NSOLO WA PFUNDZIRO 24
Calirani Misampha ya Sathani!
‘Calirani misampha ya Dyabo.’—2 TIM. 2:26.
NYIMBO 36 Titsidzikize Ntimathu
PINAFUNA IFE KUPFUNDZA *
1. Sathani alandana tani na nyakusodza?
CIFUNO ca nyakusodza ndi kumanga nyama na nsampha wace peno kuipha. Iye asaphatisira misampha yakusiyana-siyana, kuphatanizambo nsampha ninga udalonga m’bodzi wa xamwali authambi a Yobe. (Yobe 18:8-10) Kodi nyakusodza asacitanji toera nyama imangwe na nsampha wace? Pakutoma iye asadziwa mwadidi nyama inasodza iye, mbuto inapita na iyo, pinthu pinakomerwa na iyo kudya na nsampha wakuti anakwanisa kuuphatisira toera kuimanga. Munjira ibodzi ene, Sathani ndi ninga nsodzi unoyu. Iye asatipfundza. Iye asadziwa mbuto zinafamba ife na pinthu pinakomerwa na ife. Buluka penepo, iye asateya nsampha wakuti anakwanisa kutimanga nawo mwakukhonda dziwa. Mbwenye Bhibhlya isatipasa cinyindiro cakuti ife tingamangwa na misampha ya Sathani, ndi pyakukwanisika kusudzuka. Pontho iyo isatipfundzisa kuti tinacalira tani misampha ineyi.
Kudzikuza na ntima wakufuna pyonsene ndi misampha miwiri yakuti Sathani asaiphatisira kakamwe (Onani ndima 2) *
2. Ndi misampha ipi miwiri yakuti Sathani asaiphatisira kakamwe?
2 Misampha miwiri yakuti Sathani asaiphatisira kakamwe ndi kudzikuza na ntima wakufuna pyonsene. * Sathani asaphatisira kakamwe misampha ineyi kutomera kale mpaka lero. Iye ndi ninga nyakusaka mbalame wakuti asateya misampha toera kuzimanga. (Masal. 91:3) Mbwenye ife tinakwanisa kucalira misampha ya Sathani. Thangwi yanji? Thangwi Yahova asatipanga misampha yonsene inaphatisira Sathani.—2 Akor. 2:11.
Pitsandzo pinagumanika m’Bhibhlya pinatiphedza toera kuona kuti tinacalira tani misampha ya Dyabo (Onani ndima 3) *
3. Thangwi yanji Yahova alembesa pitsandzo m’Bhibhlya pya atumiki ace akuti akhali akudzikuza na a ntima wakufuna pyonsene?
3 Yahova asatipfundzisa kuti tinacalira tani kudzikuza na ntima wafuna pyonsene mukutipanga pidacitika na atumiki ace anango, natenepa ife tinakwanisambo kucalira madodo mabodzi ene. Tendeni tione kuti Sathani amanga tani atumiki anango a Yahova akuti antumikira mu pyaka pizinji. Kodi pyenepi pisabveka kuti ife nee tinakwanisa kucalira kudzikuza na ntima wakufuna pyonsene? Nkhabe. Thangwi Yahova alembesa pitsandzo pyenepi m’Bhibhlya “toera kuticenjeza.” (1 Akor. 10:11) Iye asadziwa kuti ife tinakwanisa kupfundza kubulukira mu pitsandzo pyenepi mbaticalira misampha ya Sathani.
KUDZIKUZA NDI NSAMPHA
Onani ndima 4
4. Ninji pinafuna kucitika kuna ife tingakhala akudzikuza?
4 Sathani asafuna kuti tikhale akudzikuza. Thangwi iye asadziwa kuti tingakhala akudzikuza tinakhala ninga iye, pontho tinaluza umaso wakukhonda mala. (Mis. 16:18) Na thangwi ineyi, mpostolo Paulu acenjeza kuti munthu anakwanisa “kudzikuza kakamwe mbatongwa munjira ibodzi ene ninga mudatongerwa Dyabo.” (1 Tim. 3:6, 7) Pyenepi pinakwanisa kucitika kuna ife tonsene, mwakukhonda tsalakana khala ndife apswa mu undimomwene peno tisatumikira Yahova mu pyaka pizinji.
5. Mwakubverana na Koelete 7:16, 20, munthu wakudzikuza asacitanji?
5 Munthu wakudzikuza asaona kuti ndi wakufunika kakamwe kupiringana anango. Sathani asayesera kuticitisa kunyerezera basi ene pinafuna ife mbatikhonda kunyerezera pinafuna Yahova, makamaka mu ndzidzi unathimbana ife na nyatwa. Mwacitsandzo, kodi imwe mwapambizirwa kale pinthu pyakuti nee mwapicita? Kodi alipo adakutsalakanani mwakusowa ulungami? Sathani asakomerwa angaona kuti mwaipirwa na Yahova peno na abale na alongo anu. Kusiyapo pyenepi, Sathani asafuna kuti imwe mucite pinthu mwakubverana na pinafuna imwe m’mbuto mwakubvera pitsogolero pya Yahova pinagumanika m’Bhibhlya.—Lerini Koelete 7:16, 20.
6. Tisapfundzanji na citsandzo ca mulongo unango wa ku Holanda?
6 Onani citsandzo ca mulongo unango wa ku Holanda wakuti akhadaipirwa thangwi ya pinthu pikhadancitira anango. Iye akhadatonga kukhonda cedza pontho na anthu anewa. Iye alonga: “Ine ndapibva kuti ndikhali ndekhene, pontho nee ndikhafunabve kulekerera abale na alongo anewa. Ine ndapanga mamunanga toera ticinje mpingo.” Buluka penepo iye aona JW Broadcasting wa mwezi wa Março wa 2016. Broadcasting ineyi yapereka maonero akuti tinatsalakana tani madodo a anango. Mulongo unoyu athimiza: “Ndaona kuti ndikhafunika kukhala wakucepeseka mbandinyerezera madodo anacita ine, m’mbuto mwakunyerezera madodo anacita abale na alongo mu mpingo. Pontho Broadcasting ineyi yandiphedza toera kunyerezera kakamwe Yahova na utongi wace.” Tisapfundzanji na citsandzo ca mulongo unoyu? Mungathimbana na nyatwa pitirizani kunyerezera Yahova. Mphembeni toera akuphedzeni kuona anthu anango ninga munaonera iye. Yahova asaona madodo anacita anthu anewa, ngakhale tenepo iye asaalekerera. Natenepa iye asafuna kuti imwe mucitembo pibodzi pyene.—1 Juwau 4:20.
Onani ndima 7
7. Ninji pidacitika kuna Mambo Uziya?
7 Thangwi yakudzikuza, Mambo Uziya wa ku Yuda akhonda kubvera uphungu udapaswa iye na anango mbacita pinthu pyakuti nee atawiriswa. Mambo Uziya acita pinthu pizinji pyadidi. Mwacitsandzo, iye awina nkhondo zizinji, amanga mizinda mizinji, pontho akhali na minda mizinji. Pyenepi pisapangiza kuti ‘Mulungu wandimomwene amphedza toera pinthu pinfambire mwadidi.’ (2 Pya dziko. 26:3-7, 10) Mbwenye Bhibhlya isalonga kuti: ‘Pidakhala iye wamphambvu, adzakhala wakudzikuza kakamwe, kwakuti kwamphekesa.’ Yahova akhadalonga kale kuti basi ene anyantsembe ndiwo akhafunika kupereka insenso mu templo. Mbwenye mwakudzikuza Mambo Uziya aenda mu templo toera kupereka ntsembe. Na thangwi ineyi, Yahova aipirwa kakamwe mbacitisa mamuna unoyu wakudzikuza kukhala na matanya. Uziya akhala na matanya anewa mpaka kufa kwace.—2 Pya dziko. 26:16-21.
8. Kodi lemba ya 1 Akorinto 4:6, 7, inatiphedza tani toera kucalira kudzikuza?
8 Kodi pinakwanisika kuna ife kukhala akudzikuza mbaticita madawo ninga adacita Uziya? Onani citsandzo ca José iye akhakwanisa kucita malonda munjira yadidi kakamwe, pontho akhali nkulu wa mpingo wakuti akhalemedzwa na abale na alongo mu mpingo. Iye akhacita nkhani pa misonkhano ya cisa na ya gawo, pontho ayang’aniri a cisa akhan’nyindira kakamwe. Iye alonga: “Ine ndasiya kunyindira Yahova, mbanditoma kunyindira udziwisi wanga na maluso anga. Ine ndikhanyerezera kuti ndine wakuwanga mwauzimu, natenepa nee ndikhabvera uphungu wa Yahova.” José acita madawo makulu mbabuluswa mu mpingo. Mbwenye mukupita kwa pyaka iye abwezereswa. Natenepa iye alonga: “Yahova andipfundzisa kuti cinthu cakufunika kakamwe nee ndi mbiri, mbwenye ndikucita pinatiphemba iye.” Natenepa tisafunika kukumbuka kuti maluso onsene ali na ife na miyai yonsene yakutumikira iri na ife mu mpingo tapaswa na Yahova. (Lerini 1 Akorinto 4:6, 7.) Tingakhala akudzikuza, Yahova nee anatiphatisira.
NTIMA WAKUFUNA PYONSENE NDI NSAMPHA
Onani ndima 9
9. Ndi pinthu pipi pidacita Sathani na Eva thangwi yakufuna pyonsene?
9 Sathani Dyabo ali na ntima wakufuna pinthu pyonsene. Pikhali iye anju wa Yahova, Sathani akhali na miyai mizinji yakutumikira. Mbwenye iye akhafuna pizinji kupiringana miyai ineyi. Iye akhafuna kuti anthu amulambire, m’mbuto mwakulambira Yahova. Sathani asafuna kuti tikhale ninga iye, na thangwi ineyi asayesera kuticitisa kufuna pinthu pizinji kupiringana pire piri na ife. Ulendo wakutoma udacita iye pyenepi, ndi mu ndzidzi udalonga iye na Eva. Mwaufuni, Yahova apasa Eva pabodzi na mamunace misapo ya miti yonsene toera adye, kusiyapo nsapo wa muti ubodzi. (Gen. 2:16) Mbwenye Sathani anyengerera Eva toera adye nsapo wa muti udakhondeswa iye. Pidadya Eva nsapo wa muti unoyu, iye apangiza kuti akhafuna pizinji kupiringana pidampasa Yahova. Pyenepi pyancitisa kudawa, pontho mukupita kwa ndzidzi mbafa.—Gen. 3:6, 19.
Onani ndima 10
10. Kodi Dhavidhi acitanji mu ndzidzi udakhala iye na ntima wakufuna pinthu pyonsene?
10 Ntima wakufuna pyonsene wacitisa Mambo Dhavidhi kuduwala pinthu pyonsene pidampasa Yahova ninga mpfuma, cidzo na kukunda anyamalwa ace azinji. Dhavidhi akhadziwa kuti nkhombo zidapaswa iye na Yahova zikhali ‘zizinji kakamwe toera kuzilonga.’ (Masal. 40:5) Mbwenye mukupita kwa ndzidzi Dhavidhi aduwala pinthu pyonsene pidampasa Yahova mbatoma kufuna pinthu pizinji. Maseze Dhavidhi akhali na akazi azinji, iye atoma kusirira nkazi wa ndzace. Nkazi unoyu akhali Bhatisebha mamunace akhali Uriya wa dzindza ya Eti. Dhavidhi apita m’mabonde na Bhatisebha mbakhala na mimba. Kusiyapo pyenepi, Dhavidhi acita masasanyiro toera kuphesa Uriya mamunace Bhatisebha. (2 Sam. 11:2-15) Thangwi yanji Dhavidhi acita pyenepi? Kodi iye akhanyerezera kuti Yahova nee akumuona? Maseze Dhavidhi atumikira Yahova mu pyaka pizinji, iye adzakhala na ntima wakufuna pyonsene, pontho pyenepi pyam’bweresera nyatwa zizinji. Mbwenye mukupita kwa ndzidzi, Dhavidhi abweka madawo ace mbatcunyuka. Iye apereka takhuta kakamwe thangwi yakulekererwa madawo ace na Yahova.—2 Sam. 12:7-13.
11. Mwakubverana na Aefesi 5:3, 4, ninji cinafuna kutiphedza toera kukunda ntima wakufuna pyonsene?
11 Tisapfundzanji na pinthu pidacita Dhavidhi? Tisapfundza kuti tingapereka takhuta kakamwe thangwi ya pinthu pyonsene pinatipasa Yahova tinakwanisa kukunda ntima wakufuna pyonsene. (Lerini Aefesi 5:3, 4.) Ife tisafunika kukomerwa na pinthu piri na ife. Tingapfundzisa anthu Bhibhlya tisafunika kuaphedza toera anyerezere pinthu pyadidi pidaapasa Yahova mbapereka takhuta thangwi ya pinthu pyenepi. Angacita pyenepi ntsiku zonsene pa sumana, pinapangiza kuti apereka takhuta thangwi ya pinthu pinomwe pyakusiyana-siyana. (1 Ates. 5:18) Kodi imwe musacita pyenepi? Mungakwanisa kunyerezera pinthu pyonsene pinacita Yahova kuna imwe, pyenepi pinakuphedzani toera kupereka takhuta kakamwe kuna iye. Pontho mungapereka takhuta kakamwe, munakomerwa na pinthu piri na imwe. Natenepa, mungakomerwa na piri na imwe munakwanisa kukunda ntima wakufuna pyonsene.
Onani ndima 12
12. Kodi Yuda Iskaryote acitanji thangwi ya kukhala na ntima wakufuna pyonsene?
12 Ntima wakufuna pyonsene wacitisa Yuda Iskaryote kucita pinthu pyakuipa kakamwe mbasandukira Yezu. Mbwenye pakutoma iye akhali munthu wadidi. (Luka 6:13, 16) Na thangwi ineyi, Yezu ansankhula ninga mpostolo. Pontho Yezu anyindira Yuda thangwi ndiye akhakoya kobiri. Yezu na apostolo akhaphatisira kobiri ineyi toera kuphedzera basa yakumwaza mphangwa. Kobiri ineyi ikhali ninga pyakupereka pinacita abale na alongo lero toera kuphedzera basa ya Mboni za Yahova inacitwa pa dziko yonsene yapantsi. Mbwenye mukupita kwa ndzidzi Yuda atoma kuba kobiri ineyi, mwakukhonda tsalakana cenjezo ya Yezu inalonga pya kucalira kufuna pyonsene. (Marko 7:22, 23; Luka 11:39; 12:15)
13. Ndi ndzidzi upi udapangiza Yuda pakweca kuti akhali na ntima wakufuna pyonsene?
13 Yuda Iskaryote apangiza kuti akhali na ntima wakufuna pyonsene Yezu mbadzati kuphiwa. Yezu na anyakupfundzace pabodzi na Mariya na Marta akhadacemerwa toera kadya kunyumba kwa Simau wakuti akhadawangiswa utenda wace wa matanya. Mu ndzidzi ukhadya iwo, Mariya akwata ntete wa mafuta akununkhira a ntengo ukulu kakamwe mbatoma kuatsanulira mu nsolo mwa Yezu. Yuda na anyakupfundza anango aipirwa kakamwe na pyenepi. Anyakupfundza anango ankhanyerezera kuti kobiri ineyi mbidaphatisirwa toera kuphedzera basa yakumwaza mphangwa, mbwenye Yuda akhali na maonero akusiyana thangwi iye “akhali mbava,” pontho akhafuna kuba kobiri ineyi. Mukupita kwa ndzidzi, thangwi yakufuna pyonsene Yuda asandukira Yezu mban’gulisa na kobiri.—Juwau 12:2-6; Mat. 26:6-16; Luka 22:3-6.
14. Kodi banja ibodzi yaphatisira tani uphungu unagumanika pa Luka 16:13?
14 Yezu apanga atowereri ace undimomwene uyu wakufunika kakamwe: “Imwe nee munakwanisa kukhala atumiki a Mulungu na a Mpfuma.” (Lerini Luka 16:13.) Mafala anewa asapitiriza kukhala andimomwene. Mwacitsandzo, onani kuti banja inango ya ku Romenya yaphatisira tani mafala anewa adalonga Yezu. Iwo akhadapangwa toera aende kaphate basa ya ndzidzi wakucepa mu dziko yakupfuma kakamwe. Iwo alonga: “Ife tikhali na mangawa mazinji kubhanko, natenepa pidapaswa ife basa ineyi tanyerezera kuti zenezi zikhali nkhombo za Yahova.” Mbwenye pakhali na pinentso. Basa ineyi mbidaacitisa kukhala na ndzidzi wakucepa toera kutumira Yahova. Mbwenye pidamala iwo kuleri nsolo wakuti “Mantenha a lealdade com um coração unificado” mu A Sentinela ya 15 de Agosto de 2008, iwo acita cisankhulo. Iwo alonga: “Khala cifuno cathu cakwenda ku dziko ineyi cikhali kuwina kobiri izinji, ife nee mbatidakwanisa kutumikira Yahova na ntima onsene. Pontho tadzindikira kuti uxamwali wathu na Yahova mbudafewa.” Natenepa iwo akhonda basa ineyi. Mphapo ninji pidacitika? M’bale agumana basa mu dziko yawo yakuti ikhaaphedza toera kutsalakana pinthu pyakufunika mu umaso wawo. Nkazi wa m’bale unoyu alonga: “Yahova ndzidzi onsene asaphedza atumiki ace.” Banja ineyi iri yakutsandzaya thangwi yasankhula kutumikira Yahova, tayu kobiri.
CALIRANI MISAMPHA YA SATHANI
15. Thangwi yanji tiri na cinyindiro cakuti tinakwanisa kucalira misampha ya Sathani?
15 Tisafunika kucitanji tingadzindikira kuti ndife akudzikuza, pontho tiri na ntima wakufuna pyonsene? Tisafunika kucalira misampha ineyi. Mpostolo Paulu alonga kuti ale ‘adamangwa na nsampha wa Dyabo’ anakwanisa kusudzuka. (2 Tim. 2:26) Pyenepi ndi pidacita Dhavidhi. Iye abvesera uphungu udapaswa iye na Natani, atcunyuka madawo ace mbakhala pontho na uxamwali wakuwanga na Yahova. Lekani kuduwala, Yahova ndi wamphambvu kakamwe kupiringana Sathani. Natenepa tingatawira ciphedzo ca Yahova ife tinakwanisa kucalira misampha yonsene ya Sathani.
16. Ninji pinafuna kutiphedza toera kucalira misampha ya Sathani?
16 Mwandimomwene, ife cipo tisafunika kukhala akudzikuza peno na ntima wakufuna pyonsene. Ife tinakwanisa kucita pyenepi basi ene na ciphedzo ca Mulungu. Natenepa tisafunika kucalira kunyindira mphambvu zathu toera kukunda kudzikuza na ntima wakufuna pyonsene. Thangwi atumiki anango a Yahova akhalambo akudzikuza na ntima wakufuna pyonsene. Natenepa citani phembero kuna Yahova ntsiku zonsene toera akuphedzeni kudzindikira khala ndimwe wakudzikuza peno muli na ntima wakufuna pyonsene. (Masal. 139:23, 24) Citani pyonsene pinakwanisa imwe toera kucalira kudzikuza na ntima wakufuna pyonsene.
17. Mwakukhonda dembuka, ninji pinafuna kudzacitika na nyamalwa wathu Dyabo?
17 Kutomera kale mpaka lero Sathani asakhala ninga nyakusodza. Mbwenye mwakukhonda dembuka iye anamangwa, pontho mukupita kwa ndzidzi anafudzwa. (Apok. 20:1-3, 10) Ife tisafuna kakamwe ntsiku ineyi ifike. Mbwenye ntsiku ineyi mbidzati kufika, pitirizani kucita mphole-mphole na misampha ya Sathani. Wangisirani kakamwe toera mukhonde kukhala wakudzikuza na ntima wakufuna pyonsene. Pontho khalani akutonga toera ‘kuida Sathani, pontho iye anadzakuthawani.’—Tiya. 4:7.
NYIMBO 127 Ndisafunika Kukhala Munthu wa Ntundu Wanji?
^ ndima 5 Sathani ndi ninga nyakusodza wa maluso. Iye asayesera kutimanga na misampha yace mwakukhonda tsalakana khala tisatumikira Yahova mu pyaka pizinji peno nkhabe. Mu nsolo uno, ife tinapfundza kuti Sathani asaphatisira tani kudzikuza na ntima wakufuna pyonsene toera kufudza uxamwali wathu na Mulungu. Tinapfundzambo na pitsandzo pya anthu angasi analongwa m’Bhibhlya akuti amangwa na nsampha wakudzikuza na ntima wakufuna pyonsene, pontho tinaona kuti tinacalira tani misampha ineyi.
^ ndima 2 MABVEKERO A MAFALA ANANGO: Nsolo uno unafokotoza thangwi yakudzikuza kwakuti ndi kupibva kukhala wakufunika kakamwe kupiringana anango, pontho unalonga thangwi ya ntima wakufuna pyonsene kwakuti ndi kufuna kakamwe kukhala na kobiri izinji, kufuna kakamwe kukhala wakudziwika, kufuna kakamwe kupita m’mabonde na pinthu pinango.
^ ndima 53 FOTO TSAMBA: Mwakudzikuza m’bale ali kukhonda uphungu wakufunika. Mulongo wakuti ali na pinthu pizinji m’manja mwace ali kufuna pinthu pinango.
^ ndima 55 FOTO TSAMBA: Kudzikuza kwacitisa anju wa Mulungu na Mambo Uziya kucita pinthu pyakuipa. Ntima wakufuna pyonsene wacitisa Eva kudya nsapo wa muti wakukhondeswa, wacitisa Dhavidhi kucita upombo na Bhatisebha, pontho wacitisa Yuda kuba kobiri.
