1. Ndi cisankhulo cipi cakuti anthu onsene asafunika kucicita?

 LERO anthu asafunika kucita cisankhulo cakufunika kakamwe. Kodi iwo anaphedzera Yahova Mulungu ninga Ntongi wakuthema kudzulu na pantsi, peno anaphedzera nyamalwa wace wakuipa kakamwe, Sathani Dyabo? Nkhabe kwanisika kukhala m’makhundu mawiri ene. Cisankhulo cawo cinapangiza khala iwo anadzatambira umaso wakukhonda mala peno nkhabe. (Mat. 25:31-33, 46) Mu ndzidzi wa “nyatwa ikulu,” iwo anadzaikhwa cidzindikiro toera kupulumuka peno toera kufudzwa.—Apok. 7:14; 14:9-11; Ezek. 9:4, 6.

2. (a) Lemba ya Ahebheri 10:35-39 isatiwangisa toera kucitanji? (b) Bukhu ya Apokalipse inatiphedza tani?

² Lerini Ahebheri 10:35-39. Khala imwe mwasankhula kuphedzera utongi wa Yahova, mwacita cisankhulo cadidi kakamwe. Cincino imwe musafuna kuphedza anango toera acitembo cisankhulo cadidi. Imwe munakwanisa kuphatisira mphangwa za m’bukhu ya Apokalipse toera kuaphedza. Bukhu ineyi isalonga pinthu pinafuna kucitika kuna ale anakhonda Yahova, pontho isalonga nkhombo zinafuna kutambira ale anaphedzera utongi wace mwakukhulupirika. Natenepa ife tisafunika kupfundza undimomwene unoyu wakufunika. Kucita pyenepi kunatiphedza toera kuwangisa cisankhulo cathu cakutumikira Yahova. Kusiyapo pyenepi, ife tinakwanisa kuphatisira pidapfundza ife toera kuphedza anango kusankhula kutumikira Yahova na kupitiriza kuntumikira.

3. Tinapfundzanji mu nsolo uno?

³ Mu nsolo uno, ife tinatawira mibvundzo iyi: Ninji pinafuna kucitika kuna anthu anaphedzera utongi wa Mulungu? Ninji pinafuna kucitika kuna ale anaphedzera cikala cakufira cinalongwa m’bukhu ya Apokalipse?

4. Ndi nsoka upi udaona mpostolo Juwau wakuti ukhali pabodzi na Yezu kudzulu?

⁴ M’masomphenya, mpostolo Juwau aona misoka miwiri yakuti isaphedzera utongi wa Yahova mbitambira umaso wakukhonda mala. Nsoka wakutoma uli na anthu akukwana 144.000. (Apok. 7:4) Iwo asakwatwa pa dziko yapantsi, mbaenda kakhala amambo pabodzi na Yezu kudzulu. Iwo anadzatonga dziko yapantsi pabodzi na iye. (Apok. 5:9, 10; 14:3, 4) M’masomphenya anewa, Juwau aaona kudzulu pabodzi na Yezu Paphiri ya Sioni.—Apok. 14:1.

5. Ninji pinafuna kucitika mwakukhonda dembuka kuna anyakudzodzwa akuti aciri m’maso pa dziko yapantsi?

⁵ Kutomera mu ndzidzi wa apostolo mpaka lero, pikwi pizinji pya anthu asasankhulwa toera kucita khundu ya nsoka wa 144.000. (Luka 12:32; Aroma 8:17) Mbwenye mpostolo Juwau apangwa kuti mwa anthu anewa, ndi akucepa anafuna kusalikira pa dziko yapantsi mu ntsiku zakumalisa. Anthu anewa anafuna ‘kusalikira’ anadzaikhwa “cidzindikiro” cakumalisa na Yahova mbidzati kutoma nyatwa ikulu. (Apok. 7:2, 3; 12:17) Buluka penepo, mu ndzidzi wa nyatwa ikulu, anthu anewa anafuna kusalikira anadzakwatwa mbaenda kudzulu toera akakhale pabodzi na anango adaenda kale a mu nsoka wa 144.000. Kudzulu, iwo anadzatonga pabodzi na Yezu mu Umambo wa Mulungu.—Mat. 24:31; Apok. 5:9, 10.

6-7. (a) Ndi nsoka upi unango udaona Juwau, pontho tisapfundzanji thangwi ya iwo? (b) Thangwi yanji bukhu ya Apokalipse kapitulu 7 ndi yakufunika kuna misoka miwiri ene ya atumiki a Mulungu?

⁶ Pidamala iye kuona nsoka wa ale anafuna kuenda kudzulu, Juwau aona “mwinji ukulu.” Mwakusiyana na 144.000, nsoka unoyu ndi ukulu kakamwe wakuti nkhabe anakwanisa kuulengesa. (Apok. 7:9, 10) Tisapfundzanji thangwi ya nsoka unoyu? Juwau apangwa: “Awa ndiwo adabuluka mu nyatwa ikulu, iwo afula nguwo zawo zakulapha, mbazicenesa mu ciropa ca Mwanabira.” (Apok. 7:14) Pakumala kupulumuka pa nyatwa ikulu, ‘mwinji unoyu ukulu’ unadzakhala pa dziko yapantsi mbutsandzaya na nkhombo zizinji.—Masal. 37:9-11, 27-29; Mis. 2:21, 22; Apok. 7:16, 17.

⁷ Mwakukhonda tsalakana khala tasankhulwa toera kuenda kudzulu peno toera kukhala pa dziko yapantsi, kodi tisakwanisa kuona kuti tiri mu nsoka wa anthu analongwa pa Apokalipse kapitulu 7? Unoyu unadzakhala ndzidzi wakutsandzayisa kakamwe kuna misoka ineyi miwiri ya atumiki a Mulungu! Ife tinadzatsandzaya kakamwe thangwi yakuphedzera utongi wa Yahova. Ndi pinthu pipi pinango pinalonga bukhu ya Apokalipse thangwi ya nyatwa ikulu?—Mat. 24:21.

8. Kodi nyatwa ikulu inadzatoma tani, pontho anthu azinji anadzacitanji?

⁸ Mu nsolo udamala, ife tapfundza kuti mwakukhonda dembuka, misoka ya ndale ya dziko ino inadzapomokera Bhabhilonya Wankulu wakuti ndi utongi wa dziko yonsene wa uphemberi wauthambi. (Apok. 17:16, 17) Pyenepi pinadzatomesa nyatwa ikulu. Kodi pyenepi pinadzacitisa anthu azinji kutoma kutumikira Yahova? Nkhabe. M’mbuto mwace, bukhu ya Apokalipse kapitulu 6 isapangiza kuti mu ndzidzi unoyu wakunentsa, anthu akuti nee asatumikira Yahova anadzasaka citsidzikizo kuna misoka ya ndale na anyamalonda a dziko ino, akuti asalandaniswa na mapiri. Nakuti anthu anewa nee anadzaphedzera Umambo wa Mulungu, Yahova anadzaaona ninga apingizi.—Luka 11:23; Apok. 6:15-17.

9. Kodi atumiki a Yahova anadzakhala tani akusiyana na anthu akuti nee asatumikira Mulungu mu ndzidzi wa nyatwa ikulu, pontho ninji pinafuna kudzaacitikira?

 ⁹ Mwandimomwene, atumiki akukhulupirika a Yahova anadzakhala akusiyana mu ndzidzi unoyu wakunentsa kakamwe wa nyatwa ikulu. Iwo anadzakhala nsoka ubodzi basi pa dziko yapantsi wa anthu akuti anadzatumikira Yahova Mulungu mbakhonda kuphedzera “cikala.” (Apok. 13:14-17) Kupitiriza kwawo kukhala akukhulupirika kuna Yahova kunadzacitisa anyamalwa a Yahova kukhala akuipirwa kakamwe. Na thangwi ineyi, nsoka wa madzindza unadzapomokera atumiki a Mulungu pa dziko yonsene yapantsi. Kupomokera kweneku, m’Bhibhlya kusacemerwa kupomokera kwa Goge wa Magoge.—Ezek. 38:14-16.

10. Mwakubverana na Apokalipse 19:19-21, kodi Yahova anadzacitanji atumiki ace angadzapomokerwa?

¹⁰ Yahova anadzacitanji thangwi ya kupomokera kweneku? Iye alonga: ‘Ine ndinadzapangiza ukali wanga.’ (Ezek. 38:18, 21-23) Bukhu ya Apokalipse kapitulu 19 isalonga pinafuna kucitika. Yahova anatuma Mwanace toera kutsidzikiza atumiki Ace, pontho toera kufudza anyamalwa awo. “Anyankhondo kudzulu” akuti ndi aanju akukhulupirika na nsoka wa 144.000 anadzabwera pabodzi na Yezu toera kudzamenyana na Goge wa Magoge. (Apok. 17:14; 19:11-15) Nkhondo ineyi inadzacitanji? Iyo inadzafudza anthu onsene na misoka yonsene inakhonda Yahova!—Lerini Apokalipse 19:19-21.

11. Ndi cinthu cipi cakutsandzayisa kakamwe cinalongwa m’bukhu ya Apokalipse?

¹¹ Nyerezerani mabvero anafuna kukhala na anthu akukhulupirika pa dziko yapantsi angapulumuka pakumala kufudzwa anthu onsene akuipa! Unoyu unadzakhala ndzidzi wakutsandzayisa kakamwe. Maseze aanju kudzulu anadzatsandzaya thangwi yakufudzwa kwa Bhabhilonya Wankulu, mbwenye iwo anadzatsandzayambo kakamwe thangwi ya cinthu cinango. (Apok. 19:1-3) Unoyu unadzakhala ndzidzi wakutsandzayisa kakamwe unalongwa m’bukhu ya Apokalipse wakuti ndi ndzidzi “wakumanga banja kwa Mwanabira.”—Apok. 19:6-9.

12. Mwakubverana na Apokalipse 21:1, 2, kodi phwando yakumanga banja kwa Mwanabira inadzacitika lini?

¹² Kodi phwando ineyi yakumanga banja inadzacitika lini? Mbidzati kutoma nkhondo ya Armajedhoni, onsene anacita khundu mu nsoka wa 144.000 anadzakhala kudzulu. Mbwenye unoyu nee unadzakhala ndzidzi wakumanga banja kwa Mwanabira. (Lerini Apokalipse 21:1, 2.) Phwando yakumanga banja kwa mwanabira inadzacitika pakumala kwa nkhondo ya Armajedhoni, anyamalwa onsene a Mulungu angamala kufudzwa.—Masal. 45:3, 4, 13-17.

13. Ninji pinafuna kucitika pa phwando yakumanga banja kwa Mwanabira?

¹³ Ninji pinafuna kucitika pa phwando yakumanga banja kwa Mwanabira? Nakuti kumanga banja kusacitisa mamuna na nkazi kukhala pabodzi, natenepa kumanga banja kweneku kwakuphiphirisa kunadzacitisa Mambo Yezu Kristu kukhala pabodzi Akristu akudzodzwa akukwana 144.000, akuti ndi “mankhadzi” wace. Kumanga banja kweneku kunadzatomesa utongi upswa wakuti unadzatonga dziko yapantsi mu pyaka 1.000.—Apok. 20:6.

14-15. Kodi anyakudzodzwa 144.000 alandaniswa nanji m’bukhu ya Apokalipse kapitulu 21? (Onani foto patsamba yakutoma.)

¹⁴ Buluka penepo, bukhu ya Apokalipse kapitulu 21 isalandanisa Akristu akudzodzwa akukwana 144.000 na nzinda wakubalika kakamwe unacemerwa “Yerusalemu Mupswa.”  (Apok. 21:2, 9) Nzinda unoyu wamangwa padzulu pa miyala 12 yakuti yalembwa “madzina 12 a apostolo 12 a Mwanabira.” Thangwi yanji pyenepi pikhali pyakufunika kakamwe kuna Juwau? Thangwi iye aona kuti dzina yace yalembwambo pa ubodzi wa miyala ineyi. Unoyu ukhali mwai ukulu kakamwe kuna Juwau.—Apok. 21:10-14; Aef. 2:20.

¹⁵ Nzinda unoyu wakuphiphirisa ndi wakusiyana kakamwe na mizinda inango. Nzinda unoyu ukhali na nseu ukulu wa ouro yadidi, misuwo 12 ya perola, mpanda wa nzinda na padatoma iwo kumangwa pakhali pa miyala ya ntengo ukulu, pontho ukhadapimwa mwadidi kakamwe. (Apok. 21:15-21) Ngakhale tenepo, Juwau aona ninga ciripo cikhasala. Onani pidalonga Juwau: ‘Mwenemu nee ndaona templo, thangwi Yahova Mulungu Wamphambvu Zonsene na Mwanabira ndiwo templo ya nzinda unoyu. Nzinda nee usafuna dzuwa na mwezi toera kuumwanikira, thangwi iwo usamwanikirwa na mbiri ya Mulungu, pontho nyale yawo ndi Mwanabira.’ (Apok. 21:22, 23) Ale anafuna kucita khundu ya Yerusalemu Mupswa anadzakhala pabodzi na Yahova. (Aheb. 7:27; Apok. 22:3, 4) Natenepa, Yahova na Yezu ndi templo mu nzinda unoyu.

16. Ninji pinafuna kudzacitika kuna anthu mu Utongi wa Pyaka Cikwi pya Umambo wa Mulungu?

¹⁶ Akristu akudzodzwa asakomerwa kakamwe anganyerezera pya nzinda unoyu. Mbwenye ale ali na cidikhiro cakukhala pa dziko yapantsi asafunikambo kukomerwa na nzinda unoyu. Mu ndzidzi wa Pyaka Cikwi pya Utongi wa Umambo wa Mulungu, Yerusalemu Mupswa anadzabweresa nkhombo zizinji pa dziko yapantsi. Juwau aona nkhombo zenezi mbaziwewa ninga “nkulo wa madzi akupasa umaso.” Mitunda miwiri ene ya nkulo unoyu ikhali na “miti yakupasa umaso” yakuti ikhali na masamba akuti akhali na basa “yakuwangisa madzindza a anthu.” (Apok. 22:1, 2) Anthu onsene anafuna kudzakhala m’maso mu ndzidzi unoyu anadzakhala na mwai wakutsandzaya na pinthu pyenepi pyadidi. Mwapang’ono na pang’ono, anthu onsene akubvera anadzakhala aungwiro. Nee kunadzaonekabve utenda, nee kubva kupha, pontho nee kunadzaonekabve kulira thangwi ya kutsukwala.—Apok. 21:3-5.

17. Mwakubverana na Apokalipse 20:11-13, mbani anafuna kudzalamuswa toera kukhala m’maso mu Utongi wa Pyaka Cikwi?

¹⁷ Mbani anafuna kudzapaswa pinthu pyenepi  pyadidi? Pakutoma ndi mwinji ukulu unafuna kudzapulumuka pa nkhondo ya Armajedhoni, pabodzi na ana onsene anafuna kudzabalwa mu dziko ipswa. Kusiyapo pyenepi, bukhu ya Apokalipse kapitulu 20 isalonga kuti anyakufa anadzalamuswa. (Lerini Apokalipse 20:11-13.) Anthu “akulungama” akukhulupirika akuti afa kale pabodzi na “akukhonda kulungama” akuti nee akhala na mwai wakupfundza pya Yahova, onsene anadzalamuka mbakhala m’maso pa dziko yapantsi. (Mabasa 24:15; Juwau 5:28, 29) Kodi pyenepi pisabveka kuti mu Utongi wa Pyaka Cikwi anthu onsene anadzalamuswa mbakhala m’maso pa dziko yapantsi? Nkhabe. Anthu adakhonda kutumikira Yahova pikhali iwo m’maso nee anadzalamuswa. Iwo akhadapaswa mwai, mbwenye apangiza kuti nee athema toera kukhala m’Paraizu pa dziko yapantsi.—Mat. 25:46; 2 Ates. 1:9; Apok. 17:8; 20:15.

18. Pinthu pinadzakhala tani kunkhomo kwa pyaka 1.000?

¹⁸ Kunkhomo kwa pyaka 1.000, anthu onsene pa dziko yapantsi anadzakhala m’maso. Nkhabepo munthu anafuna pontho kudzakhuiwa na madawo a Adhamu. (Aroma 5:12) Nyatwa zinaoneka thangwi ya kudawa kwa Adhamu zinadzamaliswa zonsene. Natenepa, pyenepi pisabveka kuti ale ali pa dziko yapantsi ‘anadzakhala m’maso’ ninga anthu aungwiro kunkhomo kwa pyaka 1.000.—Apok. 20:5.

19. Thangwi yanji panadzaoneka mayesero akumalisa?

¹⁹ Ife tisadziwa kuti Yezu apitiriza kukhala wakukhulupirika kuna Mulungu, ngakhale pidayeserwa iye na Sathani. Kodi anthu onsene aungwiro anadzacita pibodzi pyene Sathani angapaswa pontho mwai wa kuayesera? M’bodzi na m’bodzi anadzatawira ekhene mbvundzo unoyu, Sathani angadzasudzulwa mbabuluka n’djendje yakuzika kakamwe kunkhomo kwa pyaka 1.000. (Apok. 20:7) Anthu anafuna kukhala akukhulupirika mu ndzidzi wa mayesero akumalisa anadzatambira umaso wakukhonda mala mbatsandzaya na ufulu wandimomwene. (Aroma 8:21) Ale anafuna kutowera Sathani mbasandukira Yahova anadzafudzwa kwenda na kwenda pabodzi na Sathani na madimonyo ace.—Apok. 20:8-10.

20. Ndi api mabvero anu thangwi ya maprofesiya akutsandzayisa a m’bukhu ya Apokalipse?

²⁰ Ndi api mabvero anu pakumala kupfundza mwacigwagwa mphangwa zenezi za m’bukhu ya Apokalipse? Kodi imwe musakomerwa munganyerezera kuti musacita khundu ya kukwanirisika kwa maprofesiya anewa? Mwakukhonda penula, pyenepi pisakukulumizani toera kucemerambo anango toera akhale pabodzi na ife mu ulambiri wakucena wa Mulungu wathu. (Apok. 22:17) Nakuti cincino tamala kupfundza pinthu pyenepi pinafuna kucitika ntsogolo, tiri akutsandzaya kakamwe, pontho tisafuna kulonga ninga pidalonga mpostolo Juwau kuti: “Ameni! Bwerani Mbuya Yezu.”—Apok. 22:20.