1. Mwakubverana na Akolose 2:4, 8, Sathani asayesera tani kutsogolera manyerezero athu?

SATHANI asafuna kuti ife tikhonde kufuna Yahova. Natenepa iye asayesera kucinja njira inanyerezera ife, mbaticitisa kunyerezera ninga iye. Sathani asayesera kutinyengeza mukuphatisira pinthu pinasirira ife.—Lerini Akolose 2:4, 8.

2-3. (a) Thangwi yanji tisafunika kubvera cenjezo inagumanika pa Akolose 2:8? (b) Tinapfundzanji mu nsolo uno?

² Kodi ife tiri pangozwi yakunyengezwa na Sathani? Inde! Kumbukani kuti Paulu nee alembera anthu akukhonda khulupira cenjezo inagumanika pa Akolose 2:8. Iye alembera Akristu akudzodzwa na nzimu wakucena. (Akol. 1:2, 5) Khala Akristu anewa akhali pangozwi yakupeuswa mu ndzidzi unoyu, ifembo lero tiri pangozwi. (1 Akor. 10:12) Thangwi yanji? Thangwi Sathani aponywa pa dziko yapantsi, natenepa iye asacita pyonsene pinakwanisa iye toera kupeusa atumiki akukhulupirika a Mulungu. (Apok. 12:9, 12, 17) Kusiyapo pyenepi, ife tikukhala mu ndzidzi wakuti ‘anthu akuipa na akunyengeza akuthimiza kucita pinthu pyakuipa kakamwe.’—2 Tim. 3:1, 13.

³ Mu nsolo uno, tinapfundza kuti Sathani asaphatisira tani “udziwisi wa anthu a dziko” toera kutsogolera manyerezero athu. Tinapfundzambo kuti tinadzindikira tani “manyengerero” peno “misampha” yace mitatu. (Aef. 6:11; cidzindikiro capantsi) Mu nsolo unatowera, tinadzapfundza kuti tinakunda tani misampha ya Sathani tingadzindikira kuti iyo isatsogolera manyerezero athu. Mbwenye pakutoma tendeni tione kuti Sathani  apeusa tani Aizraeli pidamala iwo kwene kupita mu Dziko Yakupikirwa.

4-6. Mwakubverana na Deuteronomyo 11:10-15, ndi njira zipi zipswa zakulima zidapfundza Aizraeli pikhali iwo mu Dziko Yakupikirwa?

⁴ Mwaluso, Sathani ayesera Aizraeli toera kulambira madzimunthu. Kodi iye acita tani pyenepi? Sathani akhadziwa kuti Aizraeli akhafuna cakudya, natenepa iye ayesera kuphatisira njira ineyi toera iwo acite pikhafuna iye. Pidapita Aizraeli mu Dziko Yakupikirwa, iwo apfundza njira zipswa zakulima pyakudya. Pikhali Aizraeli mu Ejito, iwo akhaphatisira madzi a mu Nkulo wa Nilo toera kuthirira minda yawo. Mbwenye mu Dziko Yakupikirwa nee mukhali na Nkulo ukulu, natenepa pyakudya pikhalima iwo pikhafunika kukula na madzi akubvumba na bume. (Lerini Deuteronomyo 11:10-15; Iza. 18:4, 5) Na thangwi ineyi, Aizraeli akhafunika kupfundza njira zipswa zakulima. Mbwenye pyenepi pikhali pyakunentsa thangwi anthu azinji akuti akhali na maluso akulima akhadamala kufa n’thando.

⁵ Yahova akhadapanga Aizraeli kuti makhaliro awo mbadacinja. Buluka penepo iye aacenjeza: ‘Citani mphole-mphole toera mitima yanu ikhonde kunyengererwa mbamutumikira alungu apezi na kualambira.’ (Deut. 11:16, 17) Pakutoma cenjezo ineyi ikhaoneka ninga nee mbidacita khundu ya pyakulima. Mphapo thangwi yanji Yahova aacenjeza pyakulambira alungu apezi mu ndzidzi ukhalonga iye pya kupfundza njira zipswa zakulima pyakudya?

⁶ Yahova akhadziwa kuti Aizraeli mbadayeserwa toera kupfundza njira zipswa zakulima kubulukira kwa anthu apacisa akuti akhalambira alungu authambi. Mwandimomwene, anthu anewa apacisa akhadziwa mwadidi kulima kupiringana Aizraeli, pontho Aizraeli  mbadakwanisa kupfundza pizinji na iwo, mbwenye akhali pangozwi. Thangwi anyakulima anewa Akanani akhalambira mulungu wawo Bhaale. Iwo akhakhulupira kuti Bhaale ndi mwanaciro kudzulu, pontho ndiye akhabvumbisa madzi. Yahova nee akhafuna kuti atumiki ace apeuswe na manyerezero anewa akuphonyeka. Mbwenye mwakubwereza-bwereza Aizraeli asankhula kulambira Bhaale. (Num. 25:3, 5; Aton. 2:13; 1 Ama. 18:18) Cincino tendeni tione misampha idaphatisira Sathani toera Aizraeli akhale mabitcu ace.

7. Kodi cikhulupiro ca Aizraeli cayeserwa tani pidapita iwo mu Dziko Yakupikirwa?

⁷ Nsampha wakutoma udaphatisira Sathani ukhali cifuno cikhali na Aizraeli. Iwo akhafuna kakamwe madzi abvumbe toera athirire minda yawo. Pyaka pyonsene, kutomera mwezi wa Abril mpaka Setembro madzi akhabvumba mwakucepa kakamwe mu Dziko Yakupikirwa. Umaso wa Aizraeli na pikhalima iwo pikhanyindira kubvumba kwa madzi akuti akhatoma mwezi wa Outubro. Sathani acitisa Aizraeli kukhulupira kuti toera pyakudya pyawo pikule mwadidi, iwo akhafunika kutowezera misambo ya anthu apacisa akuti akhalambira alungu authambi. Anthu anewa akhakhulupira kuti alungu awo mbadabvumbisa madzi basi ene angaalambira. Mwakutsukwalisa, Aizraeli azinji nee akhulupira Yahova. Natenepa, thangwi yakugopa kukhonda kubvumba kwa madzi, iwo alambira mulungu wauthambi Bhaale.

8. Ndi nsampha upi waciwiri udaphatisira Sathani? Fokotozani.

⁸ Nsampha waciwiri udaphatisira Sathani toera kunyengeza Aizraeli ukhali pifuno pyaulukwali. Akanani akhalambira alungu awo authambi mbacita pinthu pyakunyanyasa. M’mbuto zawo zaulambiri, amuna na akazi akhacita ulukwali. Kupita m’mabonde mamuna na mamuna peno nkazi na nkazi kuphatanizambo njira zinango zaulukwali, pikhali pinthu pyakutawirika kuna iwo. (Deut. 23:17, 18; 1 Ama. 14:24) Akanani akhakhulupira kuti pinthu pyenepi pyaulukwali pikhakulumiza alungu awo toera kucitisa mataka kubulusa pyakudya pizinji. Aizraeli azinji asirira pinthu pyenepi pyaulukwali mbatomambo kulambira alungu authambi. Mwandimomwene Aizraeli anewa adzakhala mabitcu a Sathani.

9. Mwakubverana na Ozeya 2:16, 17, Sathani acitisa tani Aizraeli kuduwala Yahova?

⁹ Nsampha wacitatu udaphatisira Sathani. Iye acitisa Aizraeli kuduwala Yahova. Mu ntsiku za mprofeta Yeremiya, Yahova akhadalonga kuti aprofeta authambi mbadacitisa Aizraeli kuduwala dzina Yace ‘thangwi ya Bhaale.’ (Yer. 23:27) Pisaoneka kuti Aizraeli akhadasiya kuphatisira dzina ya Yahova, mbaphatisira dzina ya Bhaale yakuti isabveka ‘Mwanaciro’ peno ‘Mbuya.’ Pyenepi pyacitisa kukhala pyakunentsa kuna Aizraeli kudzindikira kusiyana kwa Yahova na Bhaale, mbatoma kubvungaza misambo ikhacita iwo pakulambira Bhaale na ulambiri wa Yahova.—Lerini Ozeya 2:16, 17, Tradução do Novo Mundo da Bíblia Sagrada na cidzindikiro capantsi.

10. Ndi misampha ipi inaphatisira Sathani lero?

¹⁰ Sathani asaphatisira misampha ibodzi ene lero. Iye asacitisa anthu kukhala mabitcu ace mukuona ulukwali ninga cinthu cakutawirika, pontho asacitisa anthu kuduwala Yahova. Cincino tendeni tione kuti Sathani asacita tani pyenepi.

11. Sathani asacitisa tani anthu kuduwala Yahova?

¹¹ Sathani asacitisa anthu kuduwala Yahova. Pidamala kufa apostolo a Yezu, anthu anango akhalonga kuti ndi Akristu, atoma kupfundzisa  pinthu pyauthambi. (Mabasa 20:29, 30; 2 Ates. 2:3) Anthu anewa atoma kubisa undimomwene wa Mulungu. Mwacitsandzo, iwo abulusa dzina ya Mulungu m’Mabhibhlya awo mbaikha fala yakuti “Mbuya” peno pidzo pinango. Thangwi yakubulusa dzina ya Mulungu mbaikha fala yakuti “Mbuya,” iwo asacitisa anyakuleri Bhibhlya kukhala pyakunentsa kuona kusiyana kwa Yahova na “ambuya” anango analongwa m’Bhibhlya. (1 Akor. 8:5) Iwo asacemera Yahova na Yezu mukuphatisira fala ibodzi ene “Mbuya.” Pyenepi pisacitisa kukhala pyakunentsa kuna anthu kubvesesa kuti Yahova na Yezu ndi akusiyana. (Juw. 17:3) Pontho pisacitisa anthu kukhulupira pya Cipfundziso ca Utatu, cipfundziso cakuti nee cisagumanika m’Mafala a Mulungu. Na thangwi ineyi, anthu azinji asaona kuti ndi pyakunentsa kudziwa Mulungu. Unoyu ndi uthambi ukulu kakamwe!—Mabasa 17:27.

12. Kodi uphemberi wauthambi usakulisa makhaliro api, pontho pyenepi pisabweresanji mwakubverana na Aroma 1:28-31?

¹² Sathani asaphatisira pifuno pyaulukwali. Mu ntsiku za Aizraeli, Sathani aphatisira uphemberi wauthambi toera kukulisa makhaliro aulukwali. Lero, iye asacitambo pibodzi pyene. Uphemberi wauthambi usatawirisa makhaliro aulukwali, pontho usacitisa anthu kuona kuti makhaliro anewa ndi akutawirika. Na thangwi ineyi, azinji analonga kuti asatumikira Mulungu, asasiya kubvera midida ya Bhibhlya inalonga pyaulukwali. Mu tsamba yace kuna Aroma, mpostolo Paulu alemba pinthu pikhafuna kucitika kuna anthu anewa. (Lerini Aroma 1:28-31.) Iwo asacita “pinthu pyakukhonda thema.” Pinango mwa pinthu pyenepi ndi ntundu onsene waulukwali, kuphatanizambo kupita m’mabonde mamuna na mamuna peno nkazi na nkazi. (Aroma 1:24-27, 32; Apok. 2:20) Natenepa ndi pyakufunika kakamwe kwa ife kubvera pipfundziso pyakubveka pya m’Bhibhlya.

13. Ndi nsampha upi unango unaphatisira Sathani?

¹³ Sathani asaphatisira pifuno pyathu. Tonsene tisafuna kutsalakana umaso wathu na wa banja yathu. Natenepa tisafuna kuthimizira maluso athu toera kucita pyenepi. (1 Tim. 5:8) Kazinji kene, njira ibodzi yakuthimizira maluso athu ndi kuenda kuxikola na kuwangisira kupfundza. Mbwenye tisafunika kucita mphole-mphole. M’madziko mazinji,  anyakupfundza asapfundza pizinji kakamwe kuxikola, mbwenye iwo asapfundzambo udziwisi wa anthu a dziko. Mwacitsandzo, apfundzisi asakulumiza anyakupfundza awo toera akhonde kutawira kuti Mulungu alipo, pontho toera akhonde kulemedza Bhibhlya. Anyakupfundza asapangwa kuti anthu onsene audziwisi asakhulupira cipfundziso ca kusanduka kwa pinthu. (Aroma 1:21-23) Pipfundziso pyenepi pisapwaza ‘udziwisi wa Mulungu.’—1 Akor. 1:19-21; 3:18-20.

14. Udziwisi wa anthu a dziko usakulumiza anthu toera kucitanji?

¹⁴ Udziwisi wa anthu a dziko usapwaza midida yakulungama ya Yahova. M’mbuto mwakuphedza anthu toera akulise misapo ya nzimu wa Mulungu, udziwisi wa anthu a dziko usakulumiza anthu toera akulise “mabasa aunyama.” (Agal. 5:19-23) Iwo usacitisa anthu kukhala akudzikuza, natenepa anthu asakhala ‘akufunika okha basi.’ (2 Tim. 3:2-4) N’khaliro unoyu ndi wakusiyana kakamwe na n’khaliro wakucepeseka wakuti Mulungu asaufuna kuna atumiki ace. (2 Sam. 22:28) Akristu anango adapfundza ku universidhadhe atoma kukhala na manyerezero a anthu m’mbuto mwakukhala na manyerezero a Mulungu. Cincino tendeni tione citsandzo cibodzi cinapangiza ngozwi yakucita pyenepi.

15-16. Mwapfundzanji na pidacitikira mulongo unoyu?

¹⁵ Mulongo unango wakuti ali m’basa ya ndzidzi onsene mu pyaka pyakupiringana 15 alonga: “Ninga Mboni wakubatizwa, ndaleri, pontho ndabva pya ngozwi yakupfundza ku universidhadhe, mbwenye nee ndabvera uphungu unoyu. Ndikhanyerezera kuti uphungu unoyu nee ndi wakufunika kwa ine.”  Ndi pinentso pipi pidathimbana na mulongo unoyu? Iye athimiza: “Kupfundza ku universidhadhe kukhabvunga kakamwe ndzidzi wanga na mphambvu zanga. Thangwi yakuneta, ine nee ndikhali na ndzidzi wakucita phembero kuna Yahova, pontho nee ndikhakwanisabve kucedza na anango pya Bhibhlya na kukhunganyika misonkhano. Pidadzindikira ine kuti kupfundza ku universidhadhe kukhaphekesa uxamwali wanga na Yahova, ndaona kuti mphyadidi ndisiye. Natenepa ndasiya.”

¹⁶ Kodi kupfundza ku universidhadhe kwakhuya tani manyerezero a mulongo unoyu? Iye atawira: “Pisapasa manyadzo toera kupilonga, mbwenye thangwi ya kupfundza ku universidhadhe ndatoma kusumula kakamwe anango, makamaka abale na alongo mu mpingo. Pontho ndikhadikhira kuti iwo acite pizinji kupiringana pire pikhakwanisa iwo kucita, pyenepi pikhandicitisa kufuna kukhala kutali na iwo. Papita ndzidzi uzinji toera ndisiye kukhala na manyerezero anewa. Natenepa, pinthu pyenepi pidandicitikira pisapangiza ngozwi yakukhonda kubvera uphungu unapereka Babathu wakudzulu kubulukira mu gulu yace. Yahova akhandidziwa mwadidi kupiringana ine ene. Mwandimomwene ndikhafunika kumbvera!”

17. (a) Kodi tisafunika kukhala akutonga toera kucitanji? (b) Tinadzapfundzanji mu nsolo unatowera?

¹⁷ Ife tisafunika kukhala dzololo toera tikhonde kutsogolerwa na “udziwisi wa anthu a dziko” ya Sathani. Cipo musafunika kutawira kupeuswa na misampha ya Sathani. (1 Akor. 3:18; 2 Akor. 2:11) Pontho nee musafunika kutawirisa Sathani akucitiseni kuduwala Yahova na kumulambira. Lemedzani midida ya Yahova inalonga pya makhaliro adidi. Pontho lekani kutawirisa kuti Sathani akucitiseni kupwaza uphungu wa Yahova. Mphapo musafunika kucitanji mungadzindikira kuti mwakhuyiwa na manyerezero a dziko ino? Nsolo unatowera unadzapangiza kuti Mafala a Mulungu anatiphedza tani toera kufudza manyerezero na misambo yakuti ‘yakhomereka kakamwe.’—2 Akor. 10:4, 5.