1-2. Ndi pinentso pipi pinathimbana na atumiki azinji a Yahova?

MPOSTOLO Paulu akulumiza Timoti kuphatanizambo Akristu onsene toera acite mwakukwana utumiki wawo. (2 Tim. 4:5) Natenepa, ife tisabvera uphungu wa Paulu mbaticita pyonsene pinakwanisa ife m’basa ya Yahova. Mbwenye m’midzidzi inango pisakhala pyakunentsa. Thangwi abale na alongo athu azinji asagopa kumwaza mphangwa. (2 Tim. 4:2) Mwacitsandzo, nyerezerani abale na alongo athu akuti asakhala mu dziko yakuti basa yathu isatcingwa peno isakhondeswa. Iwo asamwaza mphangwa, maseze asadziwa kuti panango anaikhwa nkaidi.

² Atumiki a Yahova asathimbana na nyatwa zizinji zakuti panango zisaafewesa. Mwacitsandzo, anango asaphata basa m’midzidzi mizinji toera akwanise kutsalakana mabanja awo. Iwo asafunambo kucita pizinji m’basa yakumwaza mphangwa, mbwenye nee asakhala na mphambvu zizinji pakumala kwa sumana. Anango nee asakwanisa kucita pizinji m’basa yakumwaza mphangwa thangwi ya utenda, kukalamba peno nee asakwanisa kubuluka panyumba. Pontho anango asapibva kuti nee ndi akufunika kuna Yahova. Mwacitsandzo, mulongo anacemerwa Mary * alonga: “Ine ndisawangisira kakamwe toera kukunda mabvero akuipa, pontho pyenepi pisandimala mphambvu. Na thangwi ineyi, ndisakhala na mabvero akupasika mulando mbandisowa mphambvu yakucita utumiki wanga mwakukwana.”

3. Tinapfundzanji mu nsolo uno?

³ Mwakukhonda tsalakana nyatwa zinathimbana na ife, Yahova anatipasa mphambvu toera tipitirize kuntumikira mwakubverana na makhaliro athu. Mbatidzati kuona kuti Yahova anatiphedza tani, cakutoma tendeni tione kuti iye aphedza tani Paulu na Timoti toera kucita mwakukwana utumiki wawo mwakukhonda tsalakana nyatwa zikhathimbana na iwo.

4. Ndi nyatwa zipi zidathimbana na Paulu?

⁴ Paulu athimbana na nyatwa zizinji kakamwe. Iye akhafuna kakamwe ciphedzo ca Yahova mu ndzidzi ukhamenywa iye, ukhaikhwa iye nkaidi ngakhale mu ndzidzi ukhafuna iye kuphiwa. (2 Akor. 11:23-25) Pontho iye alonga pakweca kuti midzidzi inango akhathimbanambo na mabvero akuipa. (Aroma 7:18, 19, 24) Kusiyapo pyenepi, iye apirira nyatwa inango yakuti ikhali ninga “munga m’manungo” mwace, pontho iye akhafuna kakamwe kuti Mulungu abuluse munga unoyu.—2 Akor. 12:7, 8.

5. Ndi pinthu pipi pikhacita Paulu maseze akhathimbana na nyatwa?

⁵ Yahova apasa mphambvu Paulu toera apitirize kucita utumiki wace mwakukhonda tsalakana nyatwa zikhathimbana na iye. Onani pinthu pingasi pidacita iye. Mwacitsandzo, mu ndzidzi ukhali iye nkaidi ku Roma, iye amwazira mphangwa atsogoleri Aciyuda, pontho pisaoneka kuti iye amwazirambo mphangwa akulu a mautongi. (Mabasa 28:17; Afil. 4:21, 22) Kusiyapo pyenepi, iye amwazirambo mphangwa Anyakuonera azinji a Mambo na ale onsene akhabwera kudzamuona. (Mabasa 28:30, 31; Afil. 1:13) Mu ndzidzi unoyu, Yahova aphatisira Paulu toera kulemba matsamba akuti akhaphedza Akristu a mu ndzidzi unoyu, pontho matsamba anewa asaphedzambo Akristu andimomwene lero. Kusiyapo pyenepi, citsandzo ca Paulu cawangisa mipingo ku Roma, natenepa abale ‘onsene akhapangiza cipapo kakamwe, mbalonga mafala a Mulungu mwakukhonda gopa.’ (Afil. 1:14) Maseze midzidzi inango Paulu nee akhakwanisa kucita pinthu pyonsene pikhafuna iye, iye awangisira kakamwe “toera mphangwa zadidi ziende kutsogolo.”—Afil. 1:12.

6. Mwakubverana na 2 Akorinto 12:9, 10, ninji pidaphedza Paulu toera kucita mwakukwana utumiki wace?

⁶ Paulu akhadziwa kuti akwanisa kucita pinthu pyonsene na ciphedzo ca Yahova, tayu na mphambvu zace. Pontho Paulu akhadziwa kuti mphambvu ya Mulungu ‘ikhapangizika mwakukwana thangwi yakufewa kwace.’ (Lerini 2 Akorinto 12:9, 10.) Mukuphatisira nzimu wace wakucena, Yahova apasa mphambvu Paulu toera kucita mwakukwana utumiki wace. Mwakukhonda tsalakana kutcingwa, kuikhwa nkaidi na pinentso pinango.

7. Ndi nyatwa zipi zakuti mbazidapingiza Timoti toera kucita mwakukwana utumiki wace?

⁷ Timoti wakuti akhaphata basa pabodzi na Paulu, akhanyindirambo kakamwe ciphedzo ca Yahova toera kucita mwakukwana utumiki  wace. Timoti aperekera Paulu m’maulendo mazinji aumisionaryo. Kusiyapo pyenepi, Paulu akhatumambo Timoti toera kacedzera mipingo. (1 Akor. 4:17) Panango Timoti akhala na mabvero akuti nee mbadakwanisa kucita basa ineyi. Panango ndi thangwi ineyi idacitisa Paulu kumpanga kuti: “Nee munthu m’bodzi asafunika kukupwaza thangwi yakukhala kwako m’phale.” (1 Tim. 4:12) Kusiyapo pyenepi, Timoti akhathimbanambo na nyatwa mu ndzidzi unoyu. Iye ‘akhaduwala kazinji kene.’ (1 Tim. 5:23) Mbwenye Timoti akhadziwa kuti nzimu wakucena wa Yahova mbudampasa mphambvu toera kumwaza mphangwa zadidi na kutumikira abale ace.—2 Tim. 1:7.

8. Yahova asapasa tani mphambvu atumiki ace lero?

⁸ Lero, Yahova asapasa mphambvu atumiki ace “yakupiringana yacibaliro” toera apitirize kuntumikira mwakukhulupirika. (2 Akor. 4:7) Cincino tendeni tione pinthu pinai pinatipasa Yahova pyakuti pisatipasa mphambvu toera kupitiriza kuntumikira mwakukhulupirika: Phembero, Bhibhlya, abale na alongo athu na utumiki wathu.

9. Kodi phembero inatiphedza tani?

⁹ Phembero. Ninga pidalemba Paulu pa Aefesi 6:18, iye asatikulumiza toera ticite phembero kuna Mulungu “ndzidzi onsene.” Yahova anatawira maphembero athu mukutipasa mphambvu. Jonnie, wakuti asakhala ku Bolivia, akwanisa kuona ciphedzo ceneci ca Yahova mu ndzidzi ukhathimbana iye na nyatwa zakusiyana-siyana. Nkazace pabodzi na anyakubalace aduwala kakamwe mu ndzidzi ubodzi ene. Natenepa, pikhali pyakunentsa kakamwe kuna Jonnie toera kutsalakana nkazace pabodzi na anyakubalace. Mai wace alowa, pontho papita ndzidzi uzinji toera nkazace na pai wace awange. Thangwi ya nyatwa zikhathimbana na iye Jonnie alonga: “Ndzidzi onsene ukhali ine wakudzudzumika, ndikhacita phembero kuna Yahova mbandimpanga pinthu pikhandinentsa.” Yahova apasa mphambvu Jonnie toera kupirira nyatwa zikhathimbana na iye. Ronald wakuti ndi nkulu wa mpingo wa ku Bolivia abva kuti mai wace ali na utenda wa cancêr. Pontho mukupita kwa ndzidzi iye alowa. Ninji pidaphedza Ronald toera kupirira nyatwa ineyi? Iye alonga: “Mu ndzidzi ukhacita ine phembero kuna Yahova, ndikhampanga mabvero anga onsene. Ine ndisadziwa kuti Yahova asandidziwa mwadidi kupiringana ine ene, pontho iye asandidziwa mwadidi kupiringana munjira inandidziwa anthu anango.” Midzidzi inango, panango ife tinapibva ninga nee tinakwanisa kupirira nyatwa zinathimbana na ife peno nee tisadziwa pinthu pinafuna kulonga ife m’phembero. Mbwenye Yahova asafuna kuti ticite phembero kuna iye ngakhale ticimwane kulonga mabvero athu.—Aroma 8:26, 27.

10. Mwakubverana na Ahebheri 4:12, thangwi yanji ndi pyakufunika kakamwe kuleri Bhibhlya na kunyerezera mwacidikhodikho pinaleri ife?

¹⁰ Bhibhlya. Paulu akhaleri Malemba toera kugumana mphambvu na cibalangazo, natenepa ife tisafunikambo kucita pibodzi pyene. (Aroma 15:4) Mu ndzidzi unaleri ife Bhibhlya na kunyerezera mwacidikhodikho, Yahova anakwanisa kuphatisira nzimu wace toera kutiphedza kugumana Malemba akuti asabverana na nyatwa inathimbana na ife. (Lerini Ahebheri 4:12.) Ronald adalongwa pa ndima 9 alonga: “Ndisapereka takhuta kakamwe thangwi cincino ndiri na nsambo wakuleri Bhibhlya ntsiku zonsene namasiku. Natenepa ine ndisakwanisa kunyerezera mwadidi makhaliro a Yahova na njira inatsalakana iye atumiki ace. Pyenepi pisandiphedza toera kukhala na mphambvu.”

11. Kodi Bhibhlya yaphedza tani mulongo adaferwa na mamunace?

¹¹ Tinganyerezera mwacidikhodikho pinaleri  ife m’Bhibhlya, pinatiphedza toera kukhala na maonero adidi thangwi ya nyatwa zinathimbana na ife. Onani kuti Bhibhlya yaphedza tani mulongo unango pidaferwa iye na mamunace. Nkulu wa mpingo unango am’phemba kuti aleri bukhu ya Yobe. Pidaleri iye bukhu ineyi, pakutoma anyerezera kuti Yobe akhali na maonero akuphonyeka. Thangwi Yobe akhanyerezera basi ene pya nyatwa zace. Mbwenye buluka penepo, mulongo unoyu adzindikira kuti iye akhali na manyerezero mabodzi ene ninga a Yobe. Pyenepi pyamphedza toera kucinja manyerezero ace, pontho pyampasa mphambvu toera kupirira nyatwa yakuferwa na mamunace.

12. Kodi Yahova asaphatisira tani abale na alongo athu toera kutipasa mphambvu?

¹² Abale na alongo athu. Njira inango inaphatisira Yahova toera kutipasa mphambvu ndi kubulukira kwa abale na alongo athu. Paulu alemba kuti iye akhafuna kakamwe kuti ‘awangisane cikhulupiro’ na abale na alongo ace. (Aroma 1:11, 12) Mary adalongwa mu ndima zidamala, asakomerwa kakamwe kukhala pabodzi na abale na alongo ace. Iye alonga: “Yahova aphatisira abale na alongo akuti nee akhadziwa nyatwa zanga. Iwo akhalonga pinthu pyakuwangisa na kunditumizira matsamba, pyenepi pikhali pyakufunika kakamwe kuna ine. Pontho pyandiphedza toera kucedza na alongo akuti athimbanambo na nyatwa zibodzi zene na pisandiphedza toera kuona kuti iwo acitanji toera kupirira nyatwa zenezi. Kusiyapo pyenepi, ndzidzi onsene akulu a mpingo asandicitisa kupibva kuti ndine wakufunika mu mpingo.”

13. Tinakwanisa tani kuwangisana unango na ndzace pa misonkhano?

¹³ Njira inango toera kuwangisana unango na ndzace ndi kugumanika pa misonkhano ya mpingo. Mungagumanika pa misonkhano, munakwanisa kuwangisa anango mukuapanga kuti musaafuna na kuasimba thangwi ya pinthu pinacita iwo. Mwacitsandzo, misonkhano mbidzati kutoma nkulu wa mpingo anacemerwa Peter apanga mulongo unango wakuti mamunace nee ndi Mboni ya Yahova kuti: “Ndi pyakutsandzayisa kakamwe kukuonani pano. Ndzidzi onsene imwe pabodzi na ananu atanthatu musakhala akukhunganyika toera kutawira pa misonkhano.” Iye apereka takhuta kakamwe mbalonga: “Mwandimomwene, mafala anewa andiwangisa kakamwe lero.”

14. Kodi utumiki wathu usatiphedza tani?

¹⁴ Utumiki wathu. Tingamwaza mphangwa kuna anango, tisakhala na mphambvu mwakukhonda tsalakana khala iwo asatibvesera peno nkhabe. (Mis. 11:25) Mulongo unango anacemerwa Stacy aona kuti basa yakumwaza mphangwa isawangisa kakamwe. Mu ndzidzi udabuluswa wacibale wace mu mpingo, iye atsukwala kakamwe mbabvundzika: ‘Kodi ine mbidakwanisa kucita cinthu toera kum’phedza?’ Pikhali pyakunentsa kakamwe kuna iye toera kuduwala pinthu pyenepi. Mphapo ninji pidamphedza toera kukunda cinentso ceneci? Ndi utumiki. Mu ndzidzi ukhamwaza iye mphangwa, iye akhaikha manyerezero ace basi ene kuna anthu a mucisa cace akuti akhafuna ciphedzo. Iye alonga: “Mu ndzidzi unoyu, Yahova andipasa nyakupfundza Bhibhlya wakuti athambaruka mwakucimbiza kakamwe. Pyenepi pyandiwangisa kakamwe. Cinthu cidandiphedza kakamwe ndi basa yakumwaza mphangwa.”

15. Mwapfundzanji na mafala adalonga Mary?

¹⁵ Thangwi ya makhaliro awo, anango asanyerezera kuti nee anakwanisa kucita pizinji mu utumiki. Khala imwe musanyerezera tenepo, kumbukani kuti Yahova asakomerwa na pire pinakwanisa imwe kucita. Onani citsandzo ca Mary adalongwa mu ndima zidamala. Pidafuluka iye mbaenda kucisa cinalongwa cilongero cinango, iye aona kuti nee akhakwanisa kucita pizinji mu utumiki wace. Iye alonga: “Ine ndamala ndzidzi ungasi basi ene mbanditawira  mwacigwagwa pa misonkhano, kuleri vesi ya Bhibhlya na kupereka tratadho mu utumiki.” Pyenepi pyancitisa kunyerezera kuti akhali wakukhonda thema mukulandanisa na abale na alongo akuti akhalonga mwadidi cilongero ca kweneko. Mbwenye iye acinja maonero ace. Iye adzindikira kuti Yahova mbadamphatisira mwakukhonda tsalakana khala asalonga mwadidi cilongero peno nkhabe. Iye alonga: “Pinalonga Bhibhlya ndi pyakukhonda nentsa, pontho pinakwanisa kucinja umaso wa anthu.”

16. Ninji pinafuna kuphedza ale akuti nee asakwanisa kubuluka panyumba toera kuenda kamwaza mphangwa?

¹⁶ Yahova asadziwa kuti tisafuna kumwaza mphangwa, mbwenye asadziwambo kuti anango a ife nee asakwanisa kubuluka panyumba toera kuenda kamwaza mphangwa. Natenepa, Yahova asatiphedza toera kumwaza mphangwa kuna ale anatitsalakana peno maenfermero. Ife tingalandanisa pinthu pinacita ife cincino na pikhacita ife nduli tinatsukwala. Mbwenye tingadzindikira njira inatiphedza Yahova cincino, tinakhala na mphambvu inafuna ife toera kupirira pinentso mwakutsandzaya.

17. Mwakubverana na Koelete 11:6, thangwi yanji tisafunika kupitiriza kumwaza mphangwa maseze anthu akhonde kutawira?

¹⁷ Ife nee tisadziwa kuti ndi mbeu ipi ya undimomwene idabzwala ife yakuti inamera mbikula. (Lerini Koelete 11:6.) Mwacitsandzo, mulongo unango anacemerwa Barbara wakuti ali na pyaka 80 pyakubalwa, ndzidzi onsene asamwaza mphangwa mukuphatisira telefoni na matsamba. Mu ibodzi mwa maenvelopi akhaikhira iye matsamba ace, aikha revista ya A Sentinela ya 1.° de Março de 2014 ya nsolo wakuti “O que Deus tem feito por você?” Mulongo Barbara nee akhadziwa kuti atumiza envelopi ineyi kuna banja yakuti ikhadabuluswa mu mpingo. Iwo aleri revista ineyi mwakubwereza-bwereza. Mamuna apibva ninga Yahova ali kulonga na iye. Natenepa banja ineyi yatoma pontho kusonkhana, mbwenye pakhadapita pyaka pyakupiringana 27 mbali kunja kwa mpingo. Barbara akomerwa kakamwe, pontho awangiswa pidaona iye kuti tsamba idalemba iye yaphedza banja ineyi.

18. Tisafunika kucitanji toera tipaswe mphambvu na Mulungu?

¹⁸ Yahova asatipasa pinthu pizinji toera tikhale na mphambvu ninga phembero, Bhibhlya, abale na alongo athu na basa yakumwaza mphangwa. Tingaphatisira pinthu pyenepi, tisapangiza kuti ife tisanyindira kuti iye anakwanisa kutiphedza, pontho tisafuna kuti iye acite pyenepi. Natenepa, ndzidzi onsene tisafunika kunyindira kuti Babathu wakudzulu ‘asayang’ana pa dziko yonsene yapantsi toera kupangiza mphambvu zace kuna anthu akukhulupirika kuna iye.’—2 Pya dziko. 16:9.