1. Thangwi yanji Yezu aphemba Yahova toera aonere anyakupfundzace?

NTSIKU yakumalisa ya umaso wace namasiku, Yezu akhanyerezera thangwi ya nyatwa zikhafuna kuthimbana na anyakupfundzace. Nakuti Yezu akhafuna anyakupfundzace, iye aphemba Babace toera ‘aaonere thangwi ya Nyakuipa.’ (Juwau 17:14, 15) Yezu akhadziwa kuti angaenda kudzulu, Sathani Dyabo mbadapitiriza kumenya nkhondo thangwi ya ale anafuna kutumikira Yahova. Natenepa, atumiki a Yahova asafunika kutsidzikizwa.

2. Thangwi yanji tiri na cinyindiro cakuti Yahova anatawira maphembero athu?

² Yahova atawira phembero ya Yezu thangwi iye asafuna Mwanace. Tingacita pyonsene pinakwanisa ife toera kukomeresa Yahova, iye anatifunambo, pontho anatawira maphembero athu na kutitsidzikiza. Ninga pinacita Nsolo wa banja, Yahova anapitiriza kutsalakana mwaufuni anace. Thangwi angakhonda kucita pyenepi, anthu anasiya kulemedza iye pabodzi na dzinace.

3. Thangwi yanji tisafunika kutsidzikizwa na Yahova?

³ Lero ife tisafuna kakamwe kutsidzikizwa na Yahova. Thangwi Sathani athamangiswa kudzulu, pontho “iye ali na ukali ukulu.” (Apok. 12:12) Iye asacitisa anthu kunyerezera kuti mu ndzidzi unatitcinga iwo “akutumikira Mulungu.” (Juwau 16:2) Anthu anango akuti nee asakhulupira Mulungu, asatitcinga thangwi ife ndife akusiyana na anthu a dziko ino. Mwakukhonda tsalakana mathangwi anaacitisa toera kutitcinga, ife nkhabe kugopa. Thangwi yanji? Thangwi Bhibhlya isalonga: “Mbuya ndi wakukhulupirika, pontho iye anadzakuwangisani, mbakutsidzikizani kuna Nyakuipa.” (2 Ates. 3:3) Kodi Yahova asatitsidzikiza tani? Tendeni tione njira ziwiri zinaphatisira iye toera kutitsidzikiza.

4. Mwakubverana na Aefesi 6:13-17, Yahova asatipasanji toera kutitsidzikiza?

⁴ Yahova asatipasa pida pya nkhondo pyakuti pisatitsidzikiza ku misampha ya Sathani. (Lerini Aefesi 6:13-17.) Pida pyenepi pya nkhondo pinapereka Mulungu ndi pyakuwanga, pontho pisaphata basa mwadidi. Mbwenye toera pikwanise kutitsidzikiza, ife tisafunika kuphatisira pida pyenepi pyonsene. Kodi pida pyenepi pisaimiriranji? Tendeni tione cibodzi na cibodzi mwa pida pyenepi.

5. Sintu ya undimomwene ninji, pontho tisaibvala tani?

⁵ Sintu ya undimomwene isaimirira undimomwene unagumanika m’Mafala a Mulungu, Bhibhlya. Thangwi yanji tisafunika kubvala sintu ineyi? Thangwi Sathani ndi “baba wa uthambi.” (Juwau 8:44) Iye asalonga uthambi unoyu mu pyaka pizinji kakamwe, pontho ‘asanyengeza anthu onsene pa dziko yapantsi.’ (Apok. 12:9) Mbwenye undimomwene unagumanika m’Bhibhlya usatitsidzikiza toera tikhonde kunyengezwa. Mphapo tisabvala tani sintu ineyi ya undimomwene? Ife tisacita pyenepi mukupfundza undimomwene unalonga pya Yahova, kulambira iye “mukutsogolerwa na nzimu na undimomwene,” pontho mukukhala akukhulupirika mu pinthu pyonsene.—Juwau 4:24; Aef. 4:25; Aheb. 13:18.

6. Kodi cakutsidzikiza diti ca ulungami ninji, pontho thangwi yanji tisafunika kucibvala?

⁶ Cakutsidzikiza diti ca ulungami cisaimirira midida yakulungama ya Yahova. Thangwi yanji tisafunika kucibvala? Ninga cakutsidzikiza diti candimomwene cisatsidzikiza ntima wa nyankhondo toera ukhonde kulaswa, cakutsidzikiza diti ca ulungami cisatsidzikiza ntima wathu wakuphipirisa toera ukhonde kukhuiwa na makhaliro akuipa a dziko ino. (Mis. 4:23) Yahova asadikhira kuti ife tinfune, pontho tintumikire na ntima wathu onsene. (Mat. 22:36, 37) Mbwenye Sathani asayesera kugawa ntima wathu toera ticimwane kutumikira Yahova na ntima onsene mbatifuna pinthu pya dziko ino pyakuti Yahova asapiida. (Tiya. 4:4; 1 Juwau 2:15, 16) Sathani angacimwana kugawa ntima wathu, iye asatitcinga toera ticite pinthu pyakuti pinatsukwalisa Yahova.

7. Tisabvala tani cakutsidzikiza diti ca ulungami?

⁷ Ife tisabvala cakutsidzikiza diti ca ulungami mukutawira midida ya Yahova yakusiyanisa cadidi na cakuipa, pontho mbatikhala m’maso mwakubverana na midida ineyi. (Masal. 97:10) Anango asanyerezera kuti midida ya Yahova isapingiza ufulu wathu. Mbwenye ife tingasiya kuphatisira midida ya Bhibhlya mu umaso wathu, tinakhala ninga nyankhondo wakuti asabulusa cakutsidzikiza naco diti mu ndzidzi wa nkhondo mbanyerezera kuti ndi cakulemera kakamwe. Mbwenye pyenepi pinaikha umaso wace pangozwi. Kuna ale anafuna Yahova, matongero ace “nee ndi akulemera.” Mbwenye asapulumusa umaso.—1 Juwau 5:3.

8. Pisabvekanji kubvala masandalya m’manyalo athu toera kumwaza mphangwa zadidi?

⁸ Paulu atikulumizambo toera kubvala masandalya m’manyalo athu toera kumwaza mphangwa zadidi zantendere. Pyenepi pisabveka kuti ndzidzi onsene tisafunika kukhala dzololo toera kumwaza mphangwa zadidi za Umambo. Tingapanga anango mphangwa za Bhibhlya, cikhulupiro cathu cisakhala cakuwanga. Ife tisatsandzaya tingaona atumiki a Yahova pa dziko yonsene yapantsi mbaphatisira miyai yonsene iri na iwo toera kumwaza mphangwa. Mwacitsandzo, iwo asamwaza mphangwa kubasa, kuxikola, nyumba na nyumba, ku merkadho, angaenda kaona acibale awo akuti nee asatumikira Yahova peno angacedza na anthu anadziwa iwo. Mbwenye tingagopa mbatisiya kumwaza mphangwa, tinakhala ninga nyankhondo wakuti asaduwala masandalya ace mu ndzidzi wa nkhondo, pontho pyenepi mbapidaphekesa manyalo ace. Kusiyapo pyenepi, iye nee mbadakhala wakutsidzikizika, pontho  pyenepi mbapidapangiza kuti iye nee asabvera mitemo ya ntsogoleri wace.

9. Thangwi yanji tisafunika kukwata xango ikulu yacikhulupiro?

⁹ Xango ikulu ya cikhulupiro isaimirira cikhulupiro cathu kuna Yahova. Ife tisakhulupira kuti iye anadzakwanirisa mapikiro ace onsene. Cikhulupiro ceneci cinatiphedza ‘toera kuthimisa naco mapswimo onsene akugaka a Nyakuipa.’ Thangwi yanji tisafunika kukwata xango ineyi ikulu? Thangwi iyo isatitsidzikiza toera tikhonde kupeuswa na pipfundziso pya anthu akupanduka, pontho toera tikhonde kufeweswa na anthu anatisingirira thangwi ya pinthu pinakhulupira ife. Tingasowa cikhulupiro, nee tinakwanisa kupirira anango angatinyengerera toera tikhonde kubvera midida ya Yahova. Mbwenye tingacalira kucita pinthu pinaida Yahova kuxikola peno kubasa, pinapangiza kuti cikhulupiro cathu cikutitsidzikiza. (1 Ped. 3:15) Pontho tingakhonda kuphata basa yakuti tinawina kobiri izinji mbwenye mbiticimwanisa kutumikira Yahova na ntima onsene, pyenepi pisapangiza kuti cikhulupiro cathu cikutitsidzikiza. (Aheb. 13:5, 6) Kusiyapo pyenepi, tingapitiriza kutumikira Yahova mu ndzidzi wakutcingwa, pisapangiza kuti cikhulupiro cathu cikutitsidzikiza.—1 Ates. 2:2.

10. Kodi capeu ca utale ca cipulumuso ninji, pontho thangwi yanji tisafunika kucibvala?

¹⁰ Capeu ca utale ca cipulumuso ndi cidikhiro cinatipasa  Yahova. Cidikhiro ceneci ndi cakupasa nkhombo ale onsene anacita cifuno cace, ngakhale afe iye anadzaalamusa muli akufa. (1 Ates. 5:8; 1 Tim. 4:10; Tito 1:1, 2) Capeu ca utale ca ndimomwene cisatsidzikiza nsolo wa nyankhondo. Munjira ibodzi ene, cidikhiro ca cipulumuso cisatsidzikiza manyerezero athu. Munjira ipi? Cidikhiro ceneci cisatiphedza toera kuikha manyerezero athu ku mapikiro a Mulungu, pontho cisatiphedza toera kukhala na maonero adidi thangwi ya nyatwa zinathimbana na ife. Mphapo tinabvala tani capeu ceneci ca utale? Ife tisabvala capeu ceneci tingapitiriza kunyerezera pinthu ninga munapinyerezera Yahova. Mwacitsandzo, ife nee tisaikha cidikhiro cathu ku mpfuma yakukhonda nyindirika, mbwenye tisaikha cidikhiro cathu kuna Mulungu.—Masal. 26:2; 104:34; 1 Tim. 6:17.

11. Kodi supada ya nzimu ninji, pontho thangwi yanji tisafunika kuiphatisira?

¹¹ Supada ya nzimu ndi Mafala a Mulungu, Bhibhlya. Supada ineyi iri na mphambvu yakumalisa uthambi onsene na kusudzula anthu mu pipfundziso pyauthambi na misambo yawo yakuipa. (2 Akor. 10:4, 5; 2 Tim. 3:16, 17; Aheb. 4:12) Ife tisadziwa kuphatisira mwadidi supada ineyi tingacita pfundziro ya munthu paekha na tingapfundziswa na gulu ya Yahova. (2 Tim. 2:15) Kusiyapo pida pyenepi pya nkhondo, Yahova asatipasambo pinthu pinango toera kutitsidzikiza. Kodi pinthu pyenepi ndi pipi?

12. Thangwi yanji tisafunika ciphedzo ca abale na alongo athu?

¹² Nyankhondo wa maluso asadziwa kuti nee anakwanisa kukunda ekhene nsoka wa anyankhondo, mbwenye asafunika ciphedzo ca anyankhondo anango. Munjira ibodzi ene, ife nee tinakwanisa kukunda tekhene Sathani na ale anam’phedzera, mbwenye tisafunika ciphedzo ca abale na alongo athu. Yahova atipasa “nsoka onsene wa abale” akuti anakwanisa kutiphedza.—1 Ped. 2:17.

13. Mwakubverana na Ahebheri 10:24, 25, kodi misonkhano yathu isatiphedza tani?

¹³ Njira ibodzi toera kugumana ciphedzo ndi kugumanika pa misonkhano yathu. (Lerini Ahebheri 10:24, 25.) Midzidzi inango ife tonsene tisatsukwala, mbwenye tingagumanika pa misonkhano tinakwanisa kuwangiswa. Ife tisawangiswa na matawiro anapereka abale na alongo athu. Nkhani zakubuluswa m’Bhibhlya na makhundu anango anacitwa pa misonkhano asatiphedza toera kupitiriza kutumikira Yahova. Ife tisawangisanambo tingacedza misonkhano mbidzati kutoma na pakumala kwa misonkhano. (1 Ates. 5:14) Kusiyapo pyenepi, misonkhano isatipasa mwai toera kuphedza anango, pontho pyenepi pisatitsandzayisa. (Mabasa 20:35; Aroma 1:11, 12) Misonkhano yathu isatiphedzambo munjira zinango. Iyo isatiphedza toera kukhala na maluso adidi akumwaza mphangwa na akupfundzisa. Mwacitsandzo, ife tisapfundza kuphatisira mwadidi maferamentu anagumanika m’Bokosi Yathu Yakupfundzisa. Natenepa musafunika kukhunganyika mwadidi misonkhano ya mpingo. Pontho bveserani mwadidi mu ndzidzi wa misonkhano. Buluka penepo, phatisirani pinthu pidapfundza imwe. Mungacita pyenepi, imwe munakhala “nyankhondo wadidi wa Kristu Yezu.”—2 Tim. 2:3.

14. Kodi Yahova asaphatisira ani pontho toera kutiphedza?

¹⁴ Ife tisaphedzwambo na pikwi na pikwi pya aanju amphambvu kakamwe. Anju m’bodzi basi anakwanisa kucita pinthu pizinji toera kutiphedza. (Iza. 37:36) Pyenepi pisapangiza kuti nsoka wa aanju azinji kakamwe unakwanisa kucitambo pinthu pizinji kakamwe. Nkhabepo munthu peno dimonyo wakuti anakwanisa kumenyana na anyankhondo amphambvu kakamwe a Yahova. Yahova ndi wamphambvu kakamwe kupiringana pyonsene. Natenepa iye angakhala na ife, ndzidzi  onsene tinakhala amphambvu kupiringana anyamalwa athu mwakukhonda tsalakana khala ndi azinji peno nkhabe. (Aton. 6:16) Ife tinakwanisa kunyindira kuti pyenepi ndi pyandimomwene. Natenepa nyerezerani ciphedzo ceneci ndzidzi onsene unatcingwa imwe na andzanu akubasa, akuxikola peno acibale anu akuti nee asatumikira Yahova. Pontho kumbukani kuti nee muli mwekhene mu nkhondo ineyi. Imwe musabvera pitsogolero pya Yahova, na thangwi ineyi iye asakuphedzani.

15. Mwakubverana na Izaiya 54:15, 17, thangwi yanji nkhabepo munthu anakwanisa kucitisa atumiki a Mulungu kusiya kumwaza mphangwa?

¹⁵ Dziko ino yakuti isatongwa na Sathani iri na mathangwi mazinji toera kutitcinga. Ife nee tisacita khundu mu ndale za dziko, pontho nee tisaenda ku nkhondo. Ife tisadziwisa anthu dzina ya Yahova, tisamwaza mphangwa zakuti basi ene Umambo wa Mulungu ndiwo unafuna kubweresa ntendere, pontho tisabvera midida yakulungama ya Yahova. Kusiyapo pyenepi, ife tisapanga anthu kuti ntongi wa dziko ino ndi wakuipa, wauthambi na nyakupha anthu. (Juwau 8:44) Pontho tisadziwisa anthu kuti mwakukhonda dembuka dziko ino ya Sathani inafudzwa. Mbwenye Sathani na ale anam’phedzera cipo anakwanisa kuticitisa kusiya kumwaza mphangwa. M’mbuto mwace, ife tinapitiriza kusimba Yahova munjira zonsene zinakwanisa ife. Maseze Sathani ndi wamphambvu kakamwe, iye cipo anakwanisa kupingiza mphangwa za Umambo toera zikhonde kumwazwa pa dziko yonsene yapantsi. Pyenepi pisakwanisika basi ene na ciphedzo ca Yahova.—Lerini Izaiya 54:15, 17.

16. Kodi Yahova anadzapulumusa tani atumiki ace mu ndzidzi wa nyatwa ikulu?

¹⁶ Ndi pinthu pipi pinafuna citika ntsogolo? Mu ndzidzi wa nyatwa ikulu, Yahova anatipulumusa munjira ziwiri zakudzumatirisa kakamwe. Njira yakutoma, iye anadzapulumusa atumiki ace akukhulupirika mu ndzidzi unafuna iye kucitisa amambo a pa dziko yapantsi kufudza Bhabhilonya Wankulu, wakuti ndi uphemberi wauthambi wa pa dziko yonsene yapantsi. (Apok. 17:16-18; 18:2, 4) Njira yaciwiri, iye anadzapulumusa atumiki ace mu ndzidzi unafuna iye kufudza dziko ino ya Sathani pa Armajedhoni.—Apok. 7:9, 10; 16:14, 16.

17. Thangwi yanji tisafunika kukhala na uxamwali wakuwanga na Yahova?

¹⁷ Tingapitiriza kukhala na uxamwali wakuwanga na Yahova iye anatitsidzikiza na kutipasa mphambvu. Mwakukhonda penula, Sathani anadzafudzwa kwenda na kwenda. (Aroma 16:20) Natenepa bvalani pida pyonsene pya nkhondo, pontho pitirizani kupiphatisira. Lekani kuyesera kumenyana na Sathani pabodzi na dziko yace mwekhene. Kusiyapo pyenepi, phedzani abale na alongo anu. Pontho bverani pitsogolero pya Yahova. Mungacita pyenepi, munakwanisa kukhala na cinyindiro cakuti Babanu wakudzulu anakupasani mphambvu na kukutsidzikizani.—Iza. 41:10.