1. Ndi nkhombo zipi zinakhala na ife thangwi yakucita khundu ya gulu ya Yahova?

 NDI mwai ukulu kakamwe kuna ife kucita khundu ya gulu ya Yahova ntsiku zino zakumalisa. Umaso mu dziko ino usapitiriza kukhala wakunentsa kakamwe, mbwenye Yahova atipasa abale na alongo toera kutiphedza. (Mas. 133:1) Iye asatiphedza toera tikhale na banja yakutsandzaya. (Aef. 5:33–6:1) Pontho iye asatipasa udziwisi toera tikhale na ntendere wa m’manyerezero.

2. Tisafunika kucitanji, pontho thangwi yanji?

² Ngakhale tenepo, ife tisafunika kuwangisira toera tipitirize kutumikira Yahova mwakukhulupirika. Thangwi yanji? Thangwi midzidzi inango tisatsukwala thangwi ya pinthu pinalonga anango peno pinacita iwo. Kusiyapo pyenepi, midzidzi inango tisatsukwala thangwi ya madodo athu, makamaka khala tisacita madodo mabodzi ene mwakubwereza-bwereza. Natenepa ife tisafunika kupirira m’basa ya Yahova (1) tingatsukwaliswa na m’bale peno mulongo, (2) tingatsukwaliswa na ndzathu wa m’banja, pontho (3) tingatsukwala thangwi ya madodo athu. Mu nsolo uno tinaona kuti tinapfundzanji na pitsandzo pitatu pya anthu analongwa m’Bhibhlya, akuti apitiriza kukhala akukhulupirika kuna Yahova.

PITIRIZANI KUTUMIKIRA YAHOVA MUNGATSUKWALISWA NA M’BALE PENO MULONGO

3. Ndi pinentso pipi pinathimbana na atumiki a Yahova?

³ Pinentso. Abale na alongo anango ali na makhaliro akuti nee tisakomerwa nawo. Anango panango acita cinthu cidatitsukwalisa peno atitsalakana mwakuipa. Akulu a mpingo panango anacita madodo. Pinthu pyenepi panango pinacitisa anango kupenula khala ali mu gulu ya Yahova peno nkhabe. M’mbuto mwakupitiriza kutumikira Yahova “phewa na phewa” pabodzi na abale na  alongo awo, iwo panango anasiya kucedza na ale adaatsukwalisa ngakhale kusiya kugumanika pa misonkhano. (Sof. 3:9) Kodi ndi pyandzeru kucita pyenepi? Onani pinafuna kupfundza ife na citsandzo ca munthu m’bodzi analongwa m’Bhibhlya adathimbana na pinentso pibodzi pyene.

4. Ndi pinentso pipi pidathimbana na mpostolo Paulu?

⁴ Citsandzo ca m’Bhibhlya. Mpostolo Paulu akhadziwa kuti abale na alongo ace akhali akusowa ungwiro. Mwacitsandzo, anango mu mpingo wa ku Yerusalemu nee akhatawira kuti iye ndi nyakupfundza pidamuona iwo. (Mabasa 9:26) Mukupita kwa ndzidzi, anango alonga pinthu pyakuipa thangwi ya iye toera akhonde kunyindirwa. (2 Akor. 10:10) Paulu aona nkulu wa mpingo mbacita cisankhulo cakuipa cakuti panango cagwegwedusa anango. (Agal. 2:11, 12) Pontho Marko wakuti akhali xamwali wace wa ponda ndipondembo antsukwalisa kakamwe. (Mabasa 15:37, 38) Thangwi ya pyenepi, Paulu panango mbadasiya kucedza na abale na alongo anewa. Mbwenye iye apitiriza kukhala na maonero adidi thangwi ya abale na alongo ace mbapitiriza kutumikira Yahova mwakukhulupirika. Ninji pidaphedza Paulu toera kupirira?

5. Ninji pidaphedza Paulu toera apitirize kukhala na uxamwali wakuwanga na abale na alongo ace? (Akolose 3:13, 14) (Onanimbo foto.)

⁵ Paulu akhafuna abale na alongo ace. Pontho kufuna anango kwam’phedza toera akhonde kuikha manyerezero ace ku pinthu pyakuipa pikhacita iwo, mbwenye aone makhaliro awo adidi. Ufuni waphedzambo Paulu toera kucita pidalemba iye pa Akolose 3:13, 14. (Lerini.) Onani kuti iye alekerera tani Marko. Maseze Marko akhonda kuenda na Paulu pa ulendo wace wakutoma waumisionaryo, Paulu nee apitiriza kuipirwa na iye. Mukupita kwa ndzidzi, pidalembera Paulu tsamba mpingo wa Kolose, iye asimba Marko ninga nyabasa ndzace wakufunika, pontho alonga kuti ‘am’balangaza kakamwe.’ (Akol. 4:10, 11) Mu ndzidzi ukhali iye nkaidi ku Roma, Paulu aphemba Marko toera aende kam’phedza. (2 Tim. 4:11) Mwakukhonda penula, Paulu alekerera abale na alongo ace, pontho apitiriza kukhala na uxamwali wakuwanga na iwo. Mphapo tinapfundzanji na citsandzo ca Paulu?

6-7. Ninji pinafuna kutiphedza toera kupitiriza kufuna abale na alongo athu mwakukhonda tsalakana madodo awo? (1 Juwau 4:7)

⁶ Tisapfundzanji? Yahova asafuna kuti tipitirize kufuna abale na alongo athu. (Lerini 1 Juwau 4:7.) M’bale peno mulongo angatitsalakana mwakuipa, nee tisafunika kunyerezera kuti iye acita pyenepi mwakufuna. Tisafunika kukumbuka kuti iye ali kuwangisira toera kucita pinthu ninga munafuna Yahova. (Mis. 12:18) Yahova asafuna atumiki ace akukhulupirika mwakukhonda tsalakana madodo anacita iwo. Iye asapitiriza kukhala xamwali wathu,  pontho nee asakoya pinthu pyakuipa muntima. (Mas. 103:9) Ife tisapereka takhuta kakamwe thangwi Yahova asatilekerera, pontho tisafunikambo kutowezera citsandzo cace mbatilekerera anango.—Aef. 4:32–5:1.

⁷ Ife tiri dhuzi kakamwe na kumala kwa dziko ino, na thangwi ineyi tisafunika kukhala na uxamwali wakuwanga na abale na alongo athu. Ife tisadziwa kuti kutcingwa kunathimizirika, pontho panango tinaikhwa nkaidi thangwi ya cikhulupiro cathu. Pyenepi pingacitika tinafuna kakamwe ciphedzo ca abale na alongo athu. (Mis. 17:17) Onani pidacitikira m’bale José, a nkulu wa mpingo wa ku Espanya. Iye pabodzi na abale anango afungirwa nkaidi thangwi yakukhonda cita khundu ya dziko. José alonga: “Nakuti nkaidi tikhali tonsene mu mbuto ibodzi ene, pikhali pyakukhonda nentsa kutsukwalisana. Ife tikhafunika kupirirana na kulekererana. Pyenepi pyatiphedza toera kukhala akuphatana na kutsidzikizana. Ife tikhali pabodzi na anyakaidi anango akuti nee akhatumikira Yahova. Ulendo unango, ine ndaphekeka mbandipyangirirwa ligadura, na thangwi ineyi nee ndikhakwanisa kucita pinthu pinango ndekhene. Mbwenye m’bale m’bodzi andiphedza kufula nguwo zanga na kucita pinthu pinango. Ine ndaona ufuni wandimomwene mu ndzidzi unoyu wakunentsa.” Mwakukhonda penula, tiri na mathangwi mazinji toera kukhazikisa ntendere mwakucimbiza tingatsukwalisana na m’bale peno mulongo wathu!

PIRIRANI MUNGATSUKWALISWA NA NDZANU WA M’BANJA

8. Ndi pinentso pipi pinathimbana na mabanja?

⁸ Pinentso. Mabanja onsene asathimbana na pinentso. Bhibhlya isalonga kuti ale anamanga banja “anadzaona nyatwa mu umaso wawo.” (1 Akor. 7:28) Thangwi anthu anamanga banja ndi akusowa ungwiro, ali na makhaliro akusiyana, pifuno pyakusiyana na maonero akusiyana. Kusiyapo pyenepi, panango mamuna peno nkazi anamanga banja na munthu adakuzwa munjira yakusiyana na ndzace. Na thangwi ineyi, mukupita kwa ndzidzi, mamuna peno nkazi anadzindikira pinthu pyakuti nee akhapiona mbadzati kumanga banja. Pinango mwa pinthu pyenepi panango pinatomesa nyatwa. M’mbuto mwakumalisa nyatwa zenezi pabodzi, mabanja anango asapasana mulando unango na ndzace maseze kazinji kene onsene ali na mulando. Na thangwi ineyi, anango asanyerezera kuti njira yakumalisa nyatwa zawo ndi kumwalana peno kukhondana. Kodi ineyi ndi njira yadidi yakumalisa nyatwa za m’banja? b Nkhabe. Tendeni tione citsandzo ca munthu m’bodzi analongwa m’Bhibhlya wakuti apitiriza kupirira maseze akhathimbana na pinentso m’banja.

9. Ndi cinentso cipi cidathimbana na Abhigaili?

⁹ Citsandzo ca m’Bhibhlya. Abhigaili akhadasembwa na Nabhali, pontho Bhibhlya isalonga kuti Nabhali akhali wakunentsa kakamwe. (1 Sam. 25:3) Pikhali pyakunentsa kakamwe kuna Abhigaili kukhala na mamuna unoyu. Na thangwi ineyi, Abhigaili panango mbadasaka njira toera kumalisa banja ineyi. Iye mbadacita pyenepi mu ndzidzi ukhafuna Dhavidhi kupha Nabhali thangwi yakutikana Dhavidhi na amuna akhali na iye. (1 Sam. 25:9-13) Abhigaili mbadakwanisa kuthawa mbasiya Dhavidhi toera aphe Nabhali, mbwenye iye nee acita pyenepi. M’mbuto mwace, iye acedza na Dhavidhi toera akhonde kupha Nabhali. (1 Sam. 25:23-27) Thangwi yanji Abhigaili acita pyenepi?

10. Ninji pidaphedza Abhigaili toera kupirira maseze akhadasembwa na mamuna wakunentsa kakamwe?

¹⁰ Thangwi yakufuna Yahova, Abhigaili akhalemedza  banja ninga pinacita Yahova. Panango Abhigaili akhadziwa pidalonga Yahova kuna Adhamu na Eva mu ndzidzi udatomesa iye banja yawo. (Gen. 2:24) Abhigaili akhadziwa kuti kuna Yahova banja ndi yakucena. Iye akhafuna kukomeresa Yahova, pontho panango ndi pyenepi pidancitisa kuwangisira toera kupulumusa mamunace na anthu anango a panyumba pace. Na thangwi ineyi, iye acita pinthu mwakucimbiza toera Dhavidhi akhonde kupha Nabhali. Kusiyapo pyenepi, iye aphemba kulekererwa maseze nee acita cinthu cakuipa. Mwakukhonda penula, Yahova akhafuna nkazi unoyu wacipapo kakamwe. Mphapo amuna na akazi akumanga banja anapfundzanji na citsandzo ca Abhigaili?

11. (a) Yahova asafuna kuti anyakumanga banja acitenji? (Aefesi 5:33) (b) Mwapfundzanji na kuwangisira kudacita mulongo Carmen toera apitirize m’banja mwace? (Onanimbo foto.)

¹¹ Tisapfundzanji? Yahova asafuna kuti anyakumanga banja apitirize kukhala pabodzi maseze m’bodzi wa iwo acitise kuti banja ineyi ikhale yakunentsa. Pontho Yahova asatsandzaya angaona kuti m’bodzi wa iwo asawangisira toera kumalisa nyatwa za m’banja mbapangiza ufuni na cilemedzo. (Lerini Aefesi 5:33.) Onani citsandzo ca mulongo Carmen. Pidapita pyaka pitatu pakumala kumanga banja, iye atoma kupfundza Bhibhlya na Mboni za Yahova mbabatizwa, mbwenye iye akhafunika kupirira kakamwe. Iye awangisira kukhala pa banja pace na kupangiza ufuni na cilemedzo mu pyaka 50. Iye alonga: “Mamunanga nee akomerwa thangwi ya cisankhulo cidacita ine toera kukhala Mboni wa Yahova. Iye nee akhakomerwa na Yahova, akhanditsukwalisa na mafalace, pontho akhandipanga kuti mbadandithawa. Mukupita kwa pyaka, ine ndatoma kubvesesa mabvero akhali na mamunanga. Pontho ndawangisira kulonga naye mwaufuni. Kudziwa kuti banja ndi yakucena pamaso pa Yahova kwandiphedza toera ndipirire pinentso m’banja mwanga. Ine nee ndasiya mamunanga thangwi ndisafuna Yahova.” c Mungathimbana na nyatwa m’banja mwanu, khalani na cinyindiro cakuti Yahova anakuphedzani toera kupirira.

PIRIRANI MUNGATSUKWALA THANGWI YA MADODO ANU

12. Ndi pinentso pipi pyakuti panango tinathimbana napyo tingacita madawo makulu?

¹² Pinentso. Mungacita madawo makulu, panango munakhala na cifuno cakusiya kutumikira Yahova. Bhibhlya isalonga kuti madawo athu anakwanisa kuticitisa kukhala ‘akutsukwala kakamwe.’ (Mas. 51:17) M’bale unango anacemerwa Roberto awangisira mu pyaka pizinji toera kukhala ntumiki wakutumikira. Mbwenye buluka penepo iye acita madawo makulu, pontho aona kuti atsukwalisa Yahova. Iye alonga: “Cikumbuntima canga cikhandilemera kakamwe. Ine  ndikhalira, pontho ndikhacita phembero kuna Yahova, mbwenye ndikhanyerezera kuti Yahova nee mbadabveserabve maphembero anga. Thangwi ine ndikhadantsukwalisa kakamwe.” Tingacita madawo makulu, panango ife tinatsukwala kakamwe mbatinyerezera kuti Yahova atisiya, pontho nee tisafunikabve kuntumikira. (Mas. 38:4) Mungakhala na mabvero anewa, nyerezerani citsandzo ca munthu m’bodzi analongwa m’Bhibhlya wakuti apitiriza kutumikira Yahova mwakukhonda tsalakana madawo makulu.

13. Ndi madodo api adacita Pedhru, pontho ndi api makulu kakamwe?

¹³ Citsandzo ca m’Bhibhlya. Namasiku Yezu mbadzati kufa, Pedhru acita madodo mazinji akuti ancitisa kucita madawo makulu. Pakutoma, Pedhru anyindirika kakamwe mbalonga kuti mbadapitiriza kukhala wakukhulupirika maseze apostolo anango asiye Yezu. (Marko 14:27-29) Buluka penepo, pikhali iwo m’munda wa Getsemani, kazinji kene Pedhru nee akwanisa kukhala m’maso. (Marko 14:32, 37-41) Pontho pidafika mwinji toera kumanga Yezu, Pedhru an’thawa. (Marko 14:50) Kusiyapo pyenepi, Pedhru akhonda Yezu katatu mpaka kudumbira kuti iye nee akhadziwa Yezu. (Marko 14:66-71) Pedhru apibva tani pidadzindikira iye kuti acita madodo makulu? Iye atsukwala kakamwe mbalira. Panango iye acita pyenepi thangwi yakupasika mulando. (Marko 14:72) Pontho iye atsukwala kakamwe pidabva iye mukupita kwa ndzidzi kuti Yezu aphiwa. Panango Pedhru anyerezera kuti ndi wakusowa basa.

14. Ninji pidaphedza Pedhru toera kupirira mbapitiriza kutumikira Yahova? (Onani foto iri pa tsamba yakutoma.)

¹⁴ Pana pinthu pizinji pidaphedza Pedhru toera kupirira mbapitiriza kutumikira Yahova. Cakutoma, Pedhru asaka abale anango mbatawira ciphedzo cawo na cibalangazo. (Luka 24:33) Kusiyapo pyenepi, pidalamuswa Yezu muli akufa, iye aonekera kuna Pedhru, pontho panango amuwangisa. (Luka 24:34; 1 Akor. 15:5) Pontho, m’mbuto mwakupokera Pedhru thangwi ya madodo adacita iye, Yezu am’balangaza mbampanga kuti anampasa mabasa mazinji. (Juw. 21:15-17) Pedhru akhadziwa kuti iye akhadacita madodo makulu, mbwenye nee asiya kucita pinthu pyadidi. Thangwi yanji? Thangwi iye akhali na cinyindiro cakuti Yezu akhapitiriza kunfuna. Pontho anyakupfundza anango apitiriza kuphedza Pedhru. Tinapfundzanji na citsandzo ca Pedhru?

15. Yahova asafuna kuti tikhale na cinyindiro cipi? (Masalmo 86:5; Aroma 8:38, 39) (Onanimbo foto.)

¹⁵ Tisapfundzanji? Yahova asafuna kuti tikhale na cinyindiro cakuti iye asatifuna, pontho asatilekerera. (Lerini Masalmo 86:5; Aroma 8:38, 39.) Ndimomwene kuti tingacita madawo tisapasika mulando, pontho pyenepi pisatiphedza.  Mbwenye nee tisafunika kupasika mulando mpaka kunyerezera kuti nee tathema kufuniwa na kulekererwa na Yahova. M’mbuto mwace, tisafunika kusaka ciphedzo mwakucimbiza. M’bale Roberto adalongwa pa ndima 12, alonga tenepa thangwi yakufunika kwa kusaka ciphedzo: “Ine ndacita madawo thangwi ndikhanyerezera kuti ndikhali wamphambvu toera kupirira mayesero. Mbwenye pidasaka ine ciphedzo ca akulu a mpingo, ndaona kuti mwandimomwene Yahova asandifuna, pontho akhaphatisira abale anewa toera kupangiza pyenepi. Akulu a mpingo nee andisiya, pontho andiphedza toera kuona kuti Yahova nee andisiyambo.” Tingatcunyuka madawo athu, mbatisaka ciphedzo na kuwangisira toera tikhonde kucita pontho madawo mabodzi ene, Yahova anatiphedza toera kuona kuti asatifuna kakamwe, pontho asatilekerera. (1 Juw. 1:8, 9) Tingakhala na cinyindiro ceneci, nee tinasiya kuntumikira maseze ticite madawo.

16. Thangwi yanji muli wakutonga toera kupitiriza kupirira na kutumikira Yahova?

¹⁶ Yahova asakomerwa kakamwe na pinacita ife toera kuntumikira mu ntsiku zino zakumalisa zakuti ndi zakunentsa kakamwe. Pontho na ciphedzo cace, ife tinakwanisa kupirira mwakukhonda tsalakana pinentso. Tinakwanisa kupitiriza kufuna abale na alongo athu na kualekerera maseze atitsukwalise. Pontho tinapangiza ufuni kuna Mulungu na kulemedza banja tingawangisira toera kumalisa nyatwa zakuti panango zinaoneka m’banja. Kusiyapo pyenepi, tingacita madawo makulu tinakwanisa kusaka ciphedzo ca Yahova, kutawira ufuni wace na kulekererwa na iye mbatipitiriza kuntumikira. Pontho tinakwanisa kukhala na cinyindiro cakuti tinapaswa nkhombo zizinji ‘tingakhonda kubwerera nduli pakucita pinthu pyadidi.’—Agal. 6:9.