Munacita Tani Toera Pfundziro Yanu ya Bhibhlya Ikhale Yakuphindulisa na Yakutsandzayisa Kakamwe

LIZANI

YOSWA akhafunika kutsogolera mbumba ya Izraeli toera kupita n’Dziko Yakupikirwa. Pyenepi pikhali pyakunentsa kakamwe. Mbwenye Yahova ampasa mphambvu mukulonga: ‘Khala wakuwanga na wacipapo.’ Iye apanga Yoswa kuti angaleri na kubvera Mwambo, mbadakwanisa kupembera na kucita pisankhulo mwandzeru.—Yoswa 1:7, 8.

Ife tikukhala ‘m’midzidzi yakugopswa na yakunentsa kupirira,’ natenepa umaso wathu unakwanisambo kukhala wakunentsa. (2 Timoti 3:1) Khala tisafuna kupembera ninga Yoswa, tisafunika kutowezera uphungu udapaswa iye na Yahova. Tisafunika kuleri Bhibhlya mwakukhonda phonya na kuphatisira pinapfundza ife toera kucita pisankhulo pyadidi.

Mbwenye anango a ife panango nee asadziwa kuti anapfundza tani, peno nee asakomerwa na kupfundza. Mwandimomwene, pfundziro ya Bhibhlya ya munthu paekha ndi yakufunika kakamwe. Mungaleri bokosi “ Yeserani Kucita Ipi,” munadzagumana njira zakuti zinakuphedzani toera kucita pfundziro yakuphindulisa na yakutsandzayisa kakamwe.

Nyamasalmo alonga: ‘Nditsogolereni munjira ya matongero anu, thangwi ndisakomerwa na njira ineyi.’ (Masalmo 119:35) Imwe munakwanisambo kukomerwa na kupfundza Mafala a Mulungu. Pontho munadzagumana pinthu pizinji pyakutsandzayisa mungapitiriza kupfundza Bhibhlya.

Maseze nee munatsogolera mbumba ninga pidacita Yoswa, imwe musathimbanambo na nyatwa zanu. Natenepa, ninga Yoswa, pfundzani na bverani Mafala a Mulungu. Mungacita pyenepi, munadzapembera na kucita pisankhulo mwandzeru.

YESERANI KUCITA IPI

Phemberani mbamudzati kupfundza. Bhibhlya iri na manyerezero a Yahova, pontho yalembwa toera kutiphedza. Natenepa mungaleri Bhibhlya, phembani Yahova toera akuphedzeni kubvesesa pinaleri imwe, kupikumbukira na kupiphatisira toera kucita pisankhulo pyadidi mu umaso wanu.—Esdra 7:10.
Bvundzikani pakuleri Bhibhlya peno mabukhu akubuluswa m’Bhibhlya. Mwacitsandzo: ‘Kodi mphangwa zenezi zisandipfundzisanji thangwi ya Yahova? Zisabverana tani na ntsonga ikulu ya m’Bhibhlya? Ndinaphatisira tani mphangwa zenezi toera kuphedza anango?’
Nyerezerani mwacidikhodikho pinapfundza imwe. Limirani m’mphindi zingasi toera kunyerezera pidamala imwe kuleri. Bvundzikani: ‘Mphangwa zenezi zisandikhuya tani? Thangwi yanji zisandikhuya munjira ineyi? Zisabverana tani na pinthu pidandicitikira nduli, pinandicitikira cincino, peno pinafuna kundicitikira ntsogolo? Ndinaphatisira tani midida ineyi ya Bhibhlya peno uphungu wace mu umaso wanga?’ (Yobe 23:5; Masalmo 49:3) Pakunyerezera mwacidikhodikho, onani khala munakwanisa kufokotoza kuti thangwi yanji Yahova asapanga atumiki ace toera kucalira macitiro anango. Pontho nyerezerani pikhafuna kucitika kuna munthu analongwa mu lemba idaleri imwe mbadacita pinthu mwakusiyana.—Deuteronomyo 32:28, 29.
Phatisirani luso yanu yakunyerezera pakuleri. Mwacitsandzo, munakwanisa kunyerezera pidaguliswa Zuze na abale ace kuna Aismayeli? (Genesi 37:18-28) Musaonanji, musabvanji, pontho ndi khwema ipi inabva imwe? Nyerezerani kuti muli m’makhaliro a anthu analongwa pa lemba inaleri imwe. Kodi iwo akhapibva tani na akhanyerezeranji? Mungaphatisira luso yanu yakunyerezera, pfundziro yanu inakhala yakutsandzayisa kakamwe.
Phatisirani pinthu pinapereka gulu toera kufufudza munjira yakuphindulisa. Pfundzani kuti munaphatisira tani pinthu pinagumanika mu cilongero canu, mu interneti na mabukhu akudhindwa. Lekani kunyinyirika kuphemba anango toera akuphedzeni kuphatisira pinthu pyenepi mwadidi. Mwacitsandzo, Índice das Publicações da Torre de Vigia peno Guia de Pesquisa para Testemunhas de Jeová anakuphedzani toera kugumana mphangwa zinafuna imwe na kufokotoza mavesi mazinji a Bhibhlya. Phatisirani n’thimiziro wa Bhibhlya ya Tradução do Novo Mundo da Bíblia Sagrada khala isagumanika mu cilongero cinakwanisa imwe kuleri. Mwenemu musagumanika mphangwa zinalonga pya bhalansa na midida, mbuto, ndandanda wa ndzidzi na pinango.
Koyani ntsonga zakufunika. Pyenepi pinakuphedzani toera kukumbuka pinthu pidapfundza imwe. Cakufunika kakamwe, pangani anango pinthu pidapfundza imwe. Kodi pali na ntsonga yakuti munakwanisa kuiphatisira mu utumiki wanu? Mungacita pyenepi, munadzakumbuka ntsonga zizinji, pontho anango anadzaphindulambo na pfundziro yanu.

NCENJEZI (WA PFUNDZIRO)