1-2. Ndi ipi thangwi ibodzi inaticitisa kukomerwa na bukhu ya Apokalipse?

 KODI imwe mwacemerwa kale toera kuona mafoto a munthu unango? Mu ndzidzi unaona imwe mafoto, imwe musaona anthu azinji akuti nee musaadziwa. Mbwenye pa foto inango imwe musalimira mbamuyang’anisisa mwadidi. Thangwi yanji? Thangwi imwe mulipombo pa foto ineyi. Mu ndzidzi unayang’ana imwe foto ineyi, musayesera kukumbuka mbuto na ndzidzi udabulusa imwe foto ineyi. Imwe musakumbukambo anthu onsene anagumanika pa foto ineyi. Foto ineyi isakhala yakufunika kakamwe kuna imwe.

² Bukhu ya Apokalipse ndi ninga foto ineyi. Pana mathangwi mawiri anaticitisa kulonga pyenepi. Thangwi yakutoma, bukhu ineyi ya Apokalipse yalemberwa ife. Vesi yakutoma ya bukhu ineyi isalonga: “Masomphenya adaperekwa na Yezu, adapaswa iye na Mulungu toera kupangiza atumiki ace pinthu pyakuti pisafunika kucitika mwakukhonda dembuka.” (Apok. 1:1) Mbwenye pidalembwa m’bukhu ineyi nee pyalemberwa anthu onsene, pyalemberwa ife atumiki akuperekeka a Mulungu. Ninga atumiki a Mulungu, nee tisadzumatirwa thangwi yakudziwa kuti tikukhala mu ndzidzi wakukwanirisika kwa maprofesiya anagumanika m’bukhu ineyi. Natenepa tingaleri bukhu ya Apokalipse, ife tikuleri pinthu pyakuti pisatikhuya.

3-4. Mwakubverana na bukhu ya Apokalipse, kodi maprofesiya a bukhu ineyi anakwanirisika lini, pontho pyenepi pisatikulumiza toera kucitanji?

³ Thangwi yaciwiri inaticitisa kukomerwa na maprofesiya a m’bukhu ya Apokalipse ndi ndzidzi unafuna kukwanirisika iwo. Mpostolo Juwau wakuti akhali nkhalamba, apangiza ndzidzi ukhafuna kukwanirisika maprofesiya anewa. Iye alonga: “Mukutsogolerwa na nzimu wakucena, ndafika pa ntsiku ya Mbuya.” (Apok. 1:10) Juwau pidalemba iye mafala anewa  mu caka 96 Pakumala Kubalwa Kwa Kristu, pakhadasala pyaka pizinji toera “ntsiku ya Mbuya” itome. (Mat. 25:14, 19; Luka 19:12) Mwakubverana na profesiya ya Bhibhlya, ntsiku ineyi yatoma 1914 pidakhazikiswa Yezu ninga Mambo kudzulu. Kutomera caka ceneci, maprofesiya a Apokalipse akuti asaphataniza mbumba ya Mulungu atoma kukwanirisika. Mwandimomwene, cincino tikukhala mu “ntsiku ya Mbuya”!

⁴ Nakuti tikukhala mu ndzidzi unoyu wakutsandzayisa, ife tisafunika kubvera uphungu unagumanika pa Apokalipse 1:3: “Nyakutsandzaya ndi ule analeri mwakugaluza na ale anabva mafala a profesiya iyi mbabvera pinthu pidalembwa mwenemu, thangwi ndzidzi udakhazikiswa uli cifupi.” Mwandimomwene, ife tisafunika ‘kuleri mwakugaluza’ toera kubva ‘mafala a profesiya ineyi na kuabvera.’ Ndi api anango mwa mafala anewa akuti tisafunika kuabvera?

5. Bukhu ya Apokalipse isapangiza tani kufunika kwa kuonesesa khala ulambiri wathu ndi wakutawirika kuna Yahova peno nkhabe?

⁵ Kutomera kapitulu yakutoma ya bukhu ya Apokalipse, ife tisapfundza kuti Yezu asadziwa pinthu pyonsene pinacitika m’mipingo ya mbumba yace. (Apok. 1:12-16, 20; 2:1) Mphangwa zidatumiza Yezu ku mipingo minomwe ya ku Azya Menori zisapangiza pyenepi. Mu mphangwa zenezi, iye apereka pitsogolero toera kuphedza Akristu a mu ndzidzi unoyu kuonesesa khala ulambiri wawo ukhali wakutawirika kuna Yahova. Pinthu pidalongwa mu mphangwa zenezi, pisaphata basa kuna atumiki onsene a Mulungu lero. Pyenepi pisatipfundzisanji? Pisatipfundzisa kuti Ntsogoleri wathu Kristu Yezu, asadziwa mwadidi khala ife tiri na uxamwali wadidi na Yahova peno nkhabe. Iye asatitsogolera na kutitsidzikiza, pontho asaona pinthu pyonsene pinacitika. Iye asadziwa pinafunika ife kucita toera tipitirize kukhala akutawirika kuna Yahova. Ndi citsogolero cipi cidapereka iye cakuti ife tisafunikambo kucibvera?

6. (a) Mwakubverana na mafala anagumanika pa Apokalipse 2:3, 4, ndi nkandzo upi ukhali na Akristu a mpingo wa ku Efeso? (b) Pyenepi pisatipfundzisanji?

⁶ Lerini Apokalipse 2:3, 4. Nee tisafunika kuluza ufuni wathu wakutoma kuna Yahova. Mphangwa zidatumiza Yezu kuna Akristu a mpingo wa ku Efeso zisapangiza kuti iwo akhapirira, pontho akhapitiriza kutumikira Yahova mwakukhonda tsalakana nyatwa. Ngakhale tenepo, iwo akhadaluza ufuni ukhali na iwo pakutoma. Iwo mbadakhonda kutoma pontho kupangiza ufuni unoyu, ulambiri wawo nee mbudakhala wakutawirika kuna Yahova. Munjira ibodzi ene lero, ife tisafunika kucita pizinji kupiringana kupirira. Tisafunika kupirira na mathangwi adidi. Mulungu wathu nee asafuna kuona basi ene pinthu pinacita ife, mbwenye asafunambo kuona kuti thangwi yanji tisapicita. Mathangwi anaticitisa kumulambira ndi akufunika kakamwe kuna iye thangwi iye asafuna kuti timulambire mukukulumizwa na ufuni, pontho thangwi yakupereka takhuta kuna iye.—Mis. 16:2; Marko 12:29, 30.

7. (a) Mwakubverana na Apokalipse 3:1-3, ninji pidaona Yezu mu mpingo wa ku Sardhe? (b) Ninji pinafunika ife kucita?

⁷ Lerini Apokalipse 3:1-3. Tisafunika kupitiriza kukhala m’maso. Akristu a mu mpingo wa ku Sardhe, akhali na nkandzo wakusiyana na ukhali na Akristu a ku Efeso. Maseze nduli iwo akhatumikira Yahova mwaphinga, mbwenye cincino iwo akhadafewa. Natenepa Yezu aapanga toera ‘alamuke ncitulo.’ Pyenepi  pisatipfundzisanji? Ndimomwene kuti Yahova nkhabe kudzaduwala basa yathu. (Aheb. 6:10) Ngakhale tenepo, ife nee tisafunika kunyindira basi ene pinthu pidacitira ife Yahova nduli. Maseze nee tinakwanisabve kucita pizinji ninga pikhacita ife kale, tisafunika kupitiriza kukhala akuphatika “m’basa ya Mbuya” toera tipitirize kukhala m’maso mpaka kunkhomo.—1 Akor. 15:58; Mat. 24:13; Marko 13:33.

8. Tisapfundzanji na mafala adalemberwa abale a ku Laudhiseya anagumanika pa Apokalipse 3:15-17?

⁸ Lerini Apokalipse 3:15-17. Tisafunika kulambira Yahova mwaphinga, pontho na ntima onsene. Mphangwa zidalonga Yezu kuna Akristu a ku Laudhiseya zisapangiza kuti iwo akhali na nkandzo wakusiyana. Kulambira kwawo Yahova ‘nee kukhali kwakuthondola, nee kwakupisa.’ Thangwi yakusowa kwawo cifuno, Yezu aapanga kuti akhali pa nyatwa, pontho akhali akutcerenga. Iwo akhafunika kulambira Yahova mwaphinga. (Apok. 3:19) Pyenepi pisatipfundzisanji? Khala ife taluza phinga yathu, tisafunika kupereka takhuta kakamwe thangwi ya pinthu pyonsene pyadidi pinaticitira Yahova na gulu yace. (Apok. 3:18) Nee tisafunika kuwangisira kakamwe toera tikhale na umaso wadidi kakamwe cincino mbatiikha kulambira kwathu Yahova pa mbuto yaciwiri mu umaso wathu.

9. Mwakubverana na mafala adalonga Yezu kuna Akristu a ku Pergamo na a ku Tiyatira, ndi pinthu pipi pisafunika ife kucalira?

⁹ Tisafunika kucalira pipfundziso pya anthu akupanduka. Yezu asandika anthu anango a ku Pergamo thangwi akhacitisa abale kukhala akugawana. (Apok. 2:14-16) Iye asimba Akristu a ku Tiyatira akuti akhadakhonda “pinthu pyakuzika pya Sathani” mbaadembetera toera ‘aphatisise’ undimomwene. (Apok. 2:24-26) Akristu akufewa a ku Tiyatira akuti akhadatawira kupeuswa mu pipfundziso pyauthambi akhafunika kutcunyuka. Ndiye tanimbo ife lero? Ife tisafunika kucalira pipfundziso pyonsene pyakusiyana na pinafuna Mulungu. Anthu akupanduka asaoneka ninga asabvera kakamwe pinalonga Bhibhlya, mbwenye pinacita iwo nee pisapangiza pyenepi. (2 Tim. 3:5) Ife tingapfundza Bhibhlya mwadidi, pinakhala pyakukhonda nentsa kudzindikira na kucalira pipfundziso pyauthambi.—2 Tim. 3:14-17; Yuda 3, 4.

10. Ndi pinthu pipi pinango pinapfundza ife na mafala adalonga Yezu kuna mpingo wa ku Pergamo na ku Tiyatira?

¹⁰ Tisafunika kucalira ntundu onsene wa ulukwali. Abale a ku Pergamo na ku Tiyatira  akhali na nkandzo unango. Yezu asandika Akristu anango m’mipingo ineyi thangwi iwo akhacita ulukwali. (Apok. 2:14, 20) Pyenepi pisatipfundzisanji? Nee tisafunika kunyerezera kuti Yahova anatitawirisa kucita ulukwali khala tisantumikira mu pyaka pizinji, peno khala tiri na miyai mizinji yakutumikira. (1 Sam. 15:22; 1 Ped. 2:16) Iye asafuna kuti tibvere midida yace yakulungama mwakukhonda tsalakana khala makhaliro a dziko aipa kakamwe.—Aef. 6:11-13.

11. Ninji pidapfundza ife mpaka pano? (Onanimbo bokosi “ Pinthu Pinapfundza Ife Lero.”)

¹¹ Mwacigwagwa, ninji pidapfundza ife mpaka pano? Ife taona kufunika kwa kuonesesa khala ulambiri wathu ndi wakutawirika kuna Yahova peno nkhabe. Khala ife tisacita pinthu pyakuti pisacitisa ulambiri wathu kukhala wakukhonda tawirika, tisafunika kucita macinjo mwakucimbiza toera tikhale akutawirika kuna Mulungu. (Apok. 2:5, 16; 3:3, 16) Mbwenye Yezu alonga cinthu cinango mu mphangwa zidatumiza iye kuna mipingo. Ndi cipi cinthu ceneci?

12. Tisapfundzanji na mphangwa zidalonga Yezu kuna Akristu a ku Ejimirna na a ku Filadhelfiya? (Apokalipse 2:10)

¹² Cincino tendeni tidinge mphangwa zidatumiza Yezu kuna mpingo wa ku Ejimirna na Filadhelfiya. Iye apanga Akristu a mipingo ineyi toera akhonde kugopa kutcingwa, thangwi Yahova mbadaapasa nkhombo mbadakhala akukhulupirika. (Lerini Apokalipse 2:10; 3:10) Pyenepi pisatipfundzisanji lero? Ife tisafunika kudikhira kutcingwa, mbatikhala dzololo toera kupirira kutcingwa. (Mat. 24:9, 13; 2 Akor. 12:10) Thangwi yanji cenjezo ineyi ndi yakufunika?

13-14. Ninji pidacitikira atumiki a Mulungu thangwi ya kukwanirisika kwa mafala anagumanika pa Apokalipse kapitulu 12?

¹³ Bukhu ya Apokalipse isalonga kuti atumiki a Mulungu mbadatcingwa mu “ntsiku ya Mbuya” yakuti ndi ntsiku zino zinakhala ife. Bukhu ya Apokalipse kapitulu 12 isalonga kuti kudzulu kwaoneka nkhondo pidamala Yezu kukhazikiswa ninga mambo. Migeli wakuti ndi Yezu Kristu pabodzi na anyankhondo ace amenyana na Sathani na madimonyo. (Apok. 12:7, 8) Anyamalwa anewa a Mulungu akundwa mbaponywa pa dziko yapantsi, pontho iwo abweresa nyatwa zizinji kuna anthu anakhala pa dziko yapantsi. (Apok. 12:9, 12) Kodi pinthu pyenepi pyakhuya tani atumiki a Mulungu?

¹⁴ Bukhu ya Apokalipse isatipanga pinthu pinango pinacita Sathani pa dziko yapantsi. Iye nkhabe kwanisabve kubwerera kudzulu, natenepa asatcinga Akristu akudzodzwa a Mulungu, akuti ndi aimiriri a Umambo wa  Mulungu pa dziko yapantsi, pontho “akuti ali na basa yakupereka umboni wa Yezu.” (Apok. 12:17; 2 Akor. 5:20; Aef. 6:19, 20) Kodi profesiya ineyi yakwanirisika tani?

15. Mbani akhaimirira ‘amboni awiri’ analongwa m’bukhu ya Apokalipse, pontho ninji pidaacitikira?

¹⁵ Sathani acitisa anyamalwa a Mulungu kupomokera Akristu akudzodzwa akuti asatsogolera basa yakumwaza mphangwa za Umambo. Amuna anewa akhaimirira ‘amboni awiri’ analongwa m’bukhu ya Apokalipse akuti aphiwa. * (Apok. 11:3, 7-11) Mu caka ca 1918, abale asere akhatsogolera gulu apambizirwa pinthu pyauthambi mbaikhwa nkaidi mu pyaka pizinji. Anthu azinji akhanyerezera kuti basa ya Akristu anewa akudzodzwa ikhadalimira.

16. Ndi pinthu pipi pyakudzumatirisa pidacitika mu caka ca 1919, pontho kutomera ndzidzi unoyu ndi pinthu pipi pyakuti Sathani asapitiriza kupicita?

¹⁶ Profesiya ya Apokalipse kapitulu 11 yalongambo kuti pakupita ndzidzi wakucepa ‘amboni awiri’ mbadakhala pontho m’maso. Nkati mwa caka cibodzi, abale anewa mbadamala kale kuikhwa nkaidi, profesiya ineyi yakwanirisika mwakudzumatirisa kakamwe. Mwezi wa Março wa caka ca 1919, abale anewa akudzodzwa abuluswa nkaidi, pontho mukupita kwa ndzidzi miseru yawo yafudzwa. Mwakukhonda dembuka, abale anewa atoma pontho kutsogolera basa yakumwaza mphangwa na kupfundzisa. Mbwenye pyenepi nee pyacitisa Sathani kusiya kupomokera atumiki a Mulungu. Kutomera mu ndzidzi unoyu, Sathani asacitisa “nyandza” ya mitcingo kuna atumiki onsene a Mulungu. (Apok. 12:15) Mwandimomwene, “pyenepi pisaphemba kupirira na cikhulupiro” kuna m’bodzi na m’bodzi wa ife.—Apok. 13:10.

17. Ndi ciphedzo cipi cakukhonda dikhira cidatambira atumiki a Mulungu, mwakukhonda tsalakana kupomokerwa kwawo na Sathani?

¹⁷ Buluka penepo, bukhu ya Apokalipse kapitulu 12 isalonga kuti atumiki a Mulungu mbadatambira ciphedzo mwakukhonda dikhira. Kapitulu ineyi isafokotoza kuti “mataka” mbadameza “nyandza” ya mitcingo. (Apok. 12:16) Mwandimomwene ndi pyenepi pidacitika. Midzidzi inango, misoka inango ya mu dziko ya Sathani ninga yakutsalakana miseru, yapulumusa mbumba ya  Mulungu. Mwakubwereza-bwereza, atumiki a Yahova awina miseru mbakhala na ufulu pang’ono wakucita basa yawo. Kodi iwo aphatisira tani ufulu unoyu? Iwo abandza ufulu unoyu toera kucita basa idaapasa Yahova. (1 Akor. 16:9) Basa ineyi isaphatanizanji?

18. Ndi basa ipi yakufunika kakamwe kuna ife ntsiku zino zakumalisa?

¹⁸ Yezu akhadalonga kuti mbumba yace mbidamwaza ‘mphangwa zadidi za Umambo wa Mulungu’ pa dziko yonsene yapantsi kumala mbakudzati kufika. (Mat. 24:14) Pakucita basa ineyi, iwo asaphedzwa na anju, peno misoka ya aanju adalongwa kuti ‘akhali na mphangwa zadidi za kwenda na kwenda toera kuzimwaza kuna ale anakhala pa dziko yapantsi, kuna anthu a madziko onsene, a madzindza onsene, a pilongero pyonsene na mbumba zonsene.’—Apok. 14:6.

19. Ndi mphangwa zipi zinango zinafuna kudzamwaza ale anafuna Yahova?

¹⁹ Atumiki a Mulungu nee asamwaza basi ene mphangwa za Umambo. Iwo asafunikambo kuphedzera basa inacita aanju inalongwa m’bukhu ya Apokalipse kapitulu 8 mpaka 10. Aanju anewa asamwaza mphangwa zinalonga pya nyatwa zinafuna kutamba ale anakhonda Umambo wa Mulungu. Natenepa, Mboni za Yahova zisamwaza mphangwa zakuti zisalandaniswa na “matalala na moto,” zinapangiza kuti Mulungu akutonga pinthu pyakusiyana-siyana pya dziko ino yakuipa ya Sathani. (Apok. 8:7, 13) Anthu asafunika kudziwa kuti kumala kwa dziko ino yakuipa kuli cifupi toera iwo acite macinjo mu umaso wawo, mbapulumuka pa ntsiku ya kuipirwa kwa Yahova. (Sof. 2:2, 3) Mbwenye anthu azinji nee asatawira mphangwa zenezi. Ife tisafunika kukhala acipapo toera kumwaza mphangwa zenezi. Mu ndzidzi wa nyatwa ikulu, mphangwa zakutonga zinadzacitisa anthu kuipirwa kakamwe.—Apok. 16:21.

20. Tinapfundzanji m’misolo miwiri inatowera?

²⁰ Mwandimomwene ife tisafunika kubvera ‘mafala a profesiya ineyi’ thangwi tisacita khundu ya kukwanirisika kwa mafala a m’bukhu ya Apokalipse. (Apok. 1:3) Mphapo tinakwanisa tani kupirira mwakukhulupirika pakutcingwa, mbatipitiriza kumwaza mphangwa zenezi mwacipapo? Ife tinadzakhala na cipapo thangwi ya pinthu piwiri: Cakutoma, pinthu pinalonga bukhu ya Apokalipse thangwi ya anyamalwa athu. Caciwiri, nkhombo zinafuna kutambira ife ntsogolo tingapitiriza kukhala akukhulupirika. Ife tinapfundza pinthu pyenepi m’misolo miwiri inatowera.