Mpostolo Paulu akhadziwa kuti uthambi wa Sathani ukhali wakugoswa kakamwe. Mbwenye nee ndi Akristu onsene akhadziwa ngozwi ineyi. Mwacitsandzo, abale anango a ku Korinto akhanyerezera kuti akhali akuwanga mu undimomwene kwakuti nee mbadapeuswa na uthambi wa Sathani. (1 Akorinto 10:12) Ndi thangwi yace Paulu acenjeza: ‘Cinagopa ine ndi cakuti ninga nyoka idanyengeza Eva na uthambi wace, manyerezero anu akhonde kupeuswa mbamukhonda kukhala akulungama na akucena mwa Kristu.’—2 Akorinto 11:3.

Mafala a Paulu asapangiza kuti nee tisafunika kukhala akunyindirika kakamwe. Toera kukunda uthambi wa Sathani, musafunika kudzindikira kugopswa kwace mbamutsidzikizika ku ngozwi ineyi.

Mphangwa zauthambi ndi zakugopswa thangwi zisaphatisirwa toera kunyengeza anthu peno kutsogolera manyerezero awo na macitiro awo. Mwakubverana na bukhu Propaganda and Persuasion, mphangwa zauthambi ndi “zakuipa, zakuphekesa, kukhonda kulungama.” Anthu asafokotoza kuti mphangwa zauthambi ndi “kucinja mphangwa, kunyengeza na kunyengerera munthu toera kucita cinthu.”

Mphangwa zauthambi ndi zakugopswa kakamwe thangwi mwapang’ono-pang’ono zinakwanisa kukhuya manyerezero athu mwakukhonda kudzindikira. Tinakwanisa kuzilandanisa na muya wakuipa wakuti nee usaoneka peno kubveka khwema. Vance Packard, nyakudziwisa pya makhaliro a anthu, alonga kuti mphangwa zauthambi zisakhuya njira inacitira ife pinthu “kupiringana munanyerezera ife.” Nyakudziwisa unango alonga kuti mphangwa zauthambi zisacitisa anthu kupangiza makhaliro akugopswa kakamwe  na mwakukhonda linganira, pontho zisaatsogolera toera kuidana, kucita nkhondo na kutcingwa thangwi yakusiyana kwa khanda peno uphemberi.—Easily Led—A History of Propaganda.

Khala munthu asakwanisa kutinyengeza na mphangwa zauthambi, ndiye tani Sathani? Iye apfundza makhaliro a anthu kutomera mu ndzidzi udacitwa iwo. Pontho, iye asaonera ‘dziko yonsene,’ natenepa iye anakwanisa kuphatisira khundu yonsene yadziko toera kumwaza uthambi wace. (1 Jwau 5:19; Jwau 8:44) Sathani ‘asafunga ndzeru’ za anthu azinji mukuphatisira mphangwa zace zauthambi zakuti cincino ‘zisapeusa anthu onsene pa dziko.’ (2 Akorinto 4:4; Apokalipse 12:9) Munakwanisa tani kukhonda mphangwa zace zauthambi?

Yezu atipfundzisa kuti pana njira yakukhonda nentsa toera kuthimbana na mphangwa zauthambi: ‘Munadzadziwa undimomwene, undimomwene unadzakusudzulani.’ (Jwau 8:31, 32) Pa nkhondo, nyankhondo asafunika kudziwa kuti anagumana kupi mphangwa zakunyindirika thangwi nyamalwa anakwanisa kulonga uthambi toera kumpeusa. Mphapo munagumana kupi mphangwa zakunyindirika? Yahova atipasa mphangwa zenezi M’mafalace, Bhibhlya. Mwenemu munakwanisa kugumana pyonsene toera kuthimbana na mphangwa zauthambi wa Sathani.—2 Timoti 3:16, 17.

Mwandimomwene, Sathani asadziwa pyenepi. Natenepa iye asaphatisira dziko inaonera iye toera kutidzudzumisa na kutifewesa tingaleri na kupfundza Bhibhlya. Lekani kunyengezwa na uipi ‘wa manyengerero a Dyabo’! (Aefesi 6:11) Nee pyakwana basi ene kudziwa undimomwene. Tisafunika kuwangisira toera kukulisa cidziwiso cathu ca undimomwene. (Aefesi 3:18) Nyakulemba unango anacemerwa Noam Chomsky alonga: “Nkhabepo munthu anakwanisa kuikha undimomwene mu ongo wanu. Musafunika kuusaka mwekha.” Natenepa “usakeni mwekha” “mukudinga mwacidikhodikho Malemba ntsiku zonsene.”—Machitiro 17:11.

Sathani nee asafuna kuti munyerezere mwadidi na kubvesesa undimomwene wa pinthu pinabva imwe. Thangwi yanji? Thangwi mphangwa zauthambi “zisaoneka ninga ndi zadidi kakamwe” khala anthu anazibva nee azinyerezera mwadidi.” (Media and Society in the Twentieth Century) Lekani kukhulupira pinthu pyonsene pinabva imwe mbamudzati kupinyerezera mwadidi. (Misangani 14:15) Mulungu akupasani ‘luso yakunyerezera’  na ‘luso yakudzindikira,’ natenepa phatisirani maluso anewa toera kuwangisa cikhulupiro canu.—Misangani 2:10-15; Aroma 12:1, 2.

Anyankhondo anganyengezwa na mphangwa zauthambi asatoma kugopa mbaluza cipapo cakumenya nkhondo. Mphangwa zauthambi panango zinaacitisa kumenyana okha peno kumwazana na anyankhondo andzawo. Mwakubverana na nkulu wa nyankhondo wa ku Alemanya, mphangwa zauthambi zacitisa dziko ya Alemanya kukundwa pa Nkhondo Yakutoma Ya Dziko Yonsene Yapantsi. Iye alonga kuti anthu akhanyengezwa na mphangwa zauthambi akhafewa mbapeuswa nazo. Sathani asaphatisirambo njira zibodzi zene toera kufudza kuphatana kwa Akristu lero. Mwacitsandzo, iye asatomesa kukhonda bverana kwa abale peno alongo. Peno asaacitisa kunyerezera kuti gulu ya Yahova nee isacita pinthu munjira yadidi, natenepa anthu asasiya gulu ya Yahova.

Lekani kunyengezwa! Phatisirani uphungu wa Mafala a Mulungu na khalani akuphatana na abale na alongo anu. Mwacitsandzo, Bhibhlya isatikulumiza toera kupitiriza ‘kulekererana na ntima onsene’ na kumalisa mwakucimbiza kukhonda bverana. (Akolose 3:13, 14; Mateo 5:23, 24) Pontho isaticenjeza ngozwi yakukhonda kukhala pabodzi na abale na alongo. (Misangani 18:1) Nyindirani kuti imwe munakwanisa kucalira mphangwa zauthambi wa Sathani. Bvundzikani: ‘Ulendo wakumalisa udatsukwaliswa ine na m’bale peno mulongo, ndapangiza makhaliro anakomeresa Mulungu peno anakomeresa Sathani?’—Agalata 5:16-26; Aefesi 2:2, 3.

Nyankhondo wakukhonda nyindirika kuna ntsogoleri wace nee anamenya mwadidi nkhondo. Natenepa anyamalwa asaphatisira mphangwa zauthambi toera kufudza cinyindiro ca anyankhondo kuna atsogoleri awo. Atsogoleri angacita madodo, anyamalwa anadzayesera kuphatisira madodo anewa mukulonga: “Lekani kuanyindira!” na “Lekani kutawira kutsogolerwa na iwo thangwi munafa!” Sathani asacitambo pibodzi pyene. Iye asayesera kufudza cinyindiro canu kuna ale anaphatisira Yahova toera kutsogolera atumiki ace.

Kodi munatsidzikizika tani? Khalani wakutonga toera kupitiriza mu gulu ya Yahova. Pitirizani kukhala wakukhulupirika na kuphedzera amuna anatsogolera mbumba ya Mulungu, maseze amuna anewa ndi akusowa ungwiro. (1 Atesalonika  5:12, 13) Panango anyakupanduka na anyakunyengeza anango anapomokera gulu ya Yahova. (Tito 1:10) Maseze pinalonga iwo pisaoneka ninga pyandimomwene, lekani ‘kucimbiza na kudzudzumiswa m’mitima yanu.’ (2 Atesalonika 2:2) Phatisirani uphungu udapereka Paulu kuna Timoti: ‘Pitiriza kucita pinthu pidapfundziswa iwe,’ pontho kumbuka ‘pidapfundza iwe.’ (2 Timoti 3:14, 15) Nyerezerani pinthu pyonsene pinapangiza kuti musafunika kukhulupira m’bandazi wakukhulupirika wakuti Yahova akumphatisira mu pyaka pizinji toera kutipfundzisa undimomwene.—Mateo 24:45-47; Ahebere 13:7, 17.

Sathani asayeserambo kukunyengezani munjira zizinji. Kazinji kene iye asayesera kukugopesani. Kugopesa “ndi ibodzi mwa njira yakale ya mphangwa zauthambi.” (Easily Led—A History of Propaganda) Mpfundzisi wa ku Britanya anacemerwa Philip M. Taylor, alemba kuti Asirya aphatisira mphangwa zauthambi toera kukunda anyamalwa awo. Sathani anaphatisira kugopa munthu, kutcingwa na kugopa kufa toera akupingizeni kutumikira Yahova.—Izaiya 8:12; Yeremiya 42:11; Ahebere 2:15.

Lekani kutawirisa Sathani kucita pyenepi kwa imwe! Yezu alonga: ‘Lekani kugopa ale anakwanisa kupha manungo mbacimwana kucita pinango.’ (Luka 12:4) Khalani na cinyindiro cakuti Yahova anadzakwanirisa pikiro yace toera kukutsalakanani mwakukwana mbakupasani ‘mphambvu yakupiringana yacibaliro,’ pontho anakuphedzani kuthimbana na misampha ya Sathani.—2 Akorinto 4:7-9; 1 Pedro 3:14.

Mwakukhonda penula, panango midzidzi inango munafewa peno kugopa. Mbwenye kumbukani mafala akuwangisa a Yahova adalonga iye kuna Yoswa: ‘Khala na cipapo! Leka kugopa! Thangwi [Yahova] Mulungu wako, anadzakhala na iwe konsene kwene kunaenda iwe.’ (Yoswa 1:9) Mungakhala akudzudzumika, phemberani kuna Yahova mwakucimbiza mbamumpanga nyatwa zanu. Munakwanisa kunyindira kuti ‘ntendere wa Mulungu wakupiringana ndzeru zonsene unadzakoya mitima yanu na ndzeru zanu.’ Natenepa munadzakhala na mphambvu toera kuthimbana na mphangwa zauthambi wa Sathani.—Afilipi 4:6, 7, 13.

Kodi musakumbuka mphangwa zauthambi zidalonga nyamphangwa wa Asirya, Rabisaki toera kugopesa mbumba ya Mulungu? Iye akhafuna iwo akhulupire kuti nee m’bodzi mbadaatsidzikiza m’manja mwa Asirya, ngakhale Yahova. Iye alongambo kuti Yahova akhadapanga Asirya toera kufudza Yerusalemu. Kodi mafala anewa akhali andimomwene? Onani pidalonga Yahova: ‘Leka gopa thangwi ya mafala adabva iwe, kunditikana kunacita atumiki a mambo wa Asirya.’ (2 Amambo 18:22-25; 19:6) Buluka penepo Yahova atuma anju m’bodzi adapha Asirya akukwana 185.000 ntsiku ibodzi camasiku!—2 Amambo 19:35.

Mwatoma kale kuona filimu yakuti munthu nee akwanisa kudzindikira kuti akunyengezwa? Musafunika kulonga mwakugaluza: ‘Ine nkhabe kukhulupira pyenepi! Iwo akundinyengeza!’ Buluka penepo, nyerezerani kuti aanju akukupangani: “Lekani kunyengezwa na uthambi wa Sathani!”

Natenepa lekani kubvesera mphangwa zauthambi wa Sathani. (Misangani 26:24, 25) Bveserani Yahova, pontho nyindirani iye mu pinthu pyonsene pinacita imwe. (Misangani 3:5-7) Iye asakufunani na asakuphembani: ‘Mwananga, khala wandzeru mbukomeresa ntima wanga.’ (Misangani 27:11) Mungacita pyenepi, munadzakunda nkhondo ya manyerezero anu!