NSOLO WA PFUNDZIRO 22
Phedzani Anyakupfundza Anu a Bhibhlya Toera Abatizwe
“M’bodzi na m’bodzi wa imwe mbabatizwe.”—MABASA 2:38.
NYIMBO 72 Kudziwisa Undimomwene wa Umambo
PINAFUNA IFE KUPFUNDZA *
1. Kodi mwinji ukulu wa amuna na akazi adagumanyikana mu Yerusalemu mu ndzidzi wa apostolo apangwa toera acitenji?
MWINJI ukulu wa amuna na akazi akuti akhadabuluka m’madziko akusiyana-siyana na pilongero pyakusiyana-siyana akhadagumanyikana mu Yerusalemu. Cinthu cakudzumatirisa kakamwe cacitika pa ntsiku ineyi. Ayuda anango mwakukhonda dikhira atoma kulonga pilongero pya anthu anewa. Iwo adzumatirwa kakamwe na pinthu pyenepi. Mbwenye mphangwa zikhalonga Ayuda anewa na zidalonga mpostolo Pedhru kuna anthu onsene zikhali zakufunika kakamwe. Thangwi zaphedza anthu kubvesesa kuti iwo mbadapulumuswa angakhulupira Yezu Kristu. Mphangwa zenezi zakhuya kakamwe mitima ya anthu anewa. Buluka penepo, iwo abvundza: “Mphapo tisafunika kucitanji?” Pedhru aatawira mbaapanga kuti: “M’bodzi na m’bodzi wa imwe mbabatizwe.”—Mabasa 2:37, 38.
M’bale ali pabodzi na Nkazace mu ndzidzi unacitisa iye pfundziro ya Bhibhlya m’phale wakuti ali na bukhu Tsandzayani na Umaso wa Kwenda na Kwenda! (Onani ndima 2)
2. Tinadinganji mu nsolo uno? (Onani foto iri patsamba yakutoma.)
2 Pa ntsiku ineyi anthu cifupi na 3.000 abatizwa mbakhala anyakupfundza a Yezu, pyenepi pikhali pyakudzumatirisa kakamwe. Pontho pyenepi pyapangiza kutoma kwa basa ikulu yakucita anyakupfundza idasiya Yezu kuna atowereri ace. Basa ineyi isacitwa mpaka lero. Mbwenye ife lero nee tisacedza na munthu m’midzidzi yakucepa buluka penepo mbabatizwa. Toera munthu abatizwe ife tisapfundza naye Bhibhlya miyezi peno kupiringana caka. Khala imwe musacitisa pfundziro ya Bhibhlya, imwe musadziwa kuti tisafunika kuwangisira kakamwe toera kuphedza munthu kuti akhale nyakupfundza wa Kristu. Mu nsolo uno, ife tinadinga kuti musafunika kucitanji toera kuphedza nyakupfundza wanu wa Bhibhlya kuti abatizwe.
PHEDZANI NYAKUPFUNDZA WANU WA BHIBHLYA TOERA APHATISIRE PINAPFUNDZA IYE
3. Mwakubverana na Mateu 28:19, 20, nyakupfundza Bhibhlya asafunika kucitanji toera abatizwe?
3 Nyakupfundza Bhibhlya mbadzati kubatizwa, iye asafunika kuphatisira pinthu pinapfundza iye m’Bhibhlya. (Lerini Mateu 28:19, 20.) Nyakupfundza Bhibhlya angaphatisira pinapfundza iye, asakhala ninga “munthu wandzeru” adalonga Yezu mu nsangani wace adamanga nyumba yace pa mwala. (Mat. 7:24, 25; Luka 6:47, 48) Mphapo tinaphedza tani nyakupfundza Bhibhlya toera aphatisire pinapfundza iye? Tendeni tione pinthu pitatu pisafunika ife kucita.
4. Tinaphedza tani nyakupfundza Bhibhlya toera awangisire kuti abatizwe? (Onani bokosi ya nsolo wakuti “ Phedzani Nyakupfundza Wanu Toera Kukhala na Pifuno Mbapikwanirisa.”)
4 Phedzani nyakupfundza wanu toera akhale na pifuno. Thangwi yanji musafunika kucita pyenepi? Nyerezerani citsandzo ici: Khala imwe musafuna kuenda ulendo wakulapha, panango munacita masasanyiro toera kulimira m’mbuto zakubalika. Pyenepi pinakuphedzani toera mukhonde kukhala wakuneta mu ndzidzi unacita imwe ulendo unoyu. Munjira ibodzi ene, nyakupfundza wanu angakhala na pifuno mbapikwanirisa mu ndzidzi wakucepa, pyenepi pinamphedza toera kuona kuti anakwanisa kubatizwa. Phatisirani khundu yakuti “Cifuno canga” inagumanika m’bukhu ya nsolo wakuti Tsandzayani na Umaso Kwenda na Kwenda! toera kuphedza nyakupfundza wanu kuti akhale na pifuno. Pakumala kwa pfundziro ibodzi na ibodzi, cedzani na nyakupfundza wanu toera akwanise kuona kuti khundu ineyi ya cifuno inam’phedza tani toera kuphatisira pidapfundza iye. Khala imwe musafuna kuti nyakupfundza wanu akhazikise cifuno cinango, imwe munakwanisa kulemba pa khundu yakuti “Cinango.” Ndzidzi onsene phatisirani khundu ineyi toera kuona pifuno pyakuti nyakupfundza wanu anakwanisa kupikwanirisa mu ndzidzi wakucepa na pire pyakuti anakwanisa kupikwanirisa mu ndzidzi uzinji.
5. Mwakubverana na Marko 10:17-22, ninji pidalonga Yezu kuna mamuna wakupfuma toera acite, pontho thangwi yanji iye alonga pyenepi?
5 Phedzani nyakupfundza wanu toera acite macinjo. (Lerini Marko 10:17-22.) Yezu akhadziwa kuti mbipidakhala pyakunentsa kuna mamuna wakupfuma toera kugulisa pinthu pyace pyonsene. (Marko 10:23) Ngakhale tenepo, Yezu apanga mamuna unoyu toera acite pinthu pyenepi pyakuti pikhali pyakunentsa kakamwe mu umaso wace. Mphapo thangwi yanji Yezu ampanga toera kucita pyenepi? Thangwi iye akhanfuna. Midzidzi inango, panango ife tinanyinyirika kuphedza nyakupfundza kuti aphatisire pinapfundza iye thangwi yakunyerezera kuti nee ali dzololo toera kucita macinjo. Mbwenye ife tisafunika kudziwa kuti pisakwata ndzidzi toera anthu acinje umaso wawo mbabvala uunthu upswa. (Akol. 3:9, 10) Mbwenye mungaphedza mwakucimbiza nyakupfundza wanu toera acite macinjo, iye anakwanisambo kucita macinjo anewa mwakucimbiza. Mungacita pyenepi munapangiza kuti musatsalakana mwadidi nyakupfundza wanu.—Masal. 141:5; Mis. 27:17.
6. Thangwi yanji tisafunika kubvundza nyakupfundza wathu pinanyerezera iye thangwi ya pinthu pinapfundza iye?
6 Ndi pyakufunika kakamwe kuna ife kucita mibvundzo kuna nyakupfundza wathu wa Bhibhlya toera kudziwa pinanyerezera iye thangwi ya pinthu pinapfundza iye. Kusiyapo pyenepi, mibvundzo ineyi inatiphedza toera kuona pinthu pinabvesesa nyakupfundza wathu na pinakhulupira iye. Mungacita pyenepi ndzidzi onsene unapfundza imwe, pinakhala pyakukhonda nentsa toera kulonga naye pinthu pyakuti ndi pyakunentsa kuna iye kutawira. Mu bukhu ya nsolo wakuti Tsandzayani na Umaso Kwenda na Kwenda! musagumanika mibvundzo mizinji yakuti inatiphedza toera kudziwa pinthu pinanyerezera nyakupfundza wathu. Mwacitsandzo, pa nsolo 04 pasagumanika mbvundzo uyu: “Musanyerezera kuti Yahova asapibva tani mungaphatisira dzinace?” Pontho mu nsolo 09 musagumanika mbvundzo uyu: “Ndi pinthu pipi pyakuti mbamudafuna kupiphemba?” Pakutoma panango pinakhala pyakunentsa kuna nyakupfundza wanu toera kutawira mibvundzo ineyi. Natenepa imwe munakwanisa kum’phedza toera anyerezere malemba na mafoto anagumanika m’bukhu ineyi.
7. Tinaphatisira tani pitsandzo pya abale na alongo anango mwakuphata ntima?
7 Nyakupfundza wanu angabvesesa macinjo asafunika iye kucita, phatisirani pitsandzo pya Akristu anango toera kum’phedza kuti acite macinjo anewa. Mwacitsandzo, khala nyakupfundza wanu pisan’nentsa toera kugumanika pa misonkhano masumana onsene, imwe munakwanisa kumpangiza vidhyu ya nsolo wakuti Jeová cuidou de mim inagumanika pa nsolo 14 pa khundu yakuti “Toera Kudziwa Pizinji.” Misolo mizinji ya bukhu Tsandzayani na Umaso Kwenda na Kwenda!, munakwanisa kugumana pinthu pidacitika na abale na alongo pa khundu yakuti “Dziwani Pizinji” peno “Toera Kudziwa Pizinji.” * Mbwenye imwe musafunika kucita mphole-mphole toera mukhonde kulandanisa nyakupfundza wanu na munthu unango mukulonga kuti “khala iye akwanisa kucita pyenepi, iwe unakwanisambo.” Siyani nyakupfundza wanu kuti akwanise kuona pyenepi ekhene. Kusiyapo pyenepi, longani pinthu pyakufunika pidaphedza munthu analongwa mu vidhyu toera aphatisire pinapfundzisa Bhibhlya. Panango imwe munakwanisa kulonga lemba peno cinthu cakufunika kakamwe cidaphedza munthu unoyu. Pontho gomezerani kuti Yahova aphedza tani munthu unoyu.
8. Tinaphedza tani nyakupfundza wathu toera afune Yahova?
8 Phedzani nyakupfundza wanu toera afune Yahova. Mphapo munacita tani pyenepi? Khalani na ndzidzi toera kuphedza nyakupfundza wanu kuti adziwe mwadidi makhaliro a Yahova. Kusiyapo pyenepi, phedzani nyakupfundza wanu toera abvesese kuti Yahova ndi Mulungu wakutsandzaya, pontho asaphedza ale ananfuna. (1 Tim. 1:11; Aheb. 11:6) Phedzani nyakupfundza wanu toera adziwe kuti angaphatisira pinthu pinapfundza iye, pinthu pinanfambira mwadidi. Pontho udidi unoyu unafuna kukhala na iye unapangiza kuti asafuniwa na Yahova. (Iza. 48:17, 18) Munjira inango, dziwani kuti nyakupfundza wanu angafuna kakamwe Yahova, pyenepi pinam’phedza toera acite macinjo akufunika mu umaso wace.—1 Juwau 5:3.
PANGIZANI NYAKUPFUNDZA WANU ABALE NA ALONGO ANANGO
9. Mwakubverana na Marko 10:29, 30, ninji cinafuna kuphedza munthu toera acite macinjo mbabatizwa?
9 Toera nyakupfundza wanu wa Bhibhlya athambaruke mpaka kubatizwa, iye asafunika kuwangisira kakamwe. Ninga mamuna wakupfuma adalongwa mu ndima zakutoma, anyakupfundza anango asafunika kusiya pinthu pya mpfuma. Khala mabasa anacita iwo nee asabverana na midida ya Bhibhlya, iwo asafunika kusaka mabasa anango. Anyakupfundza anango azinji asasiya kucita uxamwali na anthu akuti nee asafuna Yahova. Anango asakhondiwa na acibale awo akuti nee asakomerwa na Mboni za Yahova. Yezu alonga kuti kuna anthu anango mbipidakhala pyakunentsa kakamwe toera kucita macinjo anewa. Mbwenye iye apikira kuti ale anantowera cipo anadzaphatiswa mwala. M’mbuto mwace, Yahova anadzaapasa nkhombo yakukhala na abale na alongo azinji pakati pa atumiki ace. (Lerini Marko 10:29, 30.) Mphapo munaphedza tani nyakupfundza wanu wa Bhibhlya toera akhale na nkhombo zenezi?
10. Mwapfundzanji na pinthu pidacitikira Manuel?
10 Khalani xamwali wa nyakupfundza wanu. Ndi pyakufunika kakamwe kuna nyakupfundza wanu toera adziwe kuti imwe musantsalakana. Thangwi yanji? Onani pidalonga Manuel anakhala ku Mexiko. Iye asakumbuka pinthu pikhacita mpfundzisi wace, natenepa iye alonga: “Ndzidzi onsene mbatidzati kutoma kupfundza, iye akhasaka kudziwa kuti ndiri tani. Pyenepi pikhandiphedza toera kukhala wakusudzuka mbandimpanga pinthu pikhandinentsa. Natenepa ndikhabvesesa kuti iye akhanditsalakana.”
11. Ndi maphindu api anafuna kukhala na anyakupfundza athu tingakhala na ndzidzi wakucedza nawo?
11 Khalani na ndzidzi toera kucedza na nyakupfundza wanu ninga pikhacita Yezu. (Juwau 3:22) Khala ndi pyakuthema, cemerani nyakupfundza wanu wa Bhibhlya wakuti ali kuthambaruka toera kudzadya naye pabodzi kunyumba kwanu peno kuona naye pabodzi vidhyu ya broadcasts. Panango nyakupfundza wanu anakomerwa kakamwe mungancemera mu ndzidzi wakuti acibale ace akucita maphwando a kudziko. Kazibwe anakhala ku Uganda alonga: “Ine ndapfundza pinthu pizinji kakamwe thangwi ya Yahova mu ndzidzi ukhacedza ine na mpfundzisi wanga wa Bhibhlya ninga pikhacita ife pa pfundziro yathu ya Bhibhlya. Ine ndakwanisa kuona kuti Yahova asatsalakana mwadidi kakamwe atumiki ace, pontho iwo asakhala akutsandzaya. Pyenepi ndi pinthu pikhafuna ine mu umaso wanga.”
Mungaenda na amwazi mphangwa akusiyana-siyana ku pfundziro yanu, pyenepi pinaphedza nyakupfundza wanu wa Bhibhlya toera agumanike pa misonkhano (Onani ndima 12) *
12. Thangwi yanji tisafunika kuenda na amwazi mphangwa akusiyana-siyana ku pfundziro ya Bhibhlya?
12 Phembani amwazi mphangwa akusiyana-siyana toera muende nawo pabodzi ku pfundziro yanu. Midzidzi inango, panango tinaona kuti pyakwana kuenda tekhene ku pfundziro yathu peno kuenda na mwazi mphangwa m’bodzi ene. Maseze tinaona kuti njira ineyi ndi yakukhonda nentsa kuna ife, nyakupfundza wathu wa Bhibhlya anapfundza pizinji kakamwe tingaenda kapfundza naye na amwazi mphangwa akusiyana-siyana. Dmitrii anakhala ku Moldova alonga: “Amwazi mphangwa onsene akhabwera pabodzi na mpfundzisi wanga wa Bhibhlya, akhafokotoza pinthu munjira yakusiyana. Pyenepi pyandiphedza toera kuona kuti ndinaphatisira tani pinthu pikhapfundza ine. Pontho pyenepi pyandiphedza toera ndikhonde kukhala wamanyadzo kakamwe mu ndzidzi udatoma ine kugumanika pa misonkhano thangwi ndikhadadziwana kale na abale na alongo azinji.”
13. Thangwi yanji tisafunika kuphedza nyakupfundza wathu toera agumanike pa misonkhano?
13 Phedzani nyakupfundza wanu wa Bhibhlya toera agumanike pa misonkhano. Thangwi yanji musafunika kucita pyenepi? Thangwi misonkhano isacita khundu ya ulambiri wathu, pontho Yahova asafuna kuti atumiki ace acite pyenepi. (Aheb. 10:24, 25) Kusiyapo pyenepi, abale na alongo mu mpingo asakhala ninga acibale athu. Tingakhala pabodzi na iwo pa misonkhano, pisakhala ninga tiri panyumba, pontho tiri kudya pabodzi cakudya cadidi. Imwe mungaphedza nyakupfundza wanu wa Bhibhlya toera agumanike pa misonkhano, pyenepi pinamphedza kakamwe toera athambaruke mbabatizwa. Mbwenye panango pinakhala pyakunentsa kwa iye toera agumanike pa misonkhano. Mphapo bukhu yakuti Tsandzayani na Umaso Kwenda na Kwenda! inaphedza tani nyakupfundza wanu wa Bhibhlya toera akunde pinentso pyonsene pinathimbana na iye?
14. Tinaphedza tani nyakupfundza wathu wa Bhibhlya toera agumanike pa misonkhano?
14 Phatisirani nsolo 10 wa bukhu yakuti Tsandzayani na Umaso Kwenda na Kwenda! toera kuphedza nyakupfundza wanu. Bukhu ineyi mbidzati kubuluswa, amwazi mphangwa anango aphembwa toera kuphatisira nsolo unoyu kuna anyakupfundza awo. Pontho iwo alonga kuti nsolo unoyu waphedza anyakupfundza awo a Bhibhlya toera kugumanika pa misonkhano. Mbwenye lekani kudikhira kuti mufike pa nsolo 10 toera kucemera nyakupfundza wanu wa Bhibhlya kuti agumanike pa misonkhano. Mpangeni mwakucimbiza toera agumanike pa misonkhano, pontho citani pyenepi ndzidzi onsene. Nyakupfundza Bhibhlya m’bodzi na m’bodzi asathimbana na nyatwa zace. Natenepa dziwani mwadidi nyatwa zinathimbana na nyakupfundza wanu, pontho m’phedzeni. Lekani kubwerera nduli mungaona kuti nyakupfundza wanu akunyinyirika toera agumanike pa misonkhano. Khalani wakupirira, pontho pitirizani kumphedza toera agumanike pa misonkhano.
PHEDZANI NYAKUPFUNDZA WANU WA BHIBHLYA TOERA AKHONDE KUGOPA
15. Ndi pinthu pipi pyakuti panango nyakupfundza wanu anapigopa?
15 Kodi imwe mukhagopa kukhala m’bodzi wa Mboni za Yahova? Panango imwe mukhaona kuti nee mbamudakwanisa kumwaza mphangwa nyumba na nyumba. Kusiyapo pyenepi, panango imwe mukhagopa kuti acibale anu peno axamwali anu mbadakutcingani. Khala imwe mukhali na mabvero ninga anewa, dziwani kuti nyakupfundza wanu wa Bhibhlya anakwanisambo kukhala na mabvero mabodzi ene. Yezu alonga kuti anthu anango mbadakhala na mabvero anewa akugopa. Mbwenye iye apanga anyakupfundzace kuti aleke kusiya kutumikira Yahova thangwi ya kugopa. (Mat. 10:16, 17, 27, 28) Kodi Yezu aphedza tani anyakupfundzace toera akhonde kugopa? Kodi imwe munatowezerambo tani citsandzo cace?
16. Munaphedza tani nyakupfundza wanu toera kulonga kuna anthu anango pinthu pinapfundza iye?
16 Mwapang’ono-pang’ono phedzani nyakupfundza wanu toera alonge kuna anango pinthu pinapfundza iye. Panango anyakupfundza a Yezu agopa mu ndzidzi udaatuma iye toera kamwaza mphangwa. Mbwenye Yezu aaphedza mukuapanga mbuto ikhafuna kamwaza iwo mphangwa na pinthu pikhafuna kulonga iwo. (Mat. 10:5-7) Munatowezerambo tani citsandzo ca Yezu? Phedzani nyakupfundza wanu toera adziwe kuti ndi ndzidzi upi wakuti anakwanisa kumwaza mphangwa. Mwacitsandzo, mbvundzeni khala asadziwa munthu wakuti asafuna kupfundza Bhibhlya. Buluka penepo mphedzeni toera akhunganyike pinthu pya m’Bhibhlya pisafunika iye kulonga kuna munthu unoyu. Khala ndi pyakuthema, phatisirani makhundu akuti: “Anango Asalonga” na “Panango Anango Anabvundza” anagumanika m’bukhu yakuti Tsandzayani na Umaso Kwenda na Kwenda! Mungacita pyenepi, munaphedza nyakupfundza wanu toera aphatisire Bhibhlya pakupereka matawiro.
17. Tinaphatisira tani lemba ya Mateu 10:19, 20, 29-31 toera kuphedza nyakupfundza wathu kuti anyindire Yahova?
17 Phedzani nyakupfundza wanu toera anyindire Yahova. Yezu apanga anyakupfundzace kuti Yahova mbadaaphedza thangwi iye asaafuna kakamwe. (Lerini Mateu 10:19, 20, 29-31.) Natenepa panganimbo nyakupfundza wanu kuti Yahova anam’phedzambo. Imwe munakwanisa kumphedza kuti anyindire Yahova mukucita phembero pabodzi na iye thangwi ya pifuno pyace. Franciszek wakuti asakhala ku Polonya alonga: “Kazinji kene mpfundzisi wanga akhalonga pifuno pyanga m’maphembero ace. Pidaona ine kuti Yahova atawira maphembero a mpfundzisi wanga, ine ndatomambo kucita phembero. Ine ndakwanisa kuona ciphedzo ca Yahova mu ndzidzi udaphemba ine patrau wanga toera andipase ndzidzi kuti ndigumanike pa misonkhano ya mpingo na ya gawo.”
18. Ndi mabvero api asakhala na Yahova thangwi ya basa inacita abale na alongo yakupfundzisa anthu?
18 Yahova asatsalakana kakamwe anyakupfundza athu a Bhibhlya. Yahova asakomerwa kakamwe na abale na alongo thangwi yakuwangisira kwawo kuphedza anthu kuti akhale na uxamwali wakuwanga na iye, pontho iye asaafuna kakamwe thangwi ya basa ineyi inacita iwo. (Iza. 52:7) Khala imwe nee musacitisa pfundziro ya Bhibhlya cincino, imwe munakwanisa kuphedza anyakupfundza a Bhibhlya toera kuthambaruka mpaka kubatizwa mungaenda na amwazi mphangwa anango ku mapfundziro awo a Bhibhlya.
NYIMBO 60 Pisabveka Umaso Wawo
^ ndima 5 Nsolo uno unafokotoza kuti Yezu aphedza tani anthu toera akhale anyakupfundzace, pontho tinatowezera tani citsandzo cace. Kusiyapo pyenepi, ife tinafokotozambo pinthu pinango pinagumanika m’bukhu ipswa ya nsolo wakuti Tsandzayani na Umaso Kwenda na Kwenda! Bukhu ineyi yacitwa toera kuphedza anyakupfundza Bhibhlya kuti athambaruke mpaka kubatizwa.
^ ndima 7 Imwe munakwanisambo kugumana pinthu pidacitika na abale na alongo mu (1) Bukhu Yakufufudza ya Mboni za Yahova pa nsolo wakuti “Bhibhlya,” buluka penepo ndokoni pa nsolo ung’ono wakuti “Midida Yadidi,” pontho m’misolo ya Ncenjezi yakuti ‘Bhibhlya Isacinja Umaso wa Anthu’ peno (2) mu JW Library®, pa mídia, ndokoni pa khundu yakuti “Mibvundzo na Matawiro na Pyakugumana Napyo.”
^ ndima 62 FOTO TSAMBA: M’bale ali pabodzi na nkazace, pontho ali kucitisa pfundziro m’phale. Midzidzi inango, iye asaenda pabodzi na abale akusiyana-siyana ku pfundziro ya Bhibhlya.
