1. Ndi cifuno cipi ciri na ife tonsene?

MUNAPIBVA tani khala munthu anadziwa imwe na analemedza imwe aduwala dzina yanu peno nee akudzindikirani? Pyenepi pinakhala pyakutsukwalisa kakamwe. Thangwi yanji? Thangwi tonsene tabalwa na cifuno ca kudzindikirwa na anango. Mbwenye nee tisafuna kuti iwo adziwe basi ene dzina yathu. Ife tisafuna iwo adziwe kuti ndife ani, pontho adziwe pinthu pidacita ife.—Numero 11:16; Yobe 31:6.

2, 3. Ninji cinafuna kucitika tingafuna kakamwe kusimbwa na anango? (Onani cithundzithundzi cakutoma.)

² Mbwenye tingakhonda kucita mphole-mphole, kufuna kusimbwa kunakwanisa kukhala kwakuipa. Dziko ya Sathani inaticitisa kufuna kukhala akubvekera na akufunika kakamwe. Pyenepi pingacitika, nee tinadzindikira na kulambira Babathu wakudzulu, Yahova Mulungu, wakuti athema kucitirwa pyenepi.—Apokalipse 4:11.

³ Mu ntsiku za Yezu, atsogoleri anango a mauphemberi  akhali na maonero akuphonyeka thangwi ya kudzindikirwa. Yezu acenjeza anyakupfundzace: ‘Citani mphole-mphole na apfundzisi a mwambo, iwo asakomerwa kufamba mbadabvala nguwo zakulapha, mbafuna kumwanyikwa m’misika; m’masinagoga, iwo asafuna mipando yakutsogolo, pontho m’maphwando, asafuna mbuto zadidi kakamwe.’ Iye athimiza: ‘Iwo anadzatcunyuswa kakamwe.’ (Luka 20:46, 47) Mbwenye Yezu asimba nzice adapereka kobiri ziwiri zing’ono, mu ndzidzi wakuti panango nee m’bodzi adzindikira pikhacita iye. (Luka 21:1-4) Mwandimomwene, Yezu akhali na maonero akusiyana na anango thangwi ya kudzindikirwa. Nsolo uno unatiphedza toera kupitiriza kukhala na maonero adidi thangwi ya kudzindikirwa, maonero akuti Yahova Mulungu asafuna kuti tikhale nawo.

4. Ndi kudzindikirwa kupi kwakufunika kakamwe, pontho thangwi yanji?

⁴ Ndi kudzindikirwa kupi kwakufunika kakamwe? Nee ndi kudzindikirwa kunasaka anthu azinji mukucita universidade, malonda peno kufuna kukhala akubvekera mu ubalangazi wa dziko. Paulu afokotoza pyenepi mudalonga iye kuti: ‘Cincino, nakuti imwe musadziwa Mulungu, peno tilonge kuti, Mulungu asakudziwani, thangwi yanji musabwerera pontho ku pinthu pyaciwana, pyakusowa basa, pyakuti nkhabe phedza, mbamufuna pontho kukhala mabitcu a pinthu pyenepi?’ (Agalata 4:9) Ndi mwai ukulu kakamwe ‘kudziwika na Mulungu,’ Ntongi Wankulu wakudzulu na pantsi! Yahova asatidziwa mwadidi, asatifuna, pontho asafuna kuti tikhale cifupi na iye. Yahova aticita toera tikhale axamwali ace.—Koelete 12:13, 14.

5. Tisafunika kucitanji toera kudziwika na Mulungu?

⁵ Ife tisadziwa kuti Mose akhali xamwali wa Yahova. Pidaphemba iye Yahova kuti: ‘Ndipangizeni njira zanu,’ Yahova atawira: ‘Ndinadzacita pinandiphemba iwe, thangwi ndakomerwa na iwe, pontho ine ndisakudziwa na dzina yako.’ (Eksodo 33:12-17) Yahova anakwanisambo kudziwa m’bodzi na m’bodzi wa ife. Mphapo tisafunika kucitanji toera kukhala axamwali a Yahova? Tisafunika kunfuna na kuperekeka kwa iye.—Lerini 1 Akorinto 8:3.

6, 7. Ninji cinafuna kuticitisa kuluza uxamwali wathu na Yahova?

⁶ Ife tisafunika kutsidzikiza uxamwali wathu na Babathu wakudzulu. Ninga Akristu a mu ndzidzi wa apostolo ku Galasya, ife tisafunika kusiya kukhala mabitcu a ‘pinthu pyaciwana, pyakusowa basa, pyakuti nkhabe phedza’ kuphatanizambo kukhala na mbiri na kubvekera n’dziko ino. (Agalata 4:9) Akristu a ku Galasya akhadziwa kale Mulungu, pontho akhadziwika na Mulungu. Mbwenye Paulu alonga kuti abale anewa ‘akhabwerera pontho’ ku pinthu pyakusowa basa. Munjira inango, iye akhaabvundza: ‘Thangwi yanji mwabwerera nduli mbamutoma pontho kukhala mabitcu a pinthu pyakusowa basa?’

⁷ Kodi pyenepi pinakwanisambo kucitika kuna ife? Inde. Ninga Paulu, pidadziwa ife undimomwene, panango tasiya kukhala akubvekera n’dziko ino ya Sathani. (Lerini Afilipi 3:7, 8.) Panango tasiya mwai wakupfundza mwakukhonda lipa, mabasa adidi peno mwai wakuwina kobiri izinji. Panango  mbatidakhala akubvekera peno akupfuma thangwi ya maluso akuimba peno m’masendzekero. Mbwenye ife takhonda miyai ineyi yonsene. (Ahebere 11:24-27) Pinakhala pyakusowa ndzeru kakamwe kutsumbikika thangwi ya pisankhulo pyadidi pidacita ife na kunyerezera kuti umaso wathu mbudakhala mwadidi khala tacita pyenepi! Manyerezero anewa anaticitisa kubwerera pontho ku pinthu pya dziko ino, pyakuti tikhapiona ninga ‘pyaciwana na pyakusowa basa.’

8. Ninji cinafuna kuwangisa cifuno cathu ca kudzindikirwa na Yahova?

⁸ Tinakwanisa tani kuwangisa cifuno cathu ca kudzindikirwa na Yahova mbatikhonda kufuna kudzindikirwa na dziko? Tisafunika kuikha manyerezero athu ku pinthu piwiri pyakufunika kakamwe. Cakutoma, Yahova ndzidzi onsene asadzindikira ale anantumikira mwakukhulupirika. (Lerini Ahebere 6:10; 11:6) Yahova asaona atumiki ace akukhulupirika ninga akufunika kakamwe, natenepa iye asaona kuti ndi ‘kusowa ulungami’ kuapwaza. Yahova ndzidzi onsene asadziwa ‘anthu ace.’ (2 Timoti 2:19) Iye asadziwa ‘njira za anthu akulungama,’ pontho asadziwa kuti anaapulumusa tani.—Masalmo 1:6; 2 Pedro 2:9.

9. Perekani pitsandzo pinapangiza kuti Yahova adzindikira tani atumiki ace.

⁹ Midzidzi inango, Yahova adzindikira atumiki ace munjira yakupambulika kakamwe. (2 Pya dziko ya Israele 20:20, 29) Mwacitsandzo, nyerezerani njira idapulumusa Yahova atumiki ace pa Bara Yakufuira mu ndzidzi ukhatowererwa iwo na anyankhondo amphambvu a Farau. (Eksodo 14:21-30; Masalmo 106:9-11) Pyenepi pikhali pyakudzumatirisa kakamwe kwakuti anthu akhapitiriza kupilonga maseze pakhadapita pyaka 40. (Yoswa 2:9-11) Ndi pyakuwangisa kakamwe tingakumbuka njira idafuna Yahova atumiki ace na njira idaphatisira iye mphambvu yace nduli toera kuapulumusa, thangwi mwakukhonda dembuka Goge wa Magoge anadzatipomokera. (Ezekyele 38:8-12) Mu ndzidzi unoyu, tinadzatsandzaya kakamwe tingaona kuti tadzindikirwa na Mulungu tayu na dziko.

10. Ndi cinthu cipi cinango cinafunika ife kunyerezera?

¹⁰ Cinthu caciwiri cinafunika ife kunyerezera ndi cakuti Yahova anakwanisa kutidzindikira munjira yakukhonda dikhira. Anthu angacita pinthu pyadidi basi ene toera kusimbwa na anango, Yahova nee anadzaapasa nkhombo. Thangwi yanji? Thangwi ninga mudalonga Yezu, anthu anewa angasimbwa, ineyi ndi nkhombo yawo. (Lerini Mateo 6:1-5.) Munjira inango, Yahova asaona pinthu pyadidi pinacita ale akuti nee asasimbwa thangwi ya pinacitira iwo anango. Iye asaona pinacita iwo mbaapasa nkhombo. Pontho midzidzi inango, Yahova asapasa nkhombo atumiki ace  munjira yakukhonda dikhira. Tendeni tidinge pitsandzo pingasi.

11. Kodi Yahova adzindikira tani Mariya?

¹¹ Yahova asankhula ntsikana wakucepeseka anacemerwa Mariya toera kukhala mai wa Yezu. Mariya akakhala mu nzinda ung’ono ukhacemerwa Nazareti, wakuti ukhali kutali kakamwe na templo yakubalika ya mu Yerusalemu. (Lerini Luka 1:26-33.) Thangwi yanji Yahova asankhula Mariya? Anju Gabhriyeli apanga Mariya kuti ‘Mulungu akomerwa na iye.’ Tinakwanisa kuona kuti iye akhali na uxamwali wakuwanga na Yahova kubulukira mu pinthu pidapanga iye Elizabheti. (Luka 1:46-55) Yahova akhaona Mariya, mbampasa nkhombo mwakukhonda dikhira thangwi akhali wakukhulupirika kwa iye.

12, 13. Kodi Yezu alemedzwa tani pidabalwa iye na pidakwatwa iye kuenda ku templo pakupita ntsiku 40?

¹² Pidabalwa Yezu, mbani adapangwa na Yahova pya kubalwa kwa Yezu? Nee ndi anthu akupambulika kakamwe peno atongi a mu Yerusalemu na Bhetlehemu. M’mbuto mwace, iye atuma aanju kuna akumbizi akucepeseka akhadyesa mabira kutali na Bhetelehemu. (Luka 2:8-14) Buluka penepo, akumbizi a mabira aenda kaona mwana adabalwa. (Luka 2:15-17) Mariya na Zuze panango adzumatirwa kakamwe pidaona iwo Yezu mbakalemedzwa munjira ineyi. Yahova asacita pinthu munjira yakusiyana kakamwe na Dyabo. Pidatumiza Sathani anyakudziwisa pya nyenyezi toera kaona Yezu na anyakubalace, anthu onsene adziwa pya kubalwa kwa Yezu, natenepa pyenepi pyabweresa nyatwa zizinji. (Mateo 2:3) Pontho ana azinji aphiwa.—Mateo 2:16.

¹³ Ntemo wa Yahova kuna Aizraeli ukhalonga kuti zingapita ntsiku 40 munthu angamala kubala mwana wamamuna, mai wace akhafunika kupereka ntsembe kuna Yahova. Natenepa Mariya, Zuze pabodzi na Yezu abuluka ku Bhetelehemu mbacita ulendo wa makilometru mapfemba kuenda ku templo ya ku Yerusalemu. (Luka 2:22-24) Pikhafamba iwo, panango Mariya akhabvundzika  khala nyantsembe mbadacita cinthu cakupambulika toera kulemedza Yezu. Yezu alemedzwa, mbwenye alemedzwa munjira yakuti Mariya nee akhaidikhira. Yahova asankhula Simeoni, mamuna ‘wakulungama na wakugopa Mulungu,’ pontho mprofeta wankazi Yana, wakuti akhali nzice wa pyaka 84 pyakubalwa toera kudziwisa kuti Yezu mbadakhala Mesiya wakupikirwa, peno Kristu.—Luka 2:25-38.

14. Yahova apasa Mariya nkhombo ipi?

¹⁴ Kodi Yahova apitiriza kudzindikira Mariya thangwi yakukuza na kutsalakana Yezu mwakukhulupirika? Inde. Mulungu acitisa kuti mafala anango adalonga Mariya alembwe m’Bhibhlya. Pisaoneka kuti Mariya nee akwanisa kuenda pabodzi na Yezu m’maulendo akhacita iye nkati mwa pyaka pitatu na hafu mbakamwaza mphangwa. Panango akhafunika kukhala ku Nazareti thangwi iye akhali nzice. Natenepa iye aluza miyai mizinji yakutsandzayisa idakhala na anango. Mbwenye pidafa Yezu iye akhali cifupi. (Jwau 19:26) Mukupita kwa ndzidzi, Mariya akhali mu Yerusalemu pabodzi na anyakupfundza a Yezu akuti akhadzati kutambira nzimu wakucena mu Pentekoste. (Machitiro 1:13, 14) Pisaoneka kuti iye adzodzwambo pabodzi na anyakupfundza anango. Khala ndi tenepo, pisapangiza kuti iye atambira mwai wa kuenda kakhala pabodzi na Yezu kudzulu kwenda na kwenda. Mwakukhonda penula, ineyi ndi nkhombo ikulu kakamwe thangwi ya basa yace yakukhulupirika!

15. Yahova adzindikira tani Yezu pikhali iye pa dziko yapantsi?

¹⁵ Yezu nee akhafuna kulemedzwa na atsogoleri auphemberi na andale. Mbwenye m’maulendo matatu, Yahova alonga kubulukira kudzulu mbapanga Mwanace kuti asanfuna. Mwakukhonda penula, pyenepi pyawangisa kakamwe Yezu! Pidamala kwene Yezu kubatizwa mu Nkulo wa Yordani, Yahova alonga: ‘Uyu ndi Mwananga wakufunika, anakomerwa na ine.’ (Mateo 3:17) Pisaoneka kuti ndi Juwau M’batizi basi  ene adabva mafala anewa. Buluka penepo, cifupi na caka cibodzi Yezu mbadzati kufa, apostolo atatu abva pidalonga Yahova thangwi ya Yezu: ‘Uyu ndi Mwananga wakufunika, anakomerwa na ine, mbvereni.’ (Mateo 17:5) Pakumalisa, ntsiku zingasi Yezu mbadzati kufa, Yahova alonga pontho na Mwanace kubulukira kudzulu.—Jwau 12:28.

16, 17. Yahova alemedza tani Yezu munjira yakukhonda dikhira?

¹⁶ Yezu akhadziwa kuti anthu mbadancemera nyakuxola, pontho kuti iye mbadafa mwakutsukwalisa. Ngakhale tenepo, iye aphembera toera cifuno ca Mulungu cicitike, tayu cace. (Mateo 26:39, 42) ‘Iye apirira pamuti wakusikimizira mbapwaza manyadzo,’ thangwi akhafuna kudzindikirwa na Babace, tayu na dziko. (Ahebere 12:2) Kodi Yahova adzindikira tani Yezu?

¹⁷ Pikhali Yezu pa dziko yapantsi, iye aphembera toera akhale na mbiri ikhali na iye pakutoma, mu ndzidzi ukhali iye kudzulu na Babace. (Jwau 17:5) Bhibhlya nee isalonga kuti Yezu akhafuna pinthu pizinji kupiringana pyenepi. Iye nee akhadikhira kupaswa nkhombo yakupambulika thangwi yakucita cifuno ca Yahova pa dziko yapantsi. Mphapo Yahova acitanji? Iye alemedza Yezu munjira yakukhonda dikhira. Pidalamuswa Yezu muli akufa, Yahova amuikha ‘pa mbuto yakupambulika kakamwe’ kudzulu. Iye apasambo Yezu umaso wauzimu wakukhonda kufa, umaso wakuti nee m’bodzi akhali nawo kale! * (Onani cidzindikiro capantsi.) (Afilipi 2:9; 1 Timoti 6:16) Mwakukhonda penula, Yahova apasa nkhombo Yezu mwakudzumatirisa kakamwe thangwi ya basa yace yakukhulupirika!

18. Ninji cinafuna kutiphedza toera kudzindikirwa na Yahova tayu na dziko ino?

¹⁸ Ninji cinafuna kutiphedza toera kudzindikirwa na Yahova tayu na dziko ino? Tisafunika kukumbuka kuti Yahova ndzidzi onsene asadzindikira na kupasa nkhombo atumiki ace akukhulupirika, pontho kazinji kene asaapasa nkhombo munjira yakukhonda dikhira. Tinakwanisambo kudikhira mwacinyindiro nkhombo zinafuna kutipasa Yahova kutsogolo. Mbwenye cincino, mu ndzidzi unapirira ife nyatwa n’dziko ino yakuipa, tisafunika kukumbuka kuti dziko ino ikupita. Natenepa pinthu pyonsene pinapereka iyo pinapitambo. (1 Jwau 2:17) Munjira inango, Babathu waufuni Yahova, cipo anadzaduwala mabasa athu na ufuni unapangiza ife thangwi ya dzinace, thangwi iye ‘nee ndi wakukhonda kulungama.’ (Ahebere 6:10) Mwakukhonda penula, iye anadzatipasa nkhombo, panango munjira yakuti nee tikhaidikhira!