Ife tinakwanisa kulekererwa madawo athu basi ene kubulukira mu ntsembe yaciomboli idalipa Yezu na ciropa cace. (Aef. 1:7) Mbwenye Bhibhlya isalonga: ‘Mulungu na kupirira kwace, akhalekerera madawo adacita anthu mu ndzidzi wakale,’ peno Yezu mbadzati kuombola anthu. (Aroma 3:25) Yahova acita tani pyenepi mu ndzidzi ubodzi ene mbakhala Mulungu waulungami?

Yahova apikira “dzindza” yakuti mbidapulumusa ale anakhulupira Mulungu na mapikiro ace. Pidacita iye pikiro ineyi pikhali ninga ciomboli camala kale kulipwa. (Gen. 3:15; 22:18) Mulungu akhali na cinyindiro consene cakuti pa ndzidzi wakuthema, Mwanace mbadapereka umaso wace ninga ciomboli. (Agal. 4:4; Aheb. 10:7-10) Pikhali Yezu pa dziko yapantsi, Yahova ampasa mphambvu toera kulekerera madawo mbadzati kupereka umaso wace ninga ntsembe. Yezu akhalekerera madawo a anthu akhali na cikhulupiro thangwi akhadziwa kuti ntsembe yace mbidaphimbira madawo awo.—Mat. 9:2-6.