NSOLO WA PFUNDZIRO 26
‘Bwererani Kuna Ine’
‘Bwererani kuna ine, ine ndinadzabwererambo kuna imwe.’—MAL. 3:7.
NYIMBO 102‘Phedzani Anthu Akufewa’
PINAFUNA IFE KUPFUNDZA *
1. Ndi mabvero api anakhala na Yahova angaona kuti m’bodzi wa atumiki ace atcunyuka mbabwerera kuna iye?
MU NSOLO udamala, ife tapfundza kuti Yahova asalandanisika ekhene ninga nkumbizi wadidi wakuti asatsalakana mwaufuni mabira ace onsene. Pontho iye asasaka onsene adatayika. Yahova apanga Aizraeli ale adasiya kuntumikira kuti: ‘Bwererani kuna ine, ine ndinabwererambo kuna imwe.’ Ife tisadziwa kuti lero Yahova asapitiriza na mabvero mabodzi ene thangwi iye alonga: ‘Ine nkhabe cinja.’ (Mal. 3:6, 7) Yezu alonga kuti Yahova pabodzi na aanju asatsandzaya kakamwe angaona kuti m’bodzi wa atumiki ace atcunyuka mbabwerera kuna iye.—Luka 15:10, 32.
2. Tinapfundzanji mu nsolo uno?
2 Tendeni tidinge misangani mitatu idalonga Yezu toera tione kuti tinaphedza tani ale adasiya kutumikira Yahova. Tinadzapfundza pinthu pinafuna ife kucita toera kuphedza ale adasiya kutumikira Mulungu toera abwerere kuna iye. Pontho tinadzaona kuti tingawangisira toera kuphedza ale adasiya kutumikira Yahova tinadzatsandzaya kakamwe.
KUSAKA KOBIRI IDATAYIKA
3-4. Mwakubverana na Luka 15:8-10, nkazi analongwa mu nsangani wa Yezu acitanji toera kugumana kobiri yace idatayika?
3 Tisafunika kuwangisira kakamwe toera kugumana ale anafuna kubwerera kuna Yahova. Mu nsangani udalembwa m’bukhu ya Luka, Yezu alonga pinthu pidacita nkazi toera kugumana kobiri yace ya ndzaya idatayika. Mbwenye cinthu cakufunika kakamwe mu nsangani unoyu ndi cakuti nkazi unoyu awangisira kakamwe toera kugumana kobiri yace idatayika.—Lerini Luka 15:8-10.
4 Yezu alonga mabvero adakhala na nkazi unoyu pidagumana iye kobiri yace. Mu ntsiku za Yezu, akazi anango anawo angasembwa akhaapasa kobiri khumi za ndzaya panango kobiri ineyi ikhali muoni wakufunika kakamwe kuna iwo. Nkazi analongwa mu nsangani wa Yezu kobiri yace ikhadatayika. Natenepa iye agasa nyale toera kuisaka, mbwenye nee aigumana. Nyale yace nee ikhamwanikira mwadidi toera akwanise kuona kobiri ineyi ya ndzaya. Na thangwi ineyi iye apswaira nyumba mwace monsene. Buluka penepo iye aigumana. Natenepa iye atsandzaya kakamwe mbacemera axamwali ace na anthu apacisa toera kuapanga pyenepi.
5. Thangwi yanji tisafunika kuwangisira kakamwe toera kugumana ale adasiya kutumikira Yahova?
5 Nsangani udalonga Yezu usapangiza kuti tisafunika kuwangisira kakamwe toera kugumana cinthu cidatayika. Mu njira ibodzi ene, ife tisafunika kuwangisira kakamwe toera kugumana ale adasiya kutumikira Yahova. Panango iwo asiya kutumikira Yahova mu pyaka pizinji. Panango iwo aenda kakhala mu cisa cakuti abale a mucisa ceneci nkhabe kuadziwa. Mbwenye ife tiri na cinyindiro cakuti anango mwa abale anewa asafuna kubwerera kuna Yahova. Iwo asafuna pontho kutumikira Yahova pabodzi na abale na alongo, mbwenye toera acite pyenepi asafuna ciphedzo.
6. Mbani asafunika kusaka ale adasiya kutumikira Yahova?
6 Mbani asafunika kusaka ale adasiya kutumikira Yahova? Ife tonsene, akulu a mpingo, apainiya, acibale, na abale na alongo mu mpingo. Kodi imwe muli na xamwali peno wacibale wakuti asiya kutumikira Yahova? Kodi musafunika kucitanji mungagumana munthu adasiya kutumikira Yahova mu ndzidzi unamwaza imwe mphangwa? Nfokotozereni kuti khala iye asafuna kucedzerwa anakwanisa kukupangani kunakhala iye na numero yace ya ntokodzi toera kupasa akulu a mpingo.
7. Mwapfundzanji na pinthu pinacita nkulu wa mpingo anacemerwa Thomas?
7 Akulu a mpingo ali na basa ikulu kakamwe yakusaka ale anafuna kubwerera kuna Yahova. Kodi iwo anacita tani pyenepi? Onani pinthu pidacita nkulu wa mpingo anacemerwa Thomas. * Iye asakhala ku Espanha pontho aphedza abale na alongo akupiringana 40 toera kutumikira pontho Yahova. Thomas alonga: “Cakutoma, ine ndikhabvundzisa abale na alongo toera kudziwa mbuto inagumanika munthu adasiya kutumikira Yahova. Kusiyapo pyenepi ine ndisabvundzisa amwazi mphangwa khala iwo asadziwa munthu adasiya kusonkhana. Abale na alongo azinji asakomerwa kakamwe kundiphedza kusaka ale adasiya kutumikira Yahova. Buluka penepo, ndingacedzera abale na alongo adasiya kusonkhana, ndisaabvundza thangwi ya anawo peno acibale awo. Abale na alongo akuti asiya kutumikira Yahova, iwo ali na anawo akuti asiyambo kutumikira Yahova. Natenepa, ana anewa asafunikambo kuphedzwa toera abwerere kuna Yahova.”
PHEDZANI ALE ADASIYA KUTUMIKIRA YAHOVA TOERA ABWERERE PONTHO KUNA IYE
8. Mwakubverana na nsangani unalongwa pa Luka 15:17-24, kodi baba acitanji pidabwerera mwanace panyumba?
8 Tisafunika kukhala na makhaliro api toera kuphedza ale anafuna kubwerera kuna Yahova? Onani kuti tinapfundzanji kubulukira mu nsangani wa Yezu unalonga thangwi ya mwana adabuluka panyumba. (Lerini Luka 15:17-24.) Yezu afokotoza kuti pakumalisa mwana unoyu adzindikira kuti akhadacita pinthu pyakusowa ndzeru mbabwerera kunyumba. Baba athamanga mbakhumbatira mwanace mwaufuni, pontho pyenepi pyacitisa kuti mwana adzindikire kuti asafuniwa na babace. Nakuti mwana akhadacita pinthu pyakuipa iye akhapasika mulando, pontho akhaona kuti nee athema kutsalakanwa ninga mwana wa pabanja ineyi. Mbwenye babace ambvera ntsisi. Kusiyapo pyenepi iye acita pinthu toera kupangiza kuti akhali wakukomerwa kakamwe na kubwerera kwa mwanace. Pontho, baba apangiza pakweca kuti nee mbadantsalakana ninga nyabasa, mbwenye ninga mwanace. Natenepa iye ampasa nguwo zadidi mbancitira phwando.
9. Ndi makhaliro api anafunika ife kupangiza toera kuphedza ale adasiya kusonkhana na kumwaza mphangwa toera abwerere kuna Yahova? (Onani bokosi yakuti “ Tinaphedza Tani Ale Anafuna Kubwerera Kuna Yahova.”)
9 Yahova ndi ninga baba analongwa mu nsangani unoyu. Iye asafuna abale na alongo adasiya kusonkhana na kumwaza mphangwa, pontho asafuna kuti iwo abwerere kuna iye. Ife tingatowezera Yahova, tinakwanisa kuaphedza toera abwerere kuna iye. Toera kucita pyenepi, ife tisafunika kukhala akupirira, antsisi, na a ufuni. (Tiya. 2:13) Thangwi yanji tisafunika kupangiza makhaliro anewa, pontho tinaapangiza tani?
10. Thangwi yanji tisafunika kukhala akupirira pakuphedza anango toera kutumikira pontho Yahova?
10 Tisafunika kukhala akupirira thangwi pisakwata ndzidzi toera munthu akhale pontho na uxamwali wakuwanga na Yahova. Abale na alongo akuti akhadasiya kutumikira Yahova alonga kuti toera atumikire pontho Yahova akulu a mpingo na anango aacedzera kazinji kene. Mulongo anacemerwa Nancy anakhala ku Aziya alemba: “Xamwali wanga wa mu mpingo andiphedza kakamwe. Iye akhandifuna kakamwe ninga m’bale wace wa mimba ibodzi ene. Iye akhandikumbusa pinthu pikhacita ife kalene pabodzi. Iye akhandibvesera mwadidi, pontho nee akhanyinyirika kundipasa uphungu. Iye akhali xamwali wadidi, pontho akhandiphedza ndzidzi onsene.”
11. Thangwi yanji tisafunika kukhala na ntsisi toera kuphedza ale adatsukwaliswa na anango mu mpingo?
11 Munthu angatsukwala pisakhala ninga cironda cakupha kakamwe, mbwenye ntsisi ndi ninga ntombwe wakuti unakwanisa kuwangisa cironda ceneci. Anango asasiya kusonkhana na kumwaza mphangwa thangwi ya kutsukwaliswa na anango mu mpingo, pontho asapitiriza kukoya mathangwi muntima. Na thangwi ineyi iwo nee asafuna kubwerera kuna Yahova. Iwo asaona kuti atsalakanwa mwakuipa. Natenepa, panango iwo asafuna munthu toera abvesese mabvero awo. (Tiya. 1:19) Maria wakuti akhadasiya kusonkhana na kumwaza mphangwa alonga: “Ine ndikhafuna munthu wakuti mbadandibvesera, kundibalangaza, kundipasa uphungu wadidi na kundiphedza.”
12. Ndi munjira ipi ufuni wa Yahova ndi ninga nkhambala?
12 Bhibhlya isalonga kuti ufuni unapangiza Yahova kuna atumiki ace ndi ninga nkhambala. Ndi munjira ipi ufuni wa Mulungu ndi ninga nkhambala? Mwacitsandzo: Nyerezerani kuti mwagwa ndjenje yakuzika kakamwe yakuti nee munakwanisa kubuluka mwekhene. Natenepa, toera kubuluka mu djenje ineyi musafunika munthu akuponyereni nkhambala mbakukwewani. Yahova alonga kuna Aizraeli akhadasiya kuntumikira: ‘Ine ndikhaakwewa mwaufuni.’ (Oze. 11:4) Munjira ibodzi ene lero, Yahova asakhalambo na mabvero mabodzi ene kuna ale adasiya kuntumikira na ale anathimbana na nyatwa. Yahova asafuna kuti iwo adziwe kuti iwo asaafuna, pontho asafuna kuti iwo abwerere kuna iye. Pontho Yahova anakwanisa kuphatisira imwe toera kupangiza ufuni wace kuna anthu anewa.
13. Kodi pinthu pidacitikira Pablo pisapangiza tani kuti ufuni unakwanisa kuphedza anango toera kubwerera kuna Yahova?
13 Ndi pyakufunika kakamwe kupanga ale adasiya kutumikira Yahova kuti iye asaafuna kakamwe pontho ife tisaafunambo. Pablo anakhala ku America do Sul akhadasiya kutumikira Yahova mu pyaka 30. Iye alonga: “Ntsiku inango na macibese, pikhabuluka ine panyumba panga ndaonana na mulongo unango wakugwesera wakuti alonga na ine mu njira yadidi kakamwe. Ine ndatoma kulira ninga mwana ng’ono. Ine ndampanga kuti pikhali ninga iye atumwa na Yahova toera kulonga na ine. Kutomera pa ntsiku ineyi, ine ndatonga kubwerera kuna Yahova.”
PHEDZANI MWAUFUNI ANTHU AKUFEWA
14. Mwakubverana na nsangani unalongwa pa Luka 15:4, 5, kodi nkumbizi acitanji pidagumana iye bira yace yakutayika?
14 Ife tisafunika kupitiriza kuphedza ale akhadasiya kutumikira Yahova. Ninga mwana adabuluka panyumba analongwa mu nsangani wa Yezu, panango iwo anapitiriza kukhala na mabvero akupasika mulando. Pontho, nakuti iwo akhadasiya kutumikira Yahova, uxamwali wawo na Yahova nee ndi wakuwanga ninga kale. Natenepa tisafunika kuaphedza toera kukhala na cikhulupiro cakuwanga kuna Yahova. Mu nsangani wa bira yakutayika, Yezu alonga kuti nkumbizi asathukula bira ikhadatayika mbaenda nayo kuna mabira anango. Nkumbizi unoyu abvunga ndzidzi na mphambvu toera kugumana bira ineyi. Mbwenye pidaigumana iye, aona kuti mphyadidi kuithukula thangwi iyo nee ikhali na mphambvu toera kufamba yokhene.—Lerini Luka 15:4, 5.
15. Tinaphedza tani ale adasiya kusonkhana na kumwaza mphangwa? Toera atumikire pontho Yahova? (Onani bokosi yakuti “ Bhruxura yakufunika kakamwe.”)
15 Tisafunika kuwangisira toera kuphedza ale adasiya kusonkhana na kumwaza mphangwa toera kukunda nyatwa zinaacimwanisa kutumikira Yahova. Mbwenye ife tinakwanisa kucita pyenepi na ciphedzo ca nzimu wakucena, Bhibhlya na mabukhu anatambira ife mu mpingo. (Aro. 15:1) Mwacitsandzo nkulu wa mpingo m’bodzi alonga: “Anthu azinji anasiya kusonkhana na kumwaza mphangwa, angatonga kubwerera kuna Yahova asafunika kupfundziswa pontho Bhibhlya. Mbwenye m’bale peno mulongo anasankhulwa toera kucitisa pfundziro m’bodzi mwa anthu anewa asafunika kukhala wa uxamwali na wakunyindirika.” * Mungaphembwa toera kupfundza na m’bodzi mwa anthu anewa, kodi imwe munatawira?
KUTSANDZAYA KUNAONEKA KUDZULU NA PADZIKO YA PANTSI
16. Tisadziwa tani kuti tisaphata basa pabodzi na aanju?
16 Pana pinthu pizinji pinapangiza kuti aanju asaphata basa pabodzi na ife toera kutiphedza kugumana ale adasiya kutumikira Yahova. (Apok. 14:6) Mwacitsandzo, Silvio anakhala ku Ecuador akhadasiya kutumikira Yahova, natenepa iye aphemba Yahova toera atume munthu kuti adzamphedze toera atome pontho kusonkhana na kumwaza mphangwa. Mu ndzidzi ukhacita iye phembero, akulu a mpingo awiri afika panyumba pace. Kutomera ntsiku ineyi, iwo atoma kum’phedza toera abwerere kuna Yahova.
17. Ninji pinacitika kuna ife tingaphedza munthu adasiya kutumikira Yahova?
17 Ife tinakhala akutsandzaya kakamwe tingaphedza ale adasiya kutumikira Yahova mbabwerera kuna iye. Mwacitsandzo, Mpainiya unango anacemerwa Salvador wakuti asawangisira kakamwe toera kuphedza ale adasiya kutumikira Yahova alonga: “Midzidzi inango ndisagwisa misozi thangwi ya kutsandzaya ine ndisakhala wakutsandaya kakamwe kudziwa kuti ndaphata basa pabodzi na Yahova toera kuphedza abale na alongo adasiya kumwaza mphangwa na kusonkhana toera kubwerera kuna iye.”—Mabasa 20:35.
18. Khala imwe mwasiya kutumikira Yahova, ndi cinyindiro cipi cisafunika kukhala na imwe?
18 Khala imwe mwasiya kutumikira Yahova, khalani na cinyindiro cakuti iye asapitiriza kukufunani. Iye asafuna kuti mubwerere kuna iye. Mbwenye imwe musafunika kuwangisira kakamwe toera kubwerera kuna Yahova. Ninga baba analongwa mu nsangani wa Yezu, Yahova anakutambirani na manja mawiri mungabwerera kuna iye.
NYIMBO 103 Akulu a Mpingo Ndi Miyoni Mwa Anthu
^ ndima 5 Yahova asafuna kuti ale adasiya kumwaza mphangwa na kugumanika pamisonkhano akhale pontho na uxamwali na iye. Ife tinakwanisa kucita pizinji toera kuphedza ale anatawira ncemerero wa Yahova wakuti: ‘Bwererani kuna ine.’ Mu usolo uno, tinapfundza kuti tinaphedza tani anthu anewa.
^ ndima 7 Madzina anango acinjwa.
^ ndima 15 Anango adasiya kutumikira Yahova asaphedzwa mukuphatisira misolo mingasi ya bukhu pitirizani kufuna Mulungu, mbwenye anango asaphedzwa mukuphatisira misolo mingasi ya bukhu Achegue-se a Jeová. Abale a komiti yakuyang’anira basa mu mpingo ndiwo anasankhula m’bale peno mulongo toera kucitisa pfundziro munthu akhadasiya kutumikira Yahova.
^ ndima 68 FOTO TSAMBA: Abale atatu akusiyana akuphedza m’bale m’bodzi wakuti asafuna kubwerera kuna Yahova. Iwo asacita pyenepi mukucedza naye mukuphatisira ntokodzi, mu kumpasa cinyindiro cakuti iye asafuniwa na kumbvesera mwadidi mu ndzidzi unalonga iye mabvero ace.
