ndi axamwali, ‘akutambireni m’mbuto zakukhala kwenda na kwenda.’ Kodi tinapfundzanji kubulukira mu uphungu wa Yezu?

6. Ninji cinapangiza kuti Mulungu nee akhafuna anthu agumane kobiri mwaumbirimi?

⁶ Yezu nee afokotoza thangwi yanji acemera pinthu pyakumanungo kuti ‘pyakusowa ulungami.’ Mbwenye Bhibhlya isapangiza pakweca kuti kukhala na kobiri izinji nee pikhacita khundu ya cifuniro ca Mulungu. Mwacitsandzo, Yahova apasa Adhamu na Eva pinthu pizinji kupiringana pikhafuna iwo m’munda wa Edheni. (Genesi 2:15, 16) Mu ndzidzi wa apostolo, nzimu wakucena ukhatsogolera akristu akudzodzwa, pontho ‘nee m’bodzi wa iwo akhalonga kuti pinthu pikhali na iye ndi pyace, mbwenye pikhali pya onsene.’ (Machitiro 4:32) Mprofeta Izaiya alonga kuti unadzafika ndzidzi wakuti anthu onsene anadzatsandzaya na pinthu pya dziko. (Izaiya 25:6-9; 65:21, 22) Mbwenye mbudzati kufika ndzidzi unoyu, anyakupfundza a Yezu asafunika kukhala na udziwisi wakukwana. Iwo asafunika kuphatisira pinthu pyakumanungo pyakukhonda kulungama pya dziko, mu ndzidzi ubodzi ene mbakomeresa Mulungu.

7. Ndi uphungu upi udapereka Yezu pa lemba ya Luka 16:10-13?

⁷ Lerini Luka 16:10-13. Nyabasa adalonga Yezu acita uxamwali toera kuphindulisa umaso  wace. Mbwenye Yezu akhafuna kuti atowereri ace acite uxamwali kudzulu toera kuphindulisa anango. Iye akhafuna tibvesese kuti njira inaphatisira ife mpfuma zathu zakukhonda kulungama inakwanisa kupangiza kuti ndife akukhulupirika kuna Mulungu peno nkhabe. Tinacita tani pyenepi?

8, 9. Perekani pitsandzo pya anthu adapangiza kukhulupirika mukuphatisira mpfuma zawo zakukhonda kulungama.

⁸ Njira ibodzi toera kupangiza kuti tisaphatisira mwakukhulupirika pinthu pyathu pyakumanungo, ndi kucita pyakupereka toera kuphedzera basa yakumwaza mphangwa pa dziko yonsene idalonga Yezu kuti mbidacitwa. (Mateo 24:14) Mwana ntsikana unango ku Indiya atoma kukoya kobiri mwapang’ono-pang’ono m’bokosi toera kucita pyakupereka, m’mbuto mwakugula mabhoneka. Pidadzala bokosi, iye apereka kobiri yonsene idakoya iye toera kuphedzera basa yakumwaza mphangwa. M’bale unango ku Indiya akhali na munda wa mikoko. Iye akhapereka koko zizinji ku ofesi yakuthumburuzira mabukhu mu cilongero ca malaiala. Nakuti abale pa ofesi ineyi asagula koko, iye apibva kuti pyakupereka pyace ndi pyakufunika kakamwe kupiringana kupereka kobiri. Unoyu ndi udziwisi wakukwana. Munjira ibodzi ene, abale anango ku Gresya ndzidzi onsene asapereka mafuta, keju na pyakudya pinango ku Bheteli.

⁹ M’bale unango adafuluka mbaenda dziko inango, asiya nyumba yace ku Sri Lanka toera icitirwe misonkhano ya mpingo, ya cisa, pontho toera kufikira abale a m’basa ya ndzidzi onsene. Iye asaphedzera na mpfuma yace munjira ineyi, pontho pisaphedza kakamwe amwazi mphangwa akuti nee ali na kobiri yakukwana. M’madziko akuti basa yakumwaza mphangwa isatcingwa, abale asaphatisira nyumba zawo ninga Nyumba za Umambo. Pyenepi pisaphedza apainiya na anango akuti nee ali na kobiri yakukwana toera kucita misonkhano mwakukhonda kulipa nyumba.

10. Ndi nkhombo zipi zisakhala na ife tingapasa mwakudzala manja?

¹⁰ Pitsandzo pyenepi pisapangiza kuti atumiki a Mulungu ndi ‘akukhulupirika mu pinthu ping’ono.’ (Luka 16:10) Iwo asaphatisira pinthu pyawo pyakumanungo toera kuphindulisa anango. Kodi axamwali anewa a Yahova asapibva tani angacita pyakupereka? Iwo asatsandzaya kakamwe na kudziwa kuti angapasa mwakudzala manja, akuwina mpfuma yandimomwene kudzulu. (Luka 16:11) Mulongo unango wakuti asacita pyakupereka ndzidzi onsene toera kuphedzera basa ya Umambo alonga kuti pinthu pinango pyakutsandzayisa pyandicitikira mu pyaka pizinji. Iye alonga: “Ndingapasa mwakudzala manja pinthu pyakumanungo, pisakhala pyakukhonda nentsa kulekerera anango, kupirira, kutambira uphungu na kutsalakana mwadidi  pinthu pinathimbana na ine.” Anthu azinji adzindikira kuti kupasa mwakudzala manja kusaphedza toera kukhala na cikhulupiro cakuwanga.—Masalmo 112:5; Misangani 22:9.

11. (a) Kupasa kwathu mwakudzala manja kusapangiza tani udziwisi wakukwana? (b) Ninji pinacita atumiki a Mulungu lero? (Onani cithundzithundzi cakutoma.)

¹¹ Ife tisapangizambo kuti tiri na udziwisi wakukwana tingaphatisira pinthu pyathu pyakumanungo toera kuphedza anango mu utumiki. Maseze nee tinakwanisa kutumikira m’basa ya ndzidzi onsene peno kuenda mbuto inafunika amwazi mphangwa, tinapitiriza kuphindulisa anango. (Misangani 19:17) Mwacitsandzo, pyakupereka pyathu pisaphedzera basa yakumwaza mphangwa na kuendesa mabukhu mbuto zinagumanika anthu azinji akutcerenga kakamwe. Madziko anewa ninga Kongo, Madagaskar na Ruwanda, Mabhibhlya asadhula kakamwe. Mu pyaka pizinji, abale athu asasankhula kugulira cakudya mabanjawo peno kugula Bhibhlya. Lero, thangwi ya pyakupereka pya anango, gulu ya Yahova isathumburuza na kugawira Mabhibhlya mwakukhonda lipa kuna abale na alongo onsene kuphatanizambo anyakupfundza Bhibhlya. (Lerini 2 Akorinto 8:13-15.) Ale anacita pyakupereka na anatambira, anakwanisa kukhala axamwali a Yahova.

12. Kodi Abhrahamu apangiza tani kuti akhanyindira Mulungu?

¹² Ife tinakwanisambo kukhala axamwali a Yahova tingakhonda kudzudzumika kakamwe na mpfuma za dziko mbitisaka mpfuma zandimomwene. Pyenepi ndi pidacita Abhrahamu, mamuna wakukhulupirika. Iye abvera Yahova mbasiya nzinda wapfuma kakamwe wa Uri mbaenda kakhala m’misasa thangwi akhafuna kukhala xamwali wa Yahova. (Ahebere 11:8-10) Ndzidzi onsene iye akhanyindira Mulungu m’mbuto mwa pinthu pyakumanungo. (Genesi 14:22, 23) Yezu akulumiza anango toera kutowezera cikhulupiro ninga ceneci. Ntsiku inango, iye apanga m’phale unango wakupfuma: ‘Ungafuna kukhala munthu wakulungama kakamwe, ndoko, ukagulise pinthu pyako, mbupasa anyakucerenga, tenepa unadzakhala na mpfuma yakudzulu; ungamala, bwera dzanditowere.’ (Mateo 19:21) M’phale unoyu nee akhali na cikhulupiro ninga ca Abhrahamu. Mbwenye akhalipo anthu anango akuti akhanyindira Mulungu.

13. (a) Ndi uphungu upi udapereka Paulu kuna Timoti? (b) Tinaphatisira tani uphungu wa Paulu lero?

¹³ Timoti akhali mamuna wacipapo. Pidamala Paulu kucemera Timoti kuti “nyankhondo wadidi wa Kristu Yezu,” iye athimiza: ‘Nee munthu m’bodzi wa anyankhondo a Mulungu asatsalakana pya malonda a pantsi pano, mbwenye anafuna kukomeresa ule adampasa basa ya unyankhondo.’ (2 Timoti 2:3, 4) Atowereri a Yezu lero, kuphatanizambo atumiki ali m’basa ya ndzidzi onsene akupiringana miliyau ibodzi, asacita pyonsene toera kuphatisira uphungu wa Paulu. Iwo  asacalira pinthu pyakutundusa pya dziko ino yaumbirimi. Iwo asakumbuka uphungu uyu: ‘Nyamangawa asakhala bitcu wa nyakufiyarisi.’ (Misangani 22:7) Sathani asafuna tibvunge ndzidzi na mphambvu zathu zonsene n’dziko yace ya mpfuma. Anango asafiyari kobiri toera kulipa nyumba, motokala, xikola, peno phwando yakumanga banja. Tingakhonda kucita mphole-mphole, tinakwanisa kukhala na mangawa pyaka pizinji. Ife tisapangiza udziwisi wakukwana tingalulupisa umaso wathu, kucalira mangawa na kuphatisira kobiri yakucepa. Tingacita pyenepi, tinatumikira mwadidi Mulungu m’mbuto mwakukhala bitcu wa dziko ya mpfuma.—1 Timoti 6:10.

14. Tisafunika kukhala akutonga toera kucitanji? Perekani pitsandzo.

¹⁴ Toera kululupisa umaso wathu, tisafunika kuikha Umambo wa Mulungu pa mbuto yakutoma. Banja inango ikhacita malonda a kobiri izinji kakamwe. Mbwenye iwo akhafuna kutumikira m’basa ya ndzidzi onsene. Natenepa iwo agulisa malonda awo, bote na pinthu pinango. Buluka penepo iwo aenda kaphedzera basa yakumanga ofesi ikulu ya Mboni za Yahova ku Warwick, Nova York. Pyenepi pikhali pyakupambulika kwa iwo thangwi pikhabveka kutumikira ku Bheteli na anawo pabodzi na adzukulu awo, masumana mangasi atumikirambo na anyakubala a mamuna akuti aphedzerambo kumangwa kwa Warwick. Mulongo unango wakuti ndi mpainiya ku Colorado, Estados Unidos, agumana basa ku bhanku yakuti ikhampasa ndzidzi. Apatrau ace atsandzaya na kuphata kwace basa mbampasa cidzo cakuti mbadatambira kobiri izinji kakamwe. Mbwenye nakuti basa nee mbidancitisa kuikha manyerezero ace mu utumiki, iye aikhonda. Pyenepi ndi pitsandzo pyakucepa pya kuperekeka kunacita atumiki a Yahova. Tingakhala akutonga kuikha Umambo pa mbuto yakutoma, tinapangiza kuti tisapasa ntengo uxamwali wathu na Mulungu na mpfuma za undimomwene kupiringana pinthu pyakumanungo.

15. Ndi mpfuma zipi zakufunika kakamwe?

¹⁵ Tingakhala na pinthu pyakumanungo nee pisabveka kuti ndife akutawirika kwa Mulungu. Yahova asapasa nkhombo anthu ‘akupfuma m’basa yadidi.’ (Lerini 1 Timoti 6:17-19.) Mwacitsandzo, mulongo unango anacemerwa Lucia adzindikira kuti ku Albanya kukhafunika amwazi mphangwa. * (Onani cidzindikiro capantsi.) Natenepa iye abuluka ku Italya mu caka 1993 mbaenda kweneko. Iye nee akhali na basa mbwenye anyindira ciphedzo ca Yahova. Iye apfundza cilongero ca Albanya, mbaphedza anthu akupiringana 60 mpaka kubatizwa. Panango ife nee tinakhalambo na maphindu akumwaza mphangwa ninga anewa mu cisa cathu. Mbwenye pyonsene pinacita ife toera kuphedza anthu kudziwa Yahova mbakhala axamwali ace, ndi mpfuma za kwenda na kwenda.—Mateo 6:20.

16. (a) Ninji pinafuna kucitika na mpfuma za dziko? (b) Kodi pyenepi pinakhuya tani maonero athu thangwi ya pinthu pyakumanungo?

¹⁶ Yezu apangiza pakweca kuti dziko ya mpfuma inadzamala. Iye alonga kuti ‘mpfuma zenezi zingamala,’ nee ‘zinaoneka ninga zamala.’ (Luka 16:9) Ntsiku zino zakumalisa,  mabhanku anango akufungwa, pontho madziko anango asathimbana na nkandzo ukulu wakusoweka kwa kobiri. Mbwenye mukupita kwa ndzidzi, pinthu pinatekera kakamwe. Ndale za dziko, mauphemberi na pyampfuma pinacita khundu ya dziko ya Sathani pinadzamala. Mprofeta Ezekyeli na Sofoniya alongeratu kuti ouro na parata, pyakuti pisaphedzera kakamwe mpfuma za dziko nee pinadzakhala pyakufunika. (Ezekyele 7:19; Sofoniya 1:18) Nyerezerani kuti umaso wanu wafika kunkhomo, mbamudzindikira kuti mwasiya kukhala xamwali wa Mulungu toera kukhala na pinthu pyakumanungo. Munapibva tani? Panango munapibva ninga mamuna adaphata basa mu umaso wace onsene toera kuwina kobiri izinji, maseze kobiri ineyi nee ikhali yakufunika kakamwe. (Misangani 18:11) Pinthu pyakumanungo pya dziko ino pinadzamala. Natenepa lekani kuluza mwai wakuphatisira pinthu pyanu pyakumanungo toera kukhala xamwali wa Yahova na Yezu. Pinacitira ife Yahova na Umambo wace pinadzaticitisa kukhala akutsandzaya kakamwe.

17, 18. Ninji pinadikhira axamwali a Mulungu ntsogolo?

¹⁷ Umambo wa Mulungu ungabwera, nee m’bodzi wa ife anadzalipa nyumba toera kukhala peno kufiyari kobiri. Cakudya cinadzakhala cakunjipa kakamwe, pontho nee tinadzafunika kulipa madotoro peno kugula mitombwe. Axamwali a Yahova anadzatsandzaya na pinthu pyadidi kakamwe. Ouro, parata na miyala yakufunika, pinadzaphatisirwa toera kubalikisa dziko, tayu toera kupfumisa munthu unango. Matabwa adidi, miyala na mafero pinadzaphatisirwa toera kumanga nyumba zakubalika kakamwe. Axamwali athu anadzatiphedza thangwi anadzafuna kucita pyenepi, tayu thangwi asafuna kulipwa. Tinadzatsandzaya na pinthu pyonsene pinabulusa dziko.

¹⁸ Zenezi ndi zinango mwa nkhombo zinafuna kutambira axamwali a Yahova na Yezu. Atumiki a Yahova pa dziko yapantsi anadzakhuwa mwakutsandzaya angadzabva mafala a Yezu: ‘Bwerani, imwe mudapaswa cidzo na Babanga, tambirani Umambo udasasanyirwa imwe kutomera kucitwa kwa dziko.’—Mateo 25:34.