NSOLO WA PFUNDZIRO 27
‘Dikhirani Yahova’
‘Dikhirani Yahova; khalani acipapo na amphambvu.’—MASAL. 27:14.
NYIMBO 128 Pirirani Mpaka Kunkhomo
PINAFUNA IFE KUPFUNDZA *
1. (a) Ndi cidikhiro cipi cinatipasa Yahova? (b) ‘Kudikhira Yahova’ kusabvekanji? (Onani “Mabvekero a Mafala Anango.”)
YAHOVA asapereka cidikhiro cakutsandzayisa kakamwe kuna onsene anafuna iye. Mwakukhonda dembuka, iye anadzamalisa kutsukwala, kuduwala na kufa. (Apok. 21:3, 4) Kusiyapo pyenepi, iye anadzaphedza ‘anthu akukhurudzika’ ananyindira kuti Yahova anadzacinja dziko yapantsi kudza paraizu. (Masal. 37:9-11) Iye anadzacita pyenepi toera m’bodzi na m’bodzi wa ife akwanise kukhala na uxamwali wakuwanga kakamwe na iye kupiringana uli na ife lero. Mwandimomwene ceneci ndi cidikhiro cakutsandzayisa kakamwe. Mphapo ninji cinatipasa cinyindiro cakuti mapikiro a Mulungu anadzakwanirisika? Ndi thangwi yakuti ndzidzi onsene Yahova asacita pinalonga iye. Natenepa, ife tiri na mathangwi adidi toera ‘kudikhira Yahova.’ * (Masal. 27:14) Ife tinapangiza kuti tisadikhira Yahova tingadikhira mwakupirira na mwakutsandzaya kuti Mulungu anadzakwanirisa mapikiro ace.—Iza. 55:10, 11.
2. Ndi pinthu pipi pinacita Yahova lero?
2 Yahova apangiza kuti iye asakwanirisa mapikiro ace. Mwacitsandzo, m’bukhu ya Apokalipse, Yahova apikira kuti mu ntsiku zino iye mbadagumanya anthu a madziko onsene, a madzindza onsene na a pilongero pyonsene mu ulambiri wakucena. Lero, nsoka unoyu wakupambulika usadziwika ninga “mwinji ukulu.” (Apok. 7:9, 10) Maseze amuna, akazi na ana anacita khundu ya nsoka unoyu ndi a pa dziko yonsene yapantsi na a pilongero pyonsene, iwo asakhala mu ntendere na mwakubverana. (Masal. 133:1; Juwau 10:16) Anthu anewa anacita khundu ya mwinji ukulu asamwazambo mphangwa mwaphinga. Ndzidzi onsene iwo ali dzololo toera kulonga kuna ale anaabvesera pya cidikhiro cawo cakukhala mu dziko yadidi kakamwe. (Mat. 28:19, 20; Apok. 14:6, 7; 22:17) Khala imwe musacita khundu ya mwinji ukulu, mwakukhonda penula cidikhiro ceneci ca pinthu pyadidi kakamwe ndi cakufunika kakamwe kuna imwe.
3. Ninji pinafuna Sathani?
3 Sathani nee asafuna kuti mukhale na cidikhiro thangwi ya tsogolo yanu. Kusiyapo pyenepi, iye asafuna kuti mukhulupire kuti Yahova nee asakutsalakanani, pontho nee anakwanirisa mapikiro ace. Tingatawirisa kuti Sathani afudze cidikhiro cathu, ife tinaluza cipapo mbatisiya kutumikira Yahova. Ninga pinafuna kuona ife mu nsolo uno, Sathani Dyabo ayesera kufudza cidikhiro ca Yobe, pontho ayesera kuncitisa kuti asiye kutumikira Yahova.
4. Tinapfundzanji mu nsolo uno? (Yobe 1:9-12)
4 Mu nsolo uno, ife tinapfundza kuti Sathani ayesera tani kucitisa Yobe kuti asiye kukhala wakukhulupirika kuna Yahova. (Lerini Yobe 1:9-12.) Kusiyapo pyenepi, ife tinaonambo kuti tinapfundzanji na citsandzo ca Yobe, thangwi yanji tisafunika kukumbuka kuti Mulungu asatifuna, pontho kuti iye anadzakwanirisa mapikiro Ace.
SATHANI AYESERA KUCITISA YOBE KULUZA CIDIKHIRO
5-6. Ninji pidacitikira Yobe mu ndzidzi wakucepa?
5 Yobe akhali na umaso wadidi kakamwe. Iye akhali na uxamwali wakuwanga na Yahova, akhali na banja ikulu na yakutsandzaya, pontho akhali na mpfuma izinji. (Yobe 1:1-5) Mbwenye pa ntsiku ibodzi basi, Yobe aluza pinthu pyace pyonsene. Cakutoma, iye aluza pifuyo pyace. (Yobe 1:13-17) Buluka penepo, iye aferwa na anace onsene. Mwakukhonda penula, pyenepi pikhali pyakutsukwalisa kakamwe. Anyakubala asatsukwala kakamwe angaferwa na m’bodzi wa anawo. Natenepa, nyerezerani kutsukwala kudakhala na Yobe na nkazace pidabva iwo mphangwa zakuti anawo khumi afa. Na thangwi ineyi, Yobe apandula nguwo zace mbagwa pantsi!—Yobe 1:18-20.
6 Buluka penepo, Sathani acitisa Yobe kukhala na utenda wakugopswa kakamwe na wakupasa manyadzo. (Yobe 2:6-8; 7:5) Mbwenye mbadzati kugwerwa na nyatwa ineyi, anthu azinji akhalemedza Yobe, pontho iwo akhaenda kuna iye toera kaphemba uphungu. (Yobe 31:18) Mbwenye mu ndzidzi udagwerwa iye na nyatwa, iwo akhancalira. Iye akhacalirwa na abale ace, axamwali ace apantima, kuphatanizambo anyabasa ace.—Yobe 19:13, 14, 16.
Abale na alongo azinji lero asakwanisa kubvesesa mabvero akhali na Yobe mu ndzidzi ukhathimbana iye na nyatwa (Onani ndima 7) *
7. (a) Ndi pinthu pipi pidanyerezera Yobe thangwi ya nyatwa zikhathimbana na iye, mbwenye ndi pinthu pipi pidakhonda iye kucita? (b) Ndi mayesero api akuti panango Nkristu anathimbana nawo akulandana na pinaona ife pa foto?
7 Sathani akhafuna kuti Yobe akhulupire kuti Yahova akhadaipirwa na iye. Mwacitsandzo, Sathani aphatisira mphepo yamphambvu toera kufudza nyumba ikhali ana khumi a Yobe mu ndzidzi ukhacita iwo phwando. (Yobe 1:18, 19) Kusiyapo pyenepi, iye acitisambo moto kubuluka kudzulu mbufudza pifuyo pya Yobe kuphatanizambo akumbizi ace akhatsalakana pifuyo pyenepi. (Yobe 1:16) Nakuti Sathani aphatisira mphepo na moto buluka kudzulu, Yobe anyerezera kuti pyenepi pyabuluka kuna Yahova. Na thangwi ineyi, Yobe akhakhulupira kuti akhadatsukwalisa kakamwe Yahova. Ngakhale tenepo, Yobe nee atikana Babace wakudzulu. Yobe akhadziwa kuti mu pyaka pizinji Yahova akhadampasa nkhombo zizinji kakamwe. Natenepa iye aona kuti khala iye akhatawira pinthu pyadidi, akhafunikambo kutawira pinthu pyakuipa. Na thangwi ineyi iye alonga: ‘Dzina ya Yahova mbipitirize kusimbwa.’ (Yobe 1:20, 21; 2:10) Mafala anewa asapangiza kuti maseze Yobe aluza mpfuma yace, aferwa na anace, pontho aphatwa na utenda, iye apitiriza kukhala wakukhulupirika kuna Yahova. Mbwenye buluka penepo Sathani amuyesera munjira zinango.
8. Ndi njira ipi inango idaphatisira Sathani toera kuyesera Yobe?
8 Mukupita kwa ndzidzi Sathani aphatisira axamwali atatu a Yobe toera kuncitisa kunyerezera kuti iye ndi wakusowa basa. Amuna anewa apanga Yobe kuti iye ali kuthabuka thangwi acita pinthu pizinji pyakuipa. (Yobe 22:5-9) Kusiyapo pyenepi, iwo ayesera kucitisa Yobe kukhulupira kuti maseze awangisire kucita pinthu pizinji pyadidi, Mulungu nee anakomerwa na pinthu pyenepi. (Yobe 4:18; 22:2, 3; 25:4) Kusiyapo pyenepi, iwo ayesera kucitisa Yobe kunyerezera kuti Mulungu nee asanfuna, nee asantsalakana, pontho kutumikira kwace ndi kwakusowa basa. Mafala awo mbadacitisa Yobe kunyerezera kuti iye nkhabebve cidikhiro.
9. Ninji cidaphedza Yobe toera kukhala wacipapo na wamphambvu?
9 Tendeni tinyerezere kuti Yobe akhala pa dotha, pontho ali kubva kupha kakamwe. (Yobe 2:8) Axamwali ace ali kupitiriza kulonga kuti iye nee ndi munthu wadidi, pontho pinthu pyonsene pinafuna kucita iye ndi pyakusowa basa. Mayesero ace akhali ninga ntolo wakulemera kakamwe mu ndzidzi wakuti iye ali wakutsukwala kakamwe thangwi yakuferwa na anace. Mbwenye pakutoma Yobe nee alonga cinthu. (Yobe 2:13–3:1) Khala amuna anewa akhanyerezera kuti kumatama kwa Yobe kukhapangiza kuti iye mbadasiya kulambira Yahova, iwo aphonyeka. Thangwi Yobe aayang’ana mbaapanga mwacipapo kuti: ‘Mpaka kufa kwanga, ine nee ndinasiya kukhala wakukhulupirika!’ (Yobe 27:5) Ninji cidaphedza Yobe toera kukhala wacipapo kakamwe na wamphambvu maseze akhathabuka? Ngakhale mu ndzidzi unoyu wa nyatwa, Yobe nee atawirisa kuti nyatwa zace zincitise kuluza cidikhiro cace cakuti Mulungu wace waufuni mbadam’phedza. Iye akhadziwa kuti ngakhale afe, Yahova mbadamulamusa muli akufa.—Yobe 14:13-15.
TINATOWEZERA TANI CITSANDZO CA YOBE?
10. Kodi citsandzo ca Yobe cisatipfundzisanji?
10 Citsandzo ca Yobe cisatipfundzisa kuti Sathani nee anakwanisa kutikakamiza toera tisiye kutumikira Yahova, pontho cisatipfundzisa kuti Yahova asadziwa pyonsene pinacitika. Kusiyapo pyenepi, citsandzo ca Yobe cinatiphedzambo toera kubvesesa mwadidi pinthu pyakufunika kakamwe. Tendeni tione kuti ndi pinthu pipi pinapfundza ife na citsandzo ca Yobe.
11. Ninji pinafuna kucitika tingapitiriza kunyindira Yahova? (Tiyago 4:7)
11 Yobe apangiza pakweca kuti ife tingapitiriza kunyindira Yahova, tinakwanisa kupirira mayesero onsene na kuida Sathani. Mphapo ninji pinafuna kucitika tingaida Sathani? Bhibhlya isatipasa cinyindiro cakuti Dyabo anadzatithawa.—Lerini Tiyago 4:7.
12. Cidikhiro cakulamuswa muli akufa caphedza tani Yobe?
12 Ife tisafunika kukhala na cikhulupiro cakuwanga thangwi ya cidikhiro cakulamuswa muli akufa. Ninga pidalongwa mu nsolo udamala, Sathani kazinji kene asaphatisira kugopa kufa toera kuticitisa kusiya kukhala akukhulupirika kuna Yahova. Kuna Yobe, Sathani alonga kuti iye mbadacita pyonsene, ngakhale kusiya kutumikira Yahova toera kupulumusa umaso wace. Mbwenye unoyu ukhali uthambi. Ngakhale kuti Yobe akhadziwa kuti mbadafa, iye apitiriza kukhala wakukhulupirika kuna Yahova. Kunyindira kwace udidi wa Yahova na cidikhiro cakuwanga cakuti Yahova mbadantsalakana pyam’phedza toera kupirira nyatwa. Yobe akhakhulupira kuti ngakhale Yahova akhonde kum’phedza mu ndzidzi ukhali iye m’maso, Iye mbadamulamusa muli akufa ntsogolo. Yobe akhakhulupira kakamwe cidikhiro cakulamuswa muli akufa. Ife tingakhulupira cidikhiro cakulamuswa muli akufa, nee tinatawirisa kuti kugopa kufa kuticitise kusiya kutumikira Yahova.
13. Thangwi yanji tisafunika kuonesesa mwadidi misampha idaphatisira Sathani kuna Yobe?
13 Ife tisafunika kuonesesa mwadidi misampha idaphatisira Sathani kuna Yobe thangwi iye asaphatisirambo misampha ibodzi ene kuna ife lero. Onani mafala adalonga Sathani kuna Yahova. Iye alonga: ‘Munthu anapereka pyonsene piri na iye toera kupulumusa umaso wace.’ (Yobe 2:4, 5) Na mafala anewa, Sathani apangiza kuti ife nee tisafuna kakamwe Yahova Mulungu, pontho ife tinasiya kuntumikira toera kupulumusa umaso wathu. Kusiyapo pyenepi, Sathani alonga kuti Mulungu nee asatifuna, pontho iye nee asaona kuwangisira kunacita ife toera kunkomeresa. Nakuti tisadziwa pinafuna Sathani, ife nee tinakhulupira uthambi unoyu.
14. Tinapfundzanji tingathimbana na nyatwa? Perekani citsandzo.
14 Ife tisafunika kuona nyatwa zinathimbana na ife ninga mwai toera kupfundza pinthu pinango thangwi ya ife ene. Nyatwa zidathimbana na Yobe zam’phedza toera kudzindikira makhundu anango akuti akhafunika kuasasanyira. Mwacitsandzo, iye adzindikira kuti akhafunika kukhala wakucepeseka kakamwe. (Yobe 42:3) Ife tinakwanisambo kupfundza pizinji thangwi ya ife ene tingathimbana na nyatwa. M’bale Nikolay * wakuti akhadaikhwa nkaidi maseze akhabva kupha kakamwe alonga: “Ndzidzi udakhala ine nkaidi wandiphedza toera kudzindikira makhaliro akuti ndikhafunika kuasasanyira.” Ife tingadzindikira makhundu anafunika ife kusasanyira, tinawangisira toera kuasasanyira.
15. Ife tisafunika kubvesera ani, pontho thangwi yanji?
15 Ife tisafunika kubvesera Yahova, tayu anyamalwa athu. Yobe abvesera mwadidi mu ndzidzi ukhalonga Yahova na iye. Yahova aphedza Yobe toera kunyerezera mukumpanga: ‘Waona mphambvu idaphatisira ine toera kucita pinthu pyonsene? Ine ndisadziwa pyonsene pinakucitikira. Iwe usanyerezera kuti ine nee ndinakwanisa kukutsalakana?’ Yobe atawira mwakucepeseka, pontho iye apereka takhuta kakamwe thangwi ya udidi wa Yahova. Iye alonga: ‘Ine ndabva kulonga pya imwe, mbwenye cincino, ine ndisakuonani na maso anga.’ (Yobe 42:5) Mu ndzidzi udalonga iye mafala anewa, Yobe akhali pa dotha, manungo ace onsene akhali na pironda, pontho akhali wakutsukwala kakamwe thangwi yakuferwa na anace. Ngakhale tenepo, Yahova apangiza kuti akhafuna Yobe, pontho kuti Yobe akhali wakutawirika kuna iye.—Yobe 42:7, 8.
16. Mwakubverana na Izaiya 49:15, 16, tisafunika kukumbukanji tingathimbana na nyatwa?
16 Lero, anthu panango anatitikana na kutitsalakana mwakusowa cilemedzo. Kusiyapo pyenepi, iwo panango anayesera kupswipisa makhaliro athu peno gulu yathu mbalonga ‘ntundu onsene wa pinthu pyakuipa thangwi ya ife.’ (Mat. 5:11) Citsandzo ca Yobe cisatipfundzisa kuti Yahova asadziwa kuti tinapitiriza kukhala akukhulupirika kuna iye maseze tithimbane na nyatwa. Yahova asatifuna, pontho iye cipo anasiya ale anan’dikhira. (Lerini Izaiya 49:15, 16.) Lekani kubvesera mafala authambi analonga anyamalwa a Mulungu. M’bale James wa ku Turquia wakuti banja yace yathimbana na nyatwa zakunentsa kakamwe alonga: “Ife tadzindikira kuti kubvesera mafala authambi analonga anthu thangwi ya atumiki a Mulungu mbakudatifewesa. Natenepa ife taikha cidikhiro cathu ku Umambo wa Mulungu mbatipiriza kukhala aphinga m’basa ya Yahova. Na thangwi ineyi ife tapitiriza kukhala akutsandzaya.” Ninga Yobe, ife tisabvesera Yahova. Uthambi unalonga anyamalwa athu nee unakwanisa kufudza cidikhiro cathu.
CIDIKHIRO CATHU CINATIPHEDZA
Yobe apaswa nkhombo thangwi ya kukhulupirika kwace. Iye pabodzi na nkazace akhala na umaso wakutsandzaya mu ndzidzi uzinji (Onani ndima 17) *
17. Tisapfundzanji na citsandzo ca amuna na akazi akukhulupirika analongwa m’bukhu ya Ahebheri kapitulu 11?
17 Yobe ndi m’bodzi wa atumiki a Yahova adapitiriza kukhala wacipapo na wamphambvu mu ndzidzi ukhathimbana iye na nyatwa. Mu tsamba idalemba mpostolo Paulu kuna Ahebheri, iye alonga pya atumiki anango azinji kuti ndi “nsoka ukulu wa amboni.” (Aheb. 12:1) Maseze atumiki anewa onsene athimbana na mayesero, iwo apitiriza kukhala akukhulupirika kuna Yahova. (Aheb. 11:36-40) Kodi kupirira kwawo na mabasa awo akhali apezi? Nkhabe. Maseze mu umaso wawo iwo nee aona kukwanirisika kwa mapikiro onsene a Mulungu, iwo apitiriza kudikhira Yahova. Nakuti iwo akhadziwa kuti akhali akutawirika kuna Yahova, iwo akhanyindira kuti mbadaona kukwanirisika kwa mapikiro ace. (Aheb. 11:4, 5) Citsandzo cawo cinakwanisambo kutiphedza toera tipitirize kudikhira Yahova.
18. Musafunika kuwangisira toera kucitanji? (Ahebheri 11:6)
18 Lero, ife tiri kukhala mu dziko yakuti makhaliro akuipa ali kutekera kakamwe. (2 Tim. 3:13) Pontho Sathani nee anasiya kuyesera atumiki a Mulungu. Ife tisadziwa kuti tinapitiriza kuthimbana na pinentso pizinji, natenepa tisafunika kuwangisira toera kukhala aphinga m’basa ya Yahova mbatikhala na cinyindiro cakuti ‘tisaikha cidikhiro cathu kuna Mulungu wa m’maso.’ (1 Tim. 4:10) Kumbukani kuti nkhombo zidadzakhala na Yobe zisapangiza kuti “Yahova ndi wakukoma ntima kakamwe na wantsisi.” (Tiya. 5:11) Natenepa, tendeni tipitirize kukhala akukhulupirika kuna Yahova mbatinyindira kuti iye anadzapasa nkhombo “ale anansaka na ntima onsene.”—Lerini Ahebheri 11:6.
NYIMBO 150 Sakani Mulungu Toera Mupulumuswe
^ Tinganyerezera munthu adapirira mayesero akusiyana-siyana, kazinji kene tisanyerezera Yobe. Tisapfundzanji na pinthu pidacitikira mamuna unoyu wakukhulupirika? Ife tisapfundza kuti Sathani nee anakwanisa kutikakamiza toera tisiye kutumikira Yahova. Pontho tisapfundza kuti Yahova ndzidzi onsene asadziwa pinthu pinaticitikira. Nakuti Yahova amalisa nyatwa zonsene zikhathimbana na Yobe, Iye anadzamalisambo nyatwa zonsene zinathimbana na ife. Tingapangiza na macitiro athu kuti tisanyindira mafala anewa, tiri mu nsoka wa ale ‘ananyindira Yahova’ na ntima onsene.
^ MABVEKERO A MAFALA ANANGO: Fala Yacihebheri yakuti ‘kudikhira’ isabveka kudikhira cinthu cinafuna ife kakamwe. Fala ineyi isabvekambo kunyindira munthu.—Masal. 25:2, 3; 62:5.
^ Madzina anango acinjwa.
