1. Kodi Bhibhlya isalonganji thangwi ya kulanga?

NINJI pisanyerezera imwe mungabva fala yakuti ‘kulanga’? Anthu azinji asanyerezera kuti ndi kutcunyuswa, mbwenye kulangwa kusaphataniza pinthu pizinji. Bhibhlya isalonga kuti kulangwa ndi kwadidi kwa ife, pontho midzidzi inango kusaphataniza udziwisi, ufuni na umaso. (Misangani 1:2-7; 4:11-13) Natenepa, Mulungu angatilanga, pisapangiza kuti iye asatifuna na asafuna kuti tikhale kwenda na kwenda. (Ahebere 12:6) Maseze kulanga kwa Mulungu midzidzi inango kusaphataniza kutcunyusa, cipo kusakhala kwakuipa. Mwandimomwene, fala yakuti ‘kulangwa’ isaphataniza kupfundzisa, ninga kusacita nyakubala kuna mwanace wakufunika.

2, 3. Thangwi yanji kulanga kusaphataniza kupfundzisa na kutcunyusa? (Onani cithundzithundzi cakutoma.)

² Nyerezerani citsandzo ici: Mwana anacemerwa Johnny akhasendzeka na bhola n’nyumba. Mai wace ampanga: “Johnny, nee usafunika kumenya bhola n’nyumba! Thangwi unaswa pinthu.” Mbwenye iye apwaza pidalonga mai wace mbapitiriza kumenya bhola. Natenepa bhola yamenya  cakuikhira maluwa, mbicisweka! Kodi mai wace acitanji toera kumulanga? Iye ampfundzisa mukumpanga kuti thangwi yanji pidacita iye ndi pyakuipa. Iye akhafuna kuti Johnny adzindikire kuti ndi pyadidi kubvera anyakubalace, pontho uphungu wawo ndi wakufunika. Toera kumphedza kubvesesa pyenepi, mai wace aona kuti ndi pyadidi kuntcunyusa mbam’bisira bhola mu ndzidzi ungasi. Johnny nee akomerwa na pyenepi, mbwenye pyamphedza toera kudziwa kuti angakhonda kubvera anyakubalace, anatcunyuswa.

³ Ninga Akristu, ife tisacita khundu ya banja ya Mulungu. (1 Timoti 3:15) Babathu Yahova ali na mathangwi adidi toera kutipanga pinthu pyadidi na pyakuipa, mbatilanga tingakhonda kumbvera. Pontho, khala macitiro athu asabweresa mabvero akuipa, kulangwa na Yahova mwaufuni kunatiphedza toera kukumbuka kufunika kwa kumbvera. (Agalata 6:7) Mulungu asatifuna kakamwe, pontho nee asafuna kuti tithabuke.—1 Pedro 5:6, 7.

4. (a) Thangwi yanji Yahova asafuna kuti tipfundzise anango? (b) Tinadinganji mu nsolo uno?

⁴ Tingalanga mukuphatisira midida ya Bhibhlya, tinakwanisa kuphedza mwana peno nyakupfundza Bhibhlya toera akhale ntowereri wa Kristu. Ife tisaphatisira Bhibhlya toera kupfundzisa anyakupfundza athu pinthu pyadidi na kuaphedza toera kubvesesa na ‘kukoya pinthu pyonsene pidatipanga Yezu.’ (Mateo 28:18, 19; 2 Timoti 3:16) Ineyi ndi njira inafuna Yahova kwa iwo toera akwanise kuphedzambo anango kuti akhale atowereri a Kristu. (Lerini Tito 2:11-14.) Cincino tendeni tidinge mibvundzo mitatu yakufunika: (1) Kulanga kwa Mulungu kusapangiza tani kuti iye asatifuna? (2) Tinapfundzanji kubulukira mu citsandzo ca anthu adalangwa na Mulungu? (3) Tinatowezera tani Yahova na Mwanace pakulanga anango?

5. Thangwi yanji kulangwa na Yahova kusapangiza ufuni wace kwa ife?

⁵ Yahova asatisandika na kutipfundzisa thangwi asatifuna. Iye asafuna kuti tikhale cifupi na iye mbatikhala kwenda na kwenda. (1 Jwau 4:16) Iye cipo asatitikana peno kuticitisa kupibva kuti ndife akusowa basa. (Misangani 12:18) Mbwenye, Yahova asaona makhaliro athu adidi mbatipasa ufulu wakusankhula. Kodi musaona kuti kulangwa kunatambira ife kubulukira m’Bhibhlya, m’mabukhu athu, kwa anyakubalathu, peno akulu a mpingo kusapangiza ufuni wa Yahova? Mwandimomwene, akulu a mpingo angayesera kutisandika mwaufuni ife mbatidzati kudzindikira kuti tacita cinthu cakuipa, iwo asatowezera ufuni wa Yahova.—Agalata 6:1.

6. Thangwi yanji kulangwa kusapangiza ufuni wa Mulungu maseze munthu akhale wakukhonda thema kucita mabasa mu mpingo?

 ⁶ Midzidzi inango kulanga kusaphataniza pizinji kupiringana uphungu. Khala munthu acita madawo makulu, iye nee anakhalabve wakuthema toera kucita mabasa mu mpingo. Ngakhale pyenepi picitike, kulangwa kusapangiza ufuni wa Mulungu kwa iye. Mwacitsandzo, panango pinamphedza toera kuona kufunika kwa kukhazikisa ndzidzi wakupfundza Bhibhlya, kunyerezera mwacidikhodikho na kucita phembero. Kucita pyenepi kunamphedza toera kuwangisa uxamwali wace na Yahova. (Masalmo 19:7) Mukupita kwa ndzidzi, panango anakhala pontho wakuthema toera kucita mabasa adaluza iye. Ngakhale munthu abuluswe mu mpingo, pyenepi pisapangiza ufuni wa Yahova thangwi pisatsidzikiza mpingo ku pinthu pyakuipa. (1 Akorinto 5:6, 7, 11) Pontho, nakuti kulanga kwa Mulungu ndzidzi onsene ndi kwadidi, kunaphedza nyakubuluswa mu mpingo toera kudzindikira madawo ace mbatcunyuka.—Machitiro 3:19.

7. Kodi Chebna akhali ani, pontho ndi n’khaliro upi wakuipa udakulisa iye?

⁷ Toera kubvesesa kufunika kwa kulangwa, cincino tinadinga anthu awiri adalangwa na Yahova. Wakutoma ndi Chebna, mamuna adakhala maso mu ndzidzi ukhatonga Mambo Ezekiya, unango ndi Graham, m’bale wa mu ndzidzi uno. Chebna akhali ‘nyakuonera nyumba,’ panango ya Mambo Ezekiya, pontho akhali na cidzo cikulu. (Izaiya 22:15) Mbwenye Chebna adzakhala wakudzikuza na akhafuna anango anyerezere kuti iye akhali wakufunika kakamwe. Iye acitisambo nthumbi yace ikulu mbafamba pa “ngolo zadidi.”—Izaiya 22:16-18.

8. Yahova alanga tani Chebna, pontho ninji pidacitika?

⁸ Nakuti Chebna ayesera kupasika mbiri, Mulungu ankwatira basa ikhacita iye mbapasa mamuna akhacemerwa Eliakimu. (Izaiya 22:19-21) Pyenepi pyacitika mu ndzidzi ukhanyerezera Mambo Senakeribu wa ku Asirya kupomokera Yerusalemu. Buluka penepo, Senakeribu atuma nsoka wa  anyabasace na mwinji wa anyankhondo toera kugopesa Ayuda, pontho toera Mambo Ezekiya atawire kuperekeka. (2 Amambo 18:17-25) Ezekiya atuma Eliakimu na amuna anango awiri toera akaonane na anyabasa a Senakeribu. M’bodzi wa amuna anewa akhali Chebna, wakuti mu ndzidzi unoyu akhali mulembi. Natenepa tisakwanisa kuona kuti Chebna akhadapfundza kukhala wakucepeseka, pontho nee atsukwala thangwi ya kusandikwa. Iye akhali dzololo toera kucita basa yakucepeseka. Ife tinakwanisa kupfundza ntsonga zitatu kubulukira mu pinthu pidacitikira Chebna.

9-11. (a) Tisapfundzanji kubulukira mu citsandzo ca Chebna? (b) Musapibva tani thangwi ya njira idatsalakana Yahova Chebna?

⁹ Cakutoma, pidacitikira Chebna pisatikumbusa kuti ‘kudzikuza kusadzesa utcerengi.’ (Misangani 16:18) Panango ife tinakhala na miyai yakupambulika mu mpingo, pontho anango ananyerezera kuti ndife akufunika kakamwe. Khala ndi tenepo, tinapitiriza kukhala akucepeseka? Tisakumbuka kuti maluso onsene ali na ife na pinthu pyonsene pinacita ife pisakwanisika basi ene na ciphedzo ca Yahova? (1 Akorinto 4:7) Mpostolo Paulu alonga: ‘Ndiri kupanga imwe monsene kuti mukhonde kunyerezera kupiringana pinafunika imwe kunyerezera thangwi ya imwe ene, mbwenye pangizani kuti muli na manyerezero adidi.’—Aroma 12:3.

¹⁰ Caciwiri, uphungu wamphambvu udapereka Yahova kuna Chebna usapangiza kuti akhali na cinyindiro cakuti Chebna mbadacinja. (Misangani 3:11, 12) Ineyi ndi pfundziro kwa ale adaluza miyai yawo yakutumikira. M’mbuto mwakuipirwa na kukhala akutsukwala, iwo anakwanisa kupitiriza kutumikira Yahova. Iwo anakwanisa kuona kulangwa kweneku ninga cidzindikiro ca ufuni wa Yahova. Kumbukani kuti Babathu anadzapasa nkhombo ale anakhala akucepeseka. (Lerini 1 Pedro 5:6, 7.) Kulanga mwaufuni kwa Yahova kunakwanisa kutiumba khala ndife akucepeseka ninga dongo yakufewa.

¹¹ Cacitatu, tisapfundza cinthu cakufunika kakamwe munjira idatsalakana Yahova Chebna. Maseze kulanga kwa Yahova kusapangiza kuti asaida madawo, kusapangizambo kuti iye asafuna munthu adadawa. Yahova asanyang’ana pinthu pyadidi mwa anthu. Khala ndimwe nyakubala peno nkulu wa mpingo, kodi munatowezera citsandzo ca Yahova pakulanga munthu?—Yuda 22, 23.

12-14. (a) Kodi anango asapibva tani angalangwa na Yahova? (b) Kodi Mafala a Mulungu aphedza tani m’bale Graham toera kucinja n’khaliro wace, pontho ndi nkhombo zipi zidakhala na iye?

¹² Mwakutsukwalisa, anthu anango angalangwa asaipirwa kakamwe mbasiya Mulungu na mpingo. (Ahebere 3:12, 13) Kodi pyenepi pisabveka kuti nee m’bodzi anakwanisa kuaphedza? Nkhabe! Onani citsandzo ca Graham, wakuti akhadabuluswa mu mpingo, mukupita kwa ndzidzi mbabwezereswa. Buluka penepo, iye asiya kumwaza mphangwa na kuenda kumisonkhano. Nkulu wa mpingo unango awangisira toera kukhala xamwali wace, pontho Graham aphemba nkulu wa mpingo unoyu toera apfundze Bhibhlya na iye.

¹³ Nkulu wa mpingo asakumbuka: “Graham akhali na nkandzo wakudzikuza. Iye akhasumula akulu a mpingo adacita khundu ya kubuluswa kwace mu mpingo. Natenepa  maulendo mangasi, tadinga malemba analonga pya kudzikuza, pontho thangwi yanji tisafunika kucalira n’khaliro unoyu. Graham atoma kudzindikira n’khaliro wace kubulukira m’Mafala a Mulungu, natenepa iye atsukwala kakamwe! Mwakudzumatirisa, pidadzindikira iye kuti akhali na ‘cirombo’ cakudzikuza n’diso mwace na nkandzo wakusumula, iye acinja mwakucimbiza. Iye atoma kugumanika pa misonkhano mwakukhonda phonya, kupfundza Mafala a Mulungu mwaphinga na kucita phembero ntsiku zonsene. Iye atawirambo kucita mabasa ace auzimu ninga nsolo wa banja, pyenepi pyatsandzayisa nkazace na anace.”—Luka 6:41, 42; Tyago 1:23-25.

¹⁴ Nkulu wa mpingo athimiza: “Ntsiku inango, Graham andipanga pinthu pyakuti pyandikhuya kakamwe. Iye alonga: ‘Ine ndikhadziwa kale undimomwene, pontho ndikhatumikira ninga mpainiya. Mbwenye basi ene cincino ndinakwanisa kulonga kuti ndisafuna Yahova.’” Mwakukhonda dembuka, Graham apaswa basa yakutsalakana mikrofoni pa misonkhano, pontho iye akomerwa kakamwe kucita basa ineyi. Nkulu wa mpingo alonga: “Citsandzo cace candipfundzisa kuti munthu angakhala wakucepeseka pamaso pa Mulungu mbatawira kulangwa, asakhala na nkhombo zizinji!”

15. Tisafunika kucitanji toera anango atawire uphungu wathu?

¹⁵ Tingafuna kukhala apfundzisi adidi, tisafunika kukhala anyakupfundza adidi. (1 Timoti 4:15, 16) Munjira ibodzi ene, khala ndimwe munthu anaphatisirwa na Yahova toera kulanga anango, musafunika kukhala wakucepeseka na kutawira kutsogolerwa na Yahova. Anango angaona kuti ndimwe wakucepeseka, anakulemedzani na pinakhala pyakukhonda nentsa kutawira uphungu wanu. Ife tinakwanisa kupfundza kubulukira mu citsandzo ca Yezu.

16. Tisapfundzanji kubulukira munjira idalanga Yezu na kupfundzisa?

¹⁶ Ndzidzi onsene Yezu akhabvera Babace, maseze pikhali pyakunentsa kakamwe kucita pyenepi. (Mateo 26:39) Iye apanga anyakubveserace kuti pikhapfundzisa iye na udziwisi wace pikhabuluka kuna Babace. (Jwau 5:19, 30) Yezu akhali wakucepeseka na wakubvera, pontho pyenepi pyamphedza toera kukhala mpfundzisi wantsisi. Anthu a mitima yadidi akhakomerwa kukhala na iye. (Lerini Luka 4:22.) Mafala adidi a Yezu akhawangisa anthu akutsukwala na akufewa. (Mateo 12:20) Iye asandika apostolo ace mwaufuni na mwakukoma ntima, ngakhale kuti akhadaipirwa na iwo thangwi ya kuketesana kuti mbani akhali nkulu pakati pawo.—Marko 9:33-37; Luka 22:24-27.

17. Ndi makhaliro api anafuna kuphedza akulu a mpingo toera kutsalakana mwadidi mpingo?

¹⁷ Ndzidzi onsene unalanga akulu a mpingo mukuphatisira midida ya Bhibhlya,  asafunika kutowezera Kristu. Munjira ineyi, iwo anapangiza kuti asafuna kutsogolerwa na Mulungu pabodzi na Mwanace. Mpostolo Pedhru alemba: ‘Kumbizani nkumbi wa mabira a Mulungu anaonera imwe, tayu mwakukakamizwa, mbwenye mucite na ntima onsene; lekani kucita pyenepi na ntima wakufuna cinthu; mbwenye mucite na ntimanu onsene. Lekani kuoneka ninga anyakutonga Akristu andzanu; mbwenye mukhale citsandzo cadidi kuna mabira.’ (1 Pedro 5:2-4) Akulu a mpingo akuti asangonjera Mulungu na Kristu anakhala na nkhombo zizinji, kuphatanizambo ale anatsalakana iwo.—Izaiya 32:1, 2, 17, 18.

18. (a) Kodi Yahova asafuna kuti anyakubala acitenji? (b) Kodi Mulungu asaphedza tani anyakubala?

¹⁸ Ndiye tani pya kulanga na kupfundzisa m’banja? Yahova apanga misolo ya mabanja: ‘Lekani kunentsa-nentsa ananu, mbwenye mualere pyadidi, mbamuapfundzisa na kuakuza ninga munafunira Yahova.’ (Aefesi 6:4) Kodi kulanga na kupfundzisa ndi kwakufunikadi? Lemba ya Misangani 19:18 isapangiza kuti kulanga ana pisabveka umaso peno kufa. Yahova apasa basa anyakubala toera kulanga anawo. Iwo angakhonda kucita pyenepi, anatawirira okha kuna Yahova! (1 Samwele 3:12-14) Mbwenye Yahova asapasa anyakubala udziwisi na mphambvu angaphemba ciphedzo cace na kunyindira Mafalace mbatsogolerwa na nzimu wakucena.—Lerini Tyago 1:5.

19, 20. (a) Ndi nkhombo zipi zinakhala na ife tingatawira kulangwa na Mulungu? (b) Tinadzapfundzanji mu nsolo unatowera?

¹⁹ Tingatawira kulangwa na Yahova mbititowezera njira inalanga Iye na Yezu, tinakhala na nkhombo zizinji kakamwe! Anthu onsene m’mabanja mwathu na m’mipingo yathu anakhala mwantendere, pontho anapibva kuti ndi akufuniwa na akutsidzikizika. Pyenepi ndi pyakucepa kakamwe tingalandanisa na ntendere unafuna kudzakhala na ife ntsogolo. (Masalmo 72:7) Kulanga kwa Yahova kusatikhunganya toera kukhala pabodzi kwenda na kwenda mwantendere na mwakuphatana na Babathu Yahova. (Lerini Izaiya 11:9.) Tingakumbuka pyenepi, tinadzaona kuti kulanga ndi njira yadidi inaphatisira Mulungu toera kupangiza ufuni wace kwa ife.

²⁰ Mu nsolo unatowera, tinadzapfundza pizinji thangwi ya kulangwa m’banja na mu mpingo. Tinadzaona kuti tinalangika tani tekha. Tinadzapfundzambo kuti tinacalira tani cinthu cakupha kakamwe kupiringana kulangwa.