1-2. Mbani wakuti anakwanisa kuphedza nyakupfundza Bhibhlya toera athambaruke mpaka kubatizwa?

AMY anakhala ku Fiji alonga: “Ine ndikhakomerwa kakamwe na pinthu pikhapfundza ine m’Bhibhlya. Pontho ndikhadziwa kuti pyenepi ndi undimomwene. Mbwenye pidatoma ine kucedza na abale na alongo mu ndzidzi uzinji, pyenepi pyandiphedza toera kucita macinjo mbandibatizwa.” Pinthu pidacitikirwa na Amy pisatipfundzisa kuti ndi pyakufunika kakamwe kwa ife tonsene mu mpingo kuphedza nyakupfundza Bhibhlya toera athambaruke mpaka kubatizwa.

² M’mwazi mphangwa m’bodzi na m’bodzi anakwanisa kuphedza nyakupfundza Bhibhlya toera athambaruke mpaka kubatizwa. (Aef. 4:16) Mpainiya anacemera Leilani anakhala ku Vanuatu, alonga: “Kazinji kene anthu asalonga kuti anthu onsene mucisa anakwanisa kuphedzera toera mwana akule. Ine ndisanyerezera kuti pyenepi ndi sawasawa na kucita anyakupfundza, natenepa abale na alongo onsene mu mpingo anakwanisa kuphedza munthu toera adziwe undimomwene.” Acibale, axamwali na apfundzisi anakwanisa kuphata basa pabodzi toera mwana akule mwadidi. Iwo anakwanisa kucita pyenepi mukunsimba na kupfundzisa pinthu pyakufunika kakamwe. Munjira ibodzi ene, abale na alongo mu mpingo anakwanisa kupasa uphungu anyakupfundza Bhibhlya, kuasimba na kupangiza citsandzo cadidi kuna iwo na kuaphedza toera athambaruke mpaka kubatizwa.—Mis. 15:22.

3. Mwapfundzanji na mafala adalonga Ana, Dorin na Leilani?

³ Thangwi yanji m’mwazi mphangwa anacitisa pfundziro ya Bhibhlya asafunika kukhala wakutsandzaya amwazi mphangwa anango angaphedza nyakupfundzace wa Bhibhlya? Onani pidalonga mpainiya wakupambulika anacemerwa Ana wa ku Moldova: “Ndi pyakunentsa kakamwe kuna munthu m’bodzi kupereka ciphedzo kuna nyakupfundza Bhibhlya mu ndzidzi unatoma iye kuthambaruka.” Mpainiya wakupambulika  anatumikira mu dziko ibodzi ene, anacemerwa Dorin alonga: “Kazinji kene amwazi mphangwa anango asalonga mphangwa zakuti zisakhuya ntima wa nyakupfundza, pinthu pyakuti ine nee mbidakwanisa kupicita.” Pontho Leilani alonga: “Abale na alongo angapangiza ufuni na citsalakano kuna nyakupfundza Bhibhlya pinamphedza toera kudziwa mwadidi Mboni za Yahova.”—Juwau 13:35.

4. Tinapfundzanji mu nsolo uno?

⁴ Panango munabvundzika: ‘Nakuti nee ndine anacitisa pfundziro, ndinaphedza tani nyakupfundza Bhibhlya toera kuthambaruka?’ Cincino tendeni tione kuti tisafunika kucitanji m’mwazi mphangwa angatiphemba toera kukhala naye pabodzi mu ndzidzi unacitisa iye pfundziro yace ya Bhibhlya, pontho tisafunika kucitanji nyakupfundza Bhibhlya angatoma kubwera pa misonkhano? Kusiyapo pyenepi, tinaonambo kuti akulu a mpingo asafunika kucitanji toera kuphedza nyakupfundza Bhibhlya toera athambaruke mpaka kubatizwa.

5. Musafunika kucitanji m’mwazi mphangwa angakuphembani toera kukhala naye pabodzi pa pfundziro yace ya Bhibhlya?

⁵ Pa pfundziro, m’mwazi mphangwa ndiye ali na basa yakuphedza nyakupfundzace toera abvesese Mafala a Mulungu. Natenepa, m’mwazi mphangwa angakuphembani toera kukhala naye pabodzi pa pfundziro yace, imwe musafunika kumuona ninga ndzanu. Pontho basa yanu ndi ya kumphedzera. (Koel. 4:9, 10) Mphapo musafunika kucitanji toera kukhala nyakuphedza wadidi mu ndzidzi unacitisa ndzanu pfundziro yace ya Bhibhlya?

6. Mungaphembwa na m’mwazi mphangwa toera kukhala naye pabodzi pa pfundziro yace ya Bhibhlya, munaphatisira tani n’dida unagumanika pa Misangani 20:18?

⁶ Khunganyikani pfundziro ya Bhibhlya. Pakutoma bvundzani m’mwazi mphangwa toera akupangeni pang’ono thangwi ya nyakupfundzace. (Lerini Misangani 20:18, Tradução do Novo Mundo da Bíblia Sagrada.) Imwe munakwanisa kumbvundza tenepa: “Ninji pinadziwa imwe thangwi ya nyakupfundza wanu wa Bhibhlya? Ndi nsolo upi unafuna kupfundza imwe? Ninji pinafuna imwe toera nyakupfundza wanu adziwe mu nsolo unoyu? Kodi pana cinthu cinafunika ine kucita peno kucalira kucicita mu ndzidzi unacitisa imwe pfundziro ya Bhibhlya? Kodi pana cinthu cinafunika ine kulonga peno nkhabe mu ndzidzi unoyu? Pontho ndinaphedza tani nyakupfundza Bhibhlya toera athambaruke?” Mwandimomwene, m’mwazi mphangwa nee anakupangani mphangwa zacibisobiso za nyakupfundza wace, mbwenye pinthu pinafuna kukupangani iye thangwi ya nyakupfundza wace pinakwanisa kukuphedzani. Misionaryo unango wankazi anacemerwa Joy akwanisa kulonga thangwi ya nyakupfundza wace kuna ale anaenda na iye pabodzi ku pfundziro yace. Iye alonga: “Ndingacita pyenepi, ndisakwanisa kuphedza ale anandiperekera toera aone kuti anakwanisa tani kuphedza nyakupfundza wanga na kudziwa pinthu pinafuna kulonga iwo mu ndzidzi wa pfundziro.”

7. Mungaphembwa na m’mwazi mphangwa toera kukhala naye pabodzi pa pfundziro yace, thangwi yanji musafunika kukhunganyika?

 ⁷ Mungaphembwa na m’mwazi mphangwa toera kukhala naye pabodzi pa pfundziro yace, pinakhala mwadidi kwa imwe kukhunganyika nsolo unafuna kupfundzwa. (Esd. 7:10) M’bale Dorin adalongwa mu ndima zakutoma alonga: “Ndisakomerwa kakamwe ndingaona kuti m’mwazi mphangwa adaphemba ine toera kukhala naye pabodzi pa pfundziro yanga akhunganyika. Natenepa, iye anakwanisa kupereka matawiro akuphata ntima.” Kusiyapo pyenepi, nyakupfundza anakwanisa kuona kuti uwiri wanu mwakhunganyika mwadidi, pontho pyenepi pinamphedza toera akhunganyikembo mwadidi. Mungacimwana kukhunganyika mwadidi nsolo unafuna kupfundzwa, khalani na ndzidzi toera kudinga ntsonga zakufunika za nsolo unoyu.

8. Musafunika kucitanji toera phembero inacita imwe pa pfundziro ya Bhibhlya ikhale yakuphata ntima?

⁸ Pa pfundziro ya Bhibhlya phembero ndi yakufunika kakamwe, natenepa nyerezerani mwanyapantsi pinthu pinafuna kulonga imwe mungaphembwa na m’mwazi mphangwa toera kucita phembero pa pfundziro yace. Mungacita pyenepi, phembero yanu inakwanisa kukhala yakuphata ntima. (Masal. 141:2) Hanae anakhala ku Japau asakumbuka maphembero akhacita mulongo wakuti akhaperekera mpfundzisi wace wa Bhibhlya. Iye alonga: “Ine ndadzindikira kuti iye akhali na uxamwali wakuwanga na Yahova, pontho ine ndikhafunambo kukhala ninga iye. Kusiyapo pyenepi, ine ndikhakomerwa kakamwe mu ndzidzi ukhalonga iye dzina yanga mu phembero yace.”

9. Mwakubverana na Tiyago 1:19, musafunika kucitanji toera kuphedza m’mwazi mphangwa ndzanu mu ndzidzi unacitisa iye pfundziro ya Bhibhlya?

⁹ Phedzani m’mwazi mphangwa ndzanu mu ndzidzi unacitisa iye pfundziro. Mpainiya wakupambulika anacemerwa Omamuyovbi anakhala ku Nigeria alonga: “M’mwazi mphangwa anabvesera mwadidi mu ndzidzi wa pfundziro asaphedza kakamwe. Iye anakwanisa kupereka maonero ace, mbwenye nee asafunika kulonga kakamwe thangwi nee ndiye anacitisa pfundziro.” Mphapo ndi ndzidzi upi usafuna imwe kulonga maonero anu, pontho ninji pisafunika imwe kulonga? (Mis. 25:11) Bveserani mwadidi mu ndzidzi unalonga m’mwazi mphangwa na nyakupfundza. (Lerini Tiyago 1:19.) Buluka penepo, imwe munakwanisa kuona kuti ndi ndzidzi upi usafunika imwe kulonga. Mbwenye musafunika kunyerezera mwadidi mbamudzati kulonga. Mwacitsandzo, imwe nee musafunika kulonga kakamwe, peno kugwandira mafala mu ndzidzi unafokotoza m’mwazi mphangwa na kulonga pinthu pinango pyakusiyana na pinapfundzwa ndzidzi unoyu. Imwe munakwanisa kupereka maonero acigwagwa, kuphatisira nsangani peno kucita mbvundzo toera kubvekesa ntsonga inapfundzwa. Midzidzi inango, panango munasowa mafala toera kuthimizira. Mbwenye imwe mungansimba na kupangiza citsalakano kuna iye, munamphedza kakamwe toera kuthambaruka.

10. Kodi kulonga pinthu pidakucitikirani pinaphedza tani nyakupfundza Bhibhlya?

¹⁰ Longani pinthu pidakucitikirani. Khala ndi pyakufunika, pangani mwacigwagwa nyakupfundza  kuti mwadziwa tani undimomwene, mwakunda tani pinentso, pontho Yahova asakuphedzani tani. (Masal. 78:4, 7) Dziwani kuti nyakupfundza Bhibhlya asafuna kakamwe kubva pyenepi. Thangwi pyenepi pinamphedza toera kuwangisa cikhulupiro cace, pontho pinampasa cipapo toera apitirize kuthambaruka mpaka kubatizwa. Pontho pinamphedza toera kuona kuti anakunda tani pinentso pinathimbana na iye. (1 Ped. 5:9) Gabriel anakhala ku Brazil, wakuti cincino asatumikira ninga mpainiya, asakumbuka nkhombo zidakhala na iye mu ndzidzi ukhapfundza iye Bhibhlya. Iye alonga: ‘Pikhabva ine pinthu pikhacitikira abale, ine ndadzindikira kuti Yahova asadziwa nyatwa zinathimbana na ife. Khala iwo akwanisa kukunda nyatwa zenezi, ine ndinakwanisambo.”

11-12. Thangwi yanji tisafunika kutambira mwadidi nyakupfundza Bhibhlya angabwera pa misonkhano?

¹¹ Toera nyakupfundza Bhibhlya athambaruke mpaka kubatizwa, iye asafunika kugumanika pa misonkhano mwakukhonda phonya, pontho asafunika kuphindula na misonkhano ineyi. (Aheb. 10:24, 25) Panango mpfundzisi wace anancemera toera agumanike pa misonkhano. Natenepa angagumanika paulendo wakutoma, ife tonsene tinakwanisa kumphedza toera apitirize kubwera pa misonkhano. Mphapo tinamphedza tani?

¹² Tambirani mwadidi nyakupfundza Bhibhlya. (Aroma 15:7) Nyakupfundza Bhibhlya angatambirwa mwadidi pa misonkhano, iye anakhala na cifuno cakubwera pontho pa Nyumba ya Umambo. Kusiyapo pyenepi, m’mwanyikeni, pontho mpangizeni abale na alongo anango. Cedzani naye thangwi panango mpfundzisi wace adembuka na kufika peno akucita mabasa anango mu Nyumba ya Umambo. Bveserani mwadidi pinalonga iye, pontho ntsalakaneni mwadidi. Kodi pinthu pyenepi pinaphedza tani nyakupfundza? Onani citsandzo ca Dmitrii wakuti abatizwa pyaka pingasi nduli, pontho cincino asatumikira ninga ntumiki wakutumikira. Iye asakumbuka pinthu pidancitikira paulendo wakutoma udaenda iye kumisonkhano, iye alonga: “Ine ndalimira mwakudzudzumika dhuzi na Nyumba ya Umambo, mbwenye m’bale m’bodzi abwera kudzandikwata mbatienda mu Nyumba ya Umambo. Azinji abwera kudzandimwanyika. Ine ndadzumatirwa kakamwe na pyenepi. Ine ndakomerwa kakamwe, pontho ndikhafuna kuti tisonkhane ntsiku zonsene pa sumana. Ine cipo ndikhadaona kale pyenepi ku mbuto inango.”

13. Kodi makhaliro adidi anaphedza tani nyakupfundza Bhibhlya?

¹³ Pangizani makhaliro adidi. Makhaliro anu adidi anakwanisa kuphedza nyakupfundza Bhibhlya toera kukhulupira kuti imwe ndimwe Akristu andimomwene. (Mat. 5:16) Vitalii wakuti cincino asatumikira ninga mpainiya ku Moldova alonga: “Ine ndikhaona makhaliro akhali na abale na alongo mu mpingo na pinthu pikhacita iwo. Pyenepi pyandipasa cinyindiro cakuti Mboni za Yahova mwandimomwene zisafamba na Mulungu.”

14. Makhaliro anu adidi anaphedza tani nyakupfundza Bhibhlya toera athambaruke?

¹⁴ Nyakupfundza Bhibhlya toera akhale wakuthema kubatizwa, iye asafunika kuphatisira  pinapfundza iye. Midzidzi inango pyenepi pisakhala pyakunentsa. Mbwenye nyakupfundza Bhibhlya angaona nkhombo zisakhala na imwe thangwi yakuphatisira midida ya Bhibhlya, panango pyenepi pinankulumiza toera kutowezera citsandzo canu. (1 Akor. 11:1) Onani pidacitikira Hanae adalongwa mu ndima zakutoma. Iye alonga: “Abale na alongo akhacita pinthu mwakubverana na pikhapfundza ine. Pontho pyenepi pyandiphedza toera kuwangisa anango, kualekerera na kupangiza ufuni kuna iwo. Ndzidzi onsene iwo akhalonga mwadidi anango. Natenepa ine ndikhafunambo kutowezera citsandzo cawo.”

15. Mwakubverana na Misangani 27:17, thangwi yanji tisafunika kucita uxamwali na nyakupfundza Bhibhlya anapitiriza kugumanika pa misonkhano?

¹⁵ Citani uxamwali na nyakupfundza. Mu ndzidzi unapitiriza nyakupfundza Bhibhlya kugumanika pa misonkhano, pitirizani kupangiza citsalakano kuna iye. (Afil. 2:4) Pontho yeserani kundziwa mwadidi. M’mbuto mwakuncita mibvundzo yakuti inantsukwalisa, nsimbeni thangwi ya macinjo anacita iye, mbvundzeni thangwi ya pinthu pinapfundza iye m’Bhibhlya, acibale ace na basa inacita iye. Mungacedza munjira ineyi, munakwanisa kucita uxamwali na nyakupfundza wanu. Natenepa mungacita uxamwali na nyakupfundza wanu, munamphedza toera kuthambaruka mpaka kubatizwa. (Lerini Misangani 27:17.) Hanae wakuti cincino asatumikira ninga mpainiya wa ndzidzi onsene asakumbuka pinthu pidancitikira ntsiku idatoma iye kugumanika pa misonkhano. Iye alonga: “Pidatoma ine kucita uxamwali mu mpingo, ine ndapitiriza kugumanika pa misonkhano. Ngakhale midzidzi ikhaneta ine ndikhapitiriza kuenda kumisonkhano. Ine ndikhakomerwa kakamwe kucedza na axamwali anga apswa, pyenepi pyandiphedza toera kusiya kucita uxamwali na anthu akuti nee asalambira Yahova. Ine ndikhafuna kakamwe kukhala na uxamwali wakuwanga na Yahova na abale na alongo mu mpingo. Na thangwi ineyi, ine ndatonga kubatizwa.”

16. Ndi pinthu pipi pinango pisafunika ife kucita toera kuphedza nyakupfundza Bhibhlya toera akwanise kuona kuti asacita khundu ya mpingo?

¹⁶ Mu ndzidzi unapitiriza nyakupfundza wanu kuthambaruka, mphedzeni toera akwanise kuona kuti asacita khundu ya mpingo. Imwe munakwanisa kucita pyenepi mukuncemera kunyumba kwanu. (Aheb. 13:2) Denis anakhala ku Moldova asakumbuka ndzidzi ukhapfundza iye Bhibhlya, iye alonga: “Kazinji kene, ine na nkazanga tikhacemerwa na abale na alongo toera kucedza pabodzi. Iwo akhatipanga njira ikhaaphedza Yahova. Pyenepi pikhatiwangisa kakamwe. Pyenepi pyatiphedza toera kukhala na cinyindiro cakuti tingatumikira Yahova tinakhala na umaso wakutsandzayisa kakamwe.” Nyakupfundza Bhibhlya angakhazikiswa ninga m’mwazi mphangwa, imwe munakwanisa kumphemba toera kuenda naye pabodzi mu utumiki. M’bale Diego anakhala ku Brazil alonga: “Abale azinji akhandiphemba toera kuenda nawo pabodzi mu utumiki. Pyenepi pyandiphedza toera kuadziwa mwadidi. Kusiyapo pyenepi, ine ndapfundza pinthu pizinji, pontho pyandiphedza toera kukhala na uxamwali wakuwanga na Yahova pabodzi na Yezu.”

17. Akulu a mpingo anaphedza tani anyakupfundza Bhibhlya?

¹⁷ Khalani na ndzidzi wakucedza na nyakupfundza Bhibhlya. Akulu a mpingo, mungapangiza ufuni na citsalakano kuna anyakupfundza Bhibhlya, munakwanisa kuaphedza toera kuthambaruka mpaka kubatizwa. Imwe munakwanisa kucita pyenepi mungacedza nawo ndzidzi onsene pa misonkhano. Iwo anapibva kuti ndi akufunika kakamwe mungakumbuka madzina awo, makamaka mu ndzidzi unapereka iwo matawiro. Kodi imwe munakwanisa kucita masasanyiro toera kuenda pabodzi na m’mwazi mphangwa mu ndzidzi unaenda iye kacitisa pfundziro yace ya Bhibhlya? Imwe mungacita pyenepi munakwanisa kuphedza kakamwe nyakupfundza Bhibhlya. Mulongo Jackie wakuti ndi mpainiya anakhala ku Nigeria alonga: “Anyakupfundza anga azinji asadzumatirwa angadziwa kuti m’bale ali na ine pabodzi ndi nkulu wa mpingo. Nyakupfundza wanga m’bodzi alonga: ‘Pastori wanga nkhabe kucita pyenepi. Iye asacedzera basi ene anthu akupfuma na ale anampasa kobiri.’” Nyakupfundza unoyu cincino asagumanika pa misonkhano.

18. Kodi akulu a mpingo anaphatisira tani mafala anagumanika pa Mabasa 20:28?

¹⁸ Pfundzisani, pontho wangisani amwazi mphangwa. Akulu a mpingo, imwe muli na basa yakufunika kakamwe yakuphedza amwazi mphangwa toera akhale na maluso adidi akumwaza mphangwa na kucitisa mapfundziro a Bhibhlya. (Lerini Mabasa 20:28.) Khala m’bale peno mulongo ali na manyadzo toera kucitisa pfundziro ya Bhibhlya pamaso panu, perekekani toera kucitisa pfundziro ineyi. Jackie, adalongwa mu ndima zapadzulu alonga: “Ndzidzi onsene akulu a mpingo asandibvundzisa thangwi ya mapfundziro anga a Bhibhlya. Ndingathimbana na pinentso pakucitisa pfundziro, iwo asandiphedza.” Akulu a mpingo anakwanisa kucita pizinji toera kuwangisa na kuphedza amwazi mphangwa toera apirire pinentso. (1 Ates. 5:11) Jackie athimiza: “Ine ndisakomerwa kakamwe akulu a mpingo angandiwangisa na kundisimba thangwi ya basa inacita ine mwaphinga. Mafala anewa asakhala ninga madzi akuthondola akuti asapha nyota pa ntsiku yakupisa. Kusiyapo pyenepi, mafala awo akusimba asandipasa cinyindiro cakuti basa inacita ine ndi yakufunika kakamwe, pontho asandiphedza toera kukhala wakutsandzaya kakamwe.”—Mis. 25:25

19. Kodi ife tonsene tinakwanisa tani kukhala akutsandzaya?

¹⁹ Ngakhale kuti nee tisacitisa pfundziro ya Bhibhlya cincino, ife tinakwanisa kuphedza nyakupfundza Bhibhlya toera athambaruke mwauzimu. Ife tinakwanisa kucita pyenepi mukupereka maonero mu ndzidzi unacitisa m’mwazi mphangwa pfundziro yace, mbwenye nee tisafunika kulonga pinthu pizinji. Kusiyapo pyenepi, ife tinakwanisa kucita uxamwali na anyakupfundza Bhibhlya anabwera pa Nyumba ya Umambo, pontho tinakwanisambo kupangiza citsandzo cadidi kuna iwo. Pontho akulu a mpingo anakwanisa kuwangisa anyakupfundza Bhibhlya mukukhala na ndzidzi wakucedza nawo. Kusiyapo pyenepi, iwo anakwanisambo kuwangisa amwazi mphangwa mukuapfundzisa na kuasimba. Tingacita pyenepi, ife tinakhala akutsandzaya kakamwe mu ndzidzi unaphedza ife munthu toera kufuna na kutumikira Yahova.