1. Ninji cinaticitisa kukhala akutsandzaya kakamwe?

TIRI akutsandzaya kakamwe thangwi atumiki a Mulungu akupangiza ceza cawo! Caka cidamala, atumiki a Yahova acitisa mapfundziro a Bhibhlya akupiringana 10.000.000. Anthu azinji apswa agumanika pa Cikumbuso, pontho apfundza kuti ciomboli ndi muoni wakufunika kakamwe udatipasa Yahova.—1 Jwau 4:9.

2, 3. (a) Ndi pinthu pipi pyakuti nkhabe kutipingiza ‘kupangiza ceza’ cathu? (b) Tinapfundzanji mu nsolo uno?

² Pa dziko yonsene yapantsi, Mboni za Yahova zisalonga pilongero pizinji. Mbwenye pyenepi nkhabe kutipingiza toera kusimba Yahova ninga banja yakuphatana. (Apokalipse 7:9) Mwakukhonda tsalakana cilongero cathu peno kunakhala ife, tinakwanisa kuyetima ‘ninga ceza mu dziko.’—Afilipi 2:15.

³ Utumiki wathu, kuphatana kwathu Kwacikristu na kucita kwathu pinthu mwakucimbiza pisapasa mbiri Yahova. Tinapangiza tani ceza cathu m’makhundu anewa matatu?—Lerini Mateo 5:14-16.

4, 5. (a) Kusiyapo kumwaza mphangwa, tinapangiza tani ceza cathu? (b) Kukhala wakukoma ntima kusabweresa maphindu api? (Onani cithundzithundzi cakutoma.)

⁴ Njira yakufunika kakamwe toera kupangiza ceza cathu ndi kumwaza mphangwa na kucita anyakupfundza. (Mateo 28:18, 19) Mu caka 1925, nsolo ubodzi wa Ncenjezi wakuti “Ceza mu Cidima” walonga kuti mu ntsiku zakumalisa, nkhabepo munthu wakuti mbadapitiriza kukhala wakukhulupirika kuna Mbuya khala iye nkhabe “kubandza mwai toera kupangiza ceza cace.” Nsolo unoyu walongambo kuti: “Iye asafunika kucita pyenepi mukupanga anthu mphangwa zadidi na kuwangisira toera afambe munjira za ceza.” (A Sentinela 1.° de Junho de 1925) Kusiyapo basa yathu yakumwaza mphangwa, makhaliro athu adidi asapasa mbiri Yahova. Anthu azinji asationa mu ndzidzi unamwaza ife mphangwa. Tingaamwetulira mbatiamwanyika mwakutsandzaya, pinaaphedza toera akhale na maonero adidi thangwi ya ife na Mulungu analambira ife.

⁵ Yezu apanga anyakupfundzace: ‘Pakupita n’nyumba, mwanyikani anaciro nyumba.’ (Mateo 10:12) Mu cisa cikhamwaza Yezu mphangwa, anthu akhali na nsambo wakuti angatambira alendo akhaapanga toera kupita n’nyumba. M’mbuto zizinji lero, anthu nkhabebve nsambo unoyu. Kazinji kene anthu asadzudzumika angaona munthu anakhonda iwo kudziwa mbafika panyumba pawo. Mbwenye tingakhala auxamwali na akukoma ntima, iwo anakhala akusudzuka kakamwe. Mungaphatisira karinya ya mabukhu pakumwaza mphangwa, kodi nee musatawira kuti mungamwetulira anthu na kuamwanyika mwauxamwali, asakhala akusudzuka toera kukwata mabukhu? Kusiyapo pyenepi, iwo anakwanisambo kukhala na cifuno toera kucedza!

6. Ninji pinaphedza banja ibodzi yakugwesera kupitiriza kumwaza mphangwa mwaphinga?

⁶ Banja ibodzi yakugwesera ya ku Inglatera nee isakwanisabve kumwaza mphangwa nyumba na nyumba ninga pikhacita iwo kale thangwi ya nyatwa za ungumi. Natenepa, iwo asaikha meza ya mabukhu dhuzi na nyumba yawo. Nakuti iwo asakhala cifupi na xikola, asaikha mabukhu munjira yakuti anyakubala angabwera kudzakwata anawo akwanise kuaona. Anyakubala anango asakwata mabukhu anewa, kuphatanizambo bukhu Os Jovens Perguntam— Respostas Práticas, Volume 1 na 2. Kazinji kene mulongo m’bodzi wakuti ndi mpainiya asamwaza mphangwa pabodzi na banja ineyi. Anyakubala akhaona kuti mpainiya unoyu ndi wauxamwali, pontho akhaonambo kuti banja ineyi ikhafuna kakamwe kuphedza anango. Pyenepi pyacitisa kuti nyakubala m’bodzi atome kupfundza Bhibhlya.

7. Munaphedza tani anthu anathawira mu cisa canu?

⁷ Lero, anthu azinji asathawa madziko awo mbaenda kakhala m’madziko anango. Munaphedza tani anthu anathawira mu cisa canu toera kupfundza pya Yahova? Cakutoma, munakwanisa kupfundza kuti munaamwanyika  tani mu cilongero cawo. Pontho, mungaphatisira JW Language, munakwanisa kupfundza mafala akucepa akuti anaacitisa kukhala akusudzuka toera kucedza na imwe. Buluka penepo, munakwanisa kuapangiza mavidyu na mabukhu mu cilongero cawo anagumanika mu jw.org.—Deuteronomyo 10:19.

8, 9. (a) Kodi misonkhano yathu yapakati pasumana isatiphedza tani? (b) Anyakubala anaphedza tani anawo toera kutawira mwadidi pa misonkhano?

⁸ Yahova asatipasa pyonsene pinafuna ife toera kumwaza mphangwa munjira yadidi. Mwacitsandzo, pinapfundza ife pa Nsonkhano wa Umaso na Utumiki pisatiphedza toera kukhala na cinyindiro munacita ife maulendo akubwereza na kutomesa mapfundziro a Bhibhlya.

⁹ Anthu anacemera ife angabwera pa misonkhano yathu, asadzumatirwa na matawiro anapereka anapiana. Imwe munakwanisa kupfundzisa ananu toera kupereka matawiro mukuphatisira mafala awo ene. Anthu anango apfundza undimomwene thangwi yakubva anapiana mbakalonga pya cikhulupiro cawo m’mafala akukhonda nentsa na akubulukira muntima.—1 Akorinto 14:25.

10. Kulambira kwa banja kunaphedza tani mabanja toera akhale akuphatana?

¹⁰ Tingawangisira kupfundzisa banja yathu toera kuphata basa pabodzi mwakuphatana na mwantendere, tisapasa mbiri Yahova. Mwacitsandzo, khala ndimwe nyakubala, citani masasanyiro toera kucita Kulambira Kwa  Banja namaulo masumana onsene. Mabanja mazinji asaona vidyu ya Broadcasting, buluka penepo mbacedza pidapfundza iwo. Kumbukani kuti pinthu pinakomerwa na anang’ono ndi pyakusiyana na pinakomerwa na aphale na atsikana. Citani pyonsene pinakwanisa imwe toera kuphedza m’bodzi na m’bodzi m’banja yanu toera aphindule na kulambira kwa banja.—Masalmo 148:12, 13.

11-13. Tinaphedzera tani mpingo wathu toera ukhale wakuphatana kakamwe?

¹¹ Khala ndimwe m’phale peno ntsikana, munakwanisambo kuphedzera anthu onsene mu mpingo toera apibve kuti ndi akufunika. Njira ibodzi yakucita pyenepi ndi kucita uxamwali na abale na alongo akugwesera. Abvundzeni kuti ninji pinaaphedza toera kupitiriza kutumikira Yahova mu pyaka pizinji. Iwo anakupfundzisani pinthu pyadidi kakamwe. Pyenepi pinawangisa iwo na imwe ene! Pontho, mwakukhonda tsalakana thunga yathu, tonsene tisafunika kucitisa anthu anabwera pa Nyumba ya Umambo toera apibve kuti atambirwa mwadidi. Imwe munakwanisa kuamwanyika, kuamwetulira, kuapasa mbuto yakukhala na kuapangizambo abale na alongo. Aphedzeni toera akhale akusudzuka.

¹² Mungapangwa toera kutsogolera misonkhano ya kubuluka basa ya m’munda, munakwanisa kuphedza anyakugwesera toera apitirize kupangiza ceza cawo. Apaseni cisa mwakubverana na makhaliro awo. Agaweni na aphale peno atsikana toera amwaze mphangwa pabodzi na iwo. Kazinji kene abale na alongo akugwesera na ale akuti asanentseka na ungumi asatsukwala thangwi nee asakwanisabve kumwaza mphangwa ninga pikhacita iwo kale. Mbwenye iwo asatsandzaya angadziwa kuti imwe musaatsalakana, pontho musabvesesa makhaliro awo. Mwakukhonda tsalakana thunga iri na iwo peno ndzidzi udakhala iwo mu undimomwene, kukoma ntima kwanu kunaakulumiza toera apitirize kumwaza mphangwa mwaphinga.—Levitiko 19:32.

¹³ Aizraeli akhatsandzaya kulambira Yahova pabodzi. Nyamasalmo alemba: ‘Mphyadidi na pyakutsandzayisa kukhala pabodzi mwakuphatana ninga abale.’ (Lerini Masalmo 133:1, 2.) Iye alandanisa kuphatana kweneku na mafuta akudzola, akuti ndi akununkhira mwadidi, pontho asacitisa khanda kukhala yadidi. Munjira ibodzi ene, ife tinakwanisa kubalangaza abale na alongo athu tingakhala acitsalakano na akukoma ntima. Pyenepi pisacitisa mpingo kukhala wakuphatana kakamwe. Kodi imwe musadziwa mwadidi abale na alongo a mu mpingo mwanu?—2 Akorinto 6:11-13.

14. Munapangiza tani ceza canu mu cisa cinakhala imwe?

¹⁴ Musafunika kupangiza ceza canu mwakukhonda tsalakana kunakhala imwe. Kukoma kwanu ntima kunacitisa anyakuendekana anu kufuna kupfundza pizinji thangwi ya Yahova. Bvundzikani: ‘Anyakuendekana anga asandiona tani? Ndisacita unyai panyumba panga? Ndisaphedzera cisa cathu kukhala cakucena? Ndisabverana mwadidi na anyakuendekana anga?’ Bvundzani abale na alongo anango kuti citsalakano na citsandzo  cawo cadidi pyakhuya tani acibale awo, anyakuendekana awo, andzawo akubasa peno akuxikola.—Aefesi 5:9.

15. Thangwi yanji tisafunika kupitiriza kukhala maso?

¹⁵ Khala tisafuna kuti ceza cathu cipitirize kugaka, tisafunika kudziwa ndzidzi unakhala ife. Kazinji kene Yezu apanga anyakupfundzace: ‘Pitirizani kukhala maso.’ (Mateo 24:42; 25:13; 26:41) Tingakhala na manyerezero akuti ‘nyatwa ikulu’ iri kutali, nee tinasaka miyai yakuphedza anango toera kupfundza pya Yahova. (Mateo 24:21) M’mbuto mwace, manyerezero anewa anacitisa kuti ceza cathu cithowe mwapang’ono-pang’ono mpaka kuthima.

16, 17. Musafunika kucitanji toera kupitiriza kucita pinthu mwakucimbiza?

¹⁶ Uno ndi ndzidzi toera kupitiriza kukhala maso kupiringana kale. Makhaliro akuipa a dziko akupitiriza kutekera. Mbwenye ife tisadziwa kuti kufudzwa kwa makhaliro akuipa kunafika pa ndzidzi udakhazikisa Yahova. (Mateo 24:42-44) Mu ndzidzi ubodzi ene tisafunika kukhala akupirira mbatipitiriza kunyerezera tsogolo yathu. Tisafunika kuleri Bhibhlya ntsiku zonsene na kucita phembero kuna Yahova. (1 Pedro 4:7) Pfundzani kubulukira kwa abale na alongo anatumikira  Yahova mu pyaka pizinji. Mwacitsandzo, munakwanisa kuleri mbiri za umaso, ninga inagumanika mu A Sentinela ya 15 de Abril de 2012, tsamba 18-21, ya nsolo wakuti “Setenta anos ‘agarrando a aba da veste de um judeu.’”

¹⁷ Khalani akuphatika m’basa ya Yahova. Citani pinthu pyadidi kuna anango, pontho khalani na ndzidzi toera kucedza na abale na alongo. Pyenepi pinakutsandzayisani na munadzaona kuti ndzidzi ukupita mwakucimbiza. (Aefesi 5:16) Atumiki a Yahova acita pinthu pizinji mu pyaka pyakupiringana dzana nduli. Lero, tiri na basa ikulu kakamwe. Basa ya Yahova ikuthimizirika kakamwe kupiringana kale. Ceza cathu cikuyetima kakamwe!

18, 19. Akulu a mpingo anatiphedza tani toera kutumikira Yahova mwaphinga? Perekani citsandzo.

¹⁸ Ngakhale tisacita madodo mazinji, Yahova asatitawirisa toera kuntumikira. Toera kutiphedza, iye asatipasa ‘amuna ninga miyoni,’ akuti ndi akulu a mpingo. (Lerini Aefesi 4:8, 11, 12, Tradução do Novo Mundo.) Natenepa, mungacedzerwa na akulu a mpingo, bandzani mwai toera kupfundza kubulukira ku udziwisi wawo na uphungu wawo.

¹⁹ Mwacitsandzo, banja ibodzi ku Inglatera ikhathimbana na pinentso m’banja yawo mbaphemba ciphedzo kuna akulu a mpingo awiri. Nkazi akhaona kuti mamunace nee akhatsogolera mwadidi banja toera kulambira Yahova. Mamuna akhaona kuti nee akhali mpfundzisi wadidi, pontho adzindikira kuti nee akhacita masasanyiro toera kucita kulambira kwa banja masumana onsene. Akulu a mpingo aphedza banja ineyi toera kunyerezera citsandzo ca Yezu. Iwo aphedza mamuna toera kutowezera Yezu munjira ikhatsalakana iye anyakupfundzace. Iwo aphedzambo nkazi toera kukhala wakupirira. Iwo aperekambo maonero kuna banja ineyi kuti anacita tani kulambira kwa banja pabodzi na anawo awiri. (Aefesi 5:21-29) Mamuna awangisira kakamwe toera kukhala nsolo wadidi wa banja. Akulu a mpingo amphedza toera akhonde kubwerera nduli, pontho toera apitirize kunyindira nzimu wa Yahova. Ufuni na citsalakano ca akulu a mpingo pyaphedza kakamwe banja ineyi!

20. Ndi maphindu api anafuna kukhalapo mungapangiza ceza canu?

²⁰ ‘Anyakutsandzaya ndi ale anagopa Yahova, mbafamba munjira Zace.’ (Masalmo 128:1) Imwe munatsandzaya kakamwe mungapangiza ceza canu. Natenepa, pfundzisani anango thangwi ya Mulungu, citani pyonsene pinakwanisa imwe toera kuphedzera kuphatana kwa banja yanu na kuphatana mu mpingo, pontho pitirizani kukhala maso. Anango angaona citsandzo canu cadidi anadzafunambo kupasa mbiri Babathu Yahova.—Mateo 5:16.