1-2. Mwakubverana na Mabasa 8:27-31, 35-38, ninji pidakulumiza mamuna wa ku Etiopya toera kubatizwa?

KODI imwe musafuna kubatizwa toera kukhala nyakupfundza wa Kristu? Ufuni na kupereka takhuta kwakulumiza anthu azinji toera kubatizwa. Onani citsandzo ca mamuna m’bodzi wakuti akhali nyabasa wa mambo wankazi wa ku Etiopya.

² Mamuna unoyu pidabvesesa iye Malemba abatizwa mwakukhonda dembuka. (Lerini Mabasa 8:27-31, 35-38.) Ninji pidankulumiza? Iye akomerwa na Mafala a Mulungu thangwi akhaleri mavesi anango a bukhu ya Izaiya mu ndzidzi ukhabuluka iye ku Yerusalemu. Pontho mu ndzidzi udanfokotozera Filipi, iye apereka takhuta kakamwe thangwi ya pinthu pidancitira Yezu. Thangwi yanji mamuna unoyu akhadaenda ku Yerusalemu? Thangwi iye akhafuna kakamwe Yahova. Tisadziwa tani pyenepi? Thangwi iye akhadaenda kweneko toera kulambira Yahova. Pisaoneka kuti mamuna unoyu akhadasiya uphemberi wace, pontho acita khundu ya mbumba yakuti ikhatumikira basi ene Mulungu wandimomwene. Nakuti iye akhafuna Yahova, pyenepi pyankulumiza toera kubatizwa mbakhala nyakupfundza wa Kristu.​—Mat. 28:19.

3. Ndi pinthu pipi pyakuti panango pinacimwanisa munthu kubatizwa? (Onani bokosi yakuti “ Ninji Piri Muntima Mwanu?”)

³ Kufuna Yahova kunakukulumizani toera kubatizwa. Mbwenye kufuna pinthu pinango kunakucimwanisani kubatizwa. Munjira ipi? Mwacitsandzo, Panango imwe musafuna kakamwe acibale na axamwali anu akuti nee asatumikira Yahova, pontho musadzudzumika kuti mungabatizwa, iwo anakutcingani. (Mat. 10:37) Panango imwe musafuna kakamwe  misambo yakuti musaidziwa kuti Mulungu nee asakomerwa nayo, pontho pisakunentsani kakamwe kuisiya. (Masal. 97:10) Panango imwe mwakula mbamucita maphwando auphemberi wauthambi, pontho musakomerwa kakamwe na maphwando anewa. Natenepa, panango pinakhala pyakunentsa kakamwe kwa imwe toera kusiya misambo ineyi yakuti nee isakomeresa Yahova. (1 Akor. 10:20, 21) Panango munabvundzika, “Mbani peno ndi pinthu pipi pinafuna ine kakamwe?”

4. Ndi cinthu cipi cakufunika kakamwe cinafuna kukukulumizani toera kubatizwa?

⁴ Imwe muli na pinthu pyadidi pyakuti musapifuna, pontho musapereka takhuta thangwi ya pinthu pyenepi. Mwacitsandzo, mbamudzati kupfundza Bhibhlya na Mboni za Yahova, panango imwe mukhalemedza kakamwe Bhibhlya, pontho mukhafuna Yezu. Nakuti cincino musadziwa Mboni za Yahova, panango munakomerwa kukhala pabodzi na iwo. Mbwenye kufuna basi ene pinthu pyenepi nee kunakucitisani kupereka umaso wanu kuna Yahova mbamubatizwa. Cinthu cakufunika kakamwe cinafuna kukukulumizani toera kubatizwa ndi kufuna Yahova Mulungu. Mungafuna kakamwe Yahova kupiringana pinthu pyonsene, nee munatawirisa kuti cinthu cinango cikucimwaniseni kuntumikira. Kufuna Yahova kunakukulumizani toera kubatizwa, pontho kunakuphedzani toera kupitiriza kukhala wakukhulupirika kuna iye pakumala kubatizwa.

5. Ndi mibvundzo ipi inafuna ife kudinga?

⁵ Yezu alonga kuti tisafunika kufuna Yahova na ntimathu onsene, na umaso wathu onsene, na ndzeru zathu zonsene na mphambvu zathu zonsene. (Marko 12:30) Tinakwanisa tani kufuna na kulemedza kakamwe Yahova? Tinganyerezera ufuni unapangiza Yahova kuna ife, pinatiphedza toera kunfunambo. (1 Juwau 4:19) Ndi mabvero na macitiro api anango anafuna kukhala na imwe mungafuna kakamwe Yahova? *

6. Mwakubverana na Aroma 1:20, ndi njira ipi ibodzi yakuti munakwanisa kupfundza pya Yahova?

⁶ Pfundzani pya Yahova kubulukira mu pinthu pidacita iye. (Lerini Aroma 1:20; Apok. 4:11) Tinganyerezera njira idacitwa miti na pinyama, pisapangiza kuti Yahova ndi waudziwisi kakamwe. Nyerezerani njira yakudzumisa idacitwa manungo anu. (Masal. 139:14) Pontho nyerezerani mphambvu iri na dzuwa yakuti ndi ibodzi mwa mabhiliyau a nyenyezi. * (Iza. 40:26) Mungacita pyenepi, munalemedza kakamwe Yahova. Pontho mungadziwa kuti Yahova ndi waudziwisi na wamphambvu kakamwe, pinakuphedzani toera kutoma kucita uxamwali na iye. Mbwenye toera kufuna kakamwe Yahova na kukhala xamwali wace, musafunika kudziwa pizinji thangwi ya iye.

7. Musafunika kukhala na cinyindiro cipi toera kufuna kakamwe Yahova?

⁷ Musafunika kukhala na cinyindiro cakuti Yahova asakufunani kakamwe. Kodi pisakunentsani kukhulupira kuti Nciti wakudzulu na dziko yapantsi asakuonani, pontho asakutsalakanani? Khala ndi tenepo, kumbukani kuti Yahova “nee ali kutali na m’bodzi na m’bodzi wa ife.” (Mabasa 17:26-28) Iye “asadinga mitima yonsene,” pontho iye apikira kuna imwe ninga pidalonga Dhavidhi kuna Salomoni kuti “ungansaka, iwe unan’gumana.” (1 Pya dziko. 28:9) Mwandimomwene, thangwi inakucitisani  kupfundza Bhibhlya cincino ndi yakuti Yahova alonga, “ine ndakukwewa toera ubwere kuna ine.” (Yer. 31:3) Mungadziwa mwadidi pyonsene pinakucitirani Yahova, imwe munanfuna kakamwe.

8. Munapangiza tani kuti musapereka takhuta thangwi ya ufuni wa Yahova?

⁸ Njira ibodzi yakupangiza kuti tisapereka takhuta thangwi ya ufuni wa Yahova ndi kulonga naye kubulukira m’phembero. Ufuni wanu kuna Mulungu unathimizirika kakamwe mungampanga pyonsene pinakudzudzumisani na kupereka takhuta kuna iye thangwi ya pinthu pyonsene pinakucitirani iye. Pontho uxamwali wanu na Yahova unakhala wakuwanga kakamwe mungaona njira inatawira iye maphembero anu. (Masal. 116:1) Kusiyapo pyenepi, imwe munakhala na cinyindiro cakuti iye asakubveserani. Mbwenye toera uxamwali wanu na Yahova ukhale wakuwanga, musafunika kudziwa pinthu pinakomerwa na iye na pinaida iye. Pontho musafunika kudziwa pinthu pinafuna iye kuna imwe. Mbwenye njira ibodzi toera kudziwa pyenepi ndi kupfundza Bhibhlya.

9. Munapangiza tani kuti musalemedza Bhibhlya?

⁹ Lemedzani Mafala a Mulungu, Bhibhlya. Basi ene ndi m’Bhibhlya munagumanika undimomwene unalonga pya Yahova na cifuniro cace kuna imwe. Imwe munapangiza kuti musalemedza Bhibhlya mungaileri ntsiku zonsene, mungakhunganyika pfundziro yanu ya Bhibhlya na kuphatisira pinapfundza imwe. (Masal. 119:97, 99; Juwau 17:17) Kodi muli na ndandanda yakuleri Bhibhlya? Kodi musaphatisira ndandanda ineyi toera kuleri Bhibhlya ntsiku zonsene?

10. Ndi cinthu cipi cibodzi cinacitisa Bhibhlya kukhala yakupambulika kakamwe?

¹⁰ Cinthu cibodzi cinacitisa Bhibhlya kukhala yakupambulika kakamwe ndi thangwi isalonga anthu adaona Yezu. Pontho ndiyo basi ene isafokotoza pidacita Yezu kuna imwe. Natenepa mungapfundza pinthu pidalonga Yezu na pidacita iye, pinakuphedzani toera kukhala na uxamwali na iye.

11. Ninji pinafuna kukuphedzani toera kufuna Yahova?

 ¹¹ Funani Yezu, natenepa ufuni wanu kuna Yahova unakhala wakuwanga. Thangwi yanji? Thangwi Yezu asatowezera mwadidi makhaliro a Babace. (Juwau 14:9) Natenepa mungapfundza pizinji thangwi ya Yezu, munadzabvesesa mwadidi pya Yahova na kupereka takhuta kuna iye. Nyerezerani ntsisi zikhapangiza Yezu kuna anthu akhapwazwa na anango thangwi yakutcerenga, kuduwala peno kutsukwala. Pontho nyerezerani uphungu unakupasani iye na nkhombo zinakhala na imwe thangwi yakubvera uphungu unoyu.​—Mat. 5:1-11; 7:24-27.

12. Kupfundza pya Yezu kunakuphedzani toera kucitanji?

¹² Ufuni wanu kuna Yezu unakhala wakuwanga munganyerezera mwadidi pya ntsembe idapereka iye toera kulekerera madawo athu. (Mat. 20:28) Mungabvesesa kuti Yezu afera imwe, pinakuphedzani toera kutcunyuka na kuphemba Yahova toera akulekerereni madawo anu. (Mabasa 3:19, 20; 1 Juwau 1:9) Pontho mungafuna kakamwe Yezu na Yahova, munakomerwa kukhala pabodzi na anthu akuti asapangizambo ufuni ubodzi ene.

13. Ninji pinafuna kukupasani Yahova?

¹³ Funani ale anafuna Yahova. Acibale na axamwali anu akuti nee asatumikira Yahova, panango nee anabvesesa kuti thangwi yanji musafuna kuperekeka kuna Yahova. Panango iwo anakutcingani. Mbwenye Yahova anakupasani abale na alongo mu mpingo toera kukhala acibale anu. Mungakhala pabodzi na abale na alongo anewa, imwe munagumana ufuni na ciphedzo cinafuna imwe. (Marko 10:29, 30; Aheb. 10:24, 25) Mukupita kwa ndzidzi, panango acibale anu anafunambo kutumikira Yahova na kubvera mitemo yace.​—1 Ped. 2:12.

14. Mwakubverana na 1 Juwau 5:3, thangwi yanji kubvera matongero ya Yahova ndi kwakufunika?

¹⁴ Lemedzani mitemo ya Yahova, pontho iphatisireni. Mbamudzati kudziwa Yahova, panango mukhakwanisa kusiyanisa cadidi na cakuipa, mbwenye cincino musaona kuti mitemo ya Yahova ndi yadidi kakamwe. (Masal. 1:1-3; lerini 1 Juwau 5:3.) Nyerezerani uphungu wa Bhibhlya unalonga pya amuna na akazi akumanga banja, anyakubala na ana. (Aef. 5:22–6:4) Banja yanu inakhala yakutsandzaya kakamwe mungabvera uphungu unoyu. Mungabvera pitsogolero pya Yahova pinalonga thangwi yakusankhula axamwali mwandzeru, pinakuphedzani toera kukhala munthu wadidi kakamwe. (Mis. 13:20; 1 Akor. 15:33) Pontho munakhala wakutsandzaya.

15. Musafunika kucitanji toera kudziwa kuphatisira midida ya Bhibhlya?

¹⁵ Midzidzi inango, panango pinakunentsani toera kudziwa kuti munaphatisira tani midida ya Bhibhlya inapfundza imwe. Ndi thangwi yace Yahova asaphatisira gulu yace toera kukupasani mabukhu akuti anakuphedzani kudzindikira cadidi na cakuipa. (Aheb. 5:13, 14) Mungaleri na kupfundza mabukhu anewa, munadzaona kuti midida ineyi ndi yakufunika kakamwe, pontho munadzafuna kucita khundu ya gulu ya Yahova.

16. Yahova asakhunganya tani atumiki ace?

¹⁶ Funani na phedzerani gulu ya Yahova. Yahova asakhunganya atumiki ace m’mipingo; pontho iye akhazikisa Yezu ninga nsolo wa mipingo ineyi. (Aef. 1:22; 5:23) Yezu akhazikisa nsoka ung’ono wa amuna akudzodzwa toera kutsogolera basa inacitwa lero mu gulu ya Yahova. Nsoka unoyu wa amuna usacemerwa “m’bandazi wakukhulupirika na wandzeru,” pontho iwo ali na basa ya kukuphedzani toera kukhala cifupi na Mulungu na kutsidzikiza uxamwali wanu na iye. (Mat.  24:45-47) Njira ibodzi inaphatisira m’bandazi wakukhulupirika toera kukutsalakanani ndi kukhazikisa amuna akuthema toera kutumikira ninga akulu a mpingo, pontho iwo anakwanisa kukutsogolerani na kukutsidzikizani. (Iza. 32:1, 2; Aheb. 13:17; 1 Ped. 5:2, 3) Akulu a mpingo asacita pyonsene pinakwanisa iwo toera kukubalangazani na kukuphedzani toera mukhale na uxamwali wakuwanga na Yahova. Mbwenye cinthu cinango cakufunika kakamwe cakuti anakwanisa kucicita ndi kukuphedzani toera mupfundzise anango pya Yahova.​—Aef. 4:11-13.

17. Mwakubverana na Aroma 10:10, 13, 14, thangwi yanji tisapfundzisa anango pya Yahova?

¹⁷ Phedzani anango toera afune Yahova. Yezu apanga atowereri ace toera apfundzise anango pya Yahova. (Mat. 28:19, 20) Ife tisafunika kubvera ntemo unoyu thangwi ndi basa idapaswa ife. Ufuni wanu kuna Yahova ungakhala wakuwanga, imwe munakhala na mabvero mabodzi ene ninga adakhala na mpostolo Pedhru na Juwau adalonga kuti: “Ife nee tinasiya kulonga pinthu pidaona ife na pidabva ife.” (Mabasa 4:20) Ife tinakhala akutsandzaya kakamwe tingaphedza anango toera kufuna Yahova. Nyerezerani kutsandzaya kudakhala na Filipi, pidaphedza iye mamuna wa ku Etiopya kupfundza undimomwene wa Bhibhlya mbabatizwa. Mungatowezera Filipi na kubvera ntemo wa Yezu wakumwaza mphangwa, munapangiza kuti musafuna kukhala m’bodzi wa Mboni za Yahova. (Lerini Aroma 10:10, 13, 14.) Natenepa, panango imwe munacita mbvundzo ubodzi ene ninga udacita mamuna wa ku Etiopya kuti: “Ninji cinandipingiza toera kubatizwa?”​—Mabasa 8:36.

18. Tinapfundzanji mu nsolo unatowera?

¹⁸ Imwe munacita cisankhulo cakufunika kakamwe mu umaso wanu mungatonga kubatizwa. Nakuti ndi cisankhulo cakufunika kakamwe, musafunika kunyerezera mwadidi mbamudzati kucita cisankhulo ceneci. Kodi musafunika kudziwanji thangwi ya ubatizo? Kodi musafunika kucitanji mbamudzati kubatizwa na mungamala kubatizwa? Mibvundzo ineyi inadzatawirwa mu nsolo unatowera.