1. Mwakubverana na 3 Juwau 3, 4, ndi pinthu pipi pinaticitisa kukhala akutsandzaya?

MPOSTOLO Juwau aphedza anthu azinji toera kupfundza undimomwene. Kwa iye akristu anewa akhali ninga anace. Maseze iwo athimbana na pinentso pizinji, iwo cipo asiya kutumikira Yahova. Mwakukhonda penula, pyenepi pyatsandzayisa kakamwe mpostolo Juwau. Munjira ibodzi ene, ife tisatsandzaya kakamwe tingaona anathu peno ale anaphedza ife toera kupfundza undimomwene mbaperekeka kuna Yahova na kupitiriza kuntumikira.—Lerini 3 Juwau 3, 4.

2. Kodi matsamba adalemba Juwau akhali na cifuniro cipi?

² Pisaoneka kuti mu caka 98 Pakumala Kubalwa Kwa Kristu, Juwau akakhala ku Efeso peno cifupi na kweneko. Panango iye afuluka mbaenda kakhala kweneko pidabuluswa iye nkaidi pa ntsuwa ya Patmo. Mu ndzidzi unoyu, nzimu wakucena wa Yahova wantsogolera toera kulemba matsamba matatu. Cifuniro ca matsamba anewa cikhali kukulumiza Akristu akukhulupirika toera apitirize kukhulupira Yezu, pontho toera apitirize kufamba mu undimomwene.

3. Ndi mibvundzo ipi inafuna ife kutawira mu nsolo uno?

³ Mwa apostolo onsene, Juwau ndiye akhadasala m’maso, pontho iye akhadzudzumika kakamwe na pipfundziso pyauthambi pyakuti pikhakhuya mipingo. * (1 Juwau 2:18, 19, 26) Anthu anewa akhapfundzisa pyauthambi akhalonga kuti asadziwa Mulungu, mbwenye iwo nee akhabvera matongero a Yahova. Natenepa tendeni tione uphungu udapereka Yahova mukuphatisira mpostolo  Juwau. Mu ndzidzi unaona ife uphungu unoyu, tinatawira mibvundzo mitatu: Kodi pisabvekanji kufamba mu undimomwene? Ndi pinentso pipi pyakuti pinaticimwanisa kufamba mu undimomwene? Pontho tinaphedzana tani unango na ndzace toera kupitiriza mu undimomwene?

4. Mwakubverana na 1 Juwau 2:3-6 na 2 Juwau 4, 6, tisafunika kucitanji toera kufamba mu undimomwene?

⁴ Toera kufamba mu undimomwene, ife tisafunika kudziwa undimomwene unagumanika m’mafala a Mulungu, Bhibhlya. Kusiyapo pyenepi, ife tisafunika kubvera matongero a Yahova. (Lerini 1 Juwau 2:3-6; 2 Juwau 4, 6.) Yezu akhazikisa citsandzo cadidi cakubvera Yahova. Natenepa njira ibodzi yakubvera Yahova ndi kuwangisira kutowezera citsandzo ca Yezu.—Juwau 8:29; 1 Ped. 2:21.

5. Kodi tisafunika kukhala na cinyindiro cipi?

⁵ Toera kupitiriza kufamba mu undimomwene, ife tisafunika kukhala na cinyindiro cakuti Yahova ndi Mulungu wa undimomwene, pontho pyonsene pinatipanga iye kubulukira m’Bhibhlya ndi undimomwene. Tisafunikambo kukhala na cinyindiro cakuti Yezu ndi Mesiya adapikirwa. Anthu azinji lero asapenula kuti Yezu asankhulwa na Yahova toera kukhala Mambo wa Umambo wa Mulungu. Juwau acenjeza kuti pakhali na “anyakunyengeza azinji,” akhayesera kunyengeza ale akuti nee akakhulupira mwakukwana undimomwene unalonga pya Yahova na Yezu. (2 Juwau 7-11) Juwau alemba: “Kodi nyauthambi mbani? Ndi ule anakhonda kuti Yezu ndi Kristu.” (1 Juwau 2:22) Njira ibodzi toera tikhonde kunyengezwa na Sathani ndi kupfundza Mafala a Mulungu. Tingacita pyenepi tinakwanisa kudziwa Yahova na Yezu. (Juwau 17:3) Pontho pinatiphedza toera kukhala na cinyindiro cakuti ife tiri na undimomwene.

6. Ndi pinentso pipi pinathimbana na aphale na atsikana?

⁶ Akristu onsene asafunika kucita mphole-mphole toera akhonde kunyengezwa na pipfundziso pya anthu. (1 Juwau 2:26) Makamaka aphale na atsikana asafunika kucita mphole-mphole toera akhonde kunyengezwa na pipfundziso pyenepi. Alexia, * mulongo wa ku França wakuti ali na pyaka 25 alonga: “Pikhapfundza ine Xikola, ine ndapfundza pya kusanduka kwa pinthu na pinthu pinango, pontho pipfundziso pyenepi pikhandicitisa kupenula undimomwene. Midzidzi inango, ine ndikhakomerwa na pipfundziso pyenepi. Mbwenye  ine ndadzindikira kuti pikhali pyakuipa kupwaza pinalonga Bhibhlya mbandikhulupira pinthu pyonsene pinalonga apfundzisi anga.” Alexia apfundza bukhu yakuti A Vida​—Qual a Sua Origem? A Evolução ou a Criação? Pidapita masumana mangasi, Alexia nee akhapenulabve undimomwene. Iye alonga: “Ine ndadzindikira kuti pinalonga Bhibhlya ndi pyandimomwene. Pontho ndadzindikira kuti kukhala maso mwakubverana na pinapfundzisa Bhibhlya pinandiphedza kukhala wakutsandzaya na wantendere.”

7. Tisafunika kucalira kucitanji, pontho thangwi yanji?

⁷ Akristu onsene, aphale peno akulu, asafunika kucalira kutumikira Yahova mu ndzidzi ubodzi ene mbacita pinthu pyakuipa. Juwau alonga kuti nee tinakwanisa kufamba mu undimomwene, mu ndzidzi ubodzi ene mbaticita pinthu pyakuipa. (1 Juwau 1:6) Khala tisafuna kuti Yahova akomerwe na ife, ndzidzi onsene tisafunika kukumbuka kuti iye asaona pinthu pyonsene pinacita ife. Mwandimomwene, nkhabepo madawo anacitwa n’cibisobiso akuti Yahova nee anakwanisa kuaona.—Aheb. 4:13.

8. Ndi maonero api a dziko akuti tisafunika kuacalira?

⁸ Tisafunika kucalira maonero a dziko thangwi ya madawo. Mpostolo Juwau alemba: “Tingalonga kuti: ‘Ife nkhabe madawo,’ tikunyengezeka tekhene.” (1 Juwau 1:8) Mu ntsiku za mpostolo Juwau, anthu akhapfundzisa uthambi akhalonga kuti munthu anakwanisa kucita madawo mwa cakhomo mbapitiriza kukhala xamwali wa Mulungu. Lero anthu azinji ali na maonero mabodzi ene. Azinji asalonga kuti asakhulupira Mulungu, mbwenye iwo nee asatawira pinalonga Yahova thangwi ya madawo. Makamaka iwo nee asatawira pinalonga Yahova thangwi yakupita m’mabonde. Pinalonga Yahova kuti ndi madawo, anthu anewa asalonga kuti munthu anacita pinafuna iye.

9. Thangwi yanji ndi pyakufunika kuna aphale na atsikana kucita pinthu pinalonga Bhibhlya kuti ndi pyadidi?

⁹ Aphale na atsikana Acikristu angakhala pabodzi na andzawo a kuxikola peno akubasa, asakakamizwa toera kuona madawo ninga cinthu cakutawirika. Pyenepi ndi pidacitika kuna m’bale Aleksandar. Iye alonga: “Atsikana anango kuxikola  akhayesera kundikakamiza toera kupita nawo m’mabonde. Nakuti ine ndikakhonda kucita pikhafuna iwo, iwo alonga kuti ine ndisapita m’mabonde mamuna na mamuna.” Pinthu pyenepi pinakwanisambo kucitika kuna imwe. Mbwenye mungacita pinthu pinalonga Bhibhlya kuti ndi pyadidi, imwe munakhala wakutsandzaya, munakhala na ungumi wadidi, munacalira kuthapula matenda, pontho munakhala na uxamwali wakuwanga na Yahova. Mungapitiriza kukhonda kucita pinthu pyakuipa, pinakhala pyakukhonda nentsa toera kucita pinthu pyadidi. Pontho kumbukani kuti maonero akuipa ali na anthu lero thangwi yakupita m’mabonde atomeswa na Sathani. Natenepa, mungacalira maonero anewa, “imwe mwakunda Nyakuipa.”—1 Juwau 2:14.

10. Kodi lemba ya 1 Juwau 1:9 isatiphedza tani toera kutumikira Yahova na cikumbuntima cakucena?

¹⁰ Ife tisadziwa kuti basi ene ndi Yahova adathema kulonga kuti awa ndi madawo peno nkhabe. Pontho ife tisacita pyonsene pinakwanisa ife toera tikhonde kucita madawo. Mbwenye tingadawa, ife tisalonga madawo athu kuna Yahova kubulukira m’phembero. (Lerini 1 Juwau 1:9.) Pontho tingacita madawo makulu, ife tisasaka ciphedzo ca akulu a mpingo akuti akhazikiswa na Yahova toera kutitsalakana. (Tiya. 5:14-16) Mbwenye nee tisafunika kukhala na mabvero akupasika mulando thangwi ya madawo adacita ife nduli. Thangwi yanji? Thangwi Babathu waufuni apereka mwanace ninga ntsembe ya ciomboli toera tikwanise kulekererwa madawo athu. Yahova angalonga kuti analekerera anyakudawa angatcunyuka, iye asacitadi pyenepi. Natenepa, nkhabepo cinthu cinafuna kuticimwanisa kutumikira Yahova na cikumbuntima cakucena.—1 Juwau 2:1, 2, 12; 3:19, 20.

11. Tinatsidzikiza tani manyerezero athu ku pipfundziso pyakuti pinafewesa cikhulupiro cathu?

¹¹ Ife tisafunika kucalira pipfundziso pya uthambi. Kutomera mu ndzidzi wakale, Dyabo ndzidzi onsene asayesera kufewesa cikhulupiro ca atumiki akukhulupirika a Mulungu. Natenepa, tisafunika kudziwa kusiyanisa undimomwene na  uthambi. * Panango anyamalwa athu anaphatisira interneti toera kufewesa cikhulupiro cathu kuna Yahova na ufuni wathu kuna abale na alongo athu. Kumbukani kuti pinthu pinaikha anyamalwa athu mu interneti, pisabuluka kuna Sathani.—1 Juwau 4:1, 6; Apok. 12:9.

12. Thangwi yanji tisafunika kuwangisa cikhulupiro cathu?

¹² Toera Sathani akhonde kufewesa cikhulupiro cathu, ife tisafunika kukhulupira Yezu. Pontho tisafunika kudziwa kuti Yahova asaphatisira tani Yezu toera kukwanirisa cifuno cace. Kusiyapo pyenepi tisafunikambo kunyindira ale anaphatisirwa na Yahova toera kutsogolera gulu yace. (Mat. 24:45-47) Ife tinakwanisambo kukulisa cikhulupiro cathu mukupfundza Mafala a Mulungu mwakukhonda phonya. Tingacita pyenepi cikhulupiro cathu cinakhala ninga muti wakuti mitcitci yace yapita pantsi kakamwe. Paulu alonga mafala akulandana na anewa kuna abale a mpingo wa ku Kolose. Iye alonga: “Ninga mudatawira imwe Kristu Yezu Mbuyathu, pitirizani kufamba mwakuphatana na iye. Ninga mudapfundziswa imwe, musafunika kukhala na mitcitci yakuwanga mwa Kristu, mukhazikike muna iye, mbamukhala akuwanga mu cikhulupiro canu.” (Akol. 2:6, 7) Tingawangisira toera kuwangisa cikhulupiro cathu, Sathani pabodzi na ale anaphatisira iye nee anakwanisa kutipingiza kufamba mu undimomwene.—2 Juwau 8, 9.

13. Ndi pinthu pipi pinadziwa ife, pontho thangwi yanji?

¹³ Ife tisadziwa kuti tinaidiwa na dziko. (1 Juwau 3:13) Juwau alonga kuti “dziko yonsene iri m’manja mwa Nyakuipa.” (1 Juwau 5:19) Nakuti kumala kwa dziko ino kuli cifupi, ukali wa Sathani usathimizirika kakamwe. (Apok. 12:12) Iye nee asaphatisira basi ene ulukwali na uthambi, mbwenye iye asaphatisirambo mautongi toera kutitcinga na kutitsalakana mwakuipa. Sathani asadziwa kuti asala na ndzidzi wakucepa kakamwe toera kuyesera kupingiza basa yathu yakumwaza mphangwa peno kufewesa cikhulupiro cathu. Ndi thangwi yace basa yathu isatcingwa m’madziko mazinji kakamwe. Ngakhale tenepo, abale na alongo athu m’madziko anewa asapitiriza kupirira. Iwo asapangiza pakweca kuti mwakukhonda tsalakana pinacita Sathani kuna ife, tinakwanisa kupitiriza kukhala akukhulupirika.

14. Tinaphedza tani abale na alongo athu toera kupitiriza mu undimomwene?

¹⁴ Toera kuphedza abale na alongo athu kuti apitirize mu undimomwene, ife tisafunika kuabvera ntsisi. (1 Juwau 3:10, 11, 16-18) Ife tisafunika kufunana tayu basi ene mu ndzidzi wadidi mbwenye tisafunikambo kufunana mu ndzidzi wa nyatwa. Mwacitsandzo, kodi imwe musadziwa m’bale peno mulongo wakuti aferwa na nyakufunika wace, pontho asafuna kubalangazwa peno kuphedzwa munjira zinango? Kodi imwe musadziwa abale akuti aluza pinthu pyawo thangwi ya cidengwa ca cibaliro, peno asafuna kumanga papswa Nyumba yawo ya Umambo peno nyumba zawo? Ife tinapangiza kuti tisafuna kakamwe abale na alongo anewa, pontho tisaabvera ntsisi tayu basi ene na mafala athu mbwenye kubulukira mu pinthu pinacita ife.

15. Tisafunika kucitanji mwakubverana na 1 Juwau 4:7, 8?

¹⁵ Ife tingafunana unango na ndzace tisatowezera babathu wa ufuni, Yahova. (Lerini 1 Juwau 4:7, 8.) Njira ibodzi yakufunika kakamwe yakupangiza ufuni ndi kulekererana unango na ndzace. M’bale peno mulongo anakwanisa kutitsukwalisa buluka penepo mbaphemba kulekererwa. Ife tinapangiza kuti tisafuna m’bale wathu tingamulekerera na kuduwala pinthu pyonsene pidacita iye. (Akol. 3:13) M’bale anacemerwa Aldo atsukwala kakamwe pidabva iye  kuti m’bale wakuti iye akhamulemedza alonga pinthu pyakuipa thangwi ya anthu a dzindza yace. Iye alonga: “Ndzidzi onsene ndikhacita phembero kuna Yahova toera andiphedze kuti ndikhonde kuipirwa na m’bale unoyu.” Mbwenye Aldo acita pinthu pinango. Iye aphemba m’bale unoyu toera aende pabodzi kamwaza mphangwa. Mu ndzidzi ukhamwaza iwo mphangwa, Aldo afokotoza kutsukwala kukhali na iye thangwi ya pinthu pikhadalonga m’bale unoyu. Aldo alonga: “Pidabva m’bale unoyu kuti Aldo atsukwala na pinthu pikhadalonga iye, iye aphemba kulekererwa. Kubulukira munjira ikhalonga iye, ine ndadzindikira kuti iye asandikika thangwi ya pinthu pidalonga iye. Buluka penepo ife takhazikisa ntendere mbatiduwala pyonsene pidacitika.”

16-17. Kodi tisafunika kupitiriza kucitanji?

¹⁶ Mpostolo Juwau akhafuna kakamwe abale ace, pontho akhafuna kuti iwo akhale na cikhulupiro cakuwanga. Iye apangiza pakweca ufuni wace mudaapasa iye uphungu kubulukira m’matsamba matatu adalemba iye. Ndi pyakuwangisa kakamwe kudziwa kuti amuna na akazi anafuna tonga pabodzi na Yezu kudzulu ndi aufuni na acitsalakano ninga mpostolo Juwau.—1 Juwau 2:27.

¹⁷ Ndi pyakufunika kakamwe kubvera uphungu udapaswa ife mu nsolo uno. Tendeni tipitirize kufamba mu undimomwene mukubvera Yahova mu pinthu pyonsene pinacita ife. Pfundzani Bhibhlya, pontho nyindirani pinalonga iyo. Pitirizani kukhulupira Yezu. Calirani udziwisi wa anthu a dziko na pipfundziso pyauthambi. Lekani kutumikira Yahova mu ndzidzi ubodzi ene mbamucita pinthu pyakuipa, pontho lekani kubvera ale anakunyengererani toera kucita pinthu pyakuipa. Khalani maso mwakubverana na midida ya Yahova. Pontho tendeni tiphedze abale athu toera apitirize kukhala akuwanga mwauzimu mukulekerera ale anaatsukwalisa na kuphedza ale anafuna ciphedzo. Tingacita pyenepi, ife tinapitiriza kufamba mu undimomwene mwakukhonda tsalakana pinentso pinathimbana na ife.