Anango analeri khundu ineyi ya Bhibhlya mwakucimbiza asacita mbvundzo unoyu. Mbwenye mavesi anewa asalonga thangwi ya amuna awiri akusiyana akuti akhacemerwa Mefibhoseti, pontho tinakwanisa kupfundza cinthu tingakumbuka pyenepi.

Sauli, mambo wa mu Izraeli akhali na ana amuna anomwe na ana akazi awiri. Mwanace wakutoma akhali Yonatani. Mukupita kwa ndzidzi, mambo Sauli akhala na mwana unango akhacemerwa Mefibhoseti, adabalwa na nkazi wace unango akhacemerwa Rizipa. Pontho Yonatani akhalimbo na mwana akhacemerwa Mefibhoseti. Natenepa Mambo Sauli akhali na mwana akhacemerwa Mefibhoseti, pontho akhali na ndzukulu akhacemerwa Mefibhoseti.

Mambo Sauli atoma kuida Ajibheyoni, pontho ayesera kuapha onsene. Pisaoneka kuti azinji a iwo aphiwa. Pyenepi pikhali pyakuipa. Thangwi yanji? Thangwi mu ndzidzi wa Yoswa, akulu a mu Izraeli acita cibverano na Ajibheyoni.—Yos. 9:3-27.

Cibverano cidacita Aizraeli na Ajibheyoni cikhapitiriza kuphata basa mu ntsiku za Mambo Sauli. Mbwenye thangwi yakukhonda kubvera cibverano ceneci, Sauli ayesera kufudza Ajibheyoni onsene. Pyenepi pyabweresa ‘mulando wa ciropa kuna Sauli na banja yace.’ (2 Sam. 21:1) Mukupita kwa ndzidzi, Dhavidhi adzakhala mambo. Ajibheyoni adakhonda kuphiwa aenda kalonga naye thangwi ya pinthu pyakuipa pidacita Sauli. Dhavidhi aabvundza pinthu pikhafunika iye kuacitira toera alekerere pinthu pyakuipa pidacita Sauli, pontho toera Yahova apase nkhombo dziko ya Izraeli. M’mbuto mwa kuphemba kobiri, Ajibheyoni aphemba kuti ana anomwe a munthu ‘adacita masasanyiro toera kuamalisa,’ aphiwe. (Num. 35:30, 31) Dhavidhi acita pinthu pidaphemba iwo.—2 Sam. 21:2-6.

Sauli na Yonatani afa ku nkhondo. Mbwenye mwana wa Yonatani, Mefibhoseti, akhali m’maso. Iye akhadalamala thangwi ya cidengwa cidancitikira mu ndzidzi ukhali iye mwana, pontho nee aphedzera yavu wace mu ndzidzi udayesera iye kupha Ajibheyoni onsene. Dhavidhi akhadacita dumbiro kuna xamwali wace Yonatani, pontho dumbiro ineyi mbidaphedza ana a Yonatani, kuphatanizambo Mefibhoseti. (1 Sam. 18:1; 20:42) Bhibhlya isalonga: ‘Mambo Dhavidhi abvera ntsisi Mefibhoseti mwana wa Yonatani, ndzukulu wa Sauli, thangwi ya dumbiro idacita Dhavidhi na Yonatani mwana wa Sauli, pamaso pa Yahova.’—2 Sam. 21:7.

Ngakhale tenepo, Dhavidhi acita pinthu pidaphemba Ajibheyoni. Iye apereka ana awiri a Sauli, pontho m’bodzi mwa iwo, akhacemerwa Mefibhoseti. Kusiyapo pyenepi, iye apereka adzukulu axanu a Sauli. (2 Sam. 21:8, 9) Pidacita Dhavidhi pyamalisa mulando wa ciropa mu dziko ya Izraeli.

Pyenepi nee ndi mbiri basi. Mulungu apereka ntemo wakukhonda nentsa kubvesesa: ‘Mwana nee asafunika kuphiwa thangwi ya pinthu pinacita babace.’ (Deut. 24:16) Yahova nee mbadatawirisa kuti ana awiri a Sauli na adzukulu ace axanu aphiwe khala iwo nee acita cinthu cakuipa. Ntemo unoyu walongambo kuti: ‘Munthu asafunika kuphiwa thangwi ya madawo ace.’ Pisaoneka kuti ana anomwe a Sauli adaphiwa, am’phedzera mu ndzidzi udayesera iye kumalisa Ajibheyoni. Natenepa, iwo aphiwa thangwi ya pinthu pyakuipa pidacita iwo.

Pyenepi pisapangiza kuti munthu nee asafunika kucita pinthu pyakuipa mbanyerezera kuti akutowezera pitsogolero. Bhibhlya isalonga: ‘Sasanyira njira yako, pontho njira zako zonsene zinakhala zakutsidzikizika.’—Mis. 4:24-27; Aef. 5:15.