Khalani na Ntsisi Kuna ‘Anthu a Mitundu Yonsene’
PIDAPFUNDZISA Yezu anyakupfundzace kuti anamwaza tani mphangwa zadidi, iye aacenjeza kuti anthu nee mbadafuna kuabvesera ndzidzi onsene. (Luka 10:3, 5, 6) Pyenepi pisacitika m’basa yathu yakumwaza mphangwa. Anthu anango anagumanikana na ife asakhala akudzikuza peno aukali. Angacita pyenepi, panango pinakhala pyakunentsa kwa ife kuabvera ntsisi na kuamwazira mphangwa.
Munthu wantsisi asaona pinafuna anango, nyatwa zawo, asaabvera ntsisi mbafuna kuaphedza. Mphapo ninji pinafuna kucitika tingakhonda kubvera ntsisi anthu m’basa yakumwaza mphangwa? Tinaluza phinga yathu, pontho pinakhala pyakunentsa kuamwazira mphangwa na kuaphedza. Ife tinakwanisa kulandanisa phinga yathu na moto. Toera moto ugake mwadidi, usafunika kuseserwa. Munjira ibodzi ene, toera tipitirize kukhala aphinga, tisafunika kukhala antsisi.—1 Atesalonika 5:19.
Tinakwanisa tani kukhala antsisi, ngakhale m’makhaliro akunentsa? Tendeni tidinge pitsandzo pitatu pyakuti tinakwanisa kupitowezera: Yahova, Yezu na mpostolo Paulu.
TOWEZERANI NTSISI ZA YAHOVA
Mu pyaka pizinji, anthu asalonga uthambi thangwi ya Yahova. Mbwenye iye asapitiriza kukhala ‘wakukoma ntima kuna anthu akukhonda kupereka takhuta na akuipa.’ (Luka 6:35) Kodi iye apangiza tani kukoma ntima kwace? Iye ndi wakupirira kuna anthu onsene. Yahova asafuna ‘anthu a mitundu yonsene’ apulumuke. (1 Timoti 2:3, 4) Maseze Mulungu asaida uipi, anthu ndi akufunika kakamwe kwa iye, pontho nee asafuna kuti iwo afe.—2 Pedro 3:9.
Yahova asadziwa kuti Sathani asacitisa anthu kukhulupira uthambi. (2 Akorinto 4:3, 4) Anthu azinji asapfundziswa uthambi thangwi ya Mulungu kutomera uwana wawo. Natenepa njira inanyerezera iwo na inabva iwo, panango pinakhala pyakunentsa kutawira undimomwene. Mbwenye Yahova ali dzololo toera kuaphedza. Tisadziwa tani pyenepi?
Mwacitsandzo, Yahova apibva tani thangwi ya anthu a mu nzinda wa Ninive. Maseze iwo akhacita pinthu pyakuipa, Yahova apanga Yona: ‘Kodi ine nkhabe bverambo ntsisi nzinda ukulu wa Ninive na anthu ace akupiringana 120.000 akukhonda dziwa kusiyanisa pyadidi na pyakuipa?’ (Yona 4:11) Yahova abvera ntsisi anthu anewa akuti nee akhadziwa undimomwene thangwi ya iye. Natenepa iye atuma Yona toera kaacenjeza.
Ife tisapibvambo munjira ibodzi ene ninga Yahova thangwi ya anthu. Iwo ndi akufunika kakamwe. Ninga Yahova, ife tiri dzololo toera kuaphedza kupfundza pya iye, maseze pioneke ninga anakhonda undimomwene.
TOWEZERANI NTSISI ZA YEZU
Ninga Babace, Yezu akhabverambo ntsisi anthu ‘thangwi iwo akhapwazwa na kutsalakanwa mwakuipa ninga mabira akusowa nkumbizi.’ (Mateo 9:36) Yezu akhabvesesa kuti thangwi yanji anthu akhali m’makhaliro anewa. Pyenepi pikhacitika thangwi atsogoleri awo auphemberi akhaatsalakana mwakuipa na kuapfundzisa uthambi. Maseze Yezu akhadziwambo kuti anthu azinji akhambvesera nee mbadakhala atowereri ace na mathangwi akusiyana-siyana, iye apitiriza kuapfundzisa pinthu pizinji.—Marko 4:1-9.
Nee tisafunika kutsukwala munthu angakhonda kubvesera mphangwa zinamwaza ife
Makhaliro angacinja mu umaso, panango anthu anabvesera undimomwene munjira zakusiyana-siyana
Anthu angakhonda kubvesera mphangwa zathu, tisafunika kubvesesa kuti thangwi yanji asacita pyenepi. Panango iwo ali na maonero akuphonyeka thangwi ya Bhibhlya peno thangwi yakuona anthu anango analonga kuti ndi Akristu mbakacita pinthu pyakuipa. Panango anthu anango abva uthambi thangwi ya pinakhulupira ife. Anango asagopa acibale awo peno asagopa kusingirirwa na anthu a n’cisa cawo.
Anthu anango anamwazira ife mphangwa panango athimbana na nyatwa zizinji. Misionaryo unango anacemerwa Kim alonga kuti anthu azinji n’cisa cace apulumuka pa nkhondo, pontho aluza pinthu pizinji. Iwo nee ali na cidikhiro candimomwene ca ntsogolo. Iwo ali akutsukwala kakamwe, pontho nee asanyindira munthu. Kazinji kene anthu a n’cisa ceneci asakhonda kubvesera mphangwa zinamwaza abale na alongo athu. Ntsiku inango Kim apomokerwa mu ndzidzi ukhamwaza iye mphangwa.
Kodi Kim apitiriza kubvera ntsisi anthu, maseze akhatsalakanwa mwakuipa? Iye ndzidzi onsene asayesera kukumbuka lemba ya Misangani 19:11, inalonga: ‘Munthu waudziwisi nkhabe kuipirwa mwakucimbiza.’ Anganyerezera pinathimbana na anthu n’cisa cace, pisam’phedza toera kuabvera ntsisi. Pontho nee ndi onsene akuti ndi akuipa. Mu cisa cibodzi cene, Kim ali na maulendo akubwereza adidi.
Ife tinakwanisa kubvundzika: ‘Ine mbidakhonda kudziwa undimomwene, mbidaipirwa ndingamwazirwa mphangwa na Mboni za Yahova?’ Mwacitsandzo, ndiye tani khala tabva uthambi thangwi ya Mboni za Yahova? Panango ifembo mbitidaipirwa na kufuna kutsalakanwa mwantsisi. Yezu alonga kuti ife tisafunika kutsalakana anango ninga munafunambo ife kutsalakanwa. Natenepa, tisafunika kubvesesa mabvero a anango na kuabvera ntsisi, maseze pinentse.—Mateo 7:12.
TOWEZERANI NTSISI ZA PAULU
Mpostolo Paulu abvera ntsisi anthu maseze iwo nee akhabvesera mphangwa zikhamwaza iye. Thangwi yanji? Thangwi iye akhakumbuka makhaliro ace akale. Iye alonga: ‘Kale ine ndikhali munthu wakuxola Mulungu, ndikhatcinga mbumba yace, pontho ndikhali waukali. Ngakhale tenepo, ine ndabverwa ntsisi thangwi ndikhacita pinthu mwakukhonda dziwa na mwakusowa cikhulupiro.’ (1 Timoti 1:13) Paulu akhadziwa kuti Yahova na Yezu ambvera ntsisi. Iye akhabvesesa anthu akhafuna kupingiza basa yace, thangwi iye akhacitambo pibodzi pyene.
Midzidzi inango, Paulu akhagumanikana na anthu akhakhulupira pipfundziso pyauthambi. Kodi iye akhapibva tani? Pa lemba ya Machitiro 17:16, tisaleri kuti mu ndzidzi ukhali iye ku Atena, ‘atsukwala kakamwe pidaona iye kuti nzinda onsene ukhadadzala na madzimunthu.’ Mbwenye, Paulu aphatisira madzimunthu anewa toera kupfundzisa anthu. (Machitiro 17:22, 23) Paulu acinja njira zace zakumwaza mphangwa, mbaphatisira njira zakusiyana-siyana kuna anthu a madziko akusiyana-siyana toera ‘akwanise kupulumusa anango.’—1 Akorinto 9:20-23.
Tingamwazira mphangwa anthu anakhonda kubvesera peno anakhulupira pipfundziso pyakuphonyeka, tinakwanisa kucita ninga pidacita Paulu. Tinakwanisa kuphatisira pinthu pinadziwa ife thangwi ya iwo toera kuaphedza kupfundza pya ‘mphangwa zadidi za pinthu pyadidi.’ (Izaiya 52:7) Mulongo m’bodzi anacemerwa Dorothy alonga: “N’cisa cathu, anthu azinji asapfundziswa kuti Mulungu ndi waukali na wakutonga. Ine ndisaasimba thangwi yakukhulupira kwawo Mulungu mbindiaphedza kubvesesa pinalonga Bhibhlya thangwi ya makhaliro aufuni a Yahova na mapikiro ace a ntsogolo.”
PITIRIZANI KUKUNDA PYAKUIPA MUKUCITA PINTHU PYADIDI
Mu ndzidzi unafendedzera ife kumala kwa makhaliro ano, tisadikhira kuti anthu anango ‘anadzathimiza kucita pinthu pyakuipa kakamwe.’ (2 Timoti 3:1, 13) Mbwenye ife nee tisafunika kusiya kuabvera ntsisi peno kuluza kutsandzaya kwathu thangwi ya macitiro awo. Yahova anakwanisa kutipasa mphambvu toera ‘kupitiriza kukunda pyakuipa mukucita pinthu pyadidi.’ (Aroma 12:21) Mpainiya m’bodzi anacemerwa Jessica alonga kuti kazinji kene asagumanikana na anthu akudzikuza na ale akuti asasingirira ife na mphangwa zathu. Iye athimiza: “Pyenepi mphyakutsukwalisa kakamwe. Ndingatoma kucedza na munthu, ndisacita phembero mwacipantsipantsi kuna Yahova na kuphemba ciphedzo cace toera kuona anthu ninga munaonera iye.” Pyenepi pyaphedza Jessica toera akhonde kukundwa na mabvero ace, mbwenye toera kunyerezera kuti anaphedza tani anthu.
Ife tisapitiriza kusaka ale anafuna kupfundza undimomwene
Mukupita kwa ndzidzi, anthu anango anadzatawira ciphedzo cathu mbapfundza undimomwene
Ife tisafunikambo kuphedza abale na alongo athu munamwaza ife mphangwa pabodzi na iwo. Jessica alonga kuti angamwaza mphangwa pabodzi na andzace, khala m’bodzi wa iwo ali na pyakugumana napyo pyakuipa, iye nee asaikha manyerezero ace ku pinthu pyenepi. M’mbuto mwace, iye asalonga pinthu pyadidi, ninga nkhombo zakumwaza kwathu mphangwa maseze anango nee asakomerwa nazo.
Yahova asadziwa mwadidi kuti midzidzi inango ndi pyakunentsa kwa ife kumwaza mphangwa. Mbwenye iye asakomerwa kakamwe tingatowezera ntsisi zace! (Luka 6:36) Mwandimomwene, Yahova nee anapitiriza kupirira na kubvera ntsisi anthu kwenda na kwenda n’dziko ino. Ife tisanyindira kuti Yahova asadziwa mwadidi kumala kwa makhaliro ano. Ndzidzi unoyu mbudzati kufika, basa yathu yakumwaza mphangwa isafunika kucitwa mwakucimbiza. (2 Timoti 4:2) Natenepa, tendeni tipitirize kumwaza mphangwa mwaphinga na kubvera ntsisi ‘anthu a mitundu yonsene.’
