1. Ndi pinthu pipi pinadziwa ife thangwi ya aphale?

APHALE, imwe munakwanisa kucita pizinji toera kuphedzera mpingo. Thangwi azinji a imwe ali na mphambvu kakamwe. (Mis. 20:29) Imwe munakwanisa kucita pizinji toera kuphedza abale na alongo anu. Panango imwe musafuna kukhazikiswa ninga ntumiki wakutumikira. Mbwenye panango munapibva kuti anango anakuonani kuti ndimwe mwana kakamwe, pontho nee muli na maluso akukwana toera kucita basa ineyi. Ngakhale tenepo, imwe munakwanisa kucita pinthu pyadidi toera kunyindirwa na kulemedzwa mu mpingo.

2. Tinapfundzanji mu nsolo uno?

² Mu nsolo uno, tinadinga citsandzo ca Mambo Dhavidhi. Pontho tinaona pinthu pidacitikirwa na amambo awiri a ku Yuda, Aza na Yosafate. Kusiyapo pyenepi, tinaona kuti ndi nyatwa zipi zidathimbana na amuna anewa, pontho acitanji na aphale anapfundzanji na citsandzo cawo.

3. Ndi pinthu pipi pyakuti m’phale anakwanisa kupicita toera kuphedza m’bale peno mulongo wakugwesera mu mpingo?

³ Pikhali Dhavidhi m’phale, iye akhali na maluso akuti akhacitisa anango toera kumulemedza. Kusiyapo pyenepi, iye akhali na uxamwali wakuwanga na Yahova, pontho akhadziwa mwadidi kuimba. Natenepa, iye aphatisira maluso anewa toera kuphedza mambo Sauli. (1 Sam. 16:16, 23) Kodi imwe aphale muli na maluso akuti munakwanisa kuaphatisira toera kuphedza anango mu mpingo? Mwacitsandzo, m’bale peno mulongo wakugwesera anapereka takhuta kakamwe angaona kuti muli kumphedza toera adziwe mwadidi kuphatisira thabhuleti yace  peno telefoni yace pa misonkhano na pakucita pfundziro ya munthu paekha. Imwe munakwanisa kuphedza abale na alongo anewa thangwi musadziwa kuphatisira pinthu pyenepi.

4. Aphale anatowezera tani citsandzo ca Dhavidhi? (Onani foto iri patsamba yakutoma.)

⁴ Mu umaso wace wa ntsiku na ntsiku, Dhavidhi akhapangiza kuti akhali munthu wakunyindirika. Mwacitsandzo, pikhali iye m’phale, aphata basa mwakuwanga toera kutsalakana mabira a babace. Midzidzi inango, basa ineyi ikhali yakugoswa kakamwe. Thangwi mukupita kwa ndzidzi, Dhavidhi afokotozera Mambo Sauli kuti: ‘Ine ntumiki wanu ndikhakumbiza mabira a babanga, yabwera nkhalamu mbikwata bira ibodzi pa nkumbi. Ntsiku inango, abwera ditiringwe peno ursu mbacitambo pibodzi pyene. Ndanthamangisa, ndam’menya mbandipulumusa bira ikhali pamulomo pace.’ (1 Sam. 17:34, 35) Dhavidhi akhadziwa kuti ndiye akhali na basa yakutsalakana mabira anewa, natenepa iye aatsidzikiza mwacipapo. Munjira ibodzi ene, aphale imwe munakwanisa kutowezera citsandzo ca Dhavidhi mukucita mwadidi mabasa anapaswa imwe.

5. Mwakubverana na Masalmo 25:14, ndi cinthu cipi cakufunika kakamwe cakuti aphale asafunika kucicita?

⁵ Mu ndzidzi ukhali iye m’phale, Dhavidhi akhali na uxamwali wakuwanga kakamwe na Yahova. Uxamwali wace na Yahova ukhali wakufunika kakamwe kupiringana cipapo cace na maluso akhali na iye akuimba. Yahova nee akhali basi ene Mulungu wa Dhavidhi, mbwenye akhalimbo Xamwali wace wa ponda ndipondembo. (Lerini Masalmo 25:14.) Munjira ibodzi ene, cinthu cakufunika kakamwe kuna imwe aphale ndi kuwangisa uxamwali wanu na Yahova, pontho mungacita pyenepi munakhala na miyai mizinji yakutumikira mu mpingo.

6. Anthu anango akhaona tani Dhavidhi?

⁶ Nkandzo udathimbana na Dhavidhi ndi wakuti anthu anango akhamuona ninga mwana kakamwe, pontho nee akhali na maluso mazinji. Mwacitsandzo, mu ndzidzi udaperekeka Dhavidhi toera kamenyana na Goliati, Mambo Sauli ayesera kunfewesa manungo mbampanga kuti: “Iwe ndiwe mwana.” (1 Sam. 17:31-33) Mbadzati kupangwa mafala anewa na mambo Sauli, Dhavidhi akhadapangwa kale na m’bale wace kuti iye ndi mwana kakamwe. (1 Sam. 17:26-30) Mbwenye Yahova akhadziwa mwadidi Dhavidhi, pontho nee akhamuona ninga mwana. Natenepa, Dhavidhi akwanisa kupha Goliati thangwi akhanyindira Yahova.—1 Sam. 17:45, 48-51.

7. Mwapfundzanji na pinthu pidacita Dhavidhi?

 ⁷ Tisapfundzanji na pinthu pidacitikira Dhavidhi? Tisapfundza kuti tisafunika kukhala akupirira. Panango panakwata ndzidzi toera anthu asakudziwani kutomera mwana atome kukuonani ninga nkulu. Mbwenye khalani na cinyindiro cakuti Yahova asakuonani munjira yakusiyana kakamwe na inakuonani anthu. Iye asakudziwani mwadidi pontho asadziwa pinthu pisakwanisa imwe kucita. (1 Sam. 16:7) Natenepa wangisani uxamwali wanu na Yahova. Dhavidhi acita pyenepi mukuyang’ana pinthu pidacita Yahova. Pinthu pyenepi pyampfundzisa pizinji pidacita Yahova. (Masal. 8:3, 4; 139:14; Aroma 1:20) Cinthu cinango cinafunika imwe kucita ndi kuphemba Yahova toera akupaseni mphambvu. Mwacitsandzo, kodi imwe musasingirirwa na andzanu akuxikola thangwi yakukhala m’bodzi wa Mboni za Yahova? Khala ndi tenepo, phembani Yahova kuti akupaseni mphambvu toera mupirire mayesero anewa. Pontho phatisirani uphungu wakufunika unagumanika m’Bhibhlya, m’mabukhu na m’mavidhyu athu. Mu ndzidzi unaona imwe Yahova mbakuphedzani kukunda nyatwa zanu, imwe munakhala na cinyindiro consene cakuti iye anakuphedzani toera kukunda nyatwa zinango. Kusiyapo pyenepi, anango angakuonani kuti musanyindira Yahova, iwo anakunyindiranimbo.

8-9. Ninji cidaphedza Dhavidhi toera kudikhira mwakupirira mpaka mu ndzidzi udatoma iye kutonga ninga mambo, pontho aphale anapfundzanji na citsandzo cace?

⁸ Tendeni tione nkandzo unango udathimbana na Dhavidhi. Pidamala iye kudzodzwa ninga mambo, Dhavidhi akhafunika kudikhira pyaka pizinji toera atome kutonga ninga mambo wa Yuda. (1 Sam. 16:13; 2 Sam. 2:3, 4) Ninji cidamphedza toera kudikhira mwakupirira? M’mbuto mwakukhala wakutsukwala, Dhavidhi aphatisira ndzidzi unoyu toera kucita pire pikhakwanisa iye kucita. Mwacitsandzo, pidathawa iye mbaenda kakhala mucisa ca Afilisti, iye aphatisira ndzidzi unoyu toera kumenyana na anyamalwa a Izraeli. Iye acita pyenepi toera kutsidzikiza madire a dziko ya Yuda.—1 Sam. 27:1-12.

⁹ Kodi aphale anapfundzanji na citsandzo ca Dhavidhi? Citani pyonsene pinakwanisa imwe toera kutumikira Yahova na abale anu. Mwacitsandzo, onani pidacitikirwa na m’bale Ricardo. * Pikhali iye nkati mwa pyaka khumi pyakubalwa, iye akhali na cifuno cakutumikira ninga mpainiya wa ndzidzi onsene. Mbwenye akulu a mpingo ampanga kuti iye akhafunika kudikhira. M’mbuto mwakubwerera nduli peno kuipirwa, Ricardo apitiriza kumwaza mphangwa mwaphinga. Iye alonga: “Ndingakumbuka pya nduli, ndisakwanisa kuona kuti pikhali pyadidi kakamwe kuna ine kuthambaruka. Ine ndikhacita pyonsene pikhakwanisa ine toera kucita maulendo akubwereza kuna anthu akhapangiza cifuno, pontho ndikhakhunganyika mwadidi toera kucita maulendo akubwereza kuna m’bodzi na m’bodzi wa anthu anewa. Kusiyapo pyenepi, ine ndakwanisa kutomesa pfundziro ya Bhibhlya. Pontho phinga ineyi yakumwaza mphangwa yandiphedza toera kukunda kugopa.” Cincino Ricardo asatumikira ninga mpainiya wa ndzidzi onsene, pontho ninga ntumiki wakutumikira.

10. Kodi Dhavidhi acitanji mbadzati kuenda kapulumusa anthu adakwatwa na anyamalwa?

¹⁰ Tendeni tione pinthu pinango pidacitikirwa na Dhavidhi. Pidathawa iye mambo Sauli mbaenda kakhala mucisa ca Afilisti, Dhavidhi na anyankhondo ace asiya mabanja awo na nyumba zawo mbaenda kamenya nkhondo. Mu ndzidzi ukhali Dhavidhi kunkhondo pabodzi na anyankhondo ace, anyamalwa anango  abwera mbatapata nyumba zawo na kukwata mabanja awo. Nakuti Dhavidhi akhali nyankhondo wa maluso kakamwe, panango mbipidakhala pyakukhonda nentsa kuna iye kunyerezera kucita masasanyiro toera kupulumusa anthu adakwatwa na anyamalwa. Mbwenye Dhavidhi aphemba Yahova toera amphedze. Natenepa, na ciphedzo ca Abhiyatari Dhavidhi aphemba Yahova kuti: ‘Ndisafunika kuthamangira nsoka unoyu wa anyakutapata?’ Yahova atawirisa Dhavidhi kuti aende, pontho ampasa cinyindiro cakuti iye mbadakwanisa kupulumusa anthu adakwatwa na anyamalwa. (1 Sam. 30:7-10) Munapfundzanji na pinthu pyenepi pidacitikira Dhavidhi?

11. Musafunika kucitanji mbamudzati kucita pisankhulo?

¹¹ Sakani pitsogolero mbamudzati kucita pisankhulo. Kusiyapo pyenepi, bvundzisani anyakubalanu peno akulu a mpingo. Yahova asanyindira akulu a mpingo, pontho imwe musafunikambo kuanyindira. Yahova asaona amuna anewa ninga “miyoni” kuna abale na alongo. (Aef. 4:8) Imwe munakwanisa kucita pisankhulo pyadidi mungatowezera cikhulupiro cawo na kubvesera uphungu unakupasani iwo. Cincino tendeni tione kuti tinapfundzanji na citsandzo ca Mambo Aza.

12. Ndi makhaliro api akhali na Mambo Aza mu ndzidzi udatoma iye kutonga?

¹² Mu ndzidzi ukhali iye m’phale, Mambo Aza akhali wakucepeseka na wacipapo. Mwacitsandzo, mu ndzidzi udafa babace anacemerwa Abhiya, Aza akhazikiswa ninga mambo. Buluka penepo, iye atoma kufudza madzimunthu. Kusiyapo pyenepi, Aza ‘apanga anthu a ku Yuda toera asake Yahova Mulungu wa ambuyawo, pontho toera abvere mwambo na mitemo yonsene.’ (2 Pya dziko. 14:1-7) Pontho mu ndzidzi udabwera Zera wa ku Etiopya na anyankhondo ace 1.000.000 toera kufudza dziko ya Yuda, mambo Aza asaka ciphedzo kuna Yahova mbalonga kuti: ‘Yahova, kuna imwe nkhabe siyana khala ale anaphedza imwe ndi azinji peno akusowa mphambvu. Tiphedzeni Yahova Mulungu wathu, thangwi ife tisanyindira imwe.’ Mafala anewa asapangiza kuti Aza akhakhulupira kakamwe kuti Yahova mbadapulumusa iye pabodzi na anthu ace. Natenepa, ‘Yahova akunda anyankhondo a ku Etiopya.’—2 Pya dziko. 14:8-12.

13. Ninji pidacitika na mambo Aza mukupita kwa ndzidzi, pontho thangwi yanji?

¹³ Mwakukhonda penula, pikhali pyakunentsa kakamwe kuna Aza kudziwa kuti  asafuna kumenyana na anyankhondo akukwana 1.000.000. Mbwenye thangwi ya kunyindira Yahova, iye akunda anyankhondo anewa. Mukupita kwa ndzidzi, pidathimbana Aza na cinentso cinango, iye asiya kunyindira Yahova. Thangwi pidathuswa iye na Mambo Bhaasa wa ku Izraeli, Aza aphemba ciphedzo ca mambo wa ku Sirya. Mbwenye cisankhulo ceneci cidacita iye cambweresera nyatwa. Kubulukira mwa mprofeta Anani, Yahova apanga Aza: ‘Nakuti wanyindira mambo wa ku Sirya mbukhonda kunyindira Yahova Mulungu wako, anyankhondo a mambo wa ku Sirya apulumuka m’manja mwako.’ Natenepa kutomera pa ndzidzi unoyu, mambo Aza ndzidzi onsene akhamenya nkhondo na mambo Bhaasa wa ku Izraeli. (2 Pya dziko. 16:7, 9; 1 Ama. 15:32) Tisapfundzanji?

14. Munapangiza tani kuti musanyindira Yahova? Mwakubverana na 1 Timoti 4:12, ninji pinafuna kucitika kuna imwe munganyindira Yahova?

¹⁴ Khalani wakucepeseka, pontho pitirizani kunyindira Yahova. Mu ndzidzi udabatizwa imwe, mwapangiza pakweca kuti muli na cikhulupiro cakuwanga, pontho musanyindira Yahova. Kusiyapo pyenepi, Yahova atsandzaya kakamwe mbakupasani mwai wakucita khundu ya atumiki ace. Natenepa, pinthu pisafunika imwe kucita ndi kupitiriza kunyindira Yahova. Panango pinakhala pyakukhonda nentsa kunyindira Yahova mungafuna kucita pisankhulo pyakufunika kakamwe. Mphapo ndiye tani mungafuna kucita pisankhulo ping’ono? Ndi pyakufunika kakamwe kunyindira Yahova mu ndzidzi unacita imwe pisankhulo ninga kusankhula ubalangazi, basa na pinthu pinango. Lekani kunyindira ndzeru zanu. M’mbuto mwace, sakani midida ya Bhibhlya yakuti inakuphedzani toera kucita pisankhulo, pontho iphatisireni. (Mis. 3:5, 6) Mungacita pyenepi, Yahova anakhala wakutsandzaya, pontho abale na alongo anakulemedzani.—Lerini 1 Timoti 4:12.

15. Mwakubverana na 2 Pya dziko ya Israele 18:1-3; 19:2, ndi madodo api adacita Mambo Yosafate?

¹⁵ Mwandimomwene ninga ife tonsene, imwe ndimwe wakusowa ungwiro, pontho midzidzi inango munacita madodo. Mbwenye pyenepi nee pisafunika kukupingizani toera mukhonde kucita pizinji m’basa ya Yahova. Onani citsandzo ca Mambo Yosafate. Iye akhali na makhaliro mazinji adidi. Pikhali iye m’phale, ‘iye akhatumikira Mulungu wa pai wace  mbatowezera matongero ace.’ Kusiyapo pyenepi, iye atuma anyantsembe toera aende m’mizinda yonsene ya Yuda toera apfundzise anthu thangwi ya Yahova. (2 Pya dziko. 17:4, 7) Maseze Yosafate akhali munthu wadidi, midzidzi inango iye akhacitambo pisankhulo pyakuipa. Na thangwi ineyi, Yosafate apaswa uphungu na m’bodzi wa aimiriri a Yahova. (Lerini 2 Pya dziko ya Israele 18:1-3; 19:2.) Munapfundzanji na pinthu pyenepi?

16. Mwapfundzanji na pinthu pidacitikira Rajeev?

¹⁶ Tawirani uphungu unapaswa imwe, pontho uphatisireni. Ninga pinacitika kuna aphale azinji, panango pinakhala pyakunentsa kuna imwe toera kuikha pinthu pyauzimu pa mbuto yakutoma mu umaso wanu. Mbwenye lekani kubwerera nduli. Onani pidacitika na m’bale anacemerwa Rajeev mu ndzidzi ukhali iye m’phale. Iye alonga: “Midzidzi inango ine nee ndikhadziwa pinthu pikhafuna kucita ine mu umaso wanga. Ninga pikhacita aphale azinji, ine ndikhakomerwa kakamwe na masendzekero a bhola m’mbuto mwa kuenda kumisonkhano na kumwaza mphangwa.” Ninji pidaphedza m’bale Rajeev? Ndi uphungu udapaswa iye na nkulu wa mpingo unango. Thangwi Rajeev alonga: “Iye andiphedza toera kunyerezera uphungu unagumanika pa 1 Timoti 4:8.” Mwakucepeseka Rajeev aphatisira uphungu udapaswa iye mbadzindikira pinthu pikhafunika iye kuikha pa mbuto yakutoma mu umaso wace. Iye alonga: “Ndatonga kuikha pinthu pyauzimu pa mbuto yakutoma.” Ndi nkhombo zipi zidakhala na iye. Rajeev alonga: “Pidapita pyaka pingasi, ine ndakhazikiswa ninga ntumiki wakutumikira.”

17. Ndi mabvero api asakhala na abale na alongo thangwi ya aphale anatumikira Yahova?

¹⁷ Abale na alongo mu mpingo asapereka takhuta kakamwe thangwi ya kutumikira Yahova pabodzi na imwe aphale ‘phewa na phewa.’ (Sof. 3:9) Iwo asakomerwa kakamwe angaona kuti mukucita mabasa a Yahova mwaphinga. Natenepa imwe ndimwe akufunika kakamwe kuna iwo.—1 Juwau 2:14.

18. Mwakubverana na Misangani 27:11, Yahova asaona tani aphale anantumikira?

¹⁸ Aphale, lekani kuduwala kuti Yahova asakufunani pontho asakunyindirani. Iye akhadalonga kale kuti mu ntsiku zakumalisa, aphale azinji mbadaperekeka kuna iye. (Masal. 110:1-3) Iye asadziwa kuti imwe musanfuna, pontho musacita pyonsene pinakwanisa imwe toera kuntumikira. Natenepa khalani akupirira. Kusiyapo pyenepi, mungacita madodo tawirani uphungu unapaswa imwe, pontho dziwani kuti uphungu unoyu wabuluka kuna Yahova. (Aheb. 12:6) Citani mwaphinga mabasa onsene anapaswa imwe. Kusiyapo pyonsene, citani pinthu pyakuti pinatsandzayisa Yahova.—Lerini Misangani 27:11.