NSOLO WA PFUNDZIRO 23
Anyakubala—Phedzani Ananu Toera Afune Yahova
“Funa Yahova Mulungu wako na ntima wako onsene, na umaso wako onsene na ndzeru zako zonsene.”—MAT. 22:37.
NYIMBO 134 Anapiana Ndi Muoni wa Mulungu
PINAFUNA IFE KUPFUNDZA *
1-2. Thangwi yanji malemba anango asakhala akufunika kakamwe kuna ife pinthu pingacinja mu umaso wathu?
PA NTSIKU yakumanga banja, kazinji kene mankhadzi wamamuna na wankazi asabvesera nkhani yakubuluswa m’Bhibhlya inalonga thangwi ya banja. Malemba anafokotozwa ntsiku ineyi nee ndi mapswa kuna iwo. Mbwenye kutomera ntsiku ineyi iwo asakhala akufunika kakamwe kuna iwo. Thangwi yanji? Thangwi iwo anaaphatisira pabodzi ninga banja.
2 Pyenepi pisacitikambo kuna Akristu akumanga banja angabala mwana. Thangwi mu pyaka pizinji iwo akhabva nkhani zikhalonga thangwi ya kukuza ana. Mbwenye kutomera ndzidzi unoyu, nkhani zinalonga pya kukuza ana zisakhala zakufunika kakamwe kuna iwo. Thangwi yanji? Thangwi iwo asafunika kukuza mwana wawo ene, pontho unoyu ndi mwai ukulu kakamwe kuna iwo. Mwandimomwene, pinthu pingacinja mu umaso wathu, malemba anango asakhala akufunika kakamwe kuna ife. Na thangwi ineyi, alambiri a Yahova asaleri Bhibhlya na kunyerezera pinaleri iwo ‘ntsiku zonsene’ ninga pikhapangwa amambo Aizraeli toera kucita.—Deut. 17:19.
3. Tinapfundzanji mu nsolo uno?
3 Anyakubala, imwe muli na mwai ukulu kakamwe wakupfundzisa ananu thangwi ya Yahova. Mbwenye musafunika kucita pizinji kupiringana basi ene kuapfundzisa thangwi ya Yahova. Imwe musafunika kuphedza ananu toera anfune kakamwe. Mphapo munakwanisa tani kuphedza ananu toera afune Yahova? Mu nsolo uno, tinapfundza pinthu pinai pinalonga Bhibhlya pyakuti pinaphedza anyakubala. (2 Tim. 3:16) Pontho tinaonambo kuti anyakubala anango Acikristu aphedzeka tani thangwi yakuphatisira uphungu wa m’Bhibhlya.
PINTHU PINAI PINAFUNA KUPHEDZA ANYAKUBALA
Thangwi yanji anyakubala ndzidzi onsene asafunika kusaka citsogolero ca Yahova na kukhala citsandzo cadidi kuna anawo? (Onani ndima 4, 8)
4. Ndi cinthu cipi cakutoma cinafuna kuphedza anyakubala toera kuphedza anawo kuti afune Yahova? (Tiyago 1:5)
4 Cinthu cakutoma: Sakani citsogolero ca Yahova. Phembani Yahova toera akupaseni udziwisi kuti mukwanise kuphedza ananu toera anfune. (Lerini Tyago 1:5.) Pana mathangwi mazinji anapangiza kuti Yahova ndi wakuthema toera kukupasani uphungu. Onani mawiri mwa mathangwi anewa. Yakutoma, Yahova asadziwa pinthu pizinji kakamwe thangwi ya kukuza ana. (Masal. 36:9) Thangwi yaciwiri, uphungu unapereka iye ndzidzi onsene usaphedza.—Iza. 48:17.
5. (a) Gulu ya Yahova isaphedza tani anyakubala? (b) Ninga pidapangizwa mu vidhyu, mwapfundzanji na njira idaphatisira M’bale Amorim na nkazace toera kukuza anawo?
5 Mukuphatisira Mafalace na gulu yace, Yahova asapasa anyakubala mphangwa zizinji zakuti zinaaphedza toera kupfundzisa anawo thangwi ya iye. (Mat. 24:45) Mwacitsandzo, anyakubala anakwanisa kugumana uphungu wakuphedza m’misolo yakuti “Ajuda Para a Família,” yakuti kale ikhabuluswa mu revista ya Despertai! mbwenye cincino isagumanikambo mu saiti yathu ya jw.org. Kusiyapo pyenepi, mavidhyu mazinji anagumanika mu jw.org anakwanisa kuphedza anyakubala toera kuphatisira uphungu wa Yahova mu ndzidzi unakuza iwo anawo. *—Mis. 2:4-6.
6. Kodi Joe na nkazace asaona tani citsogolero cinaapasa Yahova mukuphatisira gulu yace?
6 Anyakubala azinji asapereka takhuta kakamwe thangwi ya ciphedzo cinaapasa Yahova mukuphatisira gulu yace. Nyakubala m’bodzi anacemerwa Joe alonga: “Kukuza ana atatu mu undimomwene ndi pyakunentsa kakamwe. Ine na nkazanga ndzidzi onsene tisaphemba Yahova toera atiphedze. Pontho kazinji kene tisaona kuti nsolo wa bukhu peno vidhyu pisatiphedza pa ndzidzi wakuthema toera kuthimbana na nyatwa. Ndzidzi onsene ife tisasaka citsogolero ca Yahova.” Joe na nkazace asaona kuti misolo na mavidhyu anewa pisaphedza anawo toera kukhala na uxamwali wakuwanga na Yahova.
7. Thangwi yanji anyakubala asafunika kuwangisira toera kukhala citsandzo cadidi kuna anawo? (Aroma 2:21)
7 Cinthu caciwiri: Khalani citsandzo cadidi. Kazinji kene anapiana asatowezera pinthu pinacita anyakubalawo. Ndimomwene kuti anyakubala nee ndi aungwiro. (Aroma 3:23) Ngakhale tenepo, anyakubala asafunika kuwangisira toera akhale citsandzo cadidi kuna anawo. (Lerini Aroma 2:21.) Nyakubala m’bodzi alonga tenepa: “Anapiana ndi ninga pau yakuti ungaibvika m’madzi isakwata madzi mazinji. Iwo asaona khala ife tisaphatisira pinthu pinaapfundzisa ife.” Natenepa khala ife tisafuna kuti anathu afune Yahova, pakutoma ife tisafunika kupangiza kuti tisafuna kakamwe Yahova.
8-9. Kodi mafala adalonga Andrew na Emma asatipfundzisanji?
8 Pana njira zizinji zakuti anyakubala anakwanisa kuziphatisira toera kupfundzisa anawo kuti afune Yahova. M’bale unango wa pyaka 17 pyakubalwa anacemerwa Andrew alonga: “Anyakubalanga ndzidzi onsene akhandipanga kuti phembero ndi yakufunika kakamwe. Namasiku onsene, Baba akhacita phembero pabodzi na ine, ngakhale kuti ndikhadacita kale phembero ndekhene. Kusiyapo pyenepi, ndzidzi onsene anyakubalathu akhapanga ine pabodzi na abale anga kuti ‘imwe munakwanisa kulonga na Yahova ndzidzi onsene unafuna imwe.’ Na thangwi ineyi, phembero yadzakhala yakufunika kakamwe kuna ine, pontho cincino ndi pyakukhonda nentsa kuna ine kucita phembero na kuona kuti Yahova ndi Baba wakuti asandifuna kakamwe.” Anyakubala, kumbukani kuti mungafuna kakamwe Yahova, munaphedza ananu toera anfunembo.
9 Onani citsandzo ca mulongo Emma. Mu ndzidzi udabuluka pai wace panyumba, iye asira mai wace mangawa mazinji. Emma alonga: “Mu ndzidzi unoyu, Mama nee akhali na kobiri, mbwenye ndzidzi onsene iye akhandipanga kuti Yahova asatsalakana atumiki ace. Ine ndikhakwanisa kuona kuti mama akhakhulupira pinthu pikhalonga iye.” Pyenepi pisatipfundzisanji? Pisatipfundzisa kuti anyakubala anakwanisa kupfundzisa anawo na citsandzo cawo, maseze athimbane na nyatwa.—Agal. 6:9.
10. Ndi midzidzi ipi yakuti Aizraeli panango akhacedza na anawo thangwi ya Yahova? (Deuteronomyo 6:6, 7)
10 Cinthu cacitatu: Cedzani kazinji kene na ananu. Yahova apanga Aizraeli toera apfundzise anawo ndzidzi onsene. (Lerini Deuteronomyo 6:6, 7.) Anyakubala anewa akhali na miyai mizinji toera kucedza na anawo na kuapfundzisa kuti afune Yahova na ntima wawo onsene. Mwacitsandzo, panango mwana wamamuna akakhala ndzidzi uzinji na pai wace toera kutceka tirigu na kubvuna. Panango mwana wantsikana akakhala ndzidzi uzinji na mai wace toera kumphedza kusona nguwo na kucita mabasa anango a panyumba. Mu ndzidzi unoyu wakuti anyakubala akhaphata basa pabodzi na anawo, akhakwanisa kucedza pinthu pizinji pyakufunika. Mwacitsandzo, iwo akhakwanisa kucedza pinthu pizinji pidaacitira Yahova, pontho akhacedza kuti iye aphedza tani banja yawo.
11. Ndi ndzidzi upi wakuti anyakubala Acikristu anakwanisa kuuphatisira toera kucedza na anawo?
11 Lero, pinthu pyasiyana kakamwe na kale. Thangwi m’madziko mazinji, anyakubala na anapiana nee asamala ndzidzi uzinji pabodzi. Anyakubala panango asakhala kubasa, anapiana panango asakhala kuxikola. Na thangwi ineyi, anyakubala asafunika kuwangisira toera kugumana ndzidzi wakucedza na anawo. (Aef. 5:15, 16; Afil. 1:10) Mbwenye anyakubala anakwanisa kugumana ndzidzi unoyu angacita kulambira kwa banja. M’bale unango anacemerwa Alexander alonga: “Pai wanga ndzidzi onsene asacita masasanyiro toera tikwanise kucita kulambira kwa banja, pontho iye nee asatawirisa kuti pinthu pinango pipingize ndzidzi unoyu. Pakumala kucita kulambira kwa banja, ife tisacedza pinthu pyakusiyana-siyana pyakuti ndi pyakufunika kwa ife.”
12. Kodi nsolo wa banja usafunika kukumbukanji mu ndzidzi wakulambira kwa banja?
12 Khala ndimwe nsolo wa banja, imwe munakwanisa kucitisa kuti ndzidzi wa kulambira kwa banja ukhale wakutsandzayisa kakamwe kuna ananu. Imwe munakwanisa kuphatisira bukhu ipswa yakuti Seja Feliz Para Sempre! toera kupfundza na ananu. Bukhu ineyi inakuphedzani toera kucedza mwadidi na iwo. Nakuti musafuna kuti ananu akhale akusudzuka toera kulonga pinanyerezera iwo, lekani kuphatisira ndzidzi wakulambira kwa banja toera kuasandika. Pontho wangisirani toera mukhonde kuipirwa iwo angalonga pinthu pyakuti nee pisabverana na Bhibhlya. Mbwenye perekani takhuta kuna iwo angalonga pinthu pinanyerezera iwo, pontho awangiseni toera apitirize kulonga mwakusudzuka pinanyerezera iwo. Imwe munakwanisa kuphedza ananu basi ene mungadziwa mwadidi pinanyerezera iwo.
Anyakubala anakwanisa tani kuphatisira pinthu pidacita Yahova toera kupfundzisa anawo makhaliro a Yahova? (Onani ndima 13)
13. Ndi miyai ipi inango yakuti anyakubala anakwanisa kuiphatisira toera kuphedza anawo kuti akhale na uxamwali wakuwanga na Yahova?
13 Anyakubala, ntsiku zonsene sakani miyai toera kuphedza ananu kuti akhale na uxamwali wakuwanga na Yahova. Imwe nee musafunika kudikhira basi ene ndzidzi wakupfundza Bhibhlya toera kuapfundzisa thangwi ya Mulungu wathu waufuni. Mwacitsandzo, mulongo unango anacemerwa Lisa alonga: “Ife tisaphatisira pinthu pyonsene pidacita Yahova toera kupfundzisa anathu thangwi ya iye. Mwacitsandzo, mwanambwa wathu angacita pinthu pyakusekesa, ife tisaapanga kuti pyenepi pisapangiza kuti Yahova ndi Mulungu wakutsandzaya, pontho asafuna kuti ife tikhalembo akutsandzaya.”
Anyakubala, kodi imwe musadziwa axamwali a ananu? (Onani ndima 14) *
14. Thangwi yanji ndi pyakufunika kuna anyakubala kuphedza anawo toera asankhule axamwali mwandzeru? (Misangani 13:20)
14 Cinthu cacinai: Phedzani ananu toera akhale na axamwali adidi. Bhibhlya isapangiza pakweca kuti axamwali anakwanisa kutikulumiza toera kucita pinthu pyadidi peno pyakuipa. (Lerini Misangani 13:20.) Anyakubala, kodi imwe musadziwa axamwali a ananu? Kodi imwe musasaka ndzidzi toera kucedza nawo? Munakwanisa tani kuphedza ananu toera acite uxamwali na anthu akuti asafuna Yahova? (1 Akor. 15:33) Imwe munakwanisa kuphedza ananu toera akhale na axamwali adidi mukucemera kunyumba kwanu abale na alongo akuti ali na uxamwali wakuwanga na Yahova.—Masal. 119:63.
15. Anyakubala anakwanisa tani kuphedza anawo toera akhale na axamwali adidi?
15 M’bale m’bodzi anacemerwa Tony afokotoza pinthu pinacita iye pabodzi na nkazace toera kuphedza anawo kuti akhale na axamwali adidi. Iye alonga: “Mu pyaka pizinji, ine pabodzi na nkazanga tisacemera abale na alongo a mathunga akusiyana-siyana kunyumba kwathu. Ife tisadya pabodzi, pontho tisakhala nawo pabodzi pakulambira kwathu kwa banja. Ineyi ndi njira yadidi kakamwe toera kudziwa abale na alongo anewa akuti asafuna Yahova, pontho asantumikira mwakutsandzaya. Kusiyapo pyenepi, ife tisacemerambo kunyumba kwathu ayang’aniri a cisa, amisionaryo na abale anango. Natenepa pitsandzo pyawo, phinga yawo na kuwangisira kwawo toera kutumikira Yahova pisaphedza kakamwe anathu toera akhale na uxamwali wakuwanga na Yahova.” Anyakubala, khalani akutonga toera kuphedza ananu kuti akhale na axamwali adidi.
LEKANI KULUZA CIDIKHIRO
16. Munacitanji khala mwananu asankhula kusiya kutumikira Yahova?
16 Munacitanji khala m’bodzi mwa ananu nee asafuna kutumikira Yahova maseze imwe musawangisira kakamwe toera kumpfundzisa? Lekani kunyerezera kuti nee ndimwe nyakubala wadidi. Yahova apasa ife tonsene kuphatanizambo mwananu ufulu wakusankhula kuntumikira peno nkhabe. Khala mwananu asankhula kusiya kutumikira Yahova, lekani kuluza cidikhiro cakuti na ntsiku yace iye anabwerera. Kumbukani nsangani wa mwana wakutayika. (Luka 15:11-19, 22-24) Mwana unoyu akhadabuluka panyumba mbacita pinthu pizinji pyakuipa, mbwenye mukupita kwa ndzidzi iye abwerera. Panango anthu anango analonga: “Unoyu basi ene ndi nsangani. Kodi mwananga anabwereradi kuna Yahova?” Inde, anabwera! Ndi pyenepi pidacita m’phale unango anacemerwa Elie.
17. Pinthu pidacita Elie pisakuwangisani tani?
17 Elie alonga tenepa thangwi ya anyakubala ace: “Iwo awangisira kakamwe toera kundipfundzisa kuti ndifune Yahova na Mafalace, Bhibhlya. Ngakhale tenepo, pikhali ine cifupi na pyaka 15 pyakubalwa, ine ndatoma kusiya kuphatisira pinthu pikhapfundza ine.” Elie atoma kucita pinthu ncibisobiso, pontho anyakubala ace ayesera kumphedza toera apitirize kukhala na uxamwali wakuwanga na Yahova, mbwenye iye nee aabvera. Iye abuluka panyumba mbatoma kucita pinthu pyakuipa kakamwe. Ngakhale tenepo, midzidzi inango Elie akhacedza thangwi ya Bhibhlya na xamwali wace. Elie athimiza: “Mu ndzidzi ukhalonga ine thangwi ya Yahova na xamwali wanga, ndikhanyerezera kakamwe thangwi ya Yahova. Natenepa, mwapang’ono na pang’ono, undimomwene unoyu wa Bhibhlya wakuti anyakubala anga akhawangisira toera kundipfundzisa pikhali ine mwana, ukhakhuya kakamwe ntima wanga.” Mukupita kwa ndzidzi, Elie abwerera kuna Yahova. * Mwakukhonda penula, anyakubala ace atsandzaya kakamwe thangwi ya kuwangisira kumpfundzisa toera afune Yahova pikhali iye mwana.—2 Tim. 3:14, 15.
18. Tisafunika kuona tani anyakubala anawangisira kakamwe kupfundzisa anawo kuti afune Yahova?
18 Anyakubala, imwe muli na mwai ukulu kakamwe wakupfundzisa ananu toera akhale alambiri a Yahova. (Masal. 78:4-6) Ineyi ndi basa ikulu kakamwe, pontho ife tisakusimbani thangwi ya kuwangisira kwanu toera kuphedza ananu. Mungapitiriza kucita pyonsene pinakwanisa imwe toera kuphedza ananu kuti afune Yahova, pontho toera kuapfundzisa kuti ambvere, Babathu wakudzulu anakhala wakutsandzaya kakamwe.—Aef. 6:4.
NYIMBO 135 Yahova Asatiphemba Mwaufuni: ‘Mwananga, Khala Wandzeru’
^ Anyakubala Acikristu asafuna kakamwe anawo. Thangwi iwo asaphata basa mwakuwanga toera kuatsalakana. Kusiyapo pyenepi, anyakubala asacita pyonsene pinakwanisa iwo toera kuphedza anawo kuti afune Yahova. Mu nsolo uno, ife tinapfundza pinthu pinai pinalonga Bhibhlya pyakuti pinaphedza anyakubala toera akwanise kucita pyenepi.
^ Onani vidhyu ya nsolo wakuti Jeová Ensinou-nos a Criar os Nossos Filhos mu jw.org.
^ Onani nsolo wakuti “A Bíblia Muda a Vida das Pessoas” mu A Sentinela ya 1.° de Abril de 2012.
^ FOTO TSAMBA: Toera adziwe axamwali a mwanace, m’bale ali kugwa bhola na mwanace pabodzi na xamwali wa mwanace.
