1. Thangwi yanji tisalonga kuti pinthu pyonsene ndi pya Yahova? (Onani cithundzithundzi cakutoma.)

PINTHU PYONSENE ndi pya Yahova! Iye ndi ‘mwanaciro kudzulu na pyonsene piri kweneko, pontho dziko yapantsi na pyonsene piri mwenemo.’ (Deuteronomyo 10:14; Apokalipse 4:11) Nakuti ndi Yahova adacita anthu, ife tonsene ndife anthu ace. (Masalmo 100:3) Mbwenye mwa anthu onsene, Mulungu asasankhula anango toera akhale ace munjira yakupambulika.

2. Mwakubverana na Bhibhlya, mbani ali kukhundu ya Yahova munjira yakupambulika?

² Mwacitsandzo, lemba ya Masalmo 135 isafokotoza pya alambiri akukhulupirika a Yahova mu Izraeli wakale ninga ‘mbumba yakupambulika.’ (Masalmo 135:4) Ozeya alongambo kuti anthu anango akuti nee ndi Aizraeli mbadakhala atumiki a Yahova. (Ozeya 2:23) Profesiya ineyi yakwanirisika pidatoma Yahova kusankhula anthu akuti nee akhali Aizraeli  toera kutonga kudzulu pabodzi na Kristu. (Machitiro 10:45; Aroma 9:23-26) Ale anadzodzwa na nzimu wakucena asacemerwa ‘dzindza yakucena.’ Iwo ndi anthu ‘akufunika kakamwe’ kwa Yahova. (1 Pedro 2:9, 10) Mphapo ndiye tani kwa Akristu onsene akukhulupirika akuti ali na cidikhiro cakukhala pa dziko yapantsi kwenda na kwenda? Yahova asaacemerambo ‘anthu anga akusankhulwa.’—Izaiya 65:22.

3. (a) Mbani ali na uxamwali wakupambulika na Yahova lero? (b) Tinadinganji mu nsolo uno?

³ Lero, ‘nkumbi ung’ono’ unadikhira kuenda kakhala kudzulu kwenda na kwenda na “mabira anango” anadikhira kukhala pa dziko yapantsi kwenda na kwenda, asalambira Yahova pabodzi ninga “nkumbi ubodzi.” (Luka 12:32; Jwau 10:16) Ife tisafuna kupangiza kuna Yahova kuti tiri akutsandzaya kakamwe thangwi yakukhala na uxamwali wakupambulika na iye. Mu nsolo uno, tinadinga kuti tinapereka tani takhuta kuna Yahova thangwi ya mwai unoyu wakupambulika.

4. Tinapereka tani takhuta kuna Yahova thangwi yakutitawirisa kucita uxamwali na iye, pontho Yezu acitambo tani pibodzi pyene?

⁴ Ife tinapangiza kupereka kwathu takhuta kuna Yahova tingaperekeka kwa iye mbatibatizwa. Natenepa onsene anakwanisa kuona kuti ife ndife a Yahova na tiri dzololo toera kumbvera. (Ahebere 12:9) Yezu acitambo pibodzi pyene pidabatizwa iye. Maseze iye akhacita kale khundu ya mbumba yakuperekeka kwa Yahova, iye aperekeka kwa Yahova. Pyenepi pisakhala ninga akhalonga: ‘Ndisakomerwa na kucita cifuno canu, imwe Mulungu wanga.’—Masalmo 40:7, 8.

5, 6. (a) Kodi Yahova alonganji mu ndzidzi udabatizwa Yezu? (b) Ndi citsandzo cipi cinapangiza kuti Yahova asakomerwa tingaperekeka kwa iye?

⁵ Kodi Yahova apibva tani mu ndzidzi udabatizwa Yezu? Bhibhlya isalonga: ‘Pidamala iye kubatizwa, mwakucimbiza Yezu alimira m’madzi, penepo kudzulu kwafunguka, iye aona nzimu wa Mulungu ukhatcita ninga nkhangaiwa mbudza kuna Yezu. Pontho kwabvekambo fala idabuluka kudzulu mbilonga: Uyu ndi Mwananga wakufunika, anakomerwa na ine.’ (Mateo 3:16, 17) Yezu akhali kale wa Mulungu. Mbwenye Yahova atsandzaya pidaona iye kuti Yezu akhali dzololo kuphatisira umaso wace toera kutumikira Iye basi. Yahova asakomerwambo tingaperekeka kwa iye, pontho anadzatipasa nkhombo.—Masalmo 149:4.

⁶ Mbwenye pinthu pyonsene mphya Yahova! Mphapo tinampasanji? Nyerezerani mamuna wakuti ali na maluwa akubalika kakamwe panyumba pace. Ntsiku inango mwanace wantsikana asaka maluwa mangasi mbampasa. Maseze maluwa ndi ace kale, baba waufuni anatsandzaya kakamwe na muoni unoyu. Thangwi muoni unoyu usapangiza kuti mwana asafuna babace. Maluwa adapaswa iye na mwanace ndi akufunika kakamwe kupiringana maluwa anango onsene a panyumba pace. Munjira ibodzi ene, Yahova asakomerwa kakamwe tingaperekeka kwa iye na ntima onsene.—Eksodo 34:14.

7. Kodi Malakiya asatiphedza tani kubvesesa mabvero a Yahova thangwi ya ale anantumikira?

⁷ Lerini Malakiya 3:16. Thangwi yanji ndi pyakufunika kuperekeka kuna Yahova  mbamubatizwa? Ndimomwene kuti kutomera ntsiku idabalwa imwe, mukhali kale wa Yahova, Nciti wanu. Mbwenye nyerezerani kutsandzaya kunafuna khala na Yahova mungantawira ninga Ntongi mbamuperekeka kwa iye. (Misangani 23:15) Yahova asadziwa ale anantumikira na ntima onsene, pontho iye asalemba madzina awo ‘m’bukhu yace ya cikumbuso.’

8, 9. Ninji pinaphemba Yahova kwa ale akuti madzina awo alembwa ‘m’bukhu ya cikumbuso’?

⁸ Tingafuna kuti madzina athu apitirize ‘m’bukhu ya cikumbuso’ ya Yahova, pana cinthu cinango cinafunika ife kucita. Malakiya alonga kuti tisafunika kugopa Yahova na kunyerezera mwacidikhodikho dzina yace. Tingalambira munthu unango peno cinthu cinango, dzina yathu inadzabuluswa m’bukhu ya Yahova!—Eksodo 32:33; Masalmo 69:28.

⁹ Natenepa nee pyakwana basi kupikira kuti tinacita cifuno ca Yahova mbitibatizwa. Pyenepi ndi pinthu pyakuti pisacitwa kabodzi basi, mbwenye ulambiri wathu kwa Yahova ndi umaso. Ntsiku zonsene, tisafunika kupangiza m’macitiro athu kuti tisabvera Yahova mu umaso wathu onsene.—1 Pedro 4:1, 2.

10. Ndi kusiyana kupi kusaoneka pakati pa ale anatumikira Yahova na ale anakhonda kuntumikira?

¹⁰ Mu nsolo udamala, tapfundza kuti Kaini, Salomoni na Aizraeli akhalonga kuti akhalambira Yahova, mbwenye nee akhali akukhulupirika kwa iye. Pitsandzo pyenepi pisatipfundzisa kuti nee pyakwana basi kulonga kuti tisalambira Yahova. Tisafunika kuida pinthu pyakuipa mbitifuna pinthu pyadidi. (Aroma 12:9) Yahova alonga kuti mbapadaoneka kusiyana kakamwe ‘pakati pa anthu akulungama na anthu akuipa, pakati pa ale anatumikira Mulungu na ale anakhonda kuntumikira.’—Malakiya 3:18.

11. Thangwi yanji pisafunika kuoneka pakweca kuna anthu onsene kuti basi ene tisalambira Yahova?

¹¹ Tisapereka takhuta kakamwe kuna Yahova thangwi yakutisankhula toera kukhala anthu ace! Pisafunika kuoneka pakweca kuna anthu onsene kuti ife tiri kukhundu ya Yahova. (Mateo 5:16; 1 Timoti 4:15) Bvundzikani: ‘Kodi anango asakwanisa kuona kuti ndiri wakukhulupirika kwa Yahova? Ndisakomerwa kupanga anango kuti ndine m’bodzi wa Mboni za Yahova?’ Nyerezerani kutsukwala kunafuna kukhala na Yahova tingakhala na manyadzo toera kupanga anango kuti ndife atumiki ace.—Masalmo 119:46; lerini Marko 8:38.

12, 13. Thangwi yanji pisakhala pyakunentsa kuna anango kuadzindikira khala ndi Mboni za Yahova?

¹² Mwakutsukwalisa, ngakhale abale na alongo anango asatowezera ‘nzimu wa dziko.’ Ndi thangwi yace nee asakhala akusiyana na ale anakhonda kulambira Yahova. (1 Akorinto 2:12) ‘Nzimu wa dziko’ usacitisa anthu kunyerezera basi ene pinafuna iwo. (Aefesi 2:3) Mwacitsandzo, mwakukhonda tsalakana uphungu onsene  unatambira ife, anango asapitiriza kubvala nguwo zakukhonda thema. Iwo asabvala nguwo zakuphata na zakuphenekera, ngakhale kuenda nazo kumisonkhano Yacikristu. Pontho asacinga tsisi munjira yakukhonda thema. (1 Timoti 2:9, 10) Na thangwi ineyi, pisakhala pyakunentsa kuna anango kuadzindikira kuti ndi Mboni za Yahova peno nkhabe.—Tyago 4:4.

¹³ Pana makhundu anango akuti abale na alongo anango nee asakhala akusiyana na dziko. Mwacitsandzo, m’maphwando, anango asabvina na kucita pinthu pinango pyakuti nee ndi pyakutawirika kwa Akristu. Anango asaikha mafoto awo mu interneti na kulemba pinthu pinafuna iwo. Panango iwo nee asandikwa mu mpingo thangwi yakucita madawo makulu, mbwenye makhaliro awo akuipa anakwanisa kukhuya abale na alongo akuti asawangisira kukhala akusiyana na dziko.—Lerini 1 Pedro 2:11, 12.

14. Tisafunika kucitanji toera kutsidzikiza uxamwali wathu na Yahova?

¹⁴ Pyonsene piri n’dziko piri na cifuno cakuticitisa kunyerezera ‘pinthu pinasirirwa na manungo, pinasirirwa na maso na kugaya thangwi ya pinthu piri na munthu mu umaso wace.’ (1 Jwau 2:16) Ife ndife a Yahova, ndi thangwi yace ndife akusiyana na anthu a dziko. Ife ‘tisakhonda pinthu pyakuipa na pifuno pya dziko, mbatikhala na ndzeru zadidi mu umaso, pontho tisakhala anthu akulungama na akuperekeka kuna Mulungu pakati pa anthu a dziko ino.’ (Tito 2:12) Umaso wathu onsene, kuphatanizambo malongero athu, kudya, kumwa, kubvala na kubasa tisafunika kupangiza pakweca kuti ndife a Yahova.—Lerini 1 Akorinto 10:31, 32.

15. Thangwi yanji tisafunika kukhala akukoma ntima na aufuni kuna Akristu andzathu?

¹⁵ Tinapangiza kuti tisalemedza uxamwali wathu na Yahova munjira inatsalakana ife abale na alongo athu. Thangwi iwo ndi a Yahova, ninga ifembo. Tingakumbuka pyenepi, ndzidzi onsene tinadzaatsalakana mwakukoma ntima na mwaufuni. (1 Atesalonika 5:15) Thangwi yanji pyenepi ndi pyakufunika? Yezu alonga kuna anyakupfundzace: ‘Imwe mungafunana unango na ndzace, anthu onsene anadzindikira kuti ndimwe anyakupfundza anga.’—Jwau 13:35.

16. Tisapfundzanji na Mwambo wa Mose thangwi ya ufuni wa Yahova kuna atumiki ace?

¹⁶ Citsandzo cibodzi cinagumanika m’Mwambo wa Mose cinatiphedza kubvesesa kuti tinatsalakana tani anango mu mpingo. Mu templo ya Yahova, mukhali na pyombo pyakuti pikhaphatisirwa basi ene mu ulambiri. Mwambo ukhalonga pakweca kuti Alevi mbadatsalakana tani pyombo pyenepi, natenepa munthu onsene akhakhonda kubvera pitsogolero pyenepi akhafunika kuphiwa. (Numero 1:50, 51) Khala Yahova akhadzudzumika na njira ikhatsalakana anthu pyombo pikhaphatisirwa mu ulambiri wace, iye asadzudzumikambo kakamwe na njira inatsalakanwa atumiki ace akukhulupirika! Iye asafuna tidziwe kuti ndife akufunika kakamwe kuna iye mudalonga iye kuti: ‘Ule anakukhuyani, akudzokonya n’diso mwanga.’—Zakariya 2:8.

17. Thangwi yanji tisafunika kutsalakanana mwadidi unango na ndzace?

¹⁷ Malakiya alonga kuti Yahova ‘asabvesera na kubvesesa’ njira inatsalakanana  atumiki ace unango na ndzace. (Malakiya 3:16) Yahova ‘asadziwa anthu ace.’ (2 Timoti 2:19) Iye asaona pyonsene pinacita ife na pinalonga ife. (Ahebere 4:13) Tingakhonda kukhala akukoma ntima kuna abale na alongo athu, Yahova asaona pyenepi. Mbwenye tinakwanisa kukhala na cinyindiro cakuti Yahova asaonambo tingakhala akutambira alendo, akupasa mwakudzala manja, akulekerera na akukoma ntima.—Ahebere 13:16; 1 Pedro 4:8, 9.

18. Tinapereka tani takhuta kuna Yahova thangwi yakukhala atumiki ace?

¹⁸ Tisafunika kupangiza kuna Yahova kuti tisapereka takhuta kakamwe thangwi yakukhala atumiki ace. Tisadziwa kuti pidaperekeka ife, tacita cisankhulo candzeru kakamwe. Maseze tikukhala ‘pakati pa anthu akuipa akuti nkhabe kucita pinthu pyakulungama,’ tinakwanisa kukhala ‘akusowa mulando na akulungama’ mbatiyetima ‘ninga ceza mu dziko ino.’ (Afilipi 2:15) Natenepa tiri akutonga toera kucalira pinthu pyonsene pinaida Yahova. (Tyago 4:7) Pontho tisafuna abale na alongo athu na kualemedza thangwi ndiwombo a Yahova.—Aroma 12:10.

19. Kodi Yahova asapasa tani nkhombo atumiki ace?

¹⁹ Bhibhlya isalonga: ‘Yahova nee anadzasiya atumiki ace.’ (Masalmo 94:14) Mafala anewa ndi akunyindirika. Mwakukhonda tsalakana pinafuna kucitika, Yahova anakhala na ife. Maseze tife, iye cipo anadzatiduwala. (Aroma 8:38, 39) ‘Khala tiri maso, ndife a Yahova, pontho tingafa, tafera Yahova. Natenepa, khala tiri maso peno tafa, ndife a Yahova.’ (Aroma 14:8) Ife tisadikhira na ntima onsene ndzidzi unafuna kudzalamusa Yahova atumiki ace akhulupirika onsene adafa. (Mateo 22:32) Ngakhale cincino tisatsandzayambo na miyoni mizinji inatipasa Babathu. Ninga pinalonga Bhibhlya, ‘yakutsandzaya ndi mbumba yakuti Mulungu wawo ndi Yahova, anthu adasankhula iye toera akhale ace.’—Masalmo 33:12.