Ine ndabalwa ku St. Paul, Minnesota, Estados Unidos da América mu caka 1954. Anyakubalanga nee akhali akupfuma, pontho nee akhali akutcerenga, ife tikhali mu uphemberi wa Katolika. Ine ndine waciwiri pakati pa abale anga axanu. Ndapfundza xikola ya uphemberi wa Katolika, pontho ndikhaphedzera padhre pakucita maserimonya n’gereja. Mbwenye nee ndikhadziwa pizinji thangwi ya Bhibhlya. Maseze ndikhakhulupira kuti alipo Mulungu adacita pinthu pyonsene, ine nee ndikhanyindirabve kuti uphemberi wa Katolika mbudandiphedza toera kumulambira.

Caka cakutoma pikhapfundza ine Mitemo Kuxikola ya William Mitchell, Mboni za Yahova zafika panyumba pathu. Pa ndzidzi unoyu, ine ndikhafula nguwo zanga, mwakukoma ntima banja ineyi yatawira toera kubwera pa ndzidzi unango. Pidabwera iwo, ine ndikhali na mibvundzo miwiri toera kuacita: “Thangwi yanji anthu akuipa asakhala na umaso wadidi kakamwe kupiringana anthu adidi?” pontho, “Anthu anakwanisa tani kukhala akutsandzaya?” Ine ndatawira bukhu A Verdade Que Conduz à Vida Eterna na Bhibhlya ya Tradução do Novo Mundo das Escrituras Sagradas, yakuti ikhali na kapa ya kore yakuyetimira ya masamba a ndimu. Ine ndatawirambo kupfundza Bhibhlya. Pfundziro  ya Bhibhlya yafungula maso anga. Ndatsandzaya kakamwe pidapfundza ine kuti Umambo wa Mulungu ndi utongi wakuti unadzatonga dziko yapantsi. Ndakwanisa kuona kuti mautongi a anthu nkhabe cinakwanisa iwo kucita, pontho mautongi anewa asacitisa kuti dziko yapantsi idzale na uipi, nyatwa, kusowa ulungami na pinthu pyakutsukwalisa.

Ine ndaperekeka kuna Yahova miyezi yakutoma ya caka 1982, mbandibatizwa mu caka cibodzi cene pa Nsonkhano wa Gawo wa nsolo wakuti, “A Verdade do Reino” udacitwa ku St. Paul Civic Center. Pidapita sumana ibodzi ndabwerera ku Civic Center toera ndicite ezame yakukhala advogado. Pakutoma kwa mwezi wa Outubro, ine ndadzindikira kuti ndapasari ezame ineyi, natenepa, ine mbidatoma kuphata basa ninga advogado.

Pa nsonkhano unoyu wa Gawo wa nsolo wakuti, “A Verdade do Reino” ndaonana na Mike Richardson, wakuti akhatumikira ku Bheteli ya ku Brooklyn, iye andipanga kuti ku ofesi ikulu kwakhazikiswa dhepartamentu yakutsalakana miseru. Penepo ine ndakumbuka mafala a mamuna wa ku Etiopya adalembwa pa Mabasa 8:36, mbandibvundzika: ‘Ninji cinandipingiza toera ndikhonde kuphemba kuti ndiende katumikira ku Dhepartamentu Yakutsalakana Miseru?’ Natenepa, ine ndalemba petisau toera kuenda katumikira ku Bheteli.

Anyakubala anga nee akomerwa pidakhala ine m’bodzi wa Mboni za Yahova. Pai wanga andibvundza kuti kuphata basa ku Bheteli kunandiphedzanji ninga advogado. Ine ndafokotoza kuti ndinaphata basa ninga munthu wakuperekeka. Ndaapanga kuti ndinapaswa madholari 75 pa mwezi, ineyi ndi kobiri ikhapaswa abale anatumikira ku Bheteli.

Pidamala ine kuphata mabasa anango ninga advogado, ndatoma kutumikira ku Bheteli ya ku Brooklyn, Nova York mu caka 1984. Ndaikhwa mu Dhepartamentu Yakutsalakana Miseru. Basa idaphata ine ninga advogado yandikhunganya toera kutsalakana pinthu pikhafuna kucitika ntsogolo.

Nyumba yakucitira masendzekero ya Stanley ku Nzinda wa Jersey, yagulwa mwezi wa Novembro wa caka 1983. Abale aphemba lisensa toera asasanyire magetsi na matubu anapita na madzi. Pidaonana iwo na atongi a nzinda, abale aapanga kuti asafuna kuphatisira nyumba yakucitira masendzekero ya stanley toera kucitira misonkhano mikulu ya Mboni za Yahova. Mbwenye pakhali na nkandzo. Mu nzinda wa Jersey mukhadakhazikiswa ntemo wakuti nyumba za uphemberi zisafunika kukhala mupisa pidamangwa nyumba zinakhala anthu. Nakuti Nyumba Yakucitira Masendzekero ya Stanley ikhali pakati pa mbuto inacitirwa malonda, atongi a nzinda akhonda kuapasa lisensa. Abale aphemba toera nseru unoyu ubviwembo na atongi anango, mbwenye iwo akhonderwa.

Pa sumana yanga yakutoma kutumikira pa Bheteli, abale aendesa nseru unoyu ku Thando Yakutongera Miseru. Nakuti ndikhadaphata kale basa mu pyaka  piwiri pa thando yakutongera miseru ku St. Paul, Minnesota, ine ndikhadziwa kakamwe kutsalakana miseru ninga ineyi. M’bodzi wa advogado wathu alonga kuti nyumba yakucitira masendzekero ya Stanley ikhaphatisirwa toera kucita mitundu mizinji ya masendzekero, ninga masinema na matsendzo akuimba nyimbo. Mphapo, thangwi yanji nee ndi pyakutawirika kuiphatisira toera kucita misonkhano ya uphemberi? Thando yakutongera miseru yadinga nseru unoyu, mbiona kuti atongi a Nzinda wa Jersey aswa ntemo unalonga pya ufulu wathu wauphemberi. Atongi a pa thando yakutongera miseru, apanga atongi a nzinda toera atipase lisensa, penepo ine ndaona kuti Yahova asapasa nkhombo gulu yace mukuphatisira anthu anatsalakana miseru toera basa yace iende patsogolo. Ndatsandzaya kakamwe thangwi yakuphedzera munjira ineyi.

Abale atoma basa ineyi ikulu kakamwe yakusasanyira nyumba, pontho turma ya 79 yacitira nsonkhano wa ntsiku yakumalisa mapfundziro a Jiliyadhi mu Nyumba Inacitirwa Misonkhano ku Nzinda wa Jersey pa ntsiku 8 ya mwezi wa Setembro mu caka 1985, mbacidzati kupita caka cibodzi basa yakusasanyira nyumba mbidatoma kale. Ine ndikhali wakutsandzaya kakamwe thangwi yakuphedzera basa ineyi ya Yahova. Basa ineyi ikhanditsandzayisa kakamwe kupiringana basa ikhaphata ine ninga advogado mbandidzati bwera kudzatumikira pa Bheteli. Ine nee ndikhadziwa kuti Yahova akhali na mabasa mazinji ninga anewa toera kundipasa.

Mu pyaka 1980, kazinji kene madotoro mu nyumba za ungumi nee akhatawira phembo ikhacita Mboni za Yahova toera akhonde kuikhwa ciropa, maseze iwo akhali athunga. Akazi akuti akhali na mimba akhali na nkandzo ukulu kakamwe, thangwi anyakutonga miseru akhanyerezera kuti akazi nee akhali na ufulu wakukhonda kuikhwa ciropa. Anyakutonga miseru akhalonga kuti mama angakhonda kuikhwa ciropa, asafunika kuphiwa, mwana mbakula wakusowa mace.

Pa ntsiku 29 ya Dezembro ya caka 1988, mulongo Denise Nicoleau athabuka na utenda wakubuluka ciropa pakumala kubala mwanace wamamuna. Hemoglobhina yace yatcita mpaka pa 5, natenepa dotoro wace am’phemba toera atawire kuikhwa ciropa. Mbwenye mulongo Denise akhonda. Mangwana mwace namacibese, madotoro aphemba anyakutonga miseru toera atawirise anyabasa a panyumba ya ungumi kuti amuikhe ciropa. Nyakutonga miseru atawirisa anyabasa a panyumba ya ungumi toera amuikhe ciropa, mbadzati kubva maonero a mulongo Denise na a mamunace peno kuadziwisa pyenepi.

Ncixanu, ntsiku 30 ya mwezi wa Dezembro, anyabasa a panyumba ya ungumi aikha ciropa mulongo Denise maseze mamunace na abale awo anango akuti akhali pabodzi na iye aakhondesa. Pa ntsiku ineyi, abale awo azinji pabodzi na nkulu wa mpingo m’bodzi peno awiri amangwa thangwi apambizirwa kuti apingiza mulongo Denise toera akhonde kuikhwa ciropa. N’Sabudu namacibese, pa ntsiku 31 ya Dezembro matsamba a mphangwa, radyo na matelevizau a mu Nzinda wa Nova York adziwisa kumangwa kwawo.

N’Ciposi namacibese, ine ndalonga na nkulu wa anyakutonga miseru anacemerwa Milton Mollen. Ndafokotoza  pinthu pidacitika, mbandigomezera kuti nyakutonga miseru unango atawirisa munthu kuikhwa ciropa mbakhonda kubva maonero ace. Ntongi Mollen andiphemba toera ndiende mu ofesi yace pa ntsiku ineyi namasiku toera ticedze thangwi ya nseru unoyu na mitemo inalonga pya nseru unoyu. Muyang’aniri wa dhepartamentu yathu anacemerwa Philip Brumley andiperekera pa ntsiku ineyi namasiku toera kuonana na Ntongi Mollen mu ofesi yace. Ntongi acemeresambo advogado wa nyumba ya ungumi toera ticedze pabodzi. Makani athu akhali ninga kuketesana. Mu ndzidzi ukhacedza ife, m’bale Philip andipasa citsamba cing’ono, pa citsamba ceneci iye akhadalemba kuti: “Khurudzikani.” Uphungu unoyu ukhali wadidi, thangwi ine ndikhasiya kukhala wakukhurudzika, mbandiyesera kupokanya maonero a advogado wa nyumba ya ungumi.

Pidapita ndzidzi ubodzi, Ntongi Mollen alonga kuti nseru unoyu ndiwo unafuna kutoma kutsalakanwa mangwana mwace namacibese. Pikhabuluka ife mu ofesi yace, Ntongi Mollen alonga: “Advogado wa nyumba ya ungumi anakhala na basa yakunentsa kakamwe mangwana.” Pyenepi pikhabveka kuti advogado mbadakhala na basa ikulu toera kufokotoza kuti thangwi yanji madotoro aikha munthu ciropa mwakukakamiza. Pa ndzidzi unoyu, ine ndaona kuti Yahova akhandipasa cinyindiro cakuti ife mbatidawina nseru unoyu. Pikhali pyakudzumisa kuona kuti Yahova akhatiphatisira toera kucita cifuno cace.

Taphata basa mpaka tciti-tciti toera kukhunganyika pikhafuna ife kulonga mangwana mwace namacibese. Nakuti thando yakutongera miseru ikhali dhuzi kakamwe na Bheteli ya ku Brooklyn, abale azinji a Dhepartamentu yathu ing’ono yakutsalakana Miseru aenda na miyendo mpaka kweneko. Anyakutonga miseru anai atibvesera, mbaphedzera mulongo Denise. Iwo alonga kuti nyakutonga miseru adatoma kutsalakana nseru unoyu nee akhafunika kukakamiza munthu toera kuikhwa ciropa; pontho kucita cisankhulo nee kubva maonero a munthu peno kudziwisa ale anantsalakana pisaphonyana na ufulu wa munthu unatsidzikizwa na mwambo wa dziko.

Mukupita kwa ndzidzi, thando ikulu yakutongera miseru ya ku Nova York yaphedzerambo mulongo Denise, mbilonga kuti iye ali na ufulu wakukondzwa mwakukhonda kuikhwa ciropa. Pakumala kwa nseru unoyu, ndakhala na nkhombo yakutsalakana miseru inango mitatu ninga ineyi idawina ife m’Mathando Makulu Akutongera Miseru. (Onani bokosi, “ Kuwina M’mathando Makulu Akutongera Miseru.”) Ine pabodzi na abale anango akhatumikira ninga advogado pa Bheteli tatsalakana miseru inango ninga miseru yakuti mbani anafuna kukhala na ana, kukhondana, mitemo yakuphatisira mbuto na nyumba.

Ntsiku yakutoma idaonana ine na Dawn wakuti adzakhala nkazanga, iye akhadakhondana na mamunace. Iye akhali na ana atatu, akhaphata basa, pontho akhatumikira ninga mpainiya. Dawn athimbana na nyatwa zizinji mu umaso wace, ine ndadzumatirwa kakamwe na cisankhulo cidacita iye cakutumikira Yahova na ntima onsene. Mu caka 1992, ife tagumanikana pa nsonkhano wa gawo wa nsolo wakuti, “Portadores da Luz,” udacitwa ku Nzinda wa Nova York, penepo ine ndamphemba toera kucedza pabodzi kuti tidziwane mwadidi. Ife tamanga banja pidapita caka cibodzi. Dawn ndi muoni udandipasa Yahova, iye ndi nkazi wa manyerezero auzimu, pontho ndi munthu wakuseka. Mwandimomwene, Dawn asandicitira pinthu pyadidi ntsiku zonsene.—Mis. 31:12.

Pidamanga ife banja, ana a Dawn akhali na pyaka 11, 13 na 16 pyakubalwa. Ine ndikhafuna kukhala baba wadidi kuna iwo, natenepa, ndapfundza mwadidi mphangwa zinagumanika m’mabukhu athu zinalonga thangwi yakukhala baba wa ana a kunjira. Ife tathimbana na pinentso pingasi mu pyaka pizinji, mbwenye ndiri wakutsandzaya thangwi ana anewa adzandiona ninga xamwali wawo wakunyindirika na baba waufuni. Ife tikhatawirisa kuti axamwali a anathu akhale akusudzuka toera kubwera panyumba pathu. Pikhali pyadidi kakamwe kuona panyumba pathu aphale na atsikana azinji akutsandzaya.

Mu caka 2013, ine na Dawn tafuluka mbatienda kakhala ku Wisconsin toera titsalakane anyakubala athu akukalamba. Ndadzumatirwa pidadziwa ine kuti basa yanga yakuphedzera ku Bheteli nee mbidamala. Ine ndaphembwa toera ndipitirize kuphedzera gulu yathu pakutsalakana miseru yakusiyana-siyana.

Mwezi wa Setembro wa caka 2018, ndadzindikira kuti ndikakhotsomola kazinji kene mbandidzati kulonga. Dotoro wanga adinga manungo anga, mbwenye nee akwanisa kudzindikira utenda ukhali na ine. Mukupita kwa ndzidzi, dotoro unango andipanga toera ndiende kaonane na dotoro anakondza utenda wa mu ongo. Mwezi wa Janeiro wa 2019, dotoro anakondza utenda wa mu ongo andipanga kuti ndiri na utenda wakuti nee ndi anthu azinji ali nawo unacemerwa paralisia supranuclear progressiva (PSP).

Pidapita ntsiku zitatu, ine ndaenda kathamanga mu gelo, mbandikhumuka nkono wanga wamadyo. Mu umaso wanga onsene ine ndikhathamanga mu gelo, ndi cinthu cakuti ndikhacicita kazinji kene. Ine ndadzindikira kuti nee ndikhakwanisabve kutsidzikiza manungo anga. Kutomera penepo, utenda wanga watoma kutekera mwakucimbiza. Ndatoma kunentseka pakulonga, pakufamba, ngakhale ndingafuna kumeza cinthu.

Ndiri wakutsandzaya kakamwe thangwi yakuphatisira luso yanga ninga advogado toera kuphedzera mabasa a Umambo. Pontho ndiri wakutsandzaya kakamwe thangwi yakulemba mphangwa zizinji toera ziphatisirwe m’mabukhu a anyakudziwisa, pontho thangwi yakufokotoza mphangwa zinango kuna anthu anaphata basa ninga advogado a nyumba za ungumi pa dziko yonsene. M’midzidzi ineyi, ine ndakwanisa kutsidzikiza ufulu wa atumiki a Yahova wakusankhula ukondzi peno kucitwa operasau mwakukhonda kuikhwa ciropa. Ngakhale tenepo, mwakubverana na mafala anagumanika pa Luka 17:10, ndinakwanisa kulonga kuti: ‘Ndine nyabasa wakukhonda thema. Pinthu pidacita ine ndipyo pikhafunika ine kucita.’