NSOLO WA PFUNDZIRO 29
Phedzerani Ntsogoleri Wathu Yezu
“Ndapaswa mphambvu zonsene kudzulu na pa dziko yapantsi.”—MAT. 28:18.
NYIMBO 13 Kristu Ndi Citsandzo Cathu
PINAFUNA IFE KUPFUNDZA *
1. Ninji pinafuna Yahova lero?
LERO, Mulungu asafuna kuti mphangwa zadidi za Umambo zimwazwe pa dziko yonsene yapantsi. (Marko 13:10; 1 Tim. 2:3, 4) Basa ineyi ndi ya Yahova, pontho iyo ndi yakufunika kakamwe. Na thangwi ineyi, iye asankhula Mwanace toera kutsogolera basa ineyi. Ife tinakwanisa kukhala na cinyindiro cakuti na citsogolero ca Yezu, mphangwa zinamwazwa pa dziko yonsene mwakubverana na pinafuna Yahova kumala mbakudzati kufika.—Mat. 24:14.
2. Tinapfundzanji mu nsolo uno?
2 Mu nsolo uno, ife tinapfundza kuti Yezu asaphatisira tani “m’bandazi wakukhulupirika na wandzeru” toera kupereka cakudya cauzimu na kutsogolera atumiki ace toera kuphata basa ikulu kakamwe yakumwaza mphangwa. (Mat. 24:45) Tinapfundzambo kuti m’bodzi na m’bodzi wa ife, asafunika kucitanji toera kuphedzera Yezu na m’bandazi wakukhulupirika na wandzeru.
YEZU ASATSOGOLERA BASA YAKUMWAZA MPHANGWA
3. Kodi Yezu apaswa mphambvu toera kucitanji?
3 Yezu ali kutsogolera basa yakumwaza mphangwa. Tisadziwa tani pyenepi? Ndzidzi ungasi mbadzati kuenda kudzulu, Yezu agumanikana na atowereri ace akukhulupirika paphiri ya Galileya. Iye aapanga: “Ndapaswa mphambvu zonsene kudzulu na pa dziko yapantsi.” Buluka penepo, iye alonga: “Ndokoni mukacite anyakupfundza kuna anthu a madzindza onsene.” (Mat. 28:18, 19) Natenepa, Yezu apaswambo mphambvu yakutsogolera basa yakumwaza mphangwa.
4. Thangwi yanji tiri na cinyindiro cakuti Yezu ali kutsogolera basa yakumwaza mphangwa?
4 Yezu alonga kuti basa yakumwaza mphangwa na yakucita anyakupfundza mbidacitwa kuna “anthu a madzindza onsene,” pontho iye mbadakhala na atowereri ace “ntsiku zonsene mpaka kumala kwa makhaliro a dziko.” (Mat. 28:20) Mafala anewa asapangiza pakweca kuti basa yakumwaza mphangwa mbidapitiriza kutsogolerwa na Yezu mpaka ntsiku zino.
5. Tinaphedzera tani kukwanirisika kwa profesiya inagumanika pa Masalmo 110:3?
5 Yezu nee akhadzudzumika kuti mbadakhala na anthu akucepa toera kumwaza mphangwa kunkhomo kwa makhaliro a dziko. Iye akhadziwa kuti mafala a profesiya inagumanika m’bukhu ya Masalmo mbadakwanirisika. Profesiya ineyi isalonga: ‘Mbumba yanu inadzaperekeka yokhene pa ntsiku inafuna imwe kutsogolera anyankhondo anu toera kuenda kunkhondo.’ (Masal. 110:3) Khala musacitambo basa ineyi yakumwaza mphangwa, imwe mukuphedzera Yezu, m’bandazi wakukhulupirika na wandzeru, pontho mukuphedzera kukwanirisika kwa profesiya ineyi. Basa yakumwaza mphangwa iri kuenda kutsogolo, mbwenye tisathimbana na pinentso.
6. Ndi cinentso cipi cinathimbana na amwazi mphangwa ntsiku zino?
6 Cinentso cibodzi cinathimbana na amwazi mphangwa a Umambo ndi kutcingwa. Anthu asasandukira Mboni za Yahova, atsogoleri a mauphemberi na mautongi asalonga uthambi kuna anthu azinji thangwi ya basa yathu. Abale athu, anthu anango anadziwa ife na andzathu a kubasa asanyengezwa na mphangwa zauthambi, mbatikakamiza toera tisiye kutumikira Yahova na kumwaza mphangwa. M’madziko anango, abale na alongo athu asathuswa, kupomokerwa, ngakhale kumangwa. Kusiyapo pyenepi, iwo asaikhwa nkaidi. Ife nee tisadzumatirwa anthu angatitsalakana munjira ineyi. Yezu alonga: “Imwe munadzaidiwa na anthu a mitundu yonsene thangwi ya dzina yanga.” (Mat. 24:9) Pinthu pyonsene pinaona ife, kuphatanizambo kuidiwa pisapangiza kuti ndife akutawirika kuna Yahova. (Mat. 5:11, 12) Dyabo ndiye anacitisa kuti ife titcingwe. Mbwenye Yezu ndi wamphambvu kakamwe kupiringana Sathani! Na ciphedzo ca Yezu, mphangwa zadidi ziri kumwazwa kuna anthu a madzindza onsene. Onani pinthu pinapangiza kuti pyenepi piri kucitikadi.
7. Ninji pinapangiza kuti mafala anagumanika pa Apokalipse 14:6, 7 ali kukwanirisika?
7 Cinentso cinango cinathimbana na ife mu ndzidzi unamwaza ife mphangwa ndi cakuti anthu azinji nee asalonga cilongero cathu. Masomphenya adaonesa iye mpostolo Juwau, Yezu alonga kuti mu ntsiku zino, mphangwa zadidi mbazidamwazwa kuna anthu azinji kakamwe, maseze alonge pilongero pyakusiyana-siyana. (Lerini Apokalipse 14:6, 7.) Pyenepi mbapidacitika tani? Ife tisacita pyonsene pinakwanisa ife toera anthu azinji kakamwe atawire mphangwa za Umambo. Lero, pa dziko yonsene yapantsi anthu anakwanisa kuleri mabukhu akubuluswa m’Bhibhlya mu saiti ya jw.org, thangwi mabukhu anewa asagumanika mu pilongero pyakupiringana 1000! Mathubo Akutonga atawirisa kuti bukhu inaphatisira ife toera kucita anyakupfundza ya nsolo wakuti Tsandzayani na Umaso Kwenda na Kwenda!, ithumburuzwe mu pilongero pyakupiringana 700! Mavidhyu asaphatisirwambo toera kupereka cakudya cauzimu kuna anthu anakhonda kubva, kuphatanizambo mabukhu anaphatisirwa na maboliboli. Ife tiri kuona kukwanirisika kwa maprofesiya a Bhibhlya. Anthu “a pilongero pya madzindza onsene” ali kupfundza “cilongero cakucena” ca undimomwene wa Bhibhlya. (Zak. 8:23; Sof. 3:9) Pyenepi pyonsene piri kukwanisika thangwi ya citsogolero cadidi ca Yezu Kristu.
8. Ninji pinacitika thangwi ya basa yathu yakumwaza mphangwa?
8 Lero, anthu akupiringana 8.000.000 m’madziko 240 ali mu gulu ya Yahova, pontho pyaka pyonsene anthu azinji kakamwe asabatizwa! Cinthu cakufunika kakamwe kupiringana kunjipa kwa anthu ndi makhaliro Acikristu peno “uunthu upswa,” unapangiza anyakupfundza anewa apswa. (Akol. 3:8-10) Anthu azinji asiya makhaliro aulukwali, uphanga, kusankhulana na kufuna kakamwe dziko yawo. Profesiya inagumanika pa Izaiya 2:4 iri kukwanirisika. Iyo isalonga: ‘Iwo nkhabe kudzapfundzabve nkhondo.’ Mu ndzidzi unawangisira ife kubvala uunthu upswa, ife tisaphedza anthu toera kupita mu gulu ya Mulungu, pontho tisapangiza kuti tiri kutowera ntsogoleri wathu Kristu Yezu. (Juwau 13:35; 1 Ped. 2:12) Pinthu pyenepi nee pisacitika pyokhene. Mbwenye pisacitika thangwi Yezu asatiphedza.
YEZU AKHAZIKISA M’BANDAZI
9. Mwakubverana na Mateu 24:45-47, ninji pidalonga Yezu kuti mbapidacitika mu ntsiku zakumalisa?
9 Lerini Mateu 24:45-47. Yezu alonga kuti mu ntsiku zakumalisa, iye mbadakhazikisa “m’bandazi wakukhulupirika na wandzeru” toera kupereka cakudya cauzimu. Natenepa, m’bandazi unoyu akhafunika kuphata basa ntsiku zino, pontho ndi pyenepi pinacitika. Ntsogoleri wathu Yezu ali kuphatisira nsoka ung’ono wa amuna akudzodzwa toera kupereka ‘cakudya pa ndzidzi wakuthema’ kuna atumiki a Mulungu na kuna ale anasonkhana na iwo. Amuna anewa nee asaoneka ninga anyakutonga cikhulupiro ca anango. (2 Akor. 1:24) Mbwenye iwo asadziwa kuti Yezu Kristu ndi “ntsogoleri na ntongi” wa mbumba yace.—Iza. 55:4.
10. Mwa mabukhu anapangizwa pa foto, ndi bukhu ipi idakuphedzani toera kutoma kutumikira Yahova?
10 Kutomera mu caka ca 1919, m’bandazi wakukhulupirika akhunganya mabukhu akusiyana-siyana toera kuphedza ale anasonkhana na ife, kuti apfundze undimomwene kubulukira m’Bhibhlya. Mu caka ca 1921, m’bandazi acita bukhu ya nsolo wakuti, A Harpa de Deus toera kuphedza ale anasonkhana na ife kuti adziwe pipfundziso pyakutoma pya m’Bhibhlya. Mukupita kwa ndzidzi acitambo mabukhu anango. Ndi bukhu ipi idakuphedzani toera kudziwa na kufuna Babathu wakudzulu? Ndi bukhu ya “Seja Deus Verdadeiro,” A Verdade Que Conduz a Vida Eterna, Poderá Viver Para Sempre no Paraíso na Terra, Conhecimento Que Conduz a Vida Eterna, Kodi Mwandimomwene Bhibhlya Isapfundzisanji?, Kodi Bhibhlya Isatipfundzisanji?, peno ndi bukhu ipswa yakuti Tsandzayani na Umaso Kwenda na Kwenda! Mabukhu anewa onsene acitwa toera kutiphedza m’basa yakucita anyakupfundza, pontho bukhu ibodzi na ibodzi ikhali yakufunika kakamwe pa ndzidzi udacitwa iyo.
11. Thangwi yanji tonsene tisafunika kudziwa mwadidi Yahova na Bhibhlya?
11 Nee ndi ale basi adatoma kwene kupfundza Bhibhlya anafunika kudziwa mwadidi Yahova na Bhibhlya. Ife tonsene tisafuna cakudya cakuuma cauzimu. Mpostolo Paulu alemba: “Cakudya cakuuma ndi ca anthu akukola mwauzimu.” Paulu alonga kuti tingaphatisira pinapfundza ife m’Bhibhlya, pinatiphedza toera “kusiyanisa cinthu cadidi na cakuipa.” (Aheb. 5:14) Ntsiku zino mphyakunentsa kubvera mitemo ya Yahova, thangwi anthu azinji ali na makhaliro aulukwali. Mbwenye Yezu asacita pyonsene toera tipfundze mphangwa zinafuna ife zakuti zinawangisa cikhulupiro cathu. Mphangwa zenezi zisabuluswa m’Bhibhlya. Yezu asatsogolera m’bandazi wakukhulupirika toera kukhunganya na kugawira cakudya cauzimu.
12. Ninga Yezu, ife tisalemedza tani dzina ya Mulungu?
12 Ninga Yezu, ife tisalemedza kakamwe dzina ya Yahova. (Juwau 17:6, 26) Mwacitsandzo, mu caka ca 1931 ife tasankhula kudziwika na dzina idabuluswa m’Bhibhlya yakuti Mboni za Yahova. Natenepa, ife tapangiza kuti dzina ya Mulungu ndi yakufunika kakamwe kuna ife, pontho tisafuna kudziwika na dzina ya Babathu wakudzulu. (Iza. 43:10-12) Pontho kutomera mwezi wa Outubro wa caka ceneci, dzina ya Yahova yatoma kuikhwa patsamba yakutoma ya marevista a Ncenjezi. Kusiyapo pyenepi, mu Tradução do Novo Mundo da Bíblia Sagrada, dzina ya Mulungu yaikhwa m’mbuto zikhafunika iyo kugumanika. Pyenepi ndi pyakusiyana kakamwe na pinacita mauphemberi akuti asabulusa dzina ya Yahova m’Mabhibhlya mazinji anathumburuza iwo!
YEZU ASAKHUNGANYA ATOWERERI ACE
13. Ninji cinakupasani cinyindiro cakuti lero Yezu ali kuphatisira “m’bandazi wakukhulupirika na wandzeru”? (Juwau 6:68)
13 Mukuphatisira “m’bandazi wakukhulupirika na wandzeru,” Yezu asaonera gulu ya Yahova pa dziko yapantsi toera kuphedzera ulambiri wakucena. Imwe musaona tani gulu ineyi? Panango munanyerezera mafala adalonga mpostolo Pedhro kuna Yezu. Iye alonga: “Tinaenda kuna ani? Imwe ndimwe ali na mafala anapasa umaso wakukhonda mala.” (Juwau 6:68) M’bodzi na m’bodzi wa ife lero, mbadakhala tani mbadakhonda kupita mu gulu ya Yahova? Mukuphatisira gulu ineyi, Kristu asatipasa cakudya cauzimu toera tipitirize kukhala akukhulupirika kuna Mulungu. Pontho iye asatipfundzisa toera tikwanise kuphata mwadidi kakamwe basa yathu yakumwaza mphangwa. Kusiyapo pyenepi, iye asatiphedza toera kubvala “uunthu upswa,” kuti tikomerese Yahova.—Aef. 4:24.
14. Mu ndzidzi wa utenda wa COVID-19, mwaphedzeka tani thangwi yakukhala mu gulu ya Yahova?
14 Yezu asatipasa pitsogolero pyadidi m’midzidzi yakunentsa. Mu ndzidzi udatoma utenda wa COVID-19, pyaoneka pakweca kuti pitsogolero pyenepi pisaphedza. Mu ndzidzi wakuti anthu azinji asadzudzumika, mbakhonda kudziwa kuti anacitanji, Yezu asatipasa pitsogolero toera kutitsidzikiza. Ife tapangwa toera tibvale maskra m’mbuto ziri na anthu azinji na kuthaukirana unango na ndzace. Akulu a mpingo apangwa kuti ndzidzi onsene apite ncibverano na abale na alongo mu mpingo toera adziwe pinthu pinafuna iwo toera akhale akutsidzikizika na ungumi wadidi, mbakhala na uxamwali wakuwanga na Yahova. (Iza. 32:1, 2) Ife tatambira pitsogolero pyakuthimizirika, pontho tawangiswa na mphangwa za Mathubo Akutonga.
15. Ndi pitsogolero pipi pidapaswa ife mu ndzidzi wa utenda wa COVID-19 toera kucita misonkhano na kumwaza mphangwa? Pontho pitsogolero pyenepi pyatiphedza tani?
15 Mu ndzidzi wa utenda wa COVID-19, ife tatambirambo pitsogolero pinalonga kuti tinacita tani misonkhano, pontho kuti tinamwaza tani mphangwa. Mwakukhonda dembuka, ife tatoma kuphatisira vidhyukonferensya toera kucita misonkhano ya mpingo, misonkhano ya cisa na misonkhano ya gawo. Pontho, tatoma kumwaza mphangwa mukuphatisira matsamba na matelefoni. Yahova apasa nkhombo kuwangisira kwathu. Mabheteli mazinji alonga kuti amwazi mphangwa athimizirika kakamwe. Mwandimomwene, azinji ali na pinthu pyakutsandzayisa kakamwe pidaacitikira mu ndzidzi wa utenda wa koronaviru.—Onani bokosi yakuti, “ Yahova Asapasa Nkhombo Basa Yathu Yakumwaza Mphangwa.”
16. Tisafunika kukhala na cinyindiro cipi?
16 Anango panango ananyerezera kuti pitsogolero pikhapereka gulu ya Yahova thangwi ya utenda wa koronaviru ndi pyakupiringana midida. Mbwenye ife takwanisa kuona kuti pitsogolero pyenepi pikhali pyakufunika kakamwe. (Mat. 11:19) Pontho, tinganyerezera mwadidi njira inaphatisira Yezu toera kutsogolera mbumba yace mwaufuni, tisakhala na cinyindiro cakuti mwakukhonda tsalakana pinafuna kucitika ntsogolo, Yahova na Mwanace wakufunika anapitiriza na ife.—Lerini Ahebheri 13:5, 6.
17. Ndi mabvero api ali na imwe thangwi yakutsogolerwa na Yezu?
17 Ife tiri akutsandzaya kakamwe thangwi yakutsogolerwa na Yezu! Ife tiri mu gulu yakuti ndi yakuphatana mwakukhonda tsalakana kusiyana kwa misambo, madziko peno pilongero. Ife tisapfundziswa mwadidi Bhibhlya, pontho tisapaswa pitsogolero pyadidi toera kumwaza mphangwa. Ife tisapfundziswa toera tibvale uunthu upswa na kufunana unango na ndzace. Natenepa, tiri na mathangwi adidi toera kugaya, thangwi Yezu ndi ntsogoleri wathu!
NYIMBO 16 Tinasimba Yahova Thangwi ya Mwanace Wakudzodzwa
^ Anthu azinji kakamwe lero, amuna, akazi na anapiana asamwaza mphangwa zadidi mwaphinga. Kodi imwe musamwazambo mphangwa zenezi? Khala musacita pyenepi, imwe muli kutsogolerwa na Mbuyathu Yezu Kristu. Mu nsolo uno, ife tinaona kuti ndi Yezu asatsogolera basa yakumwaza mphangwa ntsiku zino. Kunyerezera mwadidi mphangwa zenezi kunatiphedza toera tipitirize kutumikira Yahova mbatitsogolerwa na Kristu.
